Nakappapati ti Paraiso a Daga

ITI intero a historia, patien ti minilion a tao a panawandanto ti daga ket mapanda idiay langit. Patien ti dadduma a di pulos pinanggep ti Namarsua kadatayo a ditoy daga ti permanente a pagnaedantayo. Nakarkaro pay ti kapanunotan dagiti asetiko. Adu kadakuada ti mangibaga a dakes ti daga ken dagiti amin a pisikal a banag​—maysa a lapped iti pudno a naespirituan a pannakapnek ken kinasinged iti Dios.

Dagiti addaan kadagiti kasta a kapanunotan saanda nga ammo ti kinuna ti Dios maipapan iti paraiso a daga wenno talaga a saanda a kayat a bigbigen dayta. Iti kinapudnona, adu ita ti saan nga interesado a mangsukimat iti inrekord dagiti tattao a pinaltiingan ti Dios maipapan iti dayta a topiko a masarakan iti Saona, ti Biblia. (2 Timoteo 3:16, 17) Ngem saan kadi a nainsiriban ti agtalek iti Sao ti Dios imbes a mamati kadagiti teoria ti tao? (Roma 3:4) Iti kinapudnona, napateg nga aramidentayo dayta yantangay pakdaarannatayo ti Biblia a maysa a mannakabalin ngem di makita a dakes a parsua ti nangbulsek kadagiti tattao iti naespirituan ken madama a “mangyaw-awan iti intero a mapagnaedan a daga.”​—Apocalipsis 12:9; 2 Corinto 4:4.

Apay nga Adda Pannakariro?

Gapu kadagiti nagduduma a kapanunotan maipapan iti kararua, dagiti tattao mariroda maipapan iti panggep ti Dios iti daga. Adu ti mamati nga addaantayo iti imortal a kararua​—maysa a banag a naisina iti bagi ti tao ken saan a matay. Patien ti dadduma nga addan ti kararua sakbay pay a naparsua ti bagi ti tao. Sigun iti maysa a reperensia, ti Griego a pilosopo a ni Plato kinunana a ti kararua ket “naibalud iti bagi kas pannusa gapu kadagiti basol a naaramidna idiay langit.” Umasping iti dayta, ni Origen a teologo idi maikatlo a siglo kinunana a “dagiti kararua nagbasolda [idiay langit] sakbay a naikaykaysada iti bagi” ket “naibaludda [iti dayta a bagi ditoy daga] kas pannusa gapu kadagiti basolda.” Minilion met ti mamati a ti daga ket maysa la a lugar a pakasubokan ti tao sakbay a mapan idiay langit.

Addada met dagiti agduduma a kapanunotan maipapan iti mapasamak iti kararua no matay ti maysa a tao. Sigun iti libro a History of Western Philosophy, naaddaan dagiti Egipcio iti kapanunotan a “dagiti kararua dagiti pimmusay immulogda iti lubong dagiti natay.” Idi agangay, inkalintegan dagiti pilosopo a ti kararua dagiti pimmusay saanda nga immulog iti lubong dagiti natay no di ket immulida iti natantan-ok a disso dagiti espiritu. Sigun kadagiti kasadaranna, ti Griego a pilosopo a ni Socrates namati a no matay ti tao, ti kararua “mapan iti [maysa a] di makita a disso . . . ket makipagnaed nga agnanayon kadagiti didiosen.”

Ania ti Ibaga ti Biblia?

Iti naipaltiing a Sao ti Dios, ti Biblia, awan pulos ti ibagana nga adda imortal a kararua ti tao. Basaenyo ti salaysay iti Genesis 2:7. Kunana: “Ni Jehova a Dios binukelna ti tao manipud tapok a naggapu iti daga ket impuyotna kadagiti abut ti agongna ti anges ti biag, ket ti tao nagbalin a kararua a sibibiag.” Nalawag ken saan a makariro dayta. Idi a ti Dios pinarsuana ti umuna a tao a ni Adan, saanna nga inikkan iti aniaman a di pisikal a banag. Saan, ta kuna ti Biblia a “ti tao nagbalin a kararua a sibibiag.” Ti tao saan a naikkan iti kararua. Isu a mismo ti kararua.

Idi pinarsuana ti daga ken sangatauan, di pulos pinanggep ni Jehova a matay ti tao. Panggep ti Dios a ti tao agbiag nga agnanayon ditoy daga iti Paraiso a kasasaad. Natay ni Adan gapu ta linabsingna ti linteg ti Dios. (Genesis 2:8, 15-17; 3:1-6; Isaias 45:18) Idi natay ti umuna a tao, napan kadi iti lubong dagiti espiritu? Saan! Ti tao​—ti kararua a ni Adan​—nagsubli iti awan biagna a tapok a nakaparsuaanna.​—Genesis 3:17-19.

Amintayo ket nagtawid iti basol ken ipapatay manipud iti amatayo a ni Adan. (Roma 5:12) Daytoy nga ipapatay ket panagpatingga ti biag, kas iti napasamak ken ni Adan. (Salmo 146:3, 4) Iti kinapudnona, kadagiti amin nga 66 a libro ti Biblia, ti sao nga “imortal” wenno “agnanayon” ket saan pulos a nainaig iti sao a “kararua.” Iti kasunganina, nalawag nga ibaga ti Kasuratan a ti kararua​—ti tao​—ket mortal. Matay ti kararua.​—Eclesiastes 9:5, 10; Ezequiel 18:4.

Dakes Kadi Dagiti Pisikal a Banag?

Komusta met ti kapanunotan a dakes dagiti pisikal a banag, agraman ti daga? Kasta ti pammati dagiti mangan-annurot iti Manichaeismo, maysa a narelihiosuan a mobimiento a naipasdek idiay Persia bayat ti maikatlo a siglo K.P. babaen ti maysa a tao nga agnagan iti Mani. Kuna ti The New Encyclopædia Britannica: “Timmaud ti Manichaeismo gapu iti panagtuok a naisigud iti kasasaad ti tao.” Mamati ni Mani a ti panagbalin a tao ket “saan a normal, nadagem, ken nakadakdakes.” Kinunana pay a ti kakaisuna a pamay-an tapno makalapsut iti daytoy a “panagtuok” isu ti panangpanaw ti kararua iti bagi, panawanna ti daga, ket mapan iti lubong dagiti espiritu.

Maisupadi iti dayta, ti Biblia ibagana kadatayo nga iti panangmatmat ti Dios, “nasayaat unay” ti “isuamin nga inaramidna” idi pinarsuana ti daga ken ti sangatauan. (Genesis 1:31) Iti dayta a tiempo, awan ti bangen iti nagbaetan dagiti tao ken ti Dios. Tinagiragsak da Adan ken Eva ti kinasinged ken ni Jehova, no kasano a ti perpekto a tao a ni Jesu-Kristo tinagiragsakna ti nasinged a relasion iti nailangitan nga Amana.​—Mateo 3:17.

No saan koma a nagbasol dagiti immuna a nagannak kadatayo, da Adan ken Eva, agnanayon koma a tagiragsakenda ti nasinged a relasion ken ni Jehova a Dios, iti maysa a paraiso a daga. Paraiso idi ti pagtaenganda, ta kuna kadatayo ti Kasuratan: “Nangimula ni Jehova a Dios iti maysa a minuyongan idiay Eden, a sumango iti daya, ket inkabilna sadiay ti tao a binukelna.” (Genesis 2:8) Naparsua ni Eva iti dayta a paraiso a minuyongan. No saan koma a nagbasol da Adan ken Eva, kaduada koma dagiti perpekto nga annakda a siraragsak a nagtrabaho agingga nga agbalin a paraiso ti intero a daga. (Genesis 2:21; 3:23, 24) Ti Paraiso a daga ti agnanayon koma a taeng ti sangatauan.

Apay nga Adda Dagiti Mapan Idiay Langit?

‘Ngem,’ nalabit kunaenyo, ‘saan aya nga ibaga ti Biblia nga adda tattao a mapan idiay langit?’ Wen, adda. Idi nagbasol ni Adan, pinanggep ni Jehova a mangipasdek iti nailangitan a Pagarian ket ‘agturay kas ar-ari iti daga’ ti dadduma kadagiti annak ni Adan a kaduada ni Jesu-Kristo. (Apocalipsis 5:10; Roma 8:17) Mapagungardanto iti imortal a biag idiay langit. Agdagupda iti 144,000, ket dagiti matalek nga adalan ni Jesus idi umuna a siglo ti immuna kadakuada.​—Lucas 12:32; 1 Corinto 15:42-44; Apocalipsis 14:1-5.

Nupay kasta, saan nga orihinal a panggep ti Dios a mapan idiay langit dagiti nalinteg a tattao. Kinapudnona, idi adda ditoy daga ni Jesus, kinunana: “Awan ti tao nga immuli sadi langit no di daydiay bimmaba manipud langit, ti Anak ti tao.” (Juan 3:13) Babaen ti “Anak ti tao,” ni Jesu-Kristo, nangipaay ti Dios iti subbot tapno posible nga agbiag nga agnanayon dagidiay mangalagad iti pammati iti daton ni Jesus. (Roma 5:8) Ngem sadino ti agnanayon a pagbiagan dagita a minilion a tattao?

Matungpal ti Orihinal a Panggep ti Dios

Nupay panggep ti Dios nga alaen ti dadduma manipud iti sangatauan tapno makipagturayda ken ni Jesu-Kristo iti nailangitan a Pagarian, saanna a kaipapanan dayta nga amin a naimbag a tao mapanda idiay langit. Ni Jehova pinarsuana ti daga tapno agbalin a Paraiso a pagtaengan ti sangatauan. Iti din agbayag, itungpal ti Dios dayta nga orihinal a panggepna.​—Mateo 6:9, 10.

Iti sidong ti turay ni Jesu-Kristo ken dagiti kakaduana nga agturay idiay langit, agari ti talna ken kinaragsak iti intero a daga. (Salmo 37:9-11) Mapagungarto dagidiay adda iti lagip ti Dios ken tagiragsakenda ti perpekto a salun-at. (Aramid 24:15) Gapu ta matalekda iti Dios, matagiragsak ti natulnog a sangatauan ti napukaw ti immuna a nagannak kadatayo​—ti agnanayon a biag kas perpekto a tao iti paraiso a daga.​—Apocalipsis 21:3, 4.

Saan pulos a mapaay ni Jehova a Dios a mangitungpal kadagiti pinanggepna nga aramiden. Babaen ti propetana a ni Isaias, impakaammona: “No kasano a ti agbuyat a tudo bumaba, ken ti niebe, manipud iti langlangit ket saan nga agsubli iti dayta a lugar, malaksid no pudno nga umagsep iti daga ket mamagtaud manipud iti dayta ken mamagtubo, ket ti bin-i pudno a maited iti managmula ken tinapay iti mangan, kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 55:10, 11.

Iti libro ti Biblia nga Isaias, masaripatpatantayo no anianto ti biag iti Paraiso a daga. Awanto ti agnaed iti Paraiso nga agkuna, “Masakitak.” (Isaias 33:24) Dagiti animal saandanto a peggad kadagiti tattao. (Isaias 11:6-9) Dagiti tattao mangbangondanto kadagiti napintas a pagtaenganda ken agmulada ket agpennekda a mangan. (Isaias 65:21-25) Kanayonanna, ti Dios “alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”​—Isaias 25:8.

Iti din agbayag, ti natulnog a sangatauan agbiagto iti sidong ti kasta a nabendisionan a kasasaad. ‘Mawayawayaandanto iti pannakaadipen iti panagrupsa ken maaddaanda iti nadayag a wayawaya ti annak ti Dios.’ (Roma 8:21) Anian a nakaay-ayat ti agbiag nga agnanayon iti naikari a Paraiso a daga! (Lucas 23:43) Mabalinyo ti agbiag sadiay no agtignaykayo itan maitunos iti umiso a pannakaammo iti Kasuratan, nga alagadenyo ti pammati ken ni Jehova a Dios ken Jesu-Kristo. Ket makapagtalekkayo a rasonable ti mamati iti paraiso a daga.

[Ladawan iti panid 5]

Da Adan ken Eva nadisenioda nga agbiag nga agnanayon

[Dagiti Ladawan iti panid 7]

Iti Paraiso a daga . . .

mangbangondanto kadagiti balay

agmulada iti kaubasan

bendisionanto ida ni Jehova

[Picture Credit Line iti panid 4]

U.S. Fish & Wildlife Service, Washington, D.C./NASA