‘Nakasagana Maipaay iti Tunggal Naimbag nga Aramid’
“ITULTULOYMO a palagipan ida nga agpasakup ken agtulnogda kadagiti gobierno ken autoridad kas agtuturay, a sisasaganada iti tunggal naimbag nga aramid.” (Tito 3:1) Ania a naimbag nga aramid ti tuktukoyen ni apostol Pablo idi insuratna dagita a sasao kadagiti kapammatianna? Ti eskolar ti Biblia a ni E. F. Scott dinakamatna ti maysa a kita ti naimbag nga aramid, a kunkunana: “Dagiti Kristiano saanda laeng a pagtulnogan dagiti autoridad no di ket masapul a sisasaganada maipaay iti aniaman a naimbag nga aramid. . . . No kiddawen ti kasasaad, dagiti Kristiano koma ti kangrunaan a mangipakita iti pannakaseknan iti komunidad. No adda ti uram, didigra, nagduduma a kalamidad, dagiti amin a naimbag nga umili tarigagayanda a tulongan dagiti kaarrubada.”
Makipaset dagiti Kristiano kadagiti aktibidad a pagimbagan ti komunidad no la ket ta saan a maikaniwas dagitoy kadagiti linteg ti Dios. (Aramid 5:29) Kas pagarigan, kas panangsurot iti bilin ti departamento dagiti bombero idiay Japan, tinawen a mangipatungpal iti fire drill ti sanga nga opisina dagiti Saksi ni Jehova, a masarakan idiay Ebina. Kadagiti kasta nga okasion, agtataripnong dagiti amin a kameng ti pamilia ti Bethel tapno denggenda dagiti instruksion ti maysa a pannakabagi ti departamento dagiti bombero.
Kanayonanna, iti nasuroken a maysa a dekada, ti sanga nga opisina ket nakikooperar kadagiti lokal nga autoridad para iti maysa a naisponsoran nga eksibision tapno maitandudo ti pananglapped iti uram. Iti eksibision, dagiti kompania ken institusion iti siudad ipakitada ti kinaalertoda a manglapped ken mangkontrol iti uram. Ti sanga nga opisina ket masansan a makaawat iti pammadayaw gapu iti kinasigo ken kooperasion dagiti kamengna. Idi 2001, nagun-odda ti kangatuan a premio iti eksibision. Nakasaganada nga agaramid iti naimbag a mabalin a mangispal iti biag no adda ti uram.
Napateg a Serbisio
Nupay kasta, dagiti Saksi ni Jehova interesadoda iti napatpateg a kita ti naimbag nga aramid, a mangispal met iti biag. Regular a sarungkaranda dagiti kaarrubada tapno iranudda ti naimbag a damag ti Pagarian ti Dios. (Mateo 24:14) Dagiti Saksi paregtaenda dagiti tattao a mangammo ken mangyaplikar kadagiti prinsipio ti Biblia iti biagda tapno sumayaat ti kalidad ti biagda ita ken maaddaanda iti namnama a biag nga agnanayon iti maysa a lubong a talaga a natalna ken natalged.
Mabalin nga adda dagiti di makaammo iti pateg ti serbisio dagiti Saksi ni Jehova, nga ibilangda ida kas perhuisio. Ngem, adda naiduma a kapanunotan ni Mahistrado Jean Crepeau ti Quebec Superior Court iti Canada. Dagiti Saksi ni Jehova sadiay kinuestionaranda ti maysa nga ordinansa ti siudad ti Blainville, Quebec, a mangipapaulog a masapul a mangalada iti permiso no mangasabada iti binalaybalay. Iti desision ti Korte, kinuna ni Mahistrado Crepeau: “Ti panagbisita dagiti Saksi ni Jehova ket maysa a Nakristianuan a serbisio iti komunidad ken . . . napapateg a literatura dagiti publikasion nga ituktukon dagiti Saksi kadagiti interesado nga umili, a mangilawlawag kadagiti suheto a kas iti relihion, Biblia, droga, alkoholismo, edukasion dagiti agtutubo, parikut dagiti agassawa ken diborsio.” Innayonna: “Ikeddeng daytoy a korte a maysa a pananginsulto, panangpadakes, panangpasakit, ken panangipababa ti panangibilang kadagiti Saksi ni Jehova kas aglaklako.”
Dagiti Saksi ni Jehova tumultulongda agpaay iti pagimbagan ti pagnanaedanda a komunidad babaen ti panangtulong kadagiti tattao a mangrisut kadagiti problema iti inaldaw a panagbiagda ken maaddaan iti naraniag a masakbayan. Ti Biblia ti mangkabal kadakuada a mangitungpal iti dayta a trabaho. “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”—2 Timoteo 3:16, 17.
Kayatyo kadi a maammuan no kasano a nagbalin dagiti Saksi ni Jehova a ‘nakasagana maipaay iti tunggal naimbag nga aramid’? Awisendakayo a mangawat iti tulongda a mangammo iti ad-adu pay maipapan iti Biblia ket iti kasta magunggonaankayo iti daytoy napateg a serbisioda iti komunidadyo ken iti intero a lubong.
[Dagiti Ladawan iti panid 30, 31]
Dagiti Saksi ni Jehova ikagumaanda ti agtulnog kadagiti sekular nga autoridad
[Ladawan iti panid 31]
Agdindinamag dagiti Saksi gapu iti panangtulongda kadagiti kaarrubada