Maysa a Dios Wenno Tao?

“SIAK ti silaw ti lubong. Ti sumurot kaniak saanto a pulos magna iti sipnget, no di ket ikutannanto ti silaw ti biag.” (Juan 8:12) Sinao dagita ni Jesu-Kristo. Maipapan kenkuana, kinuna ti maysa a nakaadal a tao idi umuna a siglo: “Ti siaannad a naitalimeng kenkuana ket amin a gameng ti sirib ken pannakaammo.” (Colosas 2:3) Kanayonanna, kuna ti Biblia: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Tapno mapennek ti naespirituan a kasapulantayo, nasken a maaddaantayo iti umiso a pannakaammo maipapan ken ni Jesus.

Adu a tattao iti intero a lubong ti nakangngeg iti maipapan ken ni Jesu-Kristo. Saan a mapagduaduaan ti impluensiana iti historia ti sangatauan. Iti kinapudnona, ti kalendario a maus-usar iti kaaduan a paset ti lubong ket naibatay iti tawen a naipagarup a nakaipasngayanna. “Adu a tattao ti mangtukoy iti petsa sakbay dayta a tawen kas B.C., wenno before Christ (kasakbayan ni Kristo),” kuna ti The World Book Encyclopedia. “Usarenda ti A.D., wenno anno Domini (iti tawen ti Apotayo), para kadagiti petsa kalpasan dayta a tawen.”

Kaskasdi, adda dagiti agsusupadi a kapanunotan no siasino ni Jesus. Para kadagiti dadduma, isu ket maysa laeng a naisangsangayan a tao a nalatak iti historia. Ngem dadduma ti agdayaw kenkuana kas mannakabalin-amin a Dios. Dadduma a Hindu impadada ni Jesu-Kristo iti dios dagiti Hindu a ni Krishna, nga ibilang ti adu a tattao kas naglasag a dios. Ni Jesus kadi ket maysa laeng a tao, wenno maysa a rumbeng a dayawen? Siasino a talaga ni Jesus? Naggapuanna? Ania ti personalidadna? Ken sadino ti ayanna ita? Kas makitatayo iti sumaganad nga artikulo, ti libro a naglaon iti adu nga impormasion maipapan ken ni Jesus ti mangipaay kadagiti napudno a sungbat kadagitoy a saludsod.