“Pangsaksi Kadagiti Amin a Nasion”

“Dakayto dagiti saksik . . . agingga iti kaadaywan a paset ti daga.”​—ARAMID 1:8.

1. Kaano ken sadino a damo a nangngeg dagiti adalan ti padto a nailanad iti Mateo 24:14?

PAMILIAR ti sasao ni Jesus a nailanad iti Mateo 24:14 nga uray la memoriado dayta ti adu kadatayo. Ken anian a naisangsangayan dayta a padto! Panunotenyo laengen no ania ti narikna dagiti adalan idi damo a mangngegda dayta! Tawen ti 33 K.P. idi. Agarup tallo a tawen a dagiti adalan nakaduada ni Jesus, ket ita kaduada a napan idiay Jerusalem. Nakitada dagiti milagro nga inaramidna ken nangngegda dagiti pannursurona. Nupay pakaragsakanda dagiti agkakapateg a kinapudno nga insuro kadakuada ni Jesus, ammoda a saan nga amin ket naragsakan iti dayta. Adda dagiti nabileg ken naimpluensia a tattao a bumusbusor ken ni Jesus.

2. Ania dagiti peggad ken karit a sanguen dagiti adalan?

² Iti Bantay dagiti Olibo, situtugaw a kadua ni Jesus ti uppat nga adalanna, nga umim-imdeng a naimbag kenkuana bayat a sarsaritaenna dagiti umad-adani a peggad ken karit a sanguenda. Immun-unan nga imbagana kadakuada nga isu ket mapapatay. (Mateo 16:21) Ngem iti dayta a kanito, nalawag nga imbagana a mapasarandanto met ti naulpit nga ibubusor. “Dagiti tattao iyawatdakayto iti rigat ken papatayendakayto,” kinunana. “Ket puntiriakayto ti pananggura ti amin a nasnasion maigapu iti naganko.” Saan laeng a dayta. Dagiti ulbod a mammadto iyaw-awanda ti adu. Addanto dagidiay maitibkol ken aglilinniput ken aggiginnura. “Ad-adu” pay ketdi dagidiay bumaaw ti panagayatda iti Dios ken iti Saona.―Mateo 24:9-12.

3. Apay a pudno a nakaskasdaaw ti sasao ni Jesus a masarakan iti Mateo 24:14?

³ Kalpasan a dinakamat ni Jesus dagita a makapaladingit a kasasaad, adda sinaona a namagsiddaaw kadagiti adalanna. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Wen, agtultuloy ken agsaknap iti intero a lubong ti trabaho a rinugian ni Jesus idiay Israel―ti ‘panangsaksi iti kinapudno.’ (Juan 18:37) Anian a naisangsangayan a padto! Maysa a karit ti panangisaknap iti dayta a trabaho “kadagiti amin a nasion”; kasapulan la ketdi ti milagro tapno maibanag dayta a trabaho iti laksid ti “pananggura ti amin a nasion.” No maitungpal daytoy nga annongen, maitandudo saan laeng a ti kinasoberano ken pannakabalin ni Jehova no di ket uray ti ayat, asi, ken anusna. Maysa pay, mangted met dayta iti gundaway kadagiti adipenna tapno maipakitada ti pammati ken debosionda.

4. Siasino dagiti nakaitalkan ti trabaho a panangsaksi, ken kasano a liniwliwa ida ni Jesus?

⁴ Awan duadua a nakadakdakkel ti trabaho nga intalek ni Jesus kadagiti adalanna. Sakbay a nagpalangit, nagparang kadakuada ni Jesus ket kinunana: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Siempre, umadunto ti kakaduada. Ngem kabayatanna, manmanoda pay laeng. Makaliwliwa la ketdi idi maammuanda a pabilgen ida ti mannakabalin a nasantuan nga espiritu ti Dios tapno maitungpalda daytoy a nadiosan nga annongen!

5. Ania ti saan nga ammo dagiti adalan no maipapan iti trabaho a panangsaksi?

⁵ Ammo dagiti adalan a nasken nga ikasabada ti naimbag a damag ken ‘mangaramidda iti ad-adalan kadagiti tattao iti amin a nasion.’ (Mateo 28:19, 20) Ngem saanda nga ammo no kasano kasaknap ti maipaay a panangsaksi, ken dida ammo no kaano a dumteng ti panungpalan. Uray datayo ditay met ammo. Ni Jehova laeng ti makaammo kadagita. (Mateo 24:36) No mapneken ni Jehova iti naipaay a panangsaksi, pagpatinggaennan daytoy dakes a sistema ti bambanag. Iti daytanto laeng a kanito a maammuan dagiti Kristiano a nalpasen ti trabaho a panangasaba iti kasaknap a pinanggep ni Jehova. Saan nga ammo dagidi a nagkauna nga adalan no kasano kasaknap ti panangsaksi a nasken a maipaay iti daytoy tiempo ti panungpalan.

Ti Naipaay a Panangsaksi Idi Umuna a Siglo

6. Ania ti napasamak idi Pentecostes 33 K.P. ken di nagbayag kalpasanna?

⁶ Idi umuna a siglo, nakaskasdaaw dagiti resulta ti trabaho a panangikasaba iti Pagarian ken panangaramid iti adalan. Idi aldaw ti Pentecostes 33 K.P., agarup 120 nga adalan ti adda iti makinngato a siled idiay Jerusalem. Naiparukpok kadakuada ti nasantuan nga espiritu ti Dios, nangipaay ni apostol Pedro iti makatukay a palawag a nangibinsabinsa iti kaipapanan dayta a milagro, ken nagbalin a manamati ken nabautisaran ti agarup 3,000 a tattao. Ngem pangrugian laeng dayta. Iti laksid ti panagregget dagiti papanguluen ti relihion a mangpasardeng iti pannakaikasaba ti naimbag a damag, “intultuloy ni Jehova nga itipon [kadagiti adalan] iti inaldaw dagidiay maisalsalakan.” Di nagbayag, “ti bilang dagiti lallaki nagbalin nga agarup lima ribu.” Kalpasan dayta, “dagiti manamati iti Apo nagtultuloy a nainayonda, dagiti umariwekwek agpadpada dagiti lallaki ken dagiti babbai.”​—Aramid 2:1-4, 8, 14, 41, 47; 4:4; 5:14.

7. Apay a napateg a pasamak ti pannakakomberte ni Cornelio?

⁷ Idi 36 K.P., adda sabali pay a napateg a napasamak―nakomberte ken nabautisaran ti Gentil a ni Cornelio. Ni Jehova inturongna ni apostol Pedro iti dayta a lalaki a managbuteng iti Dios, a mangipakita a ti bilin ni Jesus a ‘mangaramid iti ad-adalan kadagiti tattao iti amin a nasion’ ket saan a nalimitaran kadagiti Judio iti nadumaduma a dagdaga. (Aramid 10:44, 45) Ania ti reaksion dagidiay mangidadaulo? Idi a dagiti apostol ken lallakay idiay Judea naawatanda a ti naimbag a damag ket maidanon met kadagiti tattao iti nasnasion―kadagiti saan a Judio―indaydayawda ti Dios. (Aramid 11:1, 18) Kabayatanna, nagtultuloy a nabunga ti trabaho a panangasaba kadagiti Judio. Sumagmamano a tawen kalpasanna, nalabit idi agarup 58 K.P., adu a “ribu a [Judio] a manamati” ti nainayon kadagiti Gentil a manamati.―Aramid 21:20.

8. Ania ti epekto ti naimbag a damag kadagiti indibidual?

⁸ Nupay nakaskasdaaw ti panagadu ti bilang dagiti Kristiano idi umuna a siglo, ditay koma pulos liplipatan ti maipapan kadagiti indibidual a mangbukel iti dayta a bilang. Nabileg ti mensahe ti Biblia a nangngegda. (Hebreo 4:12) Dakkel ti binalbaliwanna kadagiti biag dagidiay nangawat iti dayta. Gapuna, dagiti indibidual dinalusanda ti biagda, insuotda ti baro a personalidad, ken nakikappiada iti Dios. (Efeso 4:22, 23) Kasta met laeng ita. Kanayonanna, dagidiay mangipangag iti naimbag a damag addaanda iti nagsayaat a namnama a biag nga agnanayon.​—Juan 3:16.

Katrabahuan ti Dios

9. Ania a pribilehio ken responsabilidad ti binigbig dagiti nagkauna a Kristiano a tinagiragsakda?

⁹ Saan a pinanunot dagiti nagkauna a Kristiano nga isuda ti makinggapuanan iti panagrang-ay idi. Binigbigda a ti trabahoda a panangasaba ket supsuportaran ti “pannakabalin ti nasantuan nga espiritu.” (Roma 15:13, 19) Ni Jehova ti makinggapuanan kadagiti naespirituan a panagrang-ay. Malaksid iti dayta, ammo dagidi a Kristiano a tagtagiragsakenda ti pribilehio ken responsabilidad kas ‘katrabahuan ti Dios.’ (1 Corinto 3:6-9) Gapuna, maitunos iti balakad ni Jesus, sipipinget nga intungpalda ti trabaho a naitalek kadakuada.―Lucas 13:24.

10. Ania a panagregget ti inaramid dagiti nagkauna a Kristiano tapno makaipaayda iti panangsaksi kadagiti amin a nasion?

¹⁰ Kas ‘maysa nga apostol kadagiti nasion,’ nagdaliasat ken naglayag ni Pablo iti rinibu a kilometro, a nangipasdek iti adu a kongregasion idiay Grecia ken iti Asia a probinsia ti Roma. (Roma 11:13) Nagdaliasat met idiay Roma ken posible nga uray idiay Espania. Kabayatanna, ni apostol Pedro a nakaitalkan “ti naimbag a damag . . . maipaay kadagidiay nakugit” nagdaliasat iti sabali a direksion tapno mangasaba idiay Babilonia, maysa a napateg a sentro ti Judaismo idi a panawen. (Galacia 2:7-9; 1 Pedro 5:13) Karaman kadagiti adu a nakipaset iti trabaho ti Apo ket babbai a kas kada Trifena ken Trifosa, agraman ni Persida, a nadakamat kas daydiay ‘aduan iti nagapuanan a panagbannog iti Apo.’―Roma 16:12.

11. Kasano a binendisionan ni Jehova ti panagregget dagiti adalan?

¹¹ Sibabaknang a binendisionan ni Jehova ti panagregget dagidi a Kristiano ken ti dadduma pay a nareregta a trabahador. Awan pay 30 a tawen kalpasan nga impadto ni Jesus nga addanto maipaay a panangsaksi iti amin a nasnasion, insurat ni Pablo a ‘naikaskasaban ti naimbag a damag iti isuamin a parsua nga adda iti baba ti langit.’ (Colosas 1:23) Dimteng kadi idi ti panungpalan kalpasanna? Wen, no an-anagen. Dimteng dayta iti Judio a sistema ti bambanag idi tawen 70 K.P. idi a dagiti buyot ti Roma dinadaelda ti Jerusalem agraman ti templo. Nupay kasta, inkeddeng ni Jehova nga adda maipaay nga adayo a dakdakkel a panangsaksi sakbay a talipuposenna ti sangalubongan a sistema ti bambanag ni Satanas.

Ti Panangsaksi a Maipapaay Ita

12. Ania ti naawatan dagiti Estudiante ti Biblia maipapan iti bilin a mangasaba?

¹² Kabayatan ti maud-udi a paset ti maika-19 a siglo, kalpasan ti nabayag a panagraira ti narelihiosuan nga apostasia, naipasdek manen ti nasin-aw a panagdayaw. Dagiti Estudiante ti Biblia, kas pannakaawag idi kadagiti Saksi ni Jehova, naawatanda a naimbag ti bilin a mangaramid kadagiti adalan iti intero a daga. (Mateo 28:19, 20) Idi 1914, adda agarup 5,100 nga aktibo a makipaspaset iti trabaho a panangasaba, ket dimmanon ti naimbag a damag iti agarup 68 a pagilian. Kaskasdi, dagidi a nagkauna nga Estudiante ti Biblia dida naawatan ti naan-anay a kaipapanan ti Mateo 24:14. Iti ngudo ti maika-19 a siglo, ti Biblia, a naglaon iti naimbag a damag wenno ebanghelio, ket naipatarus ken nayimprenta iti adu a lenguahe ken naiwaras iti intero a lubong babaen dagiti sosiedad nga autorisado a mangaramid iti dayta. Gapuna, iti sumagmamano a dekada, impagarup dagiti Estudiante ti Biblia a naipaayen ti panangsaksi kadagiti nasnasion.

13, 14. Ania a nalawlawag a pannakaawat iti pagayatan ken panggep ti Dios ti nausig iti 1928 a ruar ti The Watch Tower?

¹³ Ni Jehova in-inut nga impaayanna ti ilina iti nalawlawag a pannakaawat maipapan iti pagayatan ken panggepna. (Proverbio 4:18) Ti The Watch Tower a Disiembre 1, 1928 kinunana: “Maikunatayo kadi a ti pannakaiwaras ti Biblia naibanagna ti naipadto a pannakaikasaba ti ebanghelio ti pagarian? Sigurado a saan! Iti laksid daytoy a pannakaiwaras ti Biblia, ti bassit a grupo dagiti saksi ditoy daga kasapulanda latta ti mangyimprenta kadagiti literatura a mangilawlawag iti [panggep] ti Dios ken kasapulan a sarungkaranda dagiti tattao nga immawat kadagita a Biblia. Ta no saan, agtalinaed nga ignorante dagiti tattao no maipapan iti pannakaipasdek ti Mesianiko a gobierno iti kaaldawantayo.”

¹⁴ Dayta a ruar ti The Watch Tower intuloyna a kinuna: “Idi 1920, . . . dagiti Estudiante ti Biblia dimtengda iti umiso a pannakaawat maipapan iti impadto ti Apo a nailanad iti Mateo 24:14. Kalpasanna, naawatanda a ‘daytoy nga ebanghelio’ a nasken a maikasaba iti intero a lubong kas panangsaksi kadagiti Gentil wenno kadagiti amin a nasion ket saan a maysa nga ebanghelio maipapan iti pagarian a di pay naipasdek no di ket maysa daytoy nga ebanghelio a mangibagbaga nga agturturayen ti Mesianiko nga Ari iti intero a daga.”

15. Kasano a nagsaknap ti trabaho a panangasaba sipud idi dekada 1920?

¹⁵ Saan a nagtalinaed a bassit daydi a “bassit a grupo dagiti saksi” idi dekada 1920. Kadagiti simmaganad a dekada, nagparang ken nangrugi a maurnong ti “maysa a dakkel a bunggoy” dagiti “sabsabali a karnero.” (Apocalipsis 7:9; Juan 10:16) Iti agdama, adda 6,613,829 a mangiwarwaragawag iti naimbag a damag iti 235 a pagilian ditoy daga. Anian a nakaskasdaaw a pannakatungpal ti padto! Ita pay laeng a naikasaba iti kastoy kasaknap “daytoy naimbag a damag ti pagarian.” Ita pay laeng nga adda kastoy kaadu a bilang dagiti matalek nga adipen ni Jehova ditoy daga.

16. Ania ti nagapuanan iti naglabas a tawen serbisio? (Kitaenyo ti tsart iti panid 27-30.)

¹⁶ Sangsangkamaysa nga okupado daytoy nagdakkel a gunglo dagiti Saksi kabayatan ti 2005 a tawen serbisio. Nasurok a maysa a bilion nga oras ti binusbosda a nangiwaragawag iti naimbag a damag iti 235 a dagdaga. Nangaramidda iti minilion a panagsarungkar, ken nangikonduktada iti minilion a panagadal iti Biblia. Naaramidan amin dayta dagiti Saksi ni Jehova, a sipaparabur a nangipaay kadagiti panawen ken sanikuada tapno mairanudda ti Sao ti Dios kadagiti sabsabali. (Mateo 10:8) Babaen ti nabileg a nasantuan nga espirituna, ni Jehova itultuloyna a pabilgen dagiti adipenna tapno maitungpalda ti pagayatanna.―Zacarias 4:6.

Panagregget a Mangipaay iti Panangsaksi

17. Ania ti tignay dagiti adipen ni Jehova no maipapan iti kinuna ni Jesus a maikasaba ti naimbag a damag?

¹⁷ Nupay dandani 2,000 a tawenen ti napalabas sipud idi kinuna ni Jesus a maikaskasaba ti naimbag a damag, saan a bimmaaw ti kinaregta dagiti adipen ti Dios iti dayta a trabaho. Ammotayo a no itultuloytayo ti agaramid iti naimbag, iparparangarangtayo dagiti galad ni Jehova a kas iti ayat, asi, ken anus. Kas kenkuana, ditay kayat nga adda asinoman a madadael no di ket tarigagayantayo nga agbabawi dagiti tattao ken maikappiada ken ni Jehova. (2 Corinto 5:18-20; 2 Pedro 3:9) Gapu ta napnoda iti espiritu, dagiti Saksi ni Jehova sireregta nga itultuloyda nga iwarwaragawag ti naimbag a damag agingga kadagiti ungto ti daga. (Roma 12:11) Kas resultana, dagiti tattao iti sadinoman aw-awatenda ti kinapudno ken makituntunosda iti naayat a panangiwanwan ni Jehova. Usigenyo ti sumagmamano a pagarigan.

18, 19. Mangisalaysay kadagiti kapadasan ti dadduma a nangipangag iti naimbag a damag.

¹⁸ Maysa a mannalon ni Charles iti makinlaud a Kenya. Idi 1998 nakailako iti 8,000 a kilo a tabako ken nagunggonaan iti maysa a sertipiko a nangted kenkuana iti titulo kas ti Kasayaatan a Mannalon iti Tabako. Iti daydi a panawen, rinugianna nga inadal ti Biblia. Di nagbayag, nabigbigna a ti maysa a tao a makipaspaset iti panangpataud kadagiti tabako salsalungasingenna ti bilin ni Jesus maipapan iti panangayat iti kaarruba. (Mateo 22:39) Idi naamirisna a daydiay ‘kasayaatan a mannalon iti tabako’ isu gayam ti ‘kangrunaan a manangpapatay,’ binombaanna iti sabidong dagiti mulana a tabako. Idi agangay, isu ket nagdedikar ken nagbautisar ken maysa itan a regular pioneer ken ministerial nga adipen.

¹⁹ Awan duadua a yugyugayogen ni Jehova ti amin a nasion babaen ti sangalubongan a panangsaksi a madama a maipapaay, ket sumsumrek dagiti matarigagayan a bambanag―dagiti tattao. (Haggeo 2:7) Ni Pedro, nga agnanaed idiay Portugal, simrek iti seminario idi agtawen iti 13. Kalatna ti agbalin a misionero ken mangisuro iti Biblia. Ngem di pay nagbayag, pinanawanna ti seminario gapu ta manmano a maisuro ti Biblia kadagiti klaseda. Kalpasan ti innem a tawen, isu ket nagadal iti sikolohia iti maysa nga unibersidad idiay Lisbon. Nakipagnaed iti ikitna, maysa a Saksi ni Jehova, ket daytoy ti nangparegta kenkuana nga agadal iti Biblia. Iti daydi a gundaway, pagduaduaan ni Pedro ti kaadda ti Dios, ken dina maikeddeng no isu ket agadal iti Biblia wenno saan. Nadakamatna iti propesorna ti maipapan iti rigatna nga agdesision. Kinuna ti propesorna a sigun iti sikolohia, dagiti tattao a marigatan nga agdesision adda tendensiada a dadaelenda ti biagda. Gapuna, inkeddeng ni Pedro ti agadal iti Biblia. Nabiit pay a nagbautisar, ken mangikonkondukta metten kadagiti panagadal iti Biblia.

20. Apay a maragsakantayo a kasta kasaknap ti maipapaay a panangsaksi kadagiti nasion?

²⁰ Agingga ita, ditay ammo no kasano kasaknap ti maipaay a panangsaksi kadagiti nasion, ken ditay ammo no ania nga aldaw wenno oras a dumteng ti panungpalan. Ti ammotayo laeng ket asidegen nga umay dayta. Maragsakantayo ta ti pannakaikasaba ti naimbag a damag iti kasta kasaknap ket maysa laeng kadagiti adu a tanda a mangipakita a ti Pagarian ti Dios asidegen a sukatanna dagiti natauan a gobierno. (Daniel 2:44) Iti kada tawen nga aglabas, minilion ti maipapaayan iti gundaway a mangipangag iti naimbag a damag, ket pakaidayawan dayta ti Diostayo a ni Jehova. Sapay koma ta determinadotayo nga agtalinaed a matalek ken okupado iti trabaho a panangsaksi kadagiti amin a nasion bayat a makidangdanggaytayo kadagiti kapammatiantayo iti intero a lubong. No kasta ti aramidentayo, maisalakantayo nga agpadpada ti bagitayo ken dagidiay umimdeng kadatayo.―1 Timoteo 4:16.

Malagipyo Kadi?

• Apay a naisangsangayan a padto ti Mateo 24:14?

• Kasano karegget a nangasaba dagiti nagkauna a Kristiano, ket ania dagiti resultana?

• Kasano a natarusan dagiti Estudiante ti Biblia a kasapulan ti mangipaay iti panangsaksi kadagiti amin a nasion?

• Ania ti pakaragsakanyo kadagiti nagapuanan dagiti adipen ni Jehova iti naglabas a tawen serbisio?

[Tsart iti panid 27-30]

REPORT ITI TAWEN 2005 A TAWEN SERBISIO DAGITI SAKSI NI JEHOVA ITI SANGALUBONGAN

(Kitaem ti bound volume)

[Mapa/Dagiti Ladawan iti panid 25]

Nagdaliasat ken naglayag ni Pablo iti rinibu a kilometro tapno maikasabana ti naimbag a damag

[Ladawan iti panid 24]

Ni Jehova inturongna ni Pedro a mangipaay iti panangsaksi ken ni Cornelio ken iti pamiliana