Nagballigi ni Samson Babaen ti Pigsa ni Jehova!

ISU ket binulsek ken pinagtrabaho iti nadagsen dagiti managibales a nangtiliw kenkuana. Kalpasanna, inruarda iti pagbaludan ket impanda iti templo dagiti pagano tapno pagkakatawaan ti adu a tattao. Pinuersada nga agparada iti publiko ken inum-umsida. Naibalud idinto ta saan met a kriminal wenno lider dagiti kabusor. Agdaydayaw ni Samson ken ni Jehova ken nagserbi kas ukom iti Israel iti 20 a tawen.

Kasano a ni Samson​—ti kapigsaan a tao a nagbiag​—naisagmak iti kasta a nakababain a kasasaad? Ti kadi naisangsangayan a pigsana ti mangispal kenkuana? Ania ti sekreto ti kinapigsa ni Samson? Ania, no addaman, ti masursurotayo iti pakasaritaanna?

‘Idauluanna ti Pannakaisalakan ti Israel’

Dagiti annak ti Israel namin-adun a nagbaw-ingda manipud iti nasin-aw a panagdayaw. Isu nga idi “inaramidda manen no ania ti dakes kadagiti mata ni Jehova, . . . inyawat ida ni Jehova iti ima dagiti Filisteo iti uppat a pulo a tawen.”​—Uk-ukom 13:1.

Nangrugi ti pakasaritaan ni Samson idi a ti anghel ni Jehova nagparang iti lupes nga asawa ti maysa nga Israelita nga agnagan iti Manoa ket impakaammo ti anghel iti babai nga isu ket agpasngay iti maysa a maladaga a lalaki. “Rebbeng nga awan ti labaha nga umay iti rabaw ti ulona,” imbilin kenkuana ti anghel, “agsipud ta maysa a Nazareo ti Dios ti pagbalinanto ti ubing iti ipapanawna iti tian; ket isunto ti mangidaulo ti panangisalakan iti Israel manipud ima dagiti Filisteo.” (Uk-ukom 13:2-5) Sakbay a nayinaw ni Samson, inkeddeng ni Jehova a maaddaan daytoy a lalaki iti espesipiko nga annongen. Apaman a maipasngay, agbalin ni Samson kas Nazareo​—maysa a napili para iti naisangsangayan a kita ti sagrado a panagserbi.

Isu “Maitutop Kadagiti Matak”

Bayat ti panagdakkel ni Samson, “intuloy a bendisionan ni Jehova.” (Uk-ukom 13:24) Naminsan, immasideg ni Samson iti ama ken inana ket kinunana: “Adda babai a nakitak idiay Timna iti annak dagiti Filisteo, ket ita alaenyo maipaay kaniak a kas asawa.” (Uk-ukom 14:2) Panunotenyo laengen ti pannakaklaatda. Imbes a wayawayaanna ti Israel manipud kadagiti ima dagiti manangirurumen, tinarigagayan ti anakda ti makialiansa kadagiti Filisteo babaen ti pannakiasawa. Maisalungasing iti linteg ti Dios ti pannakiasawa iti babai nga agdaydayaw kadagiti didiosen dagiti pagano. (Exodo 34:11-16) Gapuna, nagkedked dagiti nagannak: “Awan kadi ti babai iti annak a babbai ti kakabsatmo ken kadagiti amin a kailiak, tapno mangalaka iti asawa kadagiti di nakugit a Filisteo?” Kaskasdi, impetteng ni Samson: “Isu latta ti alaem maipaay kaniak, agsipud ta isu laeng ti maitutop kadagiti matak.”​—Uk-ukom 14:3.

Iti ania a pamay-an a “maitutop” ken Samson daytoy a Filisteo a babai? Saan nga iti anag nga isu ket “napintas, makaguyugoy, makaay-ayo,” kinuna ti Cyclopedia da McClintock ken Strong, “no di ket tapno maitungpal ti plano, panggep, wenno ranta.” Tapno maitungpal ti ania a panggep? Ilawlawag ti Uk-ukom 14:4 a ni Samson “mangsapsapul idi iti gundaway maibusor kadagiti Filisteo.” Interesado ni Samson iti babai gapu iti dayta a panggep. Idi nagbalin nga adulto ni Samson, “rinugian a tignayen ti espiritu ni Jehova.” (Uk-ukom 13:25) Ti ngarud espiritu ni Jehova ti nangtignay ken ni Samson nga agkiddaw iti di gagangay a kalikagum a pannakiasawa ken nangiwanwan iti intero a panagbiagna kas ukom ti Israel. Naaddaan kadi ni Samson iti gundaway nga inur-urayna? Usigentayo nga umuna no kasano nga impanamnama ni Jehova ti suportana kenkuana.

Nagdaliasat ni Samson nga agturong iti Timna, ti siudad ti agbalin nga asawana. “Idi nakagteng agingga kadagiti kaubasan ti Timna,” isalaysay ti Kasuratan, “ay ket, adtoy! ti maysa a burboran a bumaro a leon agngerngernger idi masabetna. Idin nagtignay kenkuana ti espiritu ni Jehova, iti kasta pinisangna a ginudua.” Napasamak daytoy a nakaskasdaaw a panangipakita iti pigsa idi agmaymaysa ni Samson. Awan ti nakakita. Dayta kadi ti pamay-an ni Jehova a mangpatalged ken ni Samson a kabaelanna kas Nazareo nga itungpal ti impaannong kenkuana ti Dios? Saan nga ibaga ti Biblia, ngem sigurado a nabigbig ni Samson a saan a naggapu kenkuana dayta a karkarna a pigsa. Naggapu la ketdi iti Dios. Mabalinna ti agpatulong ken ni Jehova iti panangitungpalna iti trabahona. Gapu ta napabileg ni Samson iti napasamak mainaig iti leon, “nagtultuloy a simmalog ket rinugianna ti agsao iti babai; ket kaskasdi nga isu maitutop kadagiti mata[na].”​—Uk-ukom 14:5-7.

Iti panagsubli ni Samson tapno iyawidna ti babai, “simiasi tapno kitaenna ti bangkay ti leon, ket sadiay adda pangen dagiti uyokan iti bangkay ti leon, ken diro.” Idi malagipna daytoy, inyimtuod ni Samson daytoy a burburtia kadagiti 30 a Filisteo a nagbalin nga abayna a lallaki iti kasarna: “Manipud iti managkaan rimmuar ti banag a makan, ket manipud iti napigsa rimmuar ti banag a nasam-it.” No maibagada ti kaipapanan ti burburtia, ikkan ida ni Samson iti 30 a makin-uneg a kawes ken aruaten a pagan-anay. No saan, isu ti ikkanda kadagita a banag. Tallo nga aldaw a pinagpanunot dayta a burburtia da-giti Filisteo. Iti maikapat nga aldaw, binutbutengda ti babai. Kinunada kenkuana: “Sikapam ti asawam tapno ibagana koma kadakami ti burburtia. Ta no saan puorandakanto ken ti balay ni amam iti apuy.” Anian a nagulpitda! No butbutngen dagiti Filisteo dagiti kailianda, panunotenyo laengen ti napeggad a kasasaad dagiti nairurumen nga Israelita!​—Uk-ukom 14:8-15.

Gapu ta napabutngan ti babai, pinilitna ni Samson a mangibaga iti sungbat. Gapu iti kinaawan ti ayat ken kinasungdona ken ni Samson, dagus nga imbagana dayta kadagiti abay a lallaki. Nasungbatanda ti burburtia, ngem ammo ni Samson no apay. Kinunana kadakuada: “No saanyo koma a pinagarado ti urbon a bakak, saanyo koma a nasungbatan ti burburtiak.” Dimteng ngarud ti gundaway nga inur-uray ni Samson. “Nagtignay kenkuana ti espiritu ni Jehova, iti kasta isu simmalog a napan idiay Ascalon ket nangpapatay iti tallopulo a lallaki kadakuada ket innalana ti inuksobna kadakuada ket intedna dagiti aruaten kadagiti nangibaga iti burburtia.”​—Uk-ukom 14:18, 19.

Panagibales kadi ti inaramid ni Samson idiay Ascalon? Saan. Maysa dayta a tignay ti Dios babaen iti pinilina a manangispal. Babaen ken Samson, inyusuat ni Jehova ti dangadang maibusor kadagiti mangirurrurumen iti ilina. Masapul nga agtultuloy daytoy a kampania. Dimteng ti sabali pay a gundaway idi bimmisita ni Samson iti asawana.

Agmaymaysa a Nakidangadang

Iti panagsublina iti Timna, naduktalan ni Samson a ti asawana ket inyasawa ti katuganganna a lalaki iti sabali a lalaki, gapu ta impagarup ti katuganganna a ginura ni Samson ti asawana. Nakapungtot ni Samson. Nangtiliw iti 300 a sora ket ginalutanna ida a sagdudua ken adda aluten iti nagbabaetan dagiti ipusda. Idi naruk-atan dagitoy, nangparnuayda iti uram kadagiti talon, kaubasan, ken kaolibuan, a nangdadael iti tallo a kangrunaan nga anien ti Filistia iti makatawen. Nangipakita iti kinaulpit dagiti nakapungtot a Filisteo. Minatmatanda a basol daytoy ti asawa ken katugangan ni Samson isu a pinuoranda ti agama. Ti naulpit a panagibalesda ket paborable iti panggep ni Samson. Rinautna ngarud ida ket adu ti pinapatayna.​—Uk-ukom 15:1-8.

Natarusan kadi dagiti Israelita a ni Jehova a Dios bembendisionanna ni Samson ket ngarud makikaykaysada kenkuana tapno agpatingga ti panangdominar dagiti Filisteo? Saan a pulos. Tapno maliklikanda ti riribuk, dagiti lallaki ti Juda nangibaonda iti 3,000 a lallaki a mangarestar iti pinili ti Dios a lider tapno iyawatda kadagiti kabusorna. Ngem daytoy a di kinamatalek dagiti Israelita ti nangted iti gundaway ken ni Samson tapno maituloyna ti panangparmekna kadagiti kabusorna. Idi a mayawaten kadagiti Filisteo, “nagtignay kenkuana ti espiritu ni Jehova, ket dagiti tali nga adda kadagiti takiagna nagbalin a kas kadagiti lienso a sinulid a nakset iti apuy, iti kasta nalunag dagiti griliosna manipud im-imana.” Kalpasanna, innalana ti tulang ti panga ti maysa nga asno ket pinasagna ti sangaribu a kabusor babaen iti dayta.​—Uk-ukom 15:10-15.

Inyasug ni Samson ken ni Jehova: “Sika ti nangted itoy naindaklan a pannakaisalakan iti ima ti adipenmo, ket ita matayakto kadi iti waw ket matnagakto iti ima dagiti di nakugit?” Impangag ni Jehova ti kararag ni Samson. “Pinagungap ti Dios ti maysa a sinan-alsong a likkukong . . . , ket nangrugi a rummuar ti danum manipud iti dayta, ket imminum, a kalpasan dayta nagsubli ti espirituna ket naungaran.”​—Uk-ukom 15:18, 19.

Determinado ni Samson iti panangitungpal iti panggepna, ti pannakidangadangna kadagiti Filisteo. Nagtalinaed iti balay ti balangkantis iti Gaza gapu iti panggepna a makiranget kadagiti kabusor ti Dios. Kasapulan ni Samson ti pagdagusan iti rabii iti maysa a siudad dagiti kabusor, ket masarakan dayta iti balay ti maysa a balangkantis. Awan ti imoral a panggep ni Samson. Pinanawanna ti balay ti babai iti tengnga ti rabii, ginammatanna dagiti ruangan ti siudad ken dagiti dua a makin-igid a teddek, ket imbaklayna dagita agingga iti tapaw ti bantay iti asideg ti Hebron, nga agarup 60 a kilometro ti kaadayona. Naaramid dayta buyogen ti anamong ti Dios ken pigsa nga intedna.​—Uk-ukom 16:1-3.

Karkarna ti panagtignay ti nasantuan nga espiritu iti kaso ni Samson gapu kadagiti saan a gagangay a kasasaad. Dagiti matalek nga adipen ti Dios ita mabalinda ti agpannuray iti isu met laeng nga espiritu tapno mapabilegda. Impanamnama ni Jesus kadagiti pasurotna a ni Jehova “mangtedto iti nasantuan nga espiritu kadagidiay agdawdawat kenkuana.”​—Lucas 11:13.

Apay a ni Samson ‘Pinanawan ni Jehova’?

Nagrayo ni Samson iti babai nga agnagan Dalila. Dagiti lima nga aliado nga appo dagiti Filisteo magagaranda unay a mangparmek ken Samson isu a nagpatulongda ken ni Dalila. Napanda ken ni Dalila ket kinunada kenkuana: “Sikapam ket kitaem no ania ti pagtaudan ti dakkel a bilegna ken no ania ti mabalinmi a pangabak kenkuana.” Kas pasuksok, tunggal maysa kadagiti lima nga aliado nga appo ti nangitukon kenkuana iti “sangaribu ket sangagasut a kapisi a pirak.”​—Uk-ukom 16:4, 5.

No dagiti kapisi a pirak ket siklo, ti naitukon a 5,500 a siklo ket dakkel a pasuksok. Nagbayad ni Abraham iti 400 a siklo para iti pakaitabonan ti asawana, ken malako ti maysa nga adipen iti 30 laeng a siklo. (Genesis 23:14-20; Exodo 21:32) Ti inaramid dagiti aliado nga appo​—agtuturay kadagiti lima a siudad dagiti Filisteo​—a panangpasuksok ken ni Dalila imbes a kalikagumanda nga agbalin a nasungdo iti ilina ipasimudaagna nga isu ket maysa nga Israelita. Aniaman kadagita, inawat ni Dalila ti tukon.

Namitlo a daras a biddut ti insungbat ni Samson kadagiti saludsod ni Dalila, ken namitlo a daras a liniputan ti babai tapno matnag iti ima dagiti kabusorna. Ngem “naaramid a gapu ta pinilitna babaen iti sasaona iti amin a gundaway ken ginuyguyugoyna, di nakaanus ti kararuana agingga a matay pay ketdin.” Kamaudiananna, impudno ni Samson no apay a nakapigpigsa​—ti buokna a saan pay a napukisan. No maputed dayta, kumapuy ni Samson ket agbalin a gagangay ti pigsana.​—Uk-ukom 16:6-17.

Dayta ti nangdadael ken ni Samson. Immaniobra ni Dalila nga impakiskis ti ulona. Ngem ti bileg ni Samson ket saan a literal nga adda iti buokna. Ti buokna ti mangirepresentar laeng iti naisangsangayan a relasionna iti Dios kas maysa a Nazareo. Idi intulok ni Samson a maapektaran ti takderna kas Nazareo gapu iti pannakakiskis ti ulona, ‘pimmanaw kenkuana ni Jehova.’ Dagiti Filisteo pinarmekda ngarud ni Samson, binulsekda, ken imbaludda.​—Uk-ukom 16:18-21.

Anian a nagbileg a leksion ti isuro dayta kadatayo! Saan kadi a rumbeng a matmatantayo a nakapatpateg ti relasiontayo ken ni Jehova? No ikompromisotayo ti Nakristianuan a dedikasiontayo iti aniaman a pamay-an, kasanotayo a manamnama nga agtultuloy ti panangbendision kadatayo ni Jehova?

“Bay-am a Matay ti Kararuak a Kadua Dagiti Filisteo”

Dagiti agdirdir-i a Filisteo nagyamanda iti diosda a ni Dagon gapu iti pannakaparmek ni Samson. Iti panangrambak iti balligida, impanda ti kautiboda iti templo ni Dagon. Ngem ammo ni Samson ti pudno a rason ti pannakaabakna. Ammona no apay a pimmanaw kenkuana ni Jehova, ket nagbabawi ni Samson gapu iti pannakapaayna. Bayat ti kaadda ni Samson iti pagbaludan, nangrugi nga umatiddog ti buokna. Ita ta adda iti sanguanan ti rinibu a Filisteo, ania ti aramidenna?

“Soberano nga Apo Jehova,” inyararaw ni Samson, “lagipennak, pangngaasim, ket papigsaennak, pangngaasim, itoy maminsan laengen, O sika a pudno a Dios, ket bay-annak nga ibalesak ti bagik kadagiti Filisteo babaen ti pammales maipaay iti maysa kadagiti dua a matak.” Kalpasanna, insadagna ti bagina iti dua a makintengnga nga adigi ti pasdek, ket “inrukobna ti bagina buyogen ti bileg.” Ti resulta? “Narba ti balay iti rabaw ti aliado nga appo ken iti rabaw dagiti amin nga umili nga adda iti dayta, iti kasta dagiti natay a pinapatayna iti mismo nga ipapatayna ad-adu ngem dagidiay napapatayna bayat ti panagbiagna.”​—Uk-ukom 16:22-30.

Awan ti umartap iti pigsa ni Samson. Talaga a nakaskasdaaw dagiti nabileg a gapuananna. Ngem ti kapatgan, ti Sao ni Jehova ibilangna ni Samson kas maysa kadagiti nabileg ti pammatida.​—Hebreo 11:32-34.

[Ladawan iti panid 26]

Ania ti sekreto ti kinapigsa ni Samson?