Salsaludsod Dagiti Agbasbasa
Malaksid kadagiti dua a tapi ti bato, adda pay kadi dagiti sabali a linaon ti lakasa ti tulag?
Idi naidedikar ti templo ni Solomon idi 1026 K.K.P., ‘awan ti aniaman a banag iti Lakasa no di ti dua a tapi nga inted ni Moises idiay Horeb, idi nakitulag ni Jehova iti annak ti Israel bayat a rumrummuarda manipud Egipto.’ (2 Cronicas 5:10) Ngem saan a kanayon a kasta.
“Iti maikatlo a bulan kalpasan a rimmuar ti annak ti Israel manipud daga ti Egipto,” simrekda iti let-ang ti Sinai. (Exodo 19:1, 2) Kalpasanna, napan ni Moises idiay Bantay Sinai ket inawatna ti dua a tapi ti bato a nakailanadan ti Linteg. Insalaysayna: “Kalpasanna nagbaw-ingak ket simmalogak iti bantay ket inkabilko dagiti tapi iti lakasa nga inaramidko, tapno agtalinaedda sadiay, kas iti imbilin kaniak ni Jehova.” (Deuteronomio 10:5) Daytoy ket temporario a lakasa, wenno pagikargaan, nga impaaramid ni Jehova ken ni Moises tapno adda pakaikabilan dagiti tapi ti Linteg. (Deuteronomio 10:1) Sa la naaramid ti lakasa ti tulag idi arinunos ti 1513 K.K.P.
Di nagbayag kalpasan ti pannakaisalakanda manipud Egipto, dagiti Israelita ket nangrugin nga agtanabutob maipapan iti taraon. Isu nga impaayan ida ni Jehova iti manna. (Exodo 12:17, 18; 16:1-5) Iti dayta a tiempo, ni Moises binilinna ni Aaron: “Mangalaka iti karamba ket ikabilmo iti dayta ti sangaomer a manna ket idulinmo iti sanguanan ni Jehova kas maysa a banag a maidulin iti intero a kapkaputotanyo.” Kuna ti salaysay: “Kas iti imbilin ni Jehova ken Moises, indulin ni Aaron iti sanguanan ti Pammaneknek [natalged a pagidulinan kadagiti napateg a dokumento] kas maysa a banag a maidulin.” (Exodo 16:33, 34) Nupay awan duadua a nagurnong ni Aaron iti manna nga inkabilna iti maysa a karamba, sa la naidulin dayta iti sanguanan ti Pammaneknek idi nakaaramid ni Moises iti Lakasa ken naikabilen iti unegna dagiti tapi.
Kas nadakamaten, naaramid ti lakasa ti tulag idi arinunos ti 1513 K.K.P. Ti sarukod ni Aaron ket nabayag pay sakbay a naikabil iti Lakasa, idi laeng kalpasan ti panagrebelde da Kore ken dagiti dadduma. Dinakamat ni apostol Pablo “ti lakasa ti tulag . . . , nga ayan ti nabalitokan a karamba nga addaan iti manna ken ti nagsaringit a sarukod ni Aaron ken dagiti tapi ti tulag.”—Hebreo 9:4.
Ti manna ket probision ti Dios agpaay kadagiti Israelita bayat ti 40 a tawen a panagtaengda idiay let-ang. Nagsardeng ti pannakaipaay daytoy idi “nangrugida a mangan iti sumagmamano kadagiti apit ti daga” a naikari. (Josue 5:11, 12) Ti pannakaikabil ti sarukod ni Aaron iti lakasa ti tulag ket adda panggepna—tapno agserbi a pagilasinan wenno pammaneknek maibusor kadagiti rebelioso a kaputotan. Ipakita daytoy a ti sarukod ket nagtalinaed sadiay bayat ti panagdaliasatda idiay let-ang. Agparang ngarud a rasonable a kunaentayo a sumagmamano a tiempo kalpasan ti iseserrek dagiti Israelita iti Naikari a Daga ken sakbay ti panangidedikar ni Solomon iti templo, ti sarukod ni Aaron ken ti nabalitokan a karamba ti manna ket naikkat manipud iti lakasa ti tulag.