Ibubusor Gapu iti Panangasaba ni Saulo

SAAN a maawatan dagiti Judio idiay Damasco no kasano a nagbalin nga apostata ti maysa a napeklan a manangitandudo kadagiti tradisional a patpatien. Agdindinamag ni Saulo kas maysa a mangparparigat kadagidiay umaw-awag iti nagan ni Jesus idiay Jerusalem. Napan sadi Damasco tapno idadanesna dagiti adalan sadiay. Ngem ita, isun a mismo ti mangikaskasaba a daydiay naumsi a kriminal a nailansa gapu iti panagtabbaaw ket isu ti Mesias! Agmauyong kadin ni Saulo?​—Aramid 9:1, 2, 20-22.

Mabalin nga adda makagapu. Agparang a dadduma a kadua ni Saulo a nagdaliasat manipud Jerusalem nasaritada ti maipapan iti napasamak iti dalanda. Idi asidegdan iti Damasco, kellaat a nagsilnag ti aglikmutda, ket napasagda amin iti daga. Adda met timek a nangngegda. Ni laeng Saulo ti nadangran. Idi makabangon, masapul nga ukodenda nga agturong idiay Damasco gapu ta saanen a makakita.​—Aramid 9:3-8; 26:13, 14.

Nagbalin a Manangaskasaba ti Dati a Bumusbusor

Ania ti napasamak ken ni Saulo iti dalan agturong iti Damasco? Ti kadi kawatiwat ti panagdaliasat wenno ti kinabara ti agmatuon ti pakaigapuan ti pannakabulsekna? Gapu ta determinadoda nga agbirok iti saan a karkarna nga eksplanasion, dagiti moderno a managduadua ti nangtukoy iti sumagmamano a posible a napasamak kas iti panagdelirio, panagammangaw, nakaro a pannakaburibor ti isip gapu iti masidsidir a konsiensia ni Saulo, sakit iti isip, ken maipagarup a panagkissiw.

Ti agpayso a napasamak ket nagparang ni Jesu-Kristo ken ni Saulo buyogen ti makabulsek a lawag, a ginutugotna a mamati nga isu ti Mesias. Iti dadduma nga artistiko a pannakailadawan dayta nga eksena, ipakitada a natnag ni Saulo iti panagsakayna iti kabalio. Nupay posible dayta, ti laeng ibaga ti Biblia ket ‘napasag ni Pablo iti daga.’ (Aramid 22:6-11) Aniaman a pisikal a pannakatnag ti napasaran ni Saulo, bassit laeng dayta no idilig iti nakababain a pannakatnagna manipud iti nangato a saadna. Masapul ita a bigbigenna a pudno ti ikaskasaba dagiti pasurot ni Jesus. Ti laeng mabalin nga aramiden ni Saulo ket makiraman kadakuada. Nupay dati a napinget a bumusbusor iti mensahe ni Jesus, nagbalin ni Saulo a maysa kadagiti naregta a nangikasaba iti dayta a mensahe. Idi naisubli ti panagkitana ken nabautisaran, “ni Saulo nagtultuloy a nakagun-od iti ad-adu pay a pannakabalin ket tiktikawenna idi dagiti Judio a nagnaed idiay Damasco bayat a lohikal a pampaneknekanna a daytoy isu ti Kristo.”​—Aramid 9:22.

Napaay ti Gandat a Mangpapatay

Kalpasan a nakomberte, napanan ni Saulo, a naawagan Pablo idi agangay? Iti suratna kadagiti taga Galacia, kinunana: “Napanak idiay Arabia, ket nagsubliak manen idiay Damasco.” (Galacia 1:17) Ti sao nga “Arabia” mabalin a tukoyenna ti panagdaliasat iti aniaman a paset ti Arabian Peninsula. Ibaga ti dadduma nga eskolar a mabalin a napan ni Pablo iti Desierto ti Siria wenno sadinoman iti pagarian ni Aretas IV iti Nabataea. Agparang a napan ni Saulo iti maysa a natalna a lugar tapno agmennamenna kalpasan ti pannakabautisarna, no kasano a napan ni Jesus iti let-ang kalpasan ti pannakaitanebna.​—Lucas 4:1.

Idi nakasubli ni Saulo idiay Damasco, ‘nagnunumo dagiti Judio tapno sangsangkamaysa a papatayenda.’ (Aramid 9:23) Ti gobernador a pannakabagi ni Ari Aretas idiay Damasco bambantayanna ti siudad tapno kemmegenda ni Saulo. (2 Corinto 11:32) Ngem bayat nga insikat dagiti kabusor ti pannakapapatay ni Saulo, dagiti adalan ni Jesus implanoda ti panaglibasna.

Karaman kadagidiay timmulong ken ni Saulo nga aglibas ket da Ananias ken dagiti adalan a siraragsak a nakalangen ti apostol kalpasan unay ti pannakakombertena.a (Aramid 9:17-19) Mabalin a timmulong met ti dadduma kadagidiay nagbalin a manamati gapu iti panangasaba ni Saulo idiay Damasco, ta kuna ti Aramid 9:25: “Isu innala dagiti adalanna ket iti rabii impababada iti maysa a gutbaw iti pader, nga isu imbabada a naikuribot.” Ti ebkas a “dagiti adalanna” mabalin a tukoyenna dagidiay sinursuruan ni Saulo. Aniaman kadagita, nalabit nga ad-adda a narubroban ti ibubusor kenkuana gapu iti naballigi a ministeriona.

Leksion a Masursuro

No usigentayo ti sumagmamano a pasamak idi nakomberte ken nabautisaran ni Saulo, nalawag a makitatayo a saanna unay a pakaseknan ti panangmatmat dagiti dadduma kenkuana; wenno simmuko man gapu iti nakaro nga ibubusor. Ti panangasaba a naipaannong kenkuana ti kapatgan ken ni Saulo.​—Aramid 22:14, 15.

Nabiit pay kadi a nabigbigyo ti kinapateg ti panangikasaba iti naimbag a damag? No kasta, ammoyon a ti amin a pudno a Kristiano masapul nga ikasabada ti Pagarian. Saankay koma a masdaaw no adda ibubusor maigapu iti ministerioyo. (Mateo 24:9; Lucas 21:12; 1 Pedro 2:20) Mapagulidanan ti tignay ni Saulo iti sidong ti ibubusor. Maay-ayo ti Dios kadagiti Kristiano a simamatalek nga agibtur iti sidong dagiti pakasuotan. Kinuna ni Jesus kadagiti adalanna: “Puntiriakayto ti pananggura ti amin a tattao maigapu iti naganko.” Ngem impanamnamana kadakuada: “Babaen ti panagibturyo magun-odanyonto dagiti kararuayo.”​—Lucas 21:17-19.

[Footnote]

[Ladawan iti panid 28]

‘Napasag ni Saulo iti daga’ idi nagparang kenkuana ni Jesus

[Ladawan iti panid 29]

Nalibasan ni Saulo ti pananggandat iti biagna idiay Damasco