Report Dagiti Manangiwaragawag iti Pagarian

Panangbirok Kadagidiay Maikari iti Naiputputong a Paset ti Australia

ADDA nalawa ken naiputputong a makin-uneg a paset ti Australia. Iti uneg ti 12 a tawen, awan ti naaramid a panangasaba iti dadduma a paset dayta a nasulinek a lugar. Gapuna, dagiti Saksi ni Jehova idiay Darwin, ti kabesera a siudad ti Northern Territory, nangorganisarda iti siam nga aldaw a nasaknap a kampania a panangasaba tapno birokenda dagiti maikari.​—Mateo 10:11.

Nangrugi ti naannad a panagplano 12 a bulan sakbay ti kampania, agraman ti panagaramidda iti mapa ti lugar a nasurok a 800,000 a kilometro kuadrado​—mamitlo a daras a nalawlawa ngem iti New Zealand. Tapno maaddaan iti ideya no kasano kakaro ti pannakaiputputong dagiti lumugar iti daytoy a nalawa a teritoria, panunotem laengen a ti pribado a kalsada iti maysa a rantso dagiti baka ket agpromedio iti 30 a kilometro manipud iti pagserkan dayta agingga iti balay! Kanayonanna, dadduma a rantso ti agiinnaddayo iti distansia a 300 a kilometro wenno nasursurok pay.

Agdagup iti 145 a Saksi ti boluntario a nakipaset iti kampania. Dadduma ti naggapu iti adayo a lugar a kas iti Tasmania. Dadduma ti simmangpet nga addaan kadagiti lugan a de dual, a nakabalanda kadagiti aruaten iti panagkamping, reserba a partes, ken petrolio. Dagiti dadduma nagusarda kadagiti treyler a mangguyod kadagiti alikamenda. Kanayonanna, dua a bus a tunggal maysa ket makalaon iti 22 katao ti naarkila a mangilugan kadagidiay awanan iti de dual a lugan. Dagidiay naglugan iti bus impamaysada ti nangasaba kadagiti lumugar kadagiti babassit nga ili kadagiti napili a teritoria.

Sakbay ti panagdaliasat, nangyurnos dagiti kakabsat kadagiti palawag ken demostrasion tapno mangipaay iti pagsurotan no kasano nga iparang ti naimbag a damag iti dayta a di gagangay a teritoria. Kas pagarigan, tapno epektibo ti panangasaba kadagiti komunidad dagiti Aborigine, masansan a kasapulan a suroten dagiti masnup a kondukta ken laglagipen dagiti kaugalian dagiti katutubo. Napagsaritaan met ti maipapan iti panangsalaknib kadagiti atap a biag ken ti aglawlaw.

Adu ti natagiragsak nga agkakasayaat a kapadasan. Kas pagarigan, iti maysa a komunidad dagiti Aborigine, nangyurnos dagiti kakabsat iti palawag publiko a naibatay iti Biblia. Ti babai a pannakaulo ti komunidad personal nga impakaammona dayta kadagiti umili. Kalpasanna, 5 a libro ken 41 a broshur ti naipaima kadagiti timmabuno. Iti sabali met a komunidad, adda nakasaritada a maysa nga Aborigine. Adda pay Bibliana a King James Version, ngem daanen ken agpirpirpiren. Idi nayimtuod no ammona ti nagan ti Dios, kinunana nga ammona ket innalana ti daan nga isyu Ti Pagwanawanan iti bulsa ti jacketna. Binasana ti magasin, a nakaadawan ti Marcos 12:30, nga agkuna: “Masapul nga ayatem ni Jehova a Diosmo buyogen ti intero a pusom.” Kinunana, “Magustuak a talaga dayta a kasuratan.” Kalpasan ti napaut a panagsasarita, nangala iti baro a Biblia ken dadduma pay a literatura a naibatay iti Biblia.

Iti asideg ti Gulf of Carpentaria, naginteres iti mensahe ti Pagarian ti maysa a mangimatmaton iti 400,000 nga ektaria a rantso dagiti baka. Idi maipakita kenkuana dagiti publikasion a Ti Librok Dagiti Estoria ti Biblia ken Pannakaammo a Mangiturong iti Biag nga Agnanayon,a inyimtuodna no adda ti aniaman a literatura iti pagsasao a Kriol. Saan a gagangay dayta a kiddaw agsipud ta nupay adu nga Aborigine ti agsasao iti Kriol, manmano ti makabasa iti dayta. Amin gayam dagiti 50 a trabahador iti dayta a rantso ket makabasa iti Kriol. Naragsakan ti mangimatmaton a nangala iti naibatay-Biblia a publikasion iti pagsasao a Kriol, ken siaayat nga impaayna ti numero ti teleponona tapno mabalin a makontak.

Bayat ti siam nga aldaw a nasaknap a panangasaba, agdagup iti 120 a Biblia, 770 a libro, 705 a magasin, ken 1,965 a broshur ti naipaima. Kanayonanna, 720 ti naaramid a panagsarungkar, ken 215 ti nairugi a panagadal iti Biblia.

Wen, mapenpennek met laeng kamaudiananna ti naespirituan a panagbisin ti adu a maikari a tattao iti daytoy a naglawa a lugar.​—Mateo 5:6.

[Footnote]

[Mapa iti panid 30]

(Para iti aktual a pannakaurnosna, kitaem ti publikasion)

AUSTRALIA

NORTHERN TERRITORY

Darwin

Gulf of Carpentaria

Sydney

TASMANIA