Salsaludsod Dagiti Agbasbasa

Apay a maikunatayo a ni Jesus, saan ket a ni Jehova a Dios, ti tuktukoyen dagiti ebkas a “daydiay kakaisuna nga agik-ikut iti imortalidad” ken daydiay “awan maysa kadagiti tattao ti nakakita wenno mabalin a makakita kenkuana”?

Insurat ni apostol Pablo: “Daytoy a pannakaiparangarang ipakitanto ti naragsak ken maymaysa a Mannakabalin nga Agturay kadagiti bukodna a naituding a tiempo, yantangay isu ti Ari dagidiay agturay kas ar-ari ken Apo dagidiay agturay kas ap-appo, daydiay kakaisuna nga agik-ikut iti imortalidad, nga agnanaed iti di maasitgan a lawag, nga awan maysa kadagiti tattao ti nakakita wenno mabalin a makakita kenkuana.”​—1 Timoteo 6:15, 16.

Masansan nga agrason dagiti komentarista iti Biblia: ‘Kasano koma a dagiti ebkas a kas iti “daydiay kakaisuna nga agik-ikut iti imortalidad,” daydiay “maymaysa a Mannakabalin nga Agturay,” ken daydiay “awan maysa kadagiti tattao ti nakakita wenno mabalin a makakita kenkuana” dida tuktukoyen ti Mannakabalin-amin?’ Pudno, mabalin a mausar dagita nga ebkas a mangdeskribir ken ni Jehova. Nupay kasta, ipakita ti konteksto ti 1 Timoteo 6:15, 16 a ni Jesus ti espesipiko a tuktukoyen ni Pablo.

Iti maudi a paset ti bersikulo 14, dinakamat ni Pablo ‘ti pannakaiparangarang ni Apotayo a Jesu-Kristo.’ (1 Timoteo 6:14) Gapuna, idi insurat ni Pablo iti bersikulo 15 a “daytoy a pannakaiparangarang ipakitanto ti naragsak ken maymaysa a Mannakabalin nga Agturay kadagiti bukodna a naituding a tiempo,” tuktukoyenna ti pannakaiparangarang ni Jesus, saan a ni Jehova a Dios. Siasino ngarud daydiay “maymaysa a Mannakabalin nga Agturay”? Agparang a rasonable a panunoten a ni Jesus ti Mannakabalin nga Agturay a tuktukoyen ni Pablo. Apay? Ipakita ti konteksto a ni Pablo idildiligna ni Jesus kadagiti natauan nga agtuturay. Talaga a ni Jesus, kas insurat ni Pablo, “ti Ari dagidiay [natauan nga] agturay kas ar-ari ken Apo dagidiay [natauan nga] agturay kas ap-appo.”a Wen, no idilig kadakuada, ni Jesus ti “maymaysa a Mannakabalin nga Agturay.” Naited ken ni Jesus ti “panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.” (Daniel 7:14) Awan ti asinoman a natauan nga agturay ti makaibaga nga isu ti nakaiturongan dagita a sasao!

Ti met ngay ebkas a “daydiay kakaisuna nga agik-ikut iti imortalidad”? Maminsan pay, ti mapagdildilig ket ni Jesus ken dagiti natauan nga ar-ari. Awan ti asinoman nga agturay ditoy daga ti makaikuna nga isu ket naparaburan iti imortalidad. Ngem maikuna dayta ni Jesus. Insurat ni Pablo: “Ammotayo a ni Kristo, ita ta naibangonen manipud kadagiti natay, saanen a matay; ti ipapatay saanen nga agturay kenkuana.” (Roma 6:9) No kasta, ni Jesus ti kaunaan a natukoy iti Biblia kas daydiay nakaawat iti sagut nga imortalidad. Siempre, idi tiempo nga insurat dayta ni Pablo, ni Jesus ti kakaisuna a nakaawat iti di madadael a biag.

Laglagipentayo met a saan nga umiso no ibaga ni Pablo a ni Jehova laeng ti imortal, yantangay imortal met ni Jesus idi insurat ni Pablo dagita a sasao. Ngem maibaga ni Pablo a ni Jesus laeng ti imortal no idilig kadagiti natauan nga agtuturay.

Kanayonanna, pudno a kalpasan a nagungar ken nagpalangit ni Jesus, “awan maysa kadagiti tattao ti nakakita wenno mabalin a makakita kenkuana.” Pudno, dagiti napulotan nga adalanna makitada ni Jesus kalpasan ti ipapatay ken panagungarda idiay langit kas espiritu a parparsua. (Juan 17:24) Ngem awan ti asinoman a tao ditoy daga ti makakita ken ni Jesus iti naipadayag a kasasaadna. Gapuna, sipupudno a maikuna a sipud idi nagungar ken nagpalangit ni Jesus, “awan maysa kadagiti tattao” ti aktual a nakakita kenkuana.

Pudno a no damo, kasla agaplikar iti Dios ti sasao a masarakan iti 1 Timoteo 6:15, 16. Ngem ti konteksto ti sasao ni Pablo​—agraman ti suporta ti dadduma a teksto​—ipakitana a ni Jesus ti tuktukoyen ni Pablo.

[Footnote]