Dagiti Pudno a Sursuro—Pakasarakanyo Kadagita?
PATAYYEKEN ti maysa a tao idiay Tibet ti maysa a banag a nakaisuratan ti karkararag. Patienna a maulit dagiti ararawna iti tunggal panagtayyek dayta. Iti maysa a nalawa a pagtaengan idiay India, maysa a bassit a siled ti nairanta para iti puja—panagdayaw a pakaibilangan ti panagdaton iti insenso, sabsabong, ken dadduma pay a banag kadagiti imahen dagiti nadumaduma a dios ken diosa. Iti maysa a nalabor a simbaan idiay Italia, maysa a babai ti agparintumeng iti sanguanan ti imahen ni Maria, ti ina ni Jesus, ket agkararag bayat a nakaiggem iti rosario.
Nalabit a napaliiwyo a mismo ti impluensia ti relihion iti biag dagiti tattao. “Ti relihion . . . ket agtultuloy nga addaan iti dakkel nga impluensia kadagiti kagimongan iti intero a lubong,” kuna ti libro a The World’s Religions—Understanding the Living Faiths. Iti libro a God—A Brief History, kuna ti autor a ni John Bowker: “Awan pay ti aniaman a kagimongan ti tattao a saan a naimpluensiaan iti panamati iti Dios, kaaduanna a dayta ti mangiturturong iti biagda. Pudno dayta uray kadagiti saan a relihioso a kagimongan.”
Kinapudnona, ti relihion inimpluensiaanna ti biag ti riniwriw a tattao. Saan kadi a nabileg dayta a pammaneknek nga adda naespirituan a kasapulan ken tarigagay ti tao? Iti librona a The Undiscovered Self, ti nalatak a sikologo a ni Dr. Carl G. Jung tuktukoyenna ti panagkasapulan ti tao nga agdayaw iti maysa a mannakabalin ken kunana a “naiparangarang dayta iti intero a historia ti sangatauan.”
Kaskasdi, adu a tattao ti di mamati iti Dios wenno di man la aginteres iti relihion. Adda dagiti agduadua wenno mangilibak iti kaadda ti Dios gapu kangrunaanna ta napaay dagiti ammoda a relihion a mangpennek iti naespirituan a kasapulanda. Ti relihion ket nadepinar kas “debosion kadagiti prinsipio; nainget a kinasungdo wenno kinamatalek; kinaserioso; nasungdo a pannakaisinggalut.” Maibatay iti dayta a depinasion, dandani amin a tattao, uray dagiti ateista, ket addaan iti porma ti narelihiosuan a debosion.
Iti rinibribu a tawen a pakasaritaan ti tao, adu a kita ti panagdayaw ti pinadasna tapno mapennekna ti naespirituan a kasapulanna. Nagresulta dayta iti nagadu a nagduduma a narelihiosuan a panangmatmat iti sangalubongan. Kas pagarigan, nupay itantandudo ti dandani amin a relihion ti panamati iti maysa a nabilbileg a mannakabalin, addaanda iti nagduduma a kapanunotan no siasino wenno no ania dayta. Ipagpaganetget met ti kaaduan a relihion ti kinapateg ti pannakaisalakan wenno pannakawayawaya. Ngem nagduduma ti sursuroda no maipapan iti pannakaisalakan ken no kasano ti maisalakan. Gapu ta nagadu dagiti kita dagiti patpatien, kasanotayo a mabigbig dagiti pudno a sursuro a makaay-ayo iti Dios?