Ti Subbot Itan-okna ti Kinalinteg ti Dios
KALPASAN ti panagrebelde da Adan ken Eva, impakaammo ni Jehova ti panggepna a mangpataud iti maysa a Bin-i a madunor ti mukodna. (Genesis 3:15) Natungpal daytoy idi a dagiti kabusor ti Dios pinapatayda ni Jesu-Kristo iti kayo a pagtutuokan. (Galacia 3:13, 16) Ni Jesus ket awanan iti basol, yantangay milagro a nayinaw iti aanakan ti maysa a birhen babaen ti pannakabalin ti nasantuan nga espiritu. Gapuna, ti naiparukpok a darana mabalin a mausar kas pangsubbot tapno mawayawayaan dagiti tattao, a nagtawid iti basol ken ipapatay manipud ken Adan.—Roma 5:12, 19.
Awan ti makalapped iti mannakabalin amin a Dios a Jehova a mangitungpal kadagiti panggepna. Kalpasan ti panagbasol ti tao, minatmatan ni Jehova a nayawaten ti pangsubbot iti sangatauan ket mabalinna ti makilangen kadagidiay mangipakita iti pammati iti kaitungpalan dagiti karina. Gapuna, dagiti managbasol a kaputotan ni Adan a kas kada Enoc, Noe, ken Abraham nabalinanda ti nakipagna ken nakigayyem iti Dios ket saanda a tinulawan ti kinasantona.—Genesis 5:24; 6:9; Santiago 2:23.
Nakaaramid iti nadagsen a basol ti dadduma a tattao a naaddaan pammati iti Dios. Ni Ari David ti maysa a pagarigan. ‘Apay,’ nalabit iyimtuodyo, ‘a ni Jehova intultuloyna a binendisionan ni Ari David uray kalpasan ti pannakikamalalana ken ni Bat-seba ken panangipapatayna ken ni Urias nga asawa ni Bat-seba?’ Ti maysa a napateg a makagapu isu ti napudno a panagbabawi ken pammati ni David. (2 Samuel 11:1-17; 12:1-14) Maibatay iti maidatonto pay laeng idi a sakripisio ni Jesu-Kristo, ti Dios mapakawanna ti agbabbabawi a ni David ket kaskasdi a mataginayonna ti kinahustisia ken kinalintegna. (Salmo 32:1, 2) Kas pammaneknek iti daytoy, ilawlawag ti Biblia a ti kasayaatan a maibanag ti subbot ni Jesus ket “tapno maipakita ti [Dios] ti bukodna a kinalinteg, agsipud ta pinakpakawanna dagiti basol a naaramid iti napalabas” ken “iti daytoy agdama a panawen.”—Roma 3:25, 26.
Wen, nakasaysayaat dagiti gunggona a tagtagiragsaken ti sangatauan gapu iti pateg ti dara ni Jesus. Maibatay iti subbot, maaddaan dagiti agbabbabawi a tattao iti nasinged a relasion iti Dios. Kanayonanna, ti subbot luktanna ti gundaway tapno dagiti natay ket mapagungar iti baro a lubong ti Dios. Karamanto kadagita dagiti matalek nga adipen ti Dios a natay sakbay nga indatag ni Jesus ti subbot, ken uray ti adu a natay gapu iti kinaignorante ken di nagdayaw Kenkuana. Kuna ti Biblia: “Addanto panagungar agpadpada dagiti nalinteg ken dagiti nakillo.” (Aramid 24:15) Iti dayta a tiempo, maibatay iti subbot, ipaayan ni Jehova iti agnanayon a biag dagiti natulnog a tattao. (Juan 3:36) Inlawlawag a mismo ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Tagiragsaken ti sangatauan amin dagitoy nga aglaplapusanan a gunggona gapu iti probision ti Dios a daton a pangsubbot.
Nupay kasta, ti kangrunaan a banag maipapan iti subbot ket saan a dagiti gunggona nga itdenna kadatayo. Napatpateg nga amang no ania ti ipaay ti subbot para iti nagan ni Jehova. Paneknekan dayta a ni Jehova ket maysa a Dios a perpekto ti hustisiana, a mabalinanna ti makigayyem kadagiti managbasol a tattao ket kaskasdi a makapagtalinaed a natarnaw ken nasantuan. No saan a pinanggep ti Dios nga ipaay ti subbot, awan koma kadagiti kaputotan ni Adan, uray da Enoc, Noe, ken Abraham, ti mabalin a nakipagna wenno nakigayyem ken ni Jehova. Nabigbig daytoy ti salmista ket insuratna: “No dagiti biddut koma ti siputam, O Jah, O Jehova, siasino ti makapagtakder?” (Salmo 130:3) Anian a yamantayo ken ni Jehova ta imbaonna ditoy daga ti ing-ingungotenna nga Anak ken kasta met ken ni Jesus a situtulok a nangipaay iti biagna kas pangsubbot kadatayo!—Marcos 10:45.