Salsaludsod Dagiti Agbasbasa

Maiparbeng kadi a ti maysa a Kristiano ket mangted iti tip wenno regalo iti maysa nga empleado ti gobierno para iti serbisiona, wenno maibilang dayta a panagpasuksok?

Sadinoman ti pagnanaedanda, ikagkagumaan dagiti Kristiano nga iyaplikar ti praktikal a sirib kadagiti kasasaad iti lugarda, a laglagipenda a ti maysa a banag a maawat ken legal iti maysa a pagilian ket mabalin a naan-anay a di maawat ken ilegal iti sabali a pagilian. (Proverbio 2:6-9) Siempre, rumbeng a laglagipen ti Kristiano nga asinoman nga agtarigagay nga agbalin a “sangaili iti tolda [ni Jehova]” nasken a liklikanna ti panagpasuksok.​—Salmo 15:1, 5; Proverbio 17:23.

Ania ti panagpasuksok? Sigun iti The World Book Encyclopedia, “ti panagpasuksok kaipapananna ti panangted wenno panangitukon iti banag nga adda gatadna . . . iti maysa nga opisial ti gobierno, a manglabsing iti pagrebbenganna wenno iti linteg tapno makaipaay iti pabor iti daydiay nangted kenkuana.” No kasta, sadinoman ti pagnanaedantayo, maibilang a panagpasuksok ti panangted iti tip wenno regalo iti maysa a hues wenno polis tapno ballikugenna ti hustisia wenno iti maysa nga inspektor tapno saanna nga aksionan ti maysa a basol wenno panagsalungasing. Panagpasuksok met ti panangted iti regalo tapno makaawat iti espesial a pannakatrato, kas iti pannakayun-una iti listaan dagiti agur-uray wenno pananglaktaw kadagiti dadduma iti maysa a linia. Ti kasta nga aramid ipakitana met ti kinaawan iti panagayat.​—Mateo 7:12; 22:39.

Ngem panagpasuksok kadi ti panangted iti regalo wenno tip, kas pagarigan, iti maysa nga opisial ti gobierno tapno magun-od ti maysa a legal a serbisio wenno tapno maliklikan ti di nainkalintegan a pannakatrato? Kas pagarigan, iti dadduma a pagilian, dagiti opisial mabalin a pagkedkedanda nga awaten ti dadduma nga estudiante, asikasuen ti maysa a tao iti ospital, wenno mangted iti visa agingga a dida makaawat iti tip. Wenno nalabit itantanda ti pannakaproseso dagiti aplikasion nga agpabaro kadagiti lisensia.

Ti kaugalian a panangted iti tip ken ti pangkaaduan a panangmatmat iti dayta ket nagduduma sigun iti lugar. Kadagiti lugar a kaugalian wenno manamnama ti kasta a panagbayad, marikna ti dadduma a Kristiano nga iti sidong ti linteg, awan ti prinsipio ti Biblia a salsalungasingenda no mangtedda iti tip iti maysa nga opisial a mangaramid iti pagrebbenganna. Iti dadduma a lugar, nalabit a dagiti tattao matmatanda pay ketdi ti kasta a panagbayad kas maysa a sagut a mangsupusop iti nababa a sueldo ti maysa nga empleado ti gobierno. Laglagipenyo nga adda nagdumaan ti panangted iti regalo agpaay iti legal a serbisio ken ti panangitukon iti pasuksok agpaay iti ilegal a pabor.

Iti sabali a bangir, adda dagiti Saksi ni Jehova a nupay legal ti serbisio a kidkiddawenda, agkedkedda a mangted iti tip kadagiti inspektor, opisial ti aduana, wenno dadduma pay uray mamatmatan a kaugalian ti kasta a panangted iti regalo. Yantangay agdindinamag dagiti Saksi iti lugarda gapu iti kasta a takderda a naibatay iti konsiensiada ken gapu iti kinamapagpiaranda, matagiragsakda no dadduma ti maysa a serbisio a mabalin laeng a matagiragsak ti kaaduan a tattao no agbayadda.​—Proverbio 10:9; Mateo 5:16.

Kas sumario, tunggal adipen ni Jehova ti rumbeng nga agdesision para iti bagina no mangted iti tip agpaay iti legal a serbisio wenno tapno maliklikanna ti di nainkalintegan a pannakatrato. Kangrunaan iti amin, nasken nga aramidenna ti maysa a banag a di koma mangburibor iti konsiensiana, a di mangyeg iti pakaumsian ti nagan ni Jehova, ken saan a mangitibkol kadagiti dadduma.​—Mateo 6:9; 1 Corinto 10:31-33; 2 Corinto 6:3; 1 Timoteo 1:5.