Salsaludsod Dagiti Agbasbasa

Apay a kiniddaw ni Eliseo ti “dua a kapaset” ti espiritu ni Elias?

Sakbay unay a naturpos ni Elias ti annongenna kas propeta iti Israel, kiniddaw kenkuana ti ub-ubing a propeta a ni Eliseo: “Pangngaasim, a ti dua a kapaset iti espiritum umay koma kaniak.” (2 Ar-ari 2:9) Iti naespirituan nga anag, nalawag a kidkiddawen ni Eliseo ti doble a paset a kas iti maited iti inauna nga anak. (Deuteronomio 21:17) Ti ababa a panangusig iti salaysay ti manglawlawag iti dayta ken tulongannatayo a makasursuro iti napasamak.

Maitunos iti bilin ni Jehova, ni propeta Elias pinulotanna ni Eliseo kas sumuno kenkuana. (1 Ar-ari 19:19-21) Iti agarup innem a tawen, nagserbi ni Eliseo kas matalek a katulongan ni Elias ket determinado idi a mangitultuloy a mangaramid iti dayta. Uray iti maudi nga aldaw ni Elias kas propeta iti Israel, sisisinged a nakipagtrabaho ni Eliseo iti mannursurona. Uray idi indagadag ni Elias ken ni Eliseo nga isardengna ti sumurot kenkuana, namitlo a kinuna ti ub-ubing a propeta: “Saankanto a panawan.” (2 Ar-ari 2:2, 4, 6; 3:11) Ni Eliseo talaga a minatmatanna ti laklakay a propeta kas ti naespirituan nga amana.​—2 Ar-ari 2:12.

Nupay kasta, saan laeng a ni Eliseo ti naespirituan nga anak ni Elias. Da Elias ken ni Eliseo naitimpuyogda iti grupo dagiti lallaki a nabigbig kas “annak dagiti mammadto.” (2 Ar-ari 2:3) Ti salaysay iti Maikadua nga Ar-ari ipasimudaagna a nasinged met dagitoy nga “annak” iti naespirituan nga amada, a ni Elias. (2 Ari-ari 2:3, 5, 7, 15-17) Kaskasdi, kas ti napulotan a sumukat, ni Eliseo ti kangrunaan kadagiti naespirituan nga annak ni Elias​—arigna nga isu ti inauna nga anak. Iti nagkauna nga Israel, ti literal nga inauna nga anak makaawat iti dua a paset iti patawid ti ama, idinto ta saggaysa ti awaten dagiti dadduma nga annak. Gapuna, kiniddaw ni Eliseo ti dua a paset ti naespirituan a patawid ni Elias.

Apay a nagkiddaw ni Eliseo iti dayta a partikular a kanito? Agsipud ta dandaninan ibaklay ti nadagsen nga annongen​—ti panangsukatna ken ni Elias kas propeta iti Israel. Nabigbig ni Eliseo a tapno maitungpalna dagiti responsabilidad mainaig iti daytoy nadagsen nga annongen, kasapulanna ti naespirituan a bileg a dakdakkel nga amang ngem kadagiti bukodna a kabaelan, ti bileg a ni laeng Jehova ti makaipaay. Kasapulanna ti agbalin a natured a kas iti impakita ni Elias. (2 Ar-ari 1:3, 4, 15, 16) Gapuna, kiniddawna ti dua a paset ti espiritu ni Elias, ti espiritu ti kinatured ken ti ‘naan-anay a panagimon maipaay ken Jehova’​—dagiti matarigagayan a galad a patauden ti espiritu ti Dios. (1 Ar-ari 19:10, 14) Ania ti sungbat ni Elias?

Ammo ni Elias a dina maited ti kidkiddawen ni Eliseo. Ti Dios laeng ti makaipaay iti dayta. Gapuna, sieemma nga insungbat ni Elias: “Nakarigrigat a banag ti kiniddawmo. No makitanak inton maalaak kenka, mapasamakto kenka ti kasta.” (2 Ar-ari 2:10) Kinapudnona, impalubos ni Jehova a makita ni Eliseo ti panagpangato ni Elias babaen ti allawig. (2 Ar-ari 2:11, 12) Napatgan ti kiddaw ni Eliseo. Impaay ni Jehova ken ni Eliseo ti espiritu a kasapulanna a mangitungpal iti baro nga annongenna ken sumango kadagiti sumangbay a suot.

Iti agdama, daytoy a salaysay ti Biblia ket dakkel a pakaparegtaan dagiti napulotan a Kristiano (a maawagan no dadduma kas klase Eliseo) ken dagiti amin nga adipen ti Dios. No dadduma, mabalin a mariknatayo a nadagsen ken ditay kabaelan ti baro nga annongen, wenno maup-upaytayo a mangikasaba iti Pagarian gapu kadagiti kumarkaro a panangidumduma wenno ibubusor iti teritoriatayo. Kaskasdi, no kiddawentayo ti tulong ni Jehova, ipaayannatayo iti nasantuan nga espiritu a kasapulantayo a mangdaer kadagiti karit ken agbaliwbaliw a kasasaad. (Lucas 11:13; 2 Corinto 4:7; Filipos 4:13) Wen, no kasano a ni Jehova pinabilegna ni Eliseo a mangitungpal kadagiti nadagsen a responsabilidadna, sigurado a tulongannatayo amin, agtutubo ken nataengan, a mangitungpal iti ministeriotayo.​—2 Timoteo 4:5.