Kasano Katibker ti Panagtalekyo iti Dios?
“Itultuloyyo, ngarud, a sapulen nga umuna ti pagarian.”—MATEO 6:33.
1, 2. Ania ti inaramid ti maysa nga agtutubo mainaig iti trabahona, ken apay?
MAYSA nga agtutubo a lalaki ti agtarigagay nga agpausar iti kongregasion. Ngem saan a regular ti pannakigimongna gapu iti sekular a trabahona. Ania ti inaramidna? Pinasimplena ti biagna, immikkat iti trabahona, ket idi agangay nakabirok iti trabaho a saan a makalapped kadagiti Nakristianuan nga aktibidadna. Ita, basbassit ti sueldona, ngem maipapaayna latta dagiti kasapulan ti pamiliana ken ad-adda a masuportaranna ti kongregasion.
2 Ammoyo kadi no apay a kasta ti inaramid dayta nga agtutubo? Kasta met kadi ti aramidenyo no addakayo iti umasping a kasasaad? Makomendaran ta adu a Kristiano ti nangaramid iti kasta, ket ipakita dagiti tignayda nga agtalekda iti kari ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” (Mateo 6:33) Agtalekda a ni Jehova ti makaipaay iti kinatalged, saan a ti sekular a lubong.―Proverbio 3:23, 26.
3. Apay a pampanunoten ti dadduma no praktikal pay laeng nga iyun-una ti Pagarian?
3 Gapu ta narigat ti panawen a pagbibiagantayo, mabalin nga agduadua ti dadduma no nainsiriban met laeng ti desision nga inaramid ti agtutubo. Iti kaaldawantayo, adda dagiti tattao nga agsagsagaba iti nakaro a kinapanglaw idinto ta adda dagidiay mangtagtagiragsak iti nakasalsaliwanwan a biag. Kaaduan kadagidiay agnanaed kadagiti napanglaw a pagilian ti sigagagar a manggundaway iti aniaman nga oportunidad a mamagbalin a nanamnam-ay ti biagda. Iti sabali a bangir, adu kadagidiay agnanaed kadagiti nabaknang a pagilian ti makarikna iti rigat ti panangtaginayon iti estilo ti panagbiagda gapu iti kumapkapuy nga ekonomia, saan a natalged a pagtrabahuan, ken dagiti uming-inget nga amo. Gapu kadagiti rigat mainaig iti panangged, mabalin a panunoten ti dadduma, ‘Praktikal pay laeng ngata nga iyun-una ti Pagarian?’ Tapno masungbatan dayta a saludsod, usigenyo ti kasasaad dagiti agdengdengngeg idi ken ni Jesus.
“Isardengyo ti Maringgoran”
4, 5. Ania nga ilustrasion ni Jesus ti mangipakita a nainrasonan a liklikan dagiti adipen ti Dios ti nalabes a pannakaringgor kadagiti inaldaw a kasapulanda?
4 Adda idi ni Jesus idiay Galilea, a kasarsaritana ti dakkel a tallaong a naggapu iti adu a lugar. (Mateo 4:25) Manmano laeng ti nabaknang kadakuada, no adda man. Agparang a napanglaw ti kaaduan kadakuada. Kaskasdi, indagadag ni Jesus a dida iyun-una ti panagurnong iti material a kinabaknang no di ket agurnongda iti banag nga adayo a napatpateg―ti naespirituan a kinabaknang. (Mateo 6:19-21, 24) Kinunana: “Isardengyo ti maringgoran maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto. Saan kadi a napatpateg ti kararua ngem iti taraon ket ti bagi ngem iti pagan-anay?”—Mateo 6:25.
5 Nalabit a pinanunot ti adu kadagidiay nga agdengdengngeg a saan a praktikal ti balakad ni Jesus. Ammoda a no saanda nga igaed ti agtrabaho, agsagaba ti pamiliada. Nupay kasta, ni Jesus impalagipna kadakuada ti maipapan kadagiti tumatayab. Inaldaw nga agbirokda iti pagbiagda ngem kaskasdi nga aywanan ida ni Jehova. Impatuldo met ni Jesus ti panangaywan ni Jehova kadagiti balang a sabong, a ti pintasda ket mangringbaw iti kinadaeg ni Solomon iti isuamin a kinadayagna. No aywanan ni Jehova dagiti tumatayab ken sabsabong, saan kadi nga ad-adda nga aywanannatayo? (Mateo 6:26-30) Kas kinuna ni Jesus, ti biag (kararua) ken bagitayo ket adayo a napatpateg ngem kadagiti taraon a gatgatangentayo tapno adda pagbiagtayo ken dagiti pagan-anay a gunggon-odentayo tapno adda pagkawestayo. Maikapistayo iti mismo a panggep ti biag no ti amin a pigsatayo ket busbosentayo laeng iti panangbirok iti taraon ken pagkawestayo, a tedtedda laengen ti usarentayo nga agserbi ken ni Jehova.―Eclesiastes 12:13.
Natimbeng a Panangmatmat
6. (a) Ania ti responsabilidad dagiti Kristiano? (b) Siasino ti naan-anay a pagkammatalkan dagiti Kristiano?
6 Siempre, saan nga iparparegta ni Jesus kadagiti agdengdengngeg kenkuana nga isardengda ti agtrabaho ket urayenda lattan a ti Dios ti mangipaay kadagiti kasapulan dagiti pamiliada. Dagiti mismo a tumatayab masapul nga agbirokda iti taraon agpaay kadakuada ken kadagiti sibongda. Gapuna, masapul nga agtrabaho dagiti Kristiano no kayatda ti mangan. Rumbeng nga ibaklayda dagiti responsabilidadda iti pamiliada. Dagiti nagkauna a Kristiano nga adipen nasken a sigagaget a pagserbianda dagiti apoda. (2 Tesalonica 3:10-12; 1 Timoteo 5:8; 1 Pedro 2:18) Masansan nga agaramid ni apostol Pablo kadagiti tolda tapno adda pangsuportana iti bagina. (Aramid 18:1-4; 1 Tesalonica 2:9) Kaskasdi, saan a pinanunot dagidi a Kristiano a ti sekular a trabaho ti makaipaay iti kinatalged. Nagtalekda ketdi ken ni Jehova. Kas resultana, naaddaanda iti talna ti panunot nga awan kadagiti dadduma. Kinuna ti salmista: “Dagidiay agtalek ken Jehova kaslada iti Bantay Sion, a saan a mapagdiwengdiweng, no di ket agnaed agingga iti tiempo a di nakedngan.”—Salmo 125:1.
7. Ania ti mabalin a panangmatmat ti maysa a di naan-anay nga agtalek ken ni Jehova?
7 Mabalin a sabali ti panangmatmat ti maysa a saan a naan-anay nga agtalek ken ni Jehova. Kaaduan a tattao ti mangmatmat iti material a kinabaknang kas ti kangrunaan a tulbek ti kinatalged. Gapuna, imparegta dagiti nagannak kadagiti annakda a busbosen dagitoy ti dakkel a paset ti kinaagtutuboda iti pananggun-od iti nangatngato nga edukasion, a namnamaenda a dayta ti mangilukat kadakuada kadagiti trabaho a mangitukon iti dakdakkel a sueldo. Nakalkaldaang ta gapu iti adu a panawen ken panagregget a binusbosda iti nangatngato nga edukasion, dakkel ti napukaw ti dadduma a Kristiano a pamilia—napukaw dagiti annakda ti naespirituan a kinatimbengda gapu kadagiti materialistiko a kalat.
8. Ania a kinatimbeng ti tagtaginayonen dagiti Kristiano?
8 No kasta, dagiti masirib a Kristiano bigbigenda nga agaplikar met ita ti balakad ni Jesus, no kasano a nagaplikar dayta idi umuna a siglo, ket ikagkagumaanda a taginayonen ti kinatimbengda. Uray pay no masapul a busbosenda ti adu nga oras iti sekular a trabahoda tapno maitungpalda dagiti Nainkasuratan nga annongenda, dida pulos ipalubos a mabaybay-anda dagiti napatpateg a naespirituan a bambanag gapu laeng ta kasapulan ti agbirok iti kuarta.―Eclesiastes 7:12.
“Dikay Pulos Maringgoran”
9. Ania ti pammabileg ni Jesus kadagidiay naan-anay nga agtalek ken ni Jehova?
9 Iti Sermonna iti Bantay, indagadag ni Jesus kadagiti agdengdengngeg kenkuana: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo.” (Mateo 6:31, 32) Anian a makapabileg a sasao! Kanayon a saranayennatayo ni Jehova no naan-anay nga agtalektayo kenkuana. Nupay kasta, mamagpanunot met ti sasao ni Jesus. Ipalagipda kadatayo a no “sigagagar” a sapulentayo dagiti material a bambanag, ti panagpampanunottayo ket umasping iti panagpampanunot “dagiti nasion,” dagiti saan a pudno a Kristiano.
10. Idi nagpabalakad ken ni Jesus ti maysa nga agtutubo, kasano nga impalgak ni Jesus no ania ti kangrunaan nga ipatpateg ti agtutubo?
10 Naminsan, maysa a nabaknang nga agtutubo ti nagimtuod ken ni Jesus no ania ti rumbeng nga aramidenna tapno magun-odna ti biag nga agnanayon. Impalagip kenkuana ni Jesus dagiti kalkalikaguman ti Linteg, a maan-annurot pay laeng iti daydi a panawen. Ti agtutubo impasiguradona ken ni Jesus: “Sinalimetmetakon amin dagitoy; ania pay ti pagkurangak?” No kadagiti adu a tattao, mabalin a saan a praktikal ti sungbat ni Jesus. Kinunana: “No kayatmo ti agbalin a naan-anay, inka ilako dagiti sanikuam ket itedmo kadagiti napanglaw ket maaddaankanto iti gameng idiay langit, ket umayka agbalinka a pasurotko.” (Mateo 19:16-21) Nalpay a pimmanaw ti agtutubo, ta dina maitured a mapukaw ti kinabaknangna. Kasano man kadakkel ti panagayatna ken ni Jehova, ad-adda nga inayatna dagiti ik-ikutanna.
11, 12. (a) Ania dagiti mamagpanunot a sasao ni Jesus maipapan iti kinabaknang? (b) Kasano a dagiti ik-ikutan agbalinda a lapped iti panagserbi ken ni Jehova?
11 Dayta a pasamak ti makagapu no apay a di ninamnama a kinuna ni Jesus: “Nakarigrigatto a banag iti maysa a nabaknang a tao ti iseserrek iti pagarian ti langlangit. . . . Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios.” (Mateo 19:23, 24) Ibagbaga kadi ni Jesus nga awan ti nabaknang nga agtawid iti Pagarian? Saan, ta intuloyna a kinuna: “Iti Dios amin a bambanag mabalin.” (Mateo 19:25, 26) Kinapudnona, babaen ti tulong ni Jehova, adda dagiti nabaknang a nagbalin a napulotan a Kristiano. (1 Timoteo 6:17) Nupay kasta, adda naimbag a rason no apay a naibaga ni Jesus dagita a di ninamnama a sasao. Isu ket mangpakpakdaar.
12 No ti maysa a tao ket kas iti nabaknang nga agtutubo a kasta unay ti panangipategna kadagiti ik-ikutanna, posible a dagita ti agbalin a lapped iti naimpusuan a panagserbina ken ni Jehova. Mabalin a pudno dayta agpadpada iti maysa a nabaknangen ken iti maysa a “determinado a bumaknang.” (1 Timoteo 6:9, 10) Ti nalabes a panagtalek ti maysa a tao kadagiti material a bambanag ti mamagbalin kenkuana a saanto unayen a ‘sipapanunot iti naespirituan a kasapulanna.’ (Mateo 5:3) Kas resultana, nalabit a mariknana a saanna unay a kasapulan ti tulong ni Jehova. (Deuteronomio 6:10-12) Mabalin a namnamaenna nga espesial ti pannakatratona iti kongregasion. (Santiago 2:1-4) Ken mabalin nga ad-adu ti busbosenna a panawen a mangtagiragsak iti kinabaknangna ngem iti panagserbina ken ni Jehova.
Maaddaan iti Umiso a Panangmatmat
13. Ania ti di umiso a panangmatmat dagiti taga-Laodicea?
13 Ti maysa a grupo a di umiso ti panangmatmatna kadagiti ik-ikutan isu ti kongregasion ti Laodicea idi umuna a siglo. Kinuna kadakuada ni Jesus: “Kunam: ‘Nabaknangak ket nakagun-odak iti kinabaknang ket saanko a pulos kasapulan ti aniaman a banag,’ ngem saanmo nga ammo a nakaay-ay-ay ken nakakaasi ken napanglaw ken bulsek ken lamolamoka.” Saan a ti kinabaknangda ti makagapu a naisagmak dagiti taga-Laodicea iti kasta a nakaay-ay-ay a naespirituan a kasasaad. Ti makagapu ket ti panagtalekda iti kinabaknang imbes a ken ni Jehova. Kas resultana, apaganem-emda iti naespirituan, a dandani ‘isarwa’ ida ni Jesus.―Apocalipsis 3:14-17.
14. Apay a kinomendaran ni Pablo dagiti Hebreo a Kristiano?
14 Iti sabali a bangir, kinomendaran ni Pablo dagiti Hebreo a Kristiano gapu iti kababalinda kabayatan ti maysa a panawen ti pannakaidadanes. Kinunana: “Agpadpada nga inyebkasyo ti pannakipagrikna kadagidiay sibabalud ken sirarag-o nga inawatyo ti pannakasamsam dagiti sanikuayo, yantangay ammoyo nga addaankayo iti nasaysayaat ken mataginayon a sanikua.” (Hebreo 10:34) Saan a napaay dagidi a Kristiano idi napukawda dagiti sanikuada. Nataginayonda ti rag-oda gapu ta pinetpetanda ti kapatgan a sanikuada, ti ‘nasaysayaat ken mataginayon a sanikuada.’ Kas iti komersiante iti pangngarig ni Jesus a nangisakripisio iti amin a banag gapu iti maysa a nabalor a perlas, determinadoda a mangpetpet iti namnamada iti Pagarian, aniaman ti mapasamak. (Mateo 13:45, 46) Anian a nagsayaat a kababalin!
15. Kasano a ti maysa a Kristiano a babai idiay Liberia inyun-unana dagiti interes ti Pagarian?
15 Adu met ita ti addaan iti kasta a nasayaat a kababalin. Idiay Liberia, kas pagarigan, maysa a Kristiano nga agtutubo a babai ti naikkan iti gundaway nga agadal iti maysa nga unibersidad. Iti dayta a pagilian, ti kasta a tukon ket mamatmatan kas maysa a pamay-an tapno maaddaan iti natalged a masanguanan. Nupay kasta, isu ket payunir, maysa nga amin-tiempo nga ebanghelisador, ken naawis nga agserbi kas temporario nga special pioneer. Pinilina nga iyun-una ti Pagarian isu a nagtalinaed iti amin-tiempo a panagserbi. Napan iti nakaibaonanna a teritoria ket nakairugi iti 21 a panagadal iti Biblia iti las-ud ti tallo a bulan. Daytoy nga agtutubo a kabsat ken rinibu a kas kenkuana ti nangyun-una iti Pagarian, uray pay no mapukawda ti gundaway a rumang-ay iti material. Kasanoda a masalsalimetmetan ti kasta a kababalin iti daytoy materialistiko a lubong? Inkagumaanda ti maaddaan kadagiti agkakaimbag a galad. Usigentayo ti dadduma kadagita.
16, 17. (a) Apay a napateg ti kinaemma no agtalektayo ken ni Jehova? (b) Apay a nasken nga agtalektayo kadagiti kari ti Dios?
16 Kinaemma: Kuna ti Biblia: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam. Dika agmasirib kadagiti bukodmo a mata.” (Proverbio 3:5-7) No dadduma, kasla praktikal ti maysa a kurso no ibatay iti panangmatmat ti tao. (Jeremias 17:9) Nupay kasta, agpaiwanwan ken ni Jehova ti maysa a napasnek a Kristiano. (Salmo 48:14) ‘Iti amin a daldalanna’―bambanag mainaig iti kongregasion, edukasion wenno sekular a trabaho, panagaliwaksay, wenno iti aniaman a banag―sieemma a birokenna ti balakad ni Jehova.―Salmo 73:24.
17 Panagtalek kadagiti kari ni Jehova: Kinuna ni Pablo: “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) No agduaduatayo a tungpalen ni Jehova dagiti karina, mabalin a mapanunottayo a kasla rasonable no ‘naan-anay nga usarentayo ti lubong.’ (1 Corinto 7:31) Iti sabali a bangir, no natibker ti pammatitayo, agbalintayo a determinado a mangyun-una iti Pagarian. Kasanotayo a maaddaan iti natibker a pammati? Babaen ti kanayon ken naimpusuan a panagkararag ken ni Jehova tapno mayadanitayo kenkuana ken babaen ti regular a personal a panagadal. (Salmo 1:1-3; Filipos 4:6, 7; Santiago 4:8) Kas ken Ari David, ikararagtayo: “Inkabilko kenka ti panagtalekko, O Jehova. Kinunak: ‘Sika ti Diosko.’ Anian a kinaruay ti kinaimbagmo!”—Salmo 31:14, 19.
18, 19. (a) Kasano a ti kinasaet patibkerenna ti panagtalektayo ken ni Jehova? (b) Apay a rumbeng a sidadaan nga agsakripisio ti maysa a Kristiano?
18 Naregta a panagserbi iti Dios: Ni Pablo pinagnaigna ti kinasaet ken ti panagtalek kadagiti kari ni Jehova idi insuratna: “Tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan.” (Hebreo 6:11) Saranayennatayo ni Jehova no okupadotayo iti panagserbi kenkuana. Iti tunggal gundaway a matagiragsaktayo ti saranayna, ad-adda a tumibker ti panagtalektayo kenkuana, agbalintayo a “natibker, di magaraw.” (1 Corinto 15:58) Mapabileg ti pammatitayo, ken mapatalgedan ti namnamatayo.―Efeso 3:16-19.
19 Sidadaan nga agsakripisio: Insakripisio ni Pablo ti maysa a manamnama a narang-ay a karera tapno masurotna ni Jesus. Nalawag nga umiso ti pangngeddengna, uray pay no adda dagiti gundaway a nagpasar iti rigat iti material. (1 Corinto 4:11-13) Saan nga ikarkari ni Jehova ti maysa a naluho a biag, ken no dadduma agsagaba iti rigat dagiti adipenna. Ngem ti panagbalintayo a sidadaan a mangpasimple iti estilo ti panagbiagtayo ken mangaramid kadagiti panagsakripisio ket pammaneknek a natibker ti determinasiontayo nga agserbi ken ni Jehova.―1 Timoteo 6:6-8.
20. Apay a napateg nga aganus ti maysa a mangyun-una kadagiti interes ti Pagarian?
20 Kinaanus: Indagadag ni adalan a Santiago kadagiti pada a Kristiano: “Watwatenyo ti kinaanus, kakabsat, agingga iti kaadda ti Apo.” (Santiago 5:7) Iti daytoy naagawa a lubong, nagrigat ti aganus. Kayattayo a malpas a dagus dagiti bambanag. Ngem idagadag kadatayo ni Pablo a tuladentayo dagidiay “babaen ti pammati ken kinaanus tawidenda dagiti kari.” (Hebreo 6:12) Sidadaan koma nga urayenyo ti inkari ni Jehova a biag nga agnanayon iti paraiso a daga. Sigurado a saan a sayang ti panaguray iti dayta!
21. (a) Ania ti ipakpakitatayo no iyun-unatayo dagiti interes ti Pagarian? (b) Ania ti mausig iti sumaganad nga artikulo?
21 Wen, praktikal ti balakad ni Jesus a sapulen nga umun-una ti Pagarian. No aramidentayo dayta, ipakpakitatayo a pudpudno nga agtalektayo ken ni Jehova ken pinilitayo ti kakaisuna a natalged a wagas ti panagbiag a rumbeng a salimetmetan ti maysa a Kristiano. Nupay kasta, binalakadannatayo met ni Jesus nga itultuloytayo a ‘sapulen nga umuna ti kinalinteg ti Dios.’ Iti sumaganad nga artikulo, makitatayo no apay a kasapulantayo unay ita dayta a pammaregta.
Mailawlawagyo Kadi?
• No maipapan kadagiti material a bambanag, ania a kinatimbeng ti imparegta ni Jesus a taginayonentayo?
• Ania ti maadaltayo iti ilustrasion ni Jesus mainaig iti kamelio ken iti abut ti dagum?
• Ania dagiti Nakristianuan a galad a tumulong kadatayo a mangyun-una iti Pagarian ti Dios?
[Ladawan iti panid 21]
Napanglaw ti adu kadagidiay agdengdengngeg ken ni Jesus
[Ladawan iti panid 23]
Ti nabaknang nga agtutubo ad-adda nga inayatna dagiti sanikuana imbes a ti Dios
[Ladawan iti panid 23]
Ti komersiante iti pangngarig ni Jesus insakripisiona ti amin a banag gapu iti maysa a nabalor a perlas
[Ladawan iti panid 24]
Saranayennatayo ni Jehova no okupadotayo nga agserserbi kenkuana