Panagdesision—Di Maliklikan a Karit
“AWANEN ti narigrigat ngem ti agdesision, ket ngarud awanen ti napatpateg no maaramidmo dayta,” kinuna naminsan ni Napoleon Bonaparte, ti emperador ti Francia idi maika-19 a siglo. Mabalin nga umanamongka iti daytoy, yantangay kaaduan a tattao dida kayat ti mabiangan. Nupay kasta, nasursuroda met a narigat ti agdesision no dadduma.
Nalaka man wenno narigat, di maliklikan ti panagdesision. Inaldaw nga agdesisiontayo. No bumangontayo iti agsapa, masapul nga ikeddengtayo no ania ti ikawestayo, no ania ti pammigattayo, ken no kasano nga asikasuentayo ti dadduma pay a bambanag iti agmalem agingga iti rabii. Saan unay a napateg ti kaaduan kadagitoy a desision. Saantay unay a pampanunoten dagita. Manmano a ditay makaturog a mangpampanunot no nainsiriban wenno saan ti desisiontayo.
Iti sabali a bangir, dakkel ti epekto ti dadduma a desision. Iti kaaldawantayo, adu nga agtutubo iti lubong ti masapul nga agdesision no ania a kurso ti alaenda. Mabalin a desisionanda no ania a klase ti adal ti kasapulanda ken no kasano kaadu. Inton agangay, kaaduan kadakuada ti agdesision no mangasawada wenno saan. Dagidiay agpalplano a mangasawa masapul a panunotenda: ‘Addaak kadin iti umiso nga edad ken nataenganak kadin tapno mangasawa? Ania a kita ti asawa ti tarigagayak, wenno napatpateg pay, ania a kita ti asawa ti kasapulak?’ Manmano dagiti desision iti biag a dakdakkel ti epektona ngem iti panangpili iti agbalin nga asawa.
Kadagiti bambanag a napateg, masapul dagiti nainsiriban a desision, yantangay ti kinaragsak agdepende a nangnangruna iti panangaramidtayo iti kasta. Mabalin a marikna ti dadduma a tattao a kabaelanda ti mangaramid kadagiti kasta a desision ken mabalin a dida awaten ti maidiaya a tulong. Nainsiriban kadi dayta? Kitaentayo.
[Picture Credit Line iti panid 3]
Ni Napoleon: Manipud iti libro a The Pictorial History of the World