Matmatmatanyo Kadi ti Gunggona?
IN-INUT a lumanlan ti sakit. Mangrugi dayta a paakikidenna ti saklaw ti panagkita. No mabaybay-an, apektaranna ti sentro ti panagkita. Inton agangay, mabalin a naan-anay a perdienna ti panagkita. Ania dayta? Glaucoma—maysa kadagiti kangrunaan a pakaigapuan ti pannakabulsek.
No kasano a mabalin nga in-inut ken di madmadlaw a mapukawtayo ti literal a panagkitatayo, mabalin met a mapukawtayo ti maysa a napatpateg nga amang—ti naespirituan a panagkitatayo. Gapuna, napateg a taginayonen a naisentro ti atensiontayo kadagiti naespirituan a banag.
Panagtalinaed a Sikikita iti Gunggona
Karaman kadagiti “bambanag a di makita” ti literal a matatayo isu ti nadayag a gunggona a biag nga agnanayon, nga ipaay ni Jehova kadagidiay nasungdo kenkuana. (2 Corinto 4:18) Siempre, ti panagayat iti Dios ti kangrunaan a rason nga agserserbi kenkuana dagiti Kristiano. (Mateo 22:37) Kaskasdi, kayat ni Jehova a sigagagar a seggaantayo ti gunggona. Kayatna a matmatantayo kas naparabur nga Ama a “mananggunggona kadagidiay sipapasnek a mangsapsapul kenkuana.” (Hebreo 11:6) Iti kasta, dagidiay pudno a makaam-ammo iti Dios ken agayat kenkuana ipategda dagiti inkarina a bendision ken il-iliwenda ti pannakatungpal dagita.—Roma 8:19, 24, 25.
Adu nga agbasbasa iti daytoy a magasin ken iti kaduana nga Agriingkayo! magustuanda ti pannakayilustrar ti asidegen a Paraiso a daga. Siempre, ditay masierto ti eksakto a buya ti Paraiso a daga, ken dagiti ilustrasion a naipablaak ket artistiko laeng a panangiladawan a naibatay kadagiti teksto ti Biblia a kas iti Isaias 11:6-9. Kaskasdi, kinuna ti maysa a Kristiano a babai: “No makitak ti ladawan ti umad-adani a Paraiso iti Ti Pagwanawanan ken Agriingkayo!, sukimatek a naimbag dagita, kas iti aramiden ti turista no sukimatenna ti broshur dagiti lugar a pagpasiaran. Ikagumaak a darepdepen nga addaak sadiay gapu ta dayta a talaga ti il-iliwek a pagyanan iti panawen nga inkeddeng ti Dios.”
Kasta met laeng ti narikna ni apostol Pablo maipapan iti ‘panangayab ti ngato’ kenkuana. Dina imbilang a nagun-odnan dayta, ta masapul nga agtalinaed a matalek agingga iti panungpalan. Ngem intultuloyna a ‘rinagpat dagiti banag nga adda iti masanguanan.’ (Filipos 3:13, 14) Umasping iti dayta, inibturan ni Jesus ti ipapatayna iti kayo a pagtutuokan “gapu iti rag-o a naikabil iti sanguananna.”—Hebreo 12:2.
Pinagduaduaanyo kadin no makastrekkay met laeng iti baro a lubong? Saan a nasayaat ti nalabes a panagkompiansa, gapu ta ti panangtagiragsaktayo iti gunggona a biag ket agpannuray iti panagtalinaedtayo a matalek agingga iti panungpalan. (Mateo 24:13) Nupay kasta, no ar-aramidentayo ti amin a kabaelantayo a mangragpat kadagiti kalikaguman ti Dios, adda rasontayo nga agkompiansa a magun-odtayo dayta a gunggona. Laglagipenyo a ni Jehova “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) No agtalektayo ken ni Jehova, tulongannatayo a mangragpat iti kalattayo. Kinapudnona, saanna nga ugali ti agsapul kadagiti banag a mangdiskualipikar iti daydiay sipapasnek a mangay-ayo kenkuana.—Salmo 103:8-11; 130:3, 4; Ezequiel 18:32.
Gapu ta ammotayo ti panagrikna ni Jehova kadagiti adipenna, mangted dayta iti namnama—maysa a galad a kas kapateg ti pammati. (1 Corinto 13:13) Ti Griego a sao a naipatarus a “namnama” iti Biblia iparipiripna ti sigagagar a “panangnamnama iti naimbag.” Kasta a namnama ti pampanunoten ni apostol Pablo idi insuratna: “Tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan, tapno saankayo nga agbalin a nabuntog, no di ket agbalin a tumutulad kadagidiay a babaen ti pammati ken kinaanus tawidenda dagiti kari.” (Hebreo 6:11, 12) Kunana a no itultuloytayo ti agserbi a matalek ken ni Jehova, maipasigurado kadatayo a masagraptayo dayta a namnama. Saan a kas iti adu a nailubongan nga arapaap, daytoy a namnama “saan a mangiturong iti pannakaupay.” (Roma 5:5) Kasanotayo ngarud a mapagtalinaed a naraniag ti namnamatayo ken sipapanunottayo a naimbag iti dayta?
No Kasano a Maparang-ay ti Naespirituan a Panangmatmattayo
Ti pisikal a matatayo dina kabaelan a paggiddanen a mingmingan ti dua a banag. Kasta met laeng ti naespirituan a matatayo. Ti panangipamaysa kadagiti bambanag iti agdama a sistema sigurado a palibegenna iti panunottayo ti inkari ti Dios a baro a lubong. Inton agangay, saanton a makaay-ayo dayta agingga a malipatantayo. Anian a nakalkaldaang dayta! (Lucas 21:34) Nagpateg ngarud a taginayonentayo ti ‘simple a mata’—daydiay sikikita iti Pagarian ti Dios ken iti gunggona a biag nga agnanayon!—Mateo 6:22.
Saan a kanayon a nalaka a taginayonen ti simple a mata. Adda dagiti inaldaw a parikut a masapul nga asikasuentayo, ken adda dagiti pakasingaan ken pannulisog a mabalin a pakaipasanguantayo. Kadagita a kasasaad, kasano nga agtalinaed a naipamaysa ti atensiontayo iti Pagarian ken iti baro a lubong nga inkari ti Dios a ditay maliwayan dagiti dadduma pay a napateg a trabaho? Usigentayo ti tallo a pamay-an.
Inaldaw nga adalen ti Sao ti Dios. Ti regular a panagbasa iti Biblia ken panagadal kadagiti naibatay iti Biblia a publikasion tulonganna ti isiptayo a mangipamaysa kadagiti naespirituan a banag. Pudno, mabalin nga adu a tawenen nga ad-adalentayo ti Sao ti Dios, ngem masapul nga itultuloytayo nga adalen dayta, no kasano a masapul nga agtultuloytayo a mangan iti material a taraon tapno agbiagtayo. Saantayo nga agsardeng a mangan gapu laeng ta rinibu a daras a nangantayon. Gapuna, kasanoman kaadu ti ammotayo iti Biblia, kasapulantayo ti agtultuloy ken regular a pannangan iti naespirituan a taraon manipud iti Biblia tapno agtalinaed a naraniag ti namnamatayo ken nabileg ti pammati ken ayattayo.—Salmo 1:1-3.
Mennamennaen ti Sao ti Dios buyogen ti apresasion. Apay a napateg ti panagmennamenna? Gapu iti dua a rason. Umuna, ti panagmennamenna tulongannatayo a mangagsep iti nabasatayo ken mangpatanor iti nauneg nga apresasion iti dayta. Maikadua, tulongannatayo nga agbalin a silalagip ken ni Jehova, kadagiti nakaskasdaaw nga aramidna, ken ti namnama nga intuyangna kadatayo. Kas panangyilustrar: Dagiti Israelita a kadua ni Moises a rimmuar idiay Egipto naimatanganda a mismo ti nakaskasdaaw a pannakabalin nga impakita ni Jehova. Nariknada met ti naayat a panangsalaknibna kadakuada bayat nga inturongna ida iti tawidenda a daga. Ngem uray adda pay laeng dagiti Israelita iti let-ang nga agturong iti Naikari a Daga, nangrugidan nga agreklamo, a mangipakita iti nakaro a kinaawan iti pammati. (Salmo 78:11-17) Ania ti nagkamalianda?
Saanen a ni Jehova ken ti nagsayaat a namnama nga intuyangna kadakuada ti pinampanunot dagiti tattao no di ket ti bukodda a pagnam-ayan ken nainlasagan a tarigagay. Iti laksid dagiti milagro a nakitada a mismo, adu nga Israelita ti nagbalin nga awanan iti pammati a reklamador. “Sidadaras a nalipatanda ti ar-aramid [ni Jehova],” kuna ti Salmo 106:13. Gapu iti dayta a di nainkalintegan a panagkamalida, saan a nakastrek daydi a kaputotan iti Naikari a Daga.
Gapuna, no agbasakayo iti Kasuratan wenno kadagiti katulongan iti panagadal iti Biblia, mennamennaenyo a naimbag ti basbasaenyo. Ti kasta a panangusig ket napateg iti naespirituan a salun-at ken panagrang-ayyo. Kas pagarigan, no basaenyo ti Salmo 106, a naadaw iti ngato ti dadduma a pasetna, mennamennaenyo dagiti galad ni Jehova. Kitaenyo no kasanona nga inan-anusan ken kinaasian dagiti Israelita, no kasanona nga inkagumaan a tinulongan ida a makagteng iti Naikari a Daga. Kitaenyo met no kasano a nagtultuloyda nga immalsa kenkuana. Riknaenyo ti ladingit ken saem a narikna ni Jehova bayat a winatwatna ti asi ken anus a mabalinna nga ipakita kadagiti tattao a kimmalio ken awanan iti apresasion. Maysa pay, babaen ti panangmennamenna iti Sal 106 bersikulo 30 ken 31—a nangdeskribir iti natibker ken natured a takder ni Finehas mainaig iti kinalinteg—namnamaentayo a saan a lipaten ni Jehova dagiti nasungdo kenkuana ken sipaparabur a gunggonaanna ida.
Iyaplikaryo dagiti prinsipio ti Biblia iti biagyo. Bayat a surotentayo dagiti prinsipio ti Biblia, makitatayo a mismo ti pagimbagan ti balakad ni Jehova. Kuna ti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” Panunotenyo no kasano a ti imoral a panagbiag ti adu a tattao ket nangyeg iti mental, emosional, ken pisikal a parikut. Babaen ti pannakiraman iti apagbiit a ragsak, apiten dagiti kasta a tattao ti adu a tawen—tungpal biag pay ketdi—a saem. Maisupadi iti dayta, dagidiay magmagna iti ‘nailet a dalan’ addaanda iti pangripiripan iti biag iti baro a sistema, ket daytoy ti mangparegta kadakuada nga agtultuloy iti dalan ti biag.—Mateo 7:13, 14; Salmo 34:8.
Maysa a karit ti panangyaplikar kadagiti prinsipio ti Biblia. No dadduma, dagiti di nainkasuratan a solusion ket agparang a makaipaay iti madagdagus a bang-ar iti maysa a narigat a kasasaad. Kas pagarigan, iti panawen ti pinansial a rigat, nalaka la a pagbalinen a maikadua dagiti interes ti Pagarian. Nupay kasta, kadagidiay agtignay buyogen ti pammati ken mangtaginayon iti naespirituan a panangmatmatda, manamnamada nga inton agangay “naimbagto ti pagbanagan dagidiay agbuteng iti pudno a Dios.” (Eclesiastes 8:12) Mabalin nga ag-overtime no dadduma ti maysa a Kristiano, ngem pulos a dina tuladen ni Esau, a nangumsi kadagiti naespirituan a bambanag, nga ibilangna dagitoy nga awanan iti pateg.—Genesis 25:34; Hebreo 12:16.
Nalawag ti kinuna ni Jesus maipapan kadagiti responsabilidadtayo kas Kristiano. Masapul nga ‘itultuloytayo a sapulen nga umuna ti pagarian ken ti kinalinteg ti Dios.’ (Mateo 6:33) No aramidentayo dayta, ipakita ni Jehova ti naamaan a panagayatna kadatayo babaen ti panangipaayna kadagiti material a kasapulantayo. Dina kayat a pakaringgorantayo dagiti bambanag a kinunana nga ipaayna. Ti kasta a nalabes a panagdandanag ket mayarig iti naespirituan a sakit iti mata—a no maliwayan, in-inut nga iturongna ti panagkitatayo kadagiti laeng material a pakaseknan ket pagbalinennatayo a bulsek iti naespirituan inton agangay. No agtalinaedtayo iti kasta a kasasaad, dumteng kadatayo ti aldaw ni Jehova “kas maysa a silo.” Anian a nakalkaldaang dayta!—Lucas 21:34-36.
Agtalinaed a Naipamaysa ti Atension Kas ken Josue
Pagtalinaedentayo a naipamaysa ti atensiontayo iti nadayag a namnama iti Pagarian, nga ikabiltayo ti dadduma a responsabilidadtayo iti umiso a lugarda. Babaen ti panagregget iti regular a panagadal, panagmennamenna, ken panangyaplikar kadagiti prinsipio ti Biblia, makapagtalinaed a natalged ti namnamatayo kas ken Josue. Iti panangiturongna iti Israel iti Naikari a Daga, kinunana: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.”—Josue 23:14.
Sapay koma ta pabilgennakayo ti namnama ti Pagarian, ken paragsakennakayo koma kas ipamatmat ti pampanunot, rikrikna, pangngeddeng, ken aktibidadyo.—Proverbio 15:15; Roma 12:12.
[Ladawan iti panid 21]
Pinagduaduaanyo kadin no makastrekkay met laeng iti baro a lubong?
[Ladawan iti panid 22]
Ti panagmennamenna ket napateg a paset ti panagadal iti Biblia
[Dagiti Ladawan iti panid 23]
Ipamaysa ti atension kadagiti interes ti Pagarian