“Nagatangkayo iti Maysa a Gatad”
“Nagatangkayo iti maysa a gatad. Padayagenyo ngarud ti Dios.”—1 CORINTO 6:20.
1, 2. (a) Sigun iti Mosaiko a Linteg, kasano ti rumbeng a pannakatrato dagiti adipen nga Israelita? (b) Ania ti mabalin nga aramiden ti maysa nga adipen a mangay-ayat iti apona?
“ITI nagkauna a lubong, nasaknap ken gagangay ti panangadipen,” kuna ti Holman Illustrated Bible Dictionary. Innayonna: “Ti ekonomia ti Egipto, Grecia, ken Roma ket agpannuray iti serbisio dagiti adipen. Idi panawen dagiti Kristiano idi umuna a siglo, tagabo ti maysa iti kada tallo katao idiay Italia ken maysa iti kada lima katao iti sadinoman.”
2 Nupay adda met idi ti panangadipen iti nagkauna nga Israel, sinigurado ti Mosaiko a Linteg a maprotektaran dagiti Hebreo nga adipen. Kas pagarigan, kinalikaguman ti Linteg a saan a mabalin a maadipen ti maysa nga Israelita iti nasursurok ngem innem a tawen. Iti maikapito a tawen, “pumanawto a kas maysa a nawayawayaan nga awanan bayad.” Naasi ken di mangidumduma dagiti pagannurotan mainaig iti pannakatrato dagiti adipen kas sagudayen ti Linteg ni Moises: “No ipilit a kunaen ti adipen, ‘Pudno nga ay-ayatek ni apok, ni asawak ken ti annakko; diak kayat ti pumanaw a kas maysa a nawayawayaan,’ ngarud masapul nga iyadani ni apona iti pudno a Dios ket masapul nga ipidegna iti ridaw wenno iti bautek; ket masapul a tebbengan ni apona ti lapayagna babaen ti maysa a kulukol, ket adipennanto agingga iti tiempo a di nakedngan.”—Exodo 21:2-6; Levitico 25:42, 43; Deuteronomio 15:12-18.
3. (a) Ania a kita ti panagpaadipen ti inawat dagiti Kristiano idi umuna a siglo? (b) Ania ti manggutugot kadatayo nga agserbi iti Dios?
3 Ti urnos a boluntario a panagpaadipen ket panirigan no ania a kita a panagpaadipen ti inawat dagiti Kristiano. Kas pagarigan, dagiti mannurat iti Biblia a da Pablo, Santiago, Pedro, ken Judas inyam-ammoda dagiti bagida kas ad-adipen ti Dios ken ni Kristo. (Tito 1:1; Santiago 1:1; 2 Pedro 1:1; Judas 1) Pinalagipan ni Pablo dagiti Kristiano a taga Tesalonica a ‘nagbaw-ingda iti Dios manipud kadagiti idoloda tapno agpaadipenda iti sibibiag ken pudno a Dios.’ (1 Tesalonica 1:9) Ania ti nanggutugot kadagidi a Kristiano tapno situtulok nga agpaadipenda iti Dios? Bueno, ania aya ti nangtignay iti maysa nga Israelita nga adipen a mangisakripisio iti personal a wayawayana? Saan kadi a ti panagayatna iti apona? Ti Nakristianuan a panagpaadipen ket maigapu iti panagayat iti Dios. No maam-ammo ken masursurotayo nga ayaten ti pudno ken sibibiag a Dios, magutugottayo nga agserbi kenkuana ‘buyogen ti isuamin a pusotayo ken isuamin a kararuatayo.’ (Deuteronomio 10:12, 13) Ngem ania ti ramanen ti panagpaadipen iti Dios ken panagpaadipen ken ni Kristo? Kasanona nga apektaran ti inaldaw a panagbiagtayo?
“Aramidenyo ti Amin a Bambanag a Maipaay iti Dayag ti Dios”
4. Kasano a nagbalintayo nga ad-adipen ti Dios ken ni Kristo?
4 Ti adipen ket nadepinar kas “maysa a tao a legal a kukua ti sabali wenno dagiti sabsabali ken obligado nga agtulnog a naan-anay.” Nagbalintayo a legal a kukua ni Jehova idi indedikartayo ti biagtayo kenkuana ken nagpabautisartayo. “Saanyo a kukua ti bagbagiyo, ta nagatangkayo iti maysa a gatad,” kinuna ni apostol Pablo. (1 Corinto 6:19, 20) Dayta a gatad ket awan sabali no di ti pangsubbot a sakripisio ni Jesu-Kristo, gapu ta maibatay iti dayta nga inawatnatayo ti Dios kas ad-adipenna, napulotantayo man a Kristiano wenno kas kakaduada nga addaan iti naindagaan a namnama. (Efeso 1:7; 2:13; Apocalipsis 5:9) Gapuna, sipud idi nabautisarantayo, “kukuanatay ni Jehova.” (Roma 14:8) Yantangay nagatangtayo iti nagpateg a dara ni Jesu-Kristo, nagbalintayo met nga ad-adipenna ken obligadotayo a mangsalimetmet kadagiti bilinna.—1 Pedro 1:18, 19.
5. Kas ad-adipen ni Jehova, ania ti kangrunaan nga obligasiontayo, ken kasanotayo a maitungpal dayta?
5 Masapul nga agtulnog dagiti adipen kadagiti appoda. Boluntario ti panagserbitayo ken maigapu dayta iti panagayattayo iti Apo. “Daytoy ti kaipapanan ti ayat iti Dios,” kuna ti 1 Juan 5:3, “a tungpalentayo dagiti bilinna; ket kaskasdi a dagiti bilinna saanda a makapadagsen.” No kasta, ti panagtulnogtayo ket pammaneknek ti panagayattayo agraman ti panagpasakuptayo. Agminar dayta iti amin nga aramidentayo. “Uray no mangmangan wenno umin-inum wenno agar-aramidkayo iti aniaman pay a banag,” kinuna ni Pablo, “aramidenyo ti amin a bambanag a maipaay iti dayag ti Dios.” (1 Corinto 10:31) Iti inaldaw, uray kadagiti babassit a banag, kayattay nga ipakita nga ‘adipennatayo ni Jehova.’—Roma 12:11.
6. Kasano a ti panagbalintayo nga adipen ti Dios apektaranna dagiti desisiontayo? Iyilustraryo babaen ti maysa a pagarigan.
6 Kas pagarigan, no agdesisiontayo, kayattayo a siaannad nga ikabilangan ti pagayatan ti nailangitan nga Apotayo, ni Jehova. (Malakias 1:6) Mabalin a masubok ti panagtulnogtayo iti Dios no maipasangotayo kadagiti narigat a desision. Ipangagtayo kadi ti balakadna imbes a suroten ti pagannayasan ti ‘nagulib’ ken “desperado” a pusotayo? (Jeremias 17:9) Ni Melisa, maysa a balasang a Kristiano, ket nabiit pay a nabautisaran idi adda nagarem kenkuana. Kasla nasingpet daytoy a baro ken makipagad-adal iti Biblia kadagiti Saksi ni Jehova. Kaskasdi, maysa a panglakayen ti nakisarita ken ni Melisa maipapan iti kinanainsiriban ti panangsurot iti bilin ni Jehova a makiasawa a mayalubog laeng “iti Apo.” (1 Corinto 7:39; 2 Corinto 6:14) “Saan a nalaka ti agtulnog iti dayta a balakad,” inamin ni Melisa. “Ngem gapu ta nagkariak iti Dios nga aramidek ti pagayatanna, inkeddengko a suroten dagiti nalawag a pagannurotanna.” No panunotenna ti napasamak, kunana: “Imbag laengen ta impangagko ti balakad. Insardeng ti baro ti panagadalna. No nakirelasionak kenkuana, nayasawaak koma itan iti saan a manamati.”
7, 8. (a) Apay a ditay koma pakaseknan unay ti panangay-ayo kadagiti tattao? (b) Iyilustraryo no kasano a maparmek ti panagbuteng iti tao.
7 Kas ad-adipen ti Dios, rumbeng a ditay agpaadipen kadagiti tattao. (1 Corinto 7:23) Pudno, awan kadatayo ti mayat a maipuera, ngem nasken a laglagipentayo a naiduma ti pagalagadan dagiti Kristiano no idilig kadagidiay adda iti lubong. Inyimtuod ni Pablo: “Ikagkagumaak aya nga ay-aywen dagiti tattao?” Ti konklusionna ket: “No tattao pay laeng ti ay-aywek, saanak nga adipen ni Kristo.” (Galacia 1:10) Ditay kayat ti agpaimpluensia tapno laeng maay-ayotayo dagiti tattao. Ania ngarud ti aramidentayo no maipasangotayo iti panangpilit a tumulad?
8 Usigenyo ni Elena, maysa nga agtutubo a Kristiano idiay Espania. Adda dagiti kaklasena nga agdondonar iti dara. Ammoda a ni Elena, a maysa a Saksi ni Jehova, ket saan nga agdonar iti dara wenno agpayalison iti dara. Idi naaddaan iti gundaway a mangilawlawag iti takderna iti intero a klaseda, nagboluntario ni Elena a mangiparang iti maysa a presentasion. “Kinaagpaysuanna, nakaro ti nerbiosko,” kuna ni Elena. “Ngem nagsaganaak a naimbag, ket diak ninamnama dagiti resultana. Nagun-odko ti panagraem ti adu kadagiti kaeskuelaak, ken kinuna kaniak ti mannursurok a magustuanna ti trabaho nga ar-aramidek. Kangrunaan iti amin, maragsakanak ta naidepensak ti nagan ni Jehova ken nailawlawagko dagiti nakaibatayan ti nainkasuratan a takderko.” (Genesis 9:3, 4; Aramid 15:28, 29) Wen, naidumatayo kas ad-adipen ti Dios ken ni Kristo. Kaskasdi, magun-odtayo ti panagraem dagiti tattao no sisasaganatayo a mangidepensa kadagiti patpatientayo iti nadayaw a pamay-an.—1 Pedro 3:15.
9. Ania ti masursurotayo iti anghel a nagparang ken ni apostol Juan?
9 Makatulong met iti panagtalinaedtayo a napakumbaba no silalagiptayo nga ad-adipennatayo ti Dios. Naminsan, kasta unay ti pannakatukay ti rikna ni apostol Juan idi nakitana ti maysa a nakarangranga a sirmata ti nailangitan a Jerusalem ket nagruknoy tapno agdayaw iti sakaanan ti anghel a nagserbi kas pannakangiwat ti Dios. “Agannadka!” kinuna kenkuana ti anghel. “Dika aramiden dayta! Maysaak laeng nga adipen a padam ken pada ti kakabsatmo a mammadto ken dagidiay mangtungtungpal iti sasao daytoy a lukot. Agdaydayawka iti Dios.” (Apocalipsis 22:8, 9) Anian a nagsayaat nga ulidan ti impakita ti anghel kadagiti amin nga adipen ti Dios! Adda dagiti Kristiano a mangtagtagiragsak kadagiti espesial nga annongen iti kongregasion. Nupay kasta, kinuna ni Jesus: “Siasinoman a kayatna ti agbalin a naindaklan kadakayo masapul nga agserbi kadakayo, ket siasinoman a kayatna ti agbalin nga umuna kadakayo masapul nga agbalin nga adipenyo.” (Mateo 20:26, 27) Kas pasurot ni Jesus, amintayo ket ad-adipen.
“Ti Naaramidanmi Isu ti Rebbeng nga Aramidenmi”
10. Mangted kadagiti Nainkasuratan a pagarigan a mangipakita a saan a kanayon a nalaka para kadagiti matalek nga adipen ti Dios ti panangaramid iti pagayatanna.
10 No kadagiti imperpekto a tattao, saan a kanayon a nalaka ti panangaramid iti pagayatan ti Dios. Nagkedked idi ni mammadto a Moises idi binilin ni Jehova a mapanna iruar dagiti annak ti Israel manipud pannakaadipen idiay Egipto. (Exodo 3:10, 11; 4:1, 10) Apaman a naawatna ti bilin nga ipakaammona ti pannakaukom dagiti taga Nineve, “timmakder ni Jonas ket nagtalaw a napan idiay Tarsis manipud iti sanguanan ni Jehova.” (Jonas 1:2, 3) Ni Baruc, ti eskriba a sekretario ni mammadto a Jeremias, inyasugna ti kumarkaro a pannakaupayna. (Jeremias 45:2, 3) Ania ti nasken nga aramidentayo no ti personal a tarigagay wenno kayattayo ket maisupadi iti panangaramid iti pagayatan ti Dios? Sungbatan dayta ti maysa nga ilustrasion ni Jesus.
11, 12. (a) Isalaysayyo iti ababa ti ilustrasion ni Jesus a nailanad iti Lucas 17:7-10. (b) Ania ti masursurotayo iti ilustrasion ni Jesus?
11 Dinakamat ni Jesus ti maysa nga adipen nga agmalmalem a mangay-aywan iti arban ni apona iti tay-ak. Idi nakaawid ti adipen, a nabannog gapu iti 12 oras a panagtrabahona iti nadagsen, saan nga inawis ti apona a makipangan iti naimas a pangrabii. Imbes ketdi, kinuna ti apo: “Isaganaannak tapno makapangrabiiak, ket mangikaweska iti bidang ket agserbika kaniak agingga a malpasak a mangan ken uminum, ket kalpasanna mabalinmon ti mangan ken uminum.” Maasikaso laeng ti adipen dagiti kasapulanna kalpasan a mapagserbianna ti apona. Ingngudo ni Jesus ti ilustrasion babaen iti panangikunana: “Gapuna dakayo met, inton naaramidyon ti amin a bambanag a naituding kadakayo, kunaenyo, ‘Awan kaes-eskanmi nga ad-adipen. Ti naaramidanmi isu ti rebbeng nga aramidenmi.’”—Lucas 17:7-10.
12 Saan nga insalaysay ni Jesus daytoy nga ilustrasion tapno ipakitana a saan nga ipatpateg ni Jehova ti panagserbitayo kenkuana. Nalawag ti kuna ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Hebreo 6:10) Imbes ketdi, ti punto ti pangngarig ni Jesus ket saan a mabalin nga ay-aywen ti adipen ti bagina wenno ipangpangrunana dagiti bukodna a pagnam-ayan. Idi indedikartayo ti biagtayo iti Dios ken pinilitayo ti agbalin nga adipenna, immannugottayo nga iyun-unatayo ti pagayatanna ngem iti bukodtayo a pagimbagan. Masapul nga ipangpangrunatayo ti pagayatan ti Dios.
13, 14. (a) Kadagiti ania a gundaway a mabalin nga isakripisiotayo dagiti personal a pagnam-ayantayo? (b) Apay a rumbeng nga iyun-unatayo ti pagayatan ti Dios?
13 Agkalikagum iti dakkel a panagregget ti regular a panangadal iti Sao ti Dios ken kadagiti publikasion ti “matalek ken masirib nga adipen.” (Mateo 24:45) Nangnangruna a kasapulantayo dayta no saantay a nairuam nga agbasbasa wenno no ti isalsalaysay ti publikasion ket dagiti “nauneg a bambanag ti Dios.” (1 Corinto 2:10) Saan kadi a rumbeng nga iwayaantayo ti personal a panagadal? Nalabit a masapul a disiplinaentayo ti bagitayo nga agtugaw ken adalen a naimbag ti material. No ditay aramiden dayta, kasano koma a masursurotayo a tarigagayan “ti nakired a taraon [nga] agpaay kadagiti nataengan a tattao”?—Hebreo 5:14.
14 Komusta met no agawidtayo a nabannog kalpasan ti agmalem a makapaksuy a trabaho? Nalabit a kasapulan ti panagreggettayo a tumabuno kadagiti Nakristianuan a gimong. Wenno nalabit saantay a naruam a mangasaba kadagiti ganggannaet. Binigbig a mismo ni Pablo nga adda dagiti panawen a mangaskasabatayo ‘maibusor iti pagayatantayo.’ (1 Corinto 9:17) Nupay kasta, rumbeng nga aramidentayo dagita a bambanag gapu ta imbilin dayta ni Jehova—ti ay-ayatentayo a nailangitan nga Apotayo. Ken saantay kadi a naynay a makarikna iti pannakapnek ken pannakabang-ar no nagreggetantayo ti agadal, makigimong, ken mangasaba?—Salmo 1:1, 2; 122:1; 145:10-13.
Dikay Kumita “iti Bambanag iti Likudan”
15. Kasano nga inyulidan ni Jesus ti panagpasakup iti Dios?
15 Impakita ni Jesu-Kristo ti panagpasakupna iti nailangitan nga Amana iti kasayaatan a pamay-an. “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.” (Juan 6:38) Bayat ti panagtuokna iti minuyongan ti Getsemani, inkararagna: “Amak, no mabalin, daytoy a kopa lumabas koma kaniak. Nupay kasta, saan a kas iti pagayatak, no di ket kas iti pagayatam.”—Mateo 26:39.
16, 17. (a) Ania ti rumbeng a panangmatmattayo kadagiti bambanag a tinallikudantayon? (b) Apay a realistiko ni Pablo idi imbilangna nga “adu a basura” dagiti mabalinna koma a nagun-od iti lubong?
16 Kayat ni Jesu-Kristo a salimetmetantayo ti desisiontayo nga agpaadipen iti Dios. Kinunana: “Awan ti tao a nangyiggem ti imana iti arado ket kumita iti bambanag iti likudan ti maikari maipaay iti pagarian ti Dios.” (Lucas 9:62) No agpaadipentayo iti Dios, saan a maiparbeng a pampanunotentayo pay laeng dagiti banag a tinallikudantayon. Imbes ketdi, nasken nga ipategtayo dagiti nasagraptayon gapu ta pinilitayo ti agpaadipen iti Dios. Nagsurat ni Pablo kadagiti taga Filipos: “Pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok. Maigapu kenkuana inawatko ti pannakaipukaw ti amin a bambanag ket ibilangko ida kas adu a basura, tapno magun-odak ni Kristo.”—Filipos 3:8.
17 Panunotenyo ti amin a bambanag nga imbilang ni Pablo a basura ken inwaksina gapu kadagiti naespirituan a gunggona a nasagrapna kas adipen ti Dios. Saanna laeng a tinallikudan dagiti pagnam-ayan iti daytoy a lubong no di ket uray ti posibilidad nga agbalin a lider ti Judaismo. No intultuloy nga inannurot ni Pablo ti Judaismo, nalabit a nagun-odna ti saad a kas ken Simeon, ti anak ni Gamaliel a nangisuro ken Pablo. (Aramid 22:3; Galacia 1:14) Nagbalin ni Simeon a lider dagiti Fariseo ken dakkel ti pasetna—nupay medio nagduadua—iti iyaalsa dagiti Judio maibusor iti Roma idi 66-70 K.P. Natay ni Simeon iti dayta a rinnisiris, nalabit iti ima dagiti panatiko a Judio wenno iti buyot ti Roma.
18. Mangted iti pagarigan no kasano a mangyeg kadagiti gunggona dagiti naespirituan a gapuanantayo.
18 Adu a Saksi ni Jehova ti nangtulad iti ulidan ni Pablo. “Sumagmamano a tawen kalpasan a nagturposak iti kolehio, nagbalinak nga executive secretary ti maysa a nalatak nga abogado idiay London,” kuna ni Jean. “Nagustuak ti trabahok ken dakkel ti sueldok, ngem iti pusok ammok a dakdakkel pay ti maipaayko a panagserbi ken Jehova. Kamaudiananna, immikkatak iti trabahok ket rinugiak ti nagpayunir. Agyamanak ta inaramidko dayta agarup 20 a tawenen ti napalabas! Ad-adda a nagbalin a makapnek ti biagko, banag a di maipaay ti aniaman a trabaho kas sekretaria. Awanen ti sabali pay a makaipaay iti dakdakkel a pannakapnek ngem iti pannakakita no kasano a binalbaliwan ti Sao ni Jehova ti biag ti maysa a tao. Naragsak no adda pasetmo iti dayta. Awan kaimudingan ti ipapaaytayo ken ni Jehova no idilig iti maaw-awattayo kenkuana.”
19. Ania ti nasken a determinasiontayo, ken apay?
19 Mabalin nga agbalbaliw ti kasasaadtayo iti panaglabas ti tiempo, ngem saan nga agbalbaliw ti dedikasiontayo iti Dios. Adipennatayo latta ni Jehova, ket ipabiangna kadatayo no kasano ti kasayaatan a panangusartayo iti panawen, pigsa, talento, ken dadduma nga ik-ikutantayo. Gapuna, ti desision nga aramidentayo mainaig iti dayta ket mangyanninaw iti panagayattayo iti Dios. Ipakitada met no agingga iti ania a sidadaantayo nga agsakripisio. (Mateo 6:33) Aniaman ti kasasaadtayo, saan kadi a rumbeng a determinadotayo a mangipaay iti kasayaatan ken ni Jehova? Insurat ni Pablo: “No ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.”—2 Corinto 8:12.
“Aw-awatenyon ti Bungayo”
20, 21. (a) Aniada a bunga ti patauden dagiti adipen ti Dios? (b) Kasano a gunggonaan ni Jehova dagidiay mangipapaay kenkuana iti kasayaatan a panagserbi?
20 Saan a makapadagsen ti agbalin nga adipen ti Dios. Imbes ketdi, wayawayaannatayo manipud iti mangparigat a kita ti pannakaadipen a mangikkat iti ragsaktayo. “Agsipud ta nawayawayaankayon iti basol ngem nagbalinkayo nga ad-adipen ti Dios,” insurat ni Pablo, “aw-awatenyon ti bungayo no maipapan iti kinasanto, ket ti panungpalanna agnanayon a biag.” (Roma 6:22) Ti panagbalin nga adipen ti Dios ket mangyeg kadagiti nasayaat a bunga mainaig iti kinasanto, kayatna a sawen, apitentayo dagiti gunggona ti nasantuan wenno nadalus iti moral a konduktatayo. Kanayonanna, mangiturong dayta iti biag nga agnanayon iti masanguanan.
21 Naparabur ni Jehova kadagiti adipenna. No ipaaytayo ti kasayaatan a panagserbi kenkuana, luktanna kadatayo “ti aribengbeng ti langlangit” ket ibukbokna kadatayo ti “bendision agingga nga awanen ti panagkasapulan.” (Malakias 3:10) Anian a makaparagsak ti agtultuloy nga agserbi ken ni Jehova kas ad-adipenna iti awan inggana!
Malagipyo Kadi?
• Apay nga agpaadipentayo iti Dios?
• Kasanotay a maipakita nga agpaspasakuptayo iti pagayatan ti Dios?
• Apay a rumbeng a sidadaantayo a mangyun-una iti pagayatan ni Jehova ngem iti bukodtayo a pagimbagan?
• Apay a nasken a ditay ‘kitaen ti bambanag iti likudan’?
[Ladawan iti panid 16, 17]
Ti urnos a boluntario a panagpaadipen idiay Israel ket panirigan ti Nakristianuan a panagserbi
[Ladawan iti panid 17]
Agbalintayo nga adipen ti Dios no agpabautisartayo
[Dagiti Ladawan iti panid 17]
Iyun-una dagiti Kristiano ti pagayatan ti Dios
[Ladawan iti panid 18]
Nagkedked ni Moises a mangawat iti annongenna