Maysa nga “Adipen” a Matalek ken Masirib
“Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna?”—MATEO 24:45.
1, 2. Apay a kasapulantayo ita ti regular a suplay ti naespirituan a taraon?
ITI malem ti Martes, Nisan 11, 33 K.P., adda inimtuod dagiti adalan ni Jesus a napnuan iti kaipapanan kadatayo ita. Insaludsodda kenkuana: “Anianto ti pagilasinan ti kaaddam ken ti panungpalan ti sistema ti bambanag?” Kas sungbat, dinakamat ni Jesus ti maysa a padto a nakadkadlaw ti kaitungpalanna. Tinukoyna ti maysa a nariribuk a tiempo dagiti gubat, bisin, ginggined, ken sakit. ‘Pangrugian laeng dagita ti ut-ot ti panagrigat.’ Adda dakdakes pay a mapasamak. Anian a nakaal-alinggaget a masakbayan!—Mateo 24:3, 7, 8, 15-22; Lucas 21:10, 11.
2 Sipud idi 1914, natungpalen ti kaaduan a paset ti padto ni Jesus. “Dagiti ut-ot ti panagrigat” naan-anay a sinaplitda ti sangatauan. Kaskasdi, saan a rumbeng nga agbuteng dagiti pudno a Kristiano. Inkari ni Jesus nga ipaayna kadakuada dagiti makapakired a naespirituan a taraon. Yantangay adda ita ni Jesus idiay langit, kasanona a maipaay ti naespirituan a taraontayo ditoy daga?
3. Ania ti inaramid ni Jesus tapno adda ‘taraontayo iti umiso a tiempo’?
3 Ni Jesus a mismo ti nangsungbat iti dayta a saludsod. Idi inyebkasna ti naindaklan a padtona, inimtuodna: “Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo?” Kalpasanna, kinunana: “Naragsak dayta nga adipen no iti idadateng ni apona masarakanna nga ar-aramidenna ti kasta! Pudno kunak kadakayo, Dutokannanto nga agaywan kadagiti amin a sanikuana.” (Mateo 24:45-47) Wen, adda “adipen” a nadutokan a mangipaay iti naespirituan a taraon, maysa nga “adipen” a matalek ken masirib. Dayta kadi nga adipen ket maysa a partikular nga indibidual, wenno agsasaruno nga indibidual, wenno adda pay sabali? Yantangay ti matalek nga adipen ti mangipaay iti kasapulan unay a naespirituan a taraon, pagimbagantayo nga ammuen ti sungbat.
Maysa nga Indibidual Wenno Maysa a Grupo?
4. Kasano nga ammotayo a saan a maymaysa a persona “ti matalek ken masirib nga adipen”?
4 Saan a mabalin a maymaysa a persona “ti matalek ken masirib nga adipen.” Apay a saan? Gapu ta ti adipen rinugianna ti nangipaay iti naespirituan a taraon idi umuna a siglo, ket sigun ken ni Jesus, agtultuloy nga aramiden dayta ti adipen agingga iti iyaay ti Apo idi 1914. Agkalikagum dayta iti agarup 1,900 a tawen a matalek a panagserbi ti maysa nga indibidual. Uray ni Matusalem di pay nakapagbiag iti kasta a kapaut!—Genesis 5:27.
5. Ilawlawag no apay a ti termino a “matalek ken masirib nga adipen” ket saan nga agaplikar iti tunggal Kristiano.
5 No kasta, agaplikar kadi iti tunggal Kristiano ti termino a “matalek ken masirib nga adipen”? Pudno, masapul a matalek ken masirib ti amin a Kristiano. Ngem nalawag nga adda sabali a pampanunoten ni Jesus idi dinakamatna “ti matalek ken masirib nga adipen.” Kasano nga ammotayo dayta? Gapu ta kinunana a ti ‘dumteng nga apo’ dutokanna ti adipen “nga agaywan kadagiti amin a sanikuana.” Kasano koma a maitalek iti tunggal Kristiano ti amin a banag—dagiti “amin” a sanikua ti Apo? Imposible dayta!
6. Kasano nga agserbi ti nasion ti Israel kas “adipen” ti Dios?
6 No kasta, daytoy laeng ti lohikal a konklusion: tuktukoyen ni Jesus ti maysa a grupo dagiti Kristiano kas “ti matalek ken masirib nga adipen.” Mabalin kadi nga adda maysa a grupo nga adipen? Wen. Pito gasut a tawen sakbay a nagbalin a tao ni Kristo, tinukoy ni Jehova ti intero a nasion ti Israel kas “dagiti saksik” ken ti “adipenko a pinilik.” (Isaias 43:10) Tunggal kameng ti nasion ti Israel manipud 1513 K.K.P., idi a naipaulog ti Mosaiko a Linteg, agingga idi Pentecostes 33 K.P., ket karaman iti daytoy a klase adipen a pinili idi ni Jehova. Awan ti direkta nga akem ti kaaduan nga Israelita no maipapan iti panangiwanwan kadagiti aktibidad ti nasion wenno no maipapan iti programa ti naespirituan a panagpakan. Dagiti ar-ari, uk-ukom, propeta, papadi, ken Levita ti inaramat ni Jehova a mangibanag kadagita nga annongen. Kaskasdi, kas maysa a nasion, irepresentar ti Israel ti kinasoberano ni Jehova ken ideklarana ti dayag ti Dios kadagiti nasnasion. Tunggal Israelita ti nasken nga agbalin a saksi ni Jehova.—Deuteronomio 26:19; Isaias 43:21; Malakias 2:7; Roma 3:1, 2.
Nailaksid nga “Adipen”
7. Apay a nailaksid ti nagkauna a nasion ti Israel kas “adipen” ti Dios?
7 Tangay ti Israel ti “adipen” ti Dios sinigsiglon ti napalabas, isu met laeng kadi ti adipen a dinakamat ni Jesus? Saan. Nakalkaldaang ta saan a nagbalin a matalek ken masirib ti nagkauna nga Israel. Kas pananggupgop ni Pablo iti kasasaad, inadawna ti kinuna ni Jehova iti nasion: “Ti nagan ti Dios matabtabbaawan maigapu kadakayo iti tengnga dagiti nasion.” (Roma 2:24) Kinapudnona, nagalimpatok ti nabayagen a pakasaritaan ti kinarebelioso ti Israel idi inlaksidda ni Jesus, ket gapu iti dayta, inlaksid ida ni Jehova.—Mateo 21:42, 43.
8. Kaano a nadutokan ti maysa nga “adipen” a mangsukat iti Israel, ken iti sidong dagiti ania a kasasaad?
8 Nupay saan a nagmatalek ti “adipen” nga Israel, dina kayat a sawen nga agnanayon a mapaidaman iti naespirituan a taraon dagidiay matalek nga agdaydayaw. Idi Pentecostes 33 K.P., 50 nga aldaw kalpasan ti ipapatay ni Jesus, naiparukpok ti nasantuan nga espiritu iti agarup 120 nga adalanna iti makinngato a siled idiay Jerusalem. Iti dayta a kanito, naipasngay ti maysa a baro a nasion. Maiparbeng laeng a naipablaak ti pannakaipasngayna idi a dagiti kamengna situtured nga inwaragawagda kadagiti umili ti Jerusalem ti maipapan “iti natan-ok a bambanag ti Dios.” (Aramid 2:11) Iti kasta, dayta a baro a nasion, maysa a naespirituan a nasion, ti nagbalin nga “adipen” a mangideklara iti dayag ni Jehova kadagiti nasion ken mangipaay iti taraon iti umiso a tiempo. (1 Pedro 2:9) Maitutop a naawagan dayta kas ti “Israel ti Dios.”—Galacia 6:16.
9. (a) Siasino ti mangbukel iti “matalek ken masirib nga adipen”? (b) Siasino dagiti ‘katulong’?
9 Amin a kameng ti “Israel ti Dios” ket dedikado, nabautisaran a Kristiano a napulotan iti nasantuan nga espiritu ken addaan iti nailangitan a namnama. No kasta, ti ebkas a “matalek ken masirib nga adipen” tukoyenna ti amin a kameng dayta napulotan a naespirituan a nasion kas maysa a grupo ditoy daga iti aniaman a tiempo mangrugi idi 33 K.P. agingga ita, no kasano a ti tunggal Israelita a nagbiag manipud idi 1513 K.K.P. agingga idi Pentecostes 33 K.P. ket paset ti klase adipen sakbay ti panawen Kristiano. Ngem siasino dagiti ‘katulong’ nga ipaayan ti adipen iti naespirituan a taraon? Idi umuna a siglo K.P., nailangitan ti namnama ti amin a Kristiano. Maitunos iti dayta, ti sangakabbalayan ket napulotan met a Kristiano, a mamatmatan kas indibidual, saan a kas maysa a grupo. Amin, agraman dagidiay addaan iti annongen iti kongregasion, kasapulanda ti naespirituan a taraon manipud iti adipen.—1 Corinto 12:12, 19-27; Hebreo 5:11-13; 2 Pedro 3:15, 16.
“Iti Tunggal Maysa ti Trabahona”
10, 11. Kasanotayo nga ammo a saan nga agpapada ti annongen dagiti kameng ti klase adipen?
10 Nupay ti “Israel ti Dios” isu ti matalek ken masirib a klase adipen nga addaan iti annongen, tunggal kamengna ti addaan met iti indibidual a rebbengen. Nabatad daytoy iti sasao ni Jesus a nairekord iti Marcos 13:34. Kinunana: “Dayta ket kas iti tao nga agdaldaliasat iti sabali a daga a pinanawanna ti balayna ket intedna ti autoridad kadagiti adipenna, iti tunggal maysa ti trabahona, ket binilinna ti agay-aywan iti ruangan nga agtultuloy nga agbantay.” Gapuna, adda naipaannong iti tunggal kameng ti klase adipen—ti panangpaadu iti sanikua ni Kristo ditoy daga. Tunggal kameng ti mangitungpal iti daytoy nga annongen iti bukodna nga abilidad ken gundaway.—Mateo 25:14, 15.
11 Maysa pay, kinuna ni apostol Pedro kadagiti napulotan a Kristiano idi kaaldawanna: “Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios a nayebkas iti nadumaduma a pamay-an.” (1 Pedro 4:10) No kasta, dagiti napulotan responsabilidadda a pagserbian ti maysa ken maysa, nga usarenda dagiti sagut nga inted kadakuada ti Dios. Kanayonanna, impasimudaag ti sasao ni Pedro a saan nga agpapada ti abilidad, responsabilidad, wenno pribilehio dagiti napulotan a Kristiano. Kaskasdi, tunggal kameng ti klase adipen makatulongda iti panagrang-ay ti naespirituan a nasion. Kasano?
12. Kasano a ti tunggal kameng ti klase adipen, lalaki man wenno babai, makatulongda iti panagrang-ay ti adipen?
12 Umuna, tunggal maysa ti nasken nga agbalin a saksi ni Jehova, nga ikasabana ti naimbag a damag ti Pagarian. (Isaias 43:10-12; Mateo 24:14) Sakbay a nagpalangit, imbilin ni Jesus a nasken a mangisuro dagiti amin a matalek nga adalanna, lalaki man wenno babai. Kinunana: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.”—Mateo 28:19, 20.
13. Ania a pribilehio ti tinagiragsak ti amin a napulotan?
13 No addada baro nga adalan a masarakan idi, nasken a maisuro a naimbag no kasanoda a tungpalen ti amin a banag nga imbilin ni Kristo kadagiti adalanna. Idi agangay, nagbalin a kualipikado a mangisuro dagidiay nangipangag. Naiburay dagiti makapasalun-at a naespirituan a taraon kadagiti agbalin a kameng ti klase adipen iti adu a nasion. Amin a napulotan a Kristiano idi, lalaki man wenno babai, nakiramanda iti trabaho a panagaramid kadagiti adalan. (Aramid 2:17, 18) Nagtultuloy dayta sipud idi rinugian ti adipen ti trabahona agingga iti panungpalan daytoy sistema ti bambanag.
14. Siasino laeng ti nakaitalkan ti pribilehio a panangisuro iti kongregasion, ket ania ti panangmatmat dagiti matalek a napulotan a babbai iti dayta?
14 Nagbalin a paset ti klase adipen dagidiay kabbaro a nabautisaran a napulotan, ket asinoman ti nangisuro kadakuada idi damo, nagtultuloy nga inwanwan ida dagiti kameng ti kongregasion a nakaragpat kadagiti Nainkasuratan a kualipikasion kas papanglakayen. (1 Timoteo 3:1-7; Tito 1:6-9) Gapuna, dagitoy a nadutokan a lallaki ket addaan iti pribilehio a tumulong iti panagrang-ay ti nasion iti naisangsangayan a pamay-an. Dagiti matalek a napulotan a Kristiano a babbai dida kinagura ti kinapudno a dagiti laeng Kristiano a lallaki ti naikkan iti annongen a mangisuro iti kongregasion. (1 Corinto 14:34, 35) Imbes ketdi, maragsakanda ta nagunggonaanda iti kinaanep dagiti lallaki a kameng ti kongregasion ken agyamanda kadagiti pribilehio a naluktan para kadagiti Kristiano a babbai, agraman ti panangiwaragawag iti naragsak a damag. Dagiti naregta a napulotan a babbai ita iparangarangda ti kasta met laeng a napakumbaba a kababalin, napulotan man wenno saan dagiti nadutokan a papanglakayen.
15. Ania ti maysa kadagiti kangrunaan a gubuayan ti naespirituan a taraon idi umuna a siglo, ken siasino ti nangidaulo iti panangipaay iti dayta?
15 Ti nesesita a naespirituan a taraon idi umuna a siglo ket direkta a naipaay babaen dagiti surat dagiti apostol ken dadduma a mangidadaulo nga adalan. Dagiti sursuratda—nangnangruna dagiti linaon ti 27 a naipaltiing a libro a mangbukel iti Kristiano a Griego a Kasuratan—ket naited kadagiti kongregasion ken awan duadua a dagita ti nakaibatayan dagiti sursuro dagiti lokal a panglakayen. Iti kastoy a wagas, dagiti pannakabagi ti adipen nagtultuloy a naipaayda ti nabaknang a naespirituan a taraon kadagiti napasnek a Kristiano. Ti klase adipen idi umuna a siglo simamatalek nga intungpalna ti naipaannong kenkuana.
Ti “Adipen” Kalpasan ti 19 a Siglo
16, 17. Kasano a ti klase adipen simamatalek nga intungpalna ti annongenna bayat ti panaglabas dagiti tawen agingga idi 1914?
16 Komusta met ita? Idi nangrugi ti kaadda ni Jesus idi 1914, adda kadi nasarakanna a grupo dagiti napulotan a Kristiano a simamatalek a mangipapaay iti taraon iti umiso a tiempo? Sigurado nga adda. Nalaka a mailasin daytoy a grupo gapu iti nasayaat a bunga a patpataudenna. (Mateo 7:20) Sipud idin, pinatalgedan ti historia nga isuda a talaga dayta.
17 Iti idadateng ni Jesus, agarup 5,000 nga indibidual ti okupado a mangirakrakurak iti kinapudno ti Biblia. Manmano dagiti trabahador, ngem nangaramat ti adipen iti nagduduma a nainsiriban a metodo a nangisaknap iti naimbag a damag. (Mateo 9:38) Kas pagarigan, nayurnos a maipablaak iti nganngani 2,000 a pagiwarnak dagiti naibatay-Biblia a palawag. Iti kastoy a wagas, namimpinsan a naipakaammo ti kinapudno ti Sao ti Dios kadagiti pinullo ribu nga agbasbasa. Kanayonanna, naisagana ti maysa a walo-oras a programa a buklen ti panangipabuya iti de kolor a ladladawan ken pelikula. Gapu iti daytoy a kabbaro idi a metodo ti panangipabuya, agdagup iti nasurok a siam a milion a tattao kadagiti tallo a kontinente ti nakangngeg iti mensahe ti Biblia, mangrugi iti Panamarsua agingga iti ngudo ti Sangaribu a Tawen a Panagturay ni Kristo. Naaramat met dagiti nayimprenta a literatura. Idi 1914, kas pagarigan, naipablaak ti agarup 50,000 a kopia daytoy a magasin.
18. Kaano nga intalek ni Jesus iti adipenna ti amin a sanikuana, ken apay?
18 Wen, idi dimteng ti Apo, nasarakanna ti matalek nga adipenna nga agtultuloy a mangtartaraon iti katulongna ken mangikaskasaba iti naimbag a damag. Kalpasanna, adda dakdakkel nga annongen nga agur-uray iti dayta nga adipen. Kinuna ni Jesus: “Pudno kunak kadakayo, Dutokannanto nga agaywan kadagiti amin a sanikuana.” (Mateo 24:47) Inaramid daytoy ni Jesus idi 1919, kalpasan a nalasatan ti adipen ti panawen ti pannubok. Ngem apay nga immawat iti dakdakkel a responsabilidad “ti matalek ken masirib nga adipen”? Gapu ta dimmakkel ti sanikua ti Apo. Nagbalin nga ari ni Jesus idi 1914.
19. Ilawlawagyo no kasano a maipapaay dagiti naespirituan a kasapulan ti “dakkel a bunggoy.”
19 Aniada a sanikua ti intalek ti kabbaro a naitrono nga Apo iti matalek nga adipenna? Amin a naespirituan a banag a kukuana ditoy daga. Kas pagarigan, dua a dekada kalpasan ti pannakaitrono ni Kristo idi 1914, nagminar ti maysa a “dakkel a bunggoy” ti “sabsabali a karnero.” (Apocalipsis 7:9; Juan 10:16) Saanda a kameng iti napulotan nga “Israel ti Dios.” Imbes ketdi, napasnekda a lallaki ken babbai nga addaan iti naindagaan a namnama a mangay-ayat ken ni Jehova ken agtarigagay nga agserbi kenkuana kas inaramid dagiti napulotan. No an-anagen, kasla ibagbagada iti “matalek ken masirib nga adipen”: “Kumuyogkaminto kadakayo, ta nangngegmi a ti Dios adda kadakayo.” (Zacarias 8:23) Tagtagiragsaken dagitoy a kabbaro a bautisado a Kristiano ti isu met laeng a nabaknang a naespirituan a taraon a tagtagiragsaken ti napulotan a sangakabbalayan, ket daytoy a dua a grupo nagranudanda daytoy maymaysa a naespirituan a sagana sipud idin. Anian a bendision daytoy kadagiti kameng ti “dakkel a bunggoy”!
20. Ania ti paset ti “dakkel a bunggoy” iti panagadu ti sanikua ti Apo?
20 Dagiti kameng ti “dakkel a bunggoy” siraragsak a makidanggayda iti napulotan a klase adipen a mangikaskasaba iti naimbag a damag. Bayat ti panangasabada, immadu ti sanikua ti Apo isu a dimmakkel ti responsabilidad “ti matalek ken masirib nga adipen.” Iti iyaadu ti bilang dagiti agsapsapul iti kinapudno, nagbalin a nesesita ti panangpalawa kadagiti pasilidad a pagimprentaan tapno masupusopan dagiti kasapulan a naibatay-Biblia a literatura. Naipasdek dagiti sanga nga opisina dagiti Saksi ni Jehova iti adu a pagilian. Naibaon dagiti misionero “agingga iti kaadaywan a paset ti daga.” (Aramid 1:8) Manipud iti mapattapatta a lima a ribu a napulotan idi 1914, nasurok nga innem a milion ita ti agdaydayaw iti Dios, a kaaduan kadakuada ti kameng ti “dakkel a bunggoy.” Kinapudnona, napartak ti panagadu ti sanikua ti Ari sipud iti pannakaitronona idi 1914!
21. Ania a dua a pangngarig ti usigentayo iti sumaganad a panagadaltayo?
21 Pammaneknek amin dagitoy a ti adipen ket agpadpada a “matalek ken masirib.” Kalpasan a dinakamatna “ti matalek ken masirib nga adipen,” tinukoy ni Jesus ti dua a pangngarig a nangitampok kadagita a dua a galad: ti pangngarig ti masirib ken naampang a birhen ken ti pangngarig dagiti talento. (Mateo 25:1-30) Makapainteres kadatayo dayta! Ania ti kaipapanan kadatayo ita dagita a pangngarig? Usigentayo daytoy a saludsod iti sumaganad nga artikulo.
Ania ti Makunayo?
• Siasino ti mangbukel iti “matalek ken masirib nga adipen”?
• Siasino dagiti “katulong”?
• Kaano a naitalek iti matalek nga adipen ti amin a sanikua ti Apo, ken apay nga iti dayta a tiempo?
• Siasino dagiti timmulong iti panagadu dagiti sanikua ti Apo kadagiti kallabes a dekada, ken kasano?
[Dagiti Ladawan iti panid 10]
Ti klase adipen idi umuna a siglo simamatalek nga intungpalna ti annongenna