Liwliwa Kadagiti Marigrigatan

IDI nakapasar iti rigat dagiti nagkauna a matalek a lallaki ken babbai, sipapasnek nga inkararagda ti panangiwanwan ti Dios. Kaskasdi, adda inaramidda nga addang a nangep-ep iti rigatda, kas iti panagbalin a nataktika tapno maliklikanda dagiti manangirurumen. Kas pagarigan, naibturan ni David ti rigatna babaen ti panagtalekna ken ni Jehova buyogen ti personal a panagregget. Komustatay met ita?

No makapasarkayo iti rigat, mabalin nga agtignaykayo a mangrisut iti parikutyo. Kas pagarigan, no awan ti trabahoyo, saan kadi nga ikagumaanyo ti agbirok iti maitutop a trabaho tapno adda pangbiagyo iti pamiliayo? (1 Timoteo 5:8) Wenno no agsakitkayo, saan aya a mapankayo agpadoktor? Makapainteres ta ni Jesus, nga addaan iti inted-Dios a pannakabalin a mangpaimbag iti amin a kita ti sakit, binigbigna a ‘dagiti masakit kasapulanda dagiti mangngagas.’ (Mateo 9:12) Kaskasdi, saan a kaskarina a maikkat dagiti pakarigatanyo; mabalin a masapul nga itultuloyyo nga ibturan dagita.

Apay a diyo ikararag dayta a banag ken ni Jehova a Dios? Kas pagarigan, no agsapsapulkayo iti trabaho, ti sikakararag a panagpannuray iti Dios tulongannatayo a di maguyugoy a mangakseptar iti aniaman a trabaho a maisalungasing kadagiti prinsipio ti Biblia. Liklikantayo met ti ‘agpayaw-awan manipud iti pammati’ gapu iti kinaagum wenno panagayat iti kuarta. (1 Timoteo 6:10) No agaramid kadagiti napateg a desision mainaig iti panggedan, pamilia wenno salun-at, mabalintay a suroten ti balakad ni David: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.”​—Salmo 55:22.

Makatulong met ti napasnek a kararag iti panangtaginayontayo iti natimbeng a panunot tapno saannatay nga idasay ni rigat. Kas pudno a Kristiano, insurat ni apostol Pablo: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” Iti ania a wagas a maliwliwanatayo ti napasnek a kararag? “Ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Ti talna ti Dios ‘ringbawanna ti isuamin a panunot.’ No kasta, mabalinnatayo a pakalmaen no maburiborantayo. ‘Saluadanna ti puso ken pannakabalin ti isiptayo,’ iti kasta, matulongannatayo a di agtignay a sidadarasudos ken di nainsiriban, a mabalin a mangpakaro iti rigattayo.

Mabalin pay ketdi a mabaliwan ti kasasaad babaen ti kararag. Idi naibalud ni apostol Pablo idiay Roma, sipapakumbaba a kiniddawna nga ikararagan koma dagiti padana a Kristiano. Apay a kasta ti kiniddaw ni Pablo? “Bagbagaankayo a nangnangruna pay nga aramidenyo daytoy,” insuratna kadakuada, “tapno maisubliak kadakayo iti kabiitan a panawen.” (Hebreo 13:19) Iti sabali a pannao, ammo ni Pablo nga iti panagimdeng ni Jehova kadagiti naynay a kararag dagiti kapammatianna, mabalin a mabalbaliwan ti tiempo ti pannakawayawayana.​—Filemon 22.

Mabalbaliwan kadi ti kararag ti resulta ti pakarigatantayo? Mabalin. Ngem nasken a bigbigentayo a mabalin a saan a sungbatan ni Jehova a Dios dagiti kararagtayo iti pamay-an a namnamaentayo. Adu a daras nga inkararag ni Pablo ti ‘siit ti lasagna,’ nalabit maysa a pisikal a sagubanit. Ngem imbes nga ikkaten ti Dios dayta a pakarigatan, kinunana ken ni Pablo: “Umdasen kenka ti di kaikarian a kinamanangngaasik; ta ti pannakabalinko maan-anay iti pagkapuyan.”​—2 Corinto 12:7-9.

No kasta, mabalin a saan a kaskarina a maikkat ti rigattayo. Nupay kasta, gundawaytayo a paneknekan ti panagtalektayo iti nailangitan nga Amatayo. (Santiago 1:2-4) Namnamaenyo nga uray no saan nga ikkaten ni Jehova a Dios ti pakarigatan, ‘aramidennanto met ti dalan a pagruaran tapno mabalinantayo nga ibturan dayta.’ (1 Corinto 10:13) Saan a pakasdaawan a naawagan ni Jehova kas ‘ti Dios ti amin a liwliwa, a mangliwliwa kadatayo iti amin a rigattayo.’ (2 Corinto 1:3, 4) Ipaay ti Dios ti kasapulantayo tapno makapagibturtayo, ken matagiragsak ti namnama a biag nga agnanayon.

Ti Sao ti Dios, ti Biblia, inkarina a ni Jehova “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:3, 4) Kasla saan kadi a nakapappapati ti lubong nga awanan iti rigat? Mabalin a kasta no dimmakkelkayo iti rigat. Kaskasdi, inkari ti Dios ti pannakalapsut manipud iti buteng ken didigra, ket sigurado a matungpal ti panggepna.​—Isaias 55:10, 11.

[Dagiti Ladawan iti panid 9]

Mabang-aran ti naawanan iti namnama