Panangragpat Kadagiti Kalikaguman ti Nakristianuan a Bautismo

“Ania ti makalapped kaniak a mabautisaran?”​—ARAMID 8:36.

1, 2. Kasano a rinugian ni Felipe ti pannakisaritana iti Etiope nga opisial, ken ania ti mangipakita nga interesado ti lalaki iti pudno a panagdayaw?

MAYSA wenno dua a tawen kalpasan ti ipapatay ni Jesus, maysa nga opisial ti gobierno ti nagpaabagatan manipud Jerusalem nga agturong idiay Gaza. Makabannog ti agarup 1,500 a kilometro a daliasatenna babaen ti karuahe. Naggapu idiay Etiopia daytoy a napasnek a tao agturong idiay Jerusalem tapno agdayaw ken ni Jehova. Bayat ti nawatiwat a panagawidna, nainsiriban nga inusarna ti tiempona babaen ti panagbasana iti Sao ti Dios―kasta ti pammati dayta a tao. Nakita ni Jehova ti kinapasnek daytoy a tao, isu a babaen ti anghelna, inturongna ti adalan a ni Felipe tapno kasabaanna dayta a lalaki.―Aramid 8:26-28.

² Saan a narigatan ni Felipe a nangirugi iti saritaan yantangay sipipigsa nga agbasbasa ti Etiope nga opisial, kas kaugalian kadagidi nga aldaw. Gapuna, nangngeg ni Felipe a basbasaen ti lalaki ti lukot ni Isaias. Maysa a simple a saludsod ni Felipe ti nangriing iti interes ti lalaki: “Ammom kadi nga agpayso no ania ti basbasaem?” Nagturong dayta iti panagpatangda maipapan iti Isaias 53:7, 8. Kamaudiananna, ‘indeklara kenkuana ni Felipe ti naimbag a damag maipapan ken Jesus.’​—Aramid 8:29-35.

3, 4. (a) Apay a di nagtaktak a binautisaran ni Felipe ti Etiope? (b) Ania a salsaludsod ti usigentayo ita?

³ Dagus a naawatan ti Etiope no ania ti akem ni Jesus iti panggep ti Dios, agraman ti kinapateg ti panagpabautisar tapno agbalin nga adalan ni Kristo. “Ania ti makalapped kaniak a mabautisaran?” inyimtuodna ken ni Felipe apaman a nakitana ti maysa a danum a mayanatup a pagitaneban. Siempre, naiduma dagitoy a kasasaad. Manamatin ti Etiope ken siguden nga agdaydayaw iti Dios kas maysa a Judio a proselita. Nalabit a mabayagto manen sakbay a maaddaan iti sabali a gundaway nga agpabautisar. Napatpateg pay, naawatanna no ania ti kalkalikaguman kenkuana ti Dios, ket kayatna ti agtignay a naimpusuan. Siraragsak nga immannugot ni Felipe iti kiddawna, isu a kalpasan a nabautisaran, ‘sirarag-o ti Etiope a nagtultuloy iti dalanna.’ Awan duadua a nagbalin a naregta a manangikasaba iti naimbag a damag iti pagilianda.​—Aramid 8:36-39.

⁴ Nupay saan a rumbeng a tagilag-anen wenno apuraen ti panagdedikar ken panagpabautisar, ti kapadasan ti Etiope nga opisial ipakitana nga adda dagiti indibidual a nagpabautisar di nagbayag kalpasan a nangngegda ti kinapudno iti Sao ti Dios.a Gapuna, rumbeng laeng nga usigen dagiti sumaganad a saludsod: Ania a kita ti panagsagana ti nasken nga aramiden sakbay nga agpabautisar? Kaano a rumbeng nga ikabilangan ti edad? Ania a naespirituan a panagrang-ay ti nasken nga ipakita ti maysa sakbay a mabautisaran? Kangrunaan iti amin, apay a kalikaguman ni Jehova nga aramiden dagiti adipenna daytoy nga addang?

Sagrado a Pannakitulag

5, 6. (a) No maipapan kadagiti adipen ti Dios idi ugma, ania ti tignayda iti panagayat ni Jehova? (b) Ania a nasinged a relasion iti Dios ti matagiragsaktayo apaman a mabautisarantayo?

⁵ Kalpasan nga inispalna dagiti Israelita idiay Egipto, sidadaan idi ni Jehova a mangakseptar kadakuada kas ti ‘naisangsangayan a sanikuana,’ nga ayaten ken salakniban ken pagbalinenna ida kas “maysa a nasantuan a nasion.” Ngem tapno masagrapda dagita a bendision, masapul a silalawag idi nga ipakita dagiti tattao ti panangipategda iti panagayat ti Dios. Pinaneknekanda dayta babaen ti iyaannugotda nga aramidenda ti “isuamin a sinao ni Jehova” ken simrekda iti maysa a pannakitulag kenkuana. (Exodo 19:4-9) Idi umuna a siglo, imbilin ni Jesus kadagiti pasurotna a mangaramidda kadagiti adalan iti amin a nasion, ket nabautisaran dagidiay nangakseptar kadagiti pannursurona. Ti nasayaat a relasion iti Dios ket agpannuray iti panamati ken ni Jesu-Kristo, sa sarunuen ti panagpabautisar.―Mateo 28:19, 20; Aramid 2:38, 41.

⁶ Dagitoy a salaysay ti Kasuratan ipakitada a bendisionan ni Jehova dagidiay mangipasdek ken mangsalimetmet iti maysa a sagrado a kari nga agserbi kenkuana. Iti biang dagiti Kristiano, ti panagdedikar ken panagpabautisar ket agkakapateg nga addang a mangyeg iti pamendision ni Jehova. Determinadotayo a mangsalimetmet kadagiti pagannurotanna ken agpaiwanwan kenkuana. (Salmo 48:14) Kas resultana, arigna a kibinennatayo ni Jehova ket iturongnatayo iti dana a rumbeng a pagnaantayo.​—Salmo 73:23; Isaias 30:21; 41:10, 13.

7. Apay a personal a desision ti panagdedikar ken panagpabautisar?

⁷ Ti koma rason nga aramidentayo dagitoy nga addang ket gapu ta ay-ayatentayo ni Jehova ken tarigagayantayo ti agserbi kenkuana. Awan koma ti asinoman nga agpabautisar gapu laeng ta adda nangibaga nga isu ket nabayagen nga agad-adal wenno gapu ta agpabautisaren dagiti gagayyemna. Natural laeng a dagiti nagannak ken dagiti nataengan a Kristiano paregtaenda ti maysa tapno pagbalinenna a kalat ti panagdedikar ken panagpabautisar. Ni apostol Pedro indagadagna kadagidiay immimdeng kenkuana idi Pentecostes nga ‘agpabautisarda.’ (Aramid 2:38) Nupay kasta, maysa a personal a banag ti panagdedikar, ket awan ti sabali a makaaramid iti dayta para kadatayo. Nasken a datayo ti agdesision no kayattayo nga aramiden ti pagayatan ti Dios.―Salmo 40:8.

Umdas a Panagsagana iti Bautismo

8, 9. (a) Apay a saan a maitunos iti Kasuratan ti panangbautisar kadagiti maladaga? (b) Ania a naespirituan a panagrang-ay ti nasken a ragpaten dagiti agtutubo sakbay ti bautismo?

⁸ Kabaelan kadi dagiti ubbing ti mangaramid iti nausig a naimbag a desision? Awan ti edad a kalikaguman ti Kasuratan kadagidiay agpabautisar. Kaskasdi, saan a kabaelan dagiti maladaga ti agbalin a manamati, mangaramid iti desision maibatay iti pammati, wenno agdedikar iti Dios. (Aramid 8:12) No maipapan kadagiti Kristiano idi umuna a siglo, ni historiador Augustus Neander kinunana iti librona a General History of the Christian Religion and Church: “Dagiti adulto laeng idi ti agpabautisar, yantangay matmatan dagiti tattao nga agkanaig unay ti bautismo ken pammati.”

⁹ Adda dagiti agtutubo a makapatanor iti nasayaat nga espiritualidad uray ubbingda pay, bayat a naladladaw ti dadduma. Ngem sakbay nga agpabautisar, nasken a maaddaan ti agtutubo iti maysa a personal a relasion ken ni Jehova, umiso a pannakaammo kadagiti napateg a sursuro ti Kasuratan, ken nalawag a pannakaawat no ania ti kaipapanan ti panagdedikar, banag a makalikaguman met kadagiti adulto.

10. Ania ti masapul nga aramiden ti maysa sakbay nga agdedikar ken agpabautisar?

¹⁰ Binilin ni Jesus dagiti adalanna nga isuroda kadagiti kabbaro ti amin a bambanag nga imbilinna kadakuada. (Mateo 28:20) Gapuna, umuna iti amin, dagiti kabbaro nasken a gumun-odda iti umiso a pannakaammo iti kinapudno, a tumulong kadakuada a mangpatanor iti pammati ken ni Jehova ken iti Saona. (Roma 10:17; 1 Timoteo 2:4; Hebreo 11:6) Kalpasanna, no ti kinapudno iti Kasuratan tukayenna ti puso ti maysa, dayta ti mangtignay kenkuana nga agbabawi ken mangtallikud iti dati a wagas ti panagbiagna. (Aramid 3:19) Kamaudiananna, dumtengto ti tiempo a tarigagayannan nga idedikar ti biagna ken ni Jehova ket agpabautisar, kas imbilin ni Jesus.

11. Apay a napateg a regular a makipasettayo iti panangasaba sakbay nga agpabautisartayo?

¹¹ Ti maysa pay a napateg nga addang agturong iti bautismo isu ti pannakipaset iti panangikasaba iti naimbag a damag ti Pagarian. Daytoy ti kangrunaan a trabaho nga intalek ni Jehova kadagiti adipenna kabayatan dagitoy maudi nga al-aldaw. (Mateo 24:14) Iti kasta, dagiti saan a bautisado nga agibumbunannag matagiragsakda ti rag-o ti panangisarita kadagiti dadduma ti maipapan iti pammatida. Babaen ti pannakipaset iti daytoy a trabaho, masursuroda met ti agbalin a regular ken naregta iti tay-ak ti ministerio kalpasan ti bautismoda.―Roma 10:9, 10, 14, 15.

Adda Kadi Manglaplapped Kadakayo nga Agpabautisar?

12. Apay nga agkitakit ti dadduma nga agpabautisar?

¹² Agkitakit nga agpabautisar ti dadduma gapu ta dida kayat nga awaten ti responsabilidad a kakuyog ti bautismo. Ammoda ngamin a tapno maragpatda dagiti pagalagadan ni Jehova, masapul a mangaramidda kadagiti dakkel a panagbalbaliw iti biagda. Wenno maamakda a saanda a masalimetmetan dagiti pagannurotan ti Dios kalpasan a mabautisaranda. Mabalin a kunaen pay ketdi ti dadduma, “Di la ket ta makaaramidakto iti basol ket mailaksidak iti kongregasion.”

13. Idi kaaldawan ni Jesus, ania ti nanglapped kadagiti dadduma nga agbalin a pasurot ni Jesus?

¹³ Idi kaaldawan ni Jesus, dadduma ti saan a nagbalin nga adalanna gapu ta nagpaigawidda iti pamiliada ken kadagiti personal a kalatda. Maysa nga eskriba ti nagkuna a surotenna ni Jesus sadinoman ti papananna. Ngem imbaga ni Jesus nga iti adu a gundaway, awan man la ti lugar a pagturoganna iti rabii. Idi inawis ni Jesus nga agbalin a pasurotna ti maysa nga agdengdengngeg, kinuna ti lalaki a mapanna pay ‘itabon’ ti amana. Agparang a kinaykayatna ti agtalinaed iti pagtaenganda bayat nga ur-urayenna ti ipapatay ni amana, idinto ta mabalinna met koma ti sumurot ken ni Jesus sananto aramiden dayta nga obligasionna iti amana no mapagtengto dayta. Kamaudiananna, kinuna ti maikatlo a tao a sakbay a sumurot ken ni Jesus, masapul nga ‘agpakada’ pay iti sangakabbalayanna. Dineskribir ni Jesus dayta a panangitantan kas ‘panangkita iti bambanag iti likudan.’ Gapuna, agparang nga adda a kanayon ti pagpambar dagidiay lumikliklik kadagiti Nakristianuan a responsabilidadda.―Lucas 9:57-62.

14. (a) Ania ti inaramid da Pedro, Andres, Santiago, ken Juan idi inawis ida ni Jesus nga agdaklis iti tattao? (b) Apay a ditay koma agpangadua a mangibaklay iti sangol ni Jesus?

¹⁴ Naiduma unay ti ulidan da Pedro, Andres, Santiago, ken Juan. Idi inawis ni Jesus a sumurotda kenkuana ken agbalinda a dumadaklis kadagiti tattao, kuna ti Biblia: ‘Madagdagus a binaybay-anda dagiti iket, ket simmurotda kenkuana.’ (Mateo 4:19-22) Gapu iti di nagtaktak a desisionda, personal a napasaranda ti kinuna ni Jesus idi agangay: “Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.” (Mateo 11:29, 30) Nupay kakuyog ti bautismo ti panangibaklay iti responsabilidad, impanamnama ni Jesus a nalanay ken nalag-an dayta ken mangyeg kadatayo iti dakkel a gin-awa.

15. Kasano a ti kapadasan da Moises ken Jeremias ipakitana a manamnamatayo ti pannaranay ti Dios?

¹⁵ Siempre, normal laeng no mariknatayo a kasla saantay a maikari. Idi damo, impagarup da Moises ken Jeremias a dida kabaelan nga ibaklay dagiti annongen nga intalek kadakuada ni Jehova. (Exodo 3:11; Jeremias 1:6) Kasano a pinaregta ida ti Dios? “Addaakto kenka,” kinunana ken ni Moises. “Addaak kenka tapno ispalenka,” inkarina ken ni Jeremias. (Exodo 3:12; Jeremias 1:8) Makapagtalektayo met a saranayennatayo ti Dios. No ayatentayo ti Dios ken agtalektayo kenkuana, maparmektayo dagiti agtultuloy a panagduadua no kabaelantayo a salimetmetan ti dedikasiontayo. “Awan ti buteng iti ayat,” insurat ni apostol Juan, “no di ket ti naan-anay nga ayat paksiatenna ti buteng.” (1 Juan 4:18) Mabalin a mabuteng ti ubing no maymaysana a magna, ngem natalged ti riknana no kibinen ni tatangna. Umasping iti dayta, no agtalektayo ken ni Jehova iti amin a pusotayo, inkarina a ‘palintegenna ti danatayo’ bayat a makipagnatayo kenkuana.―Proverbio 3:5, 6.

Nadayaw nga Okasion

16. Apay a ti bautismo kalikagumanna ti naan-anay a pannakaitaneb?

¹⁶ Sakbay ti bautismo, masansan nga adda maysa a Nainkasuratan a palawag a mangibinsabinsa iti kinapateg ti Nakristianuan a bautismo. Iti ngudo daytoy a palawag, makiddaw kadagiti kandidato nga ipakaammoda iti publiko ti pammatida babaen ti panangsungbatda iti dua a saludsod ti bautismo. (Roma 10:10; kitaenyo ti kahon iti panid 22.) Kalpasanna, maitaneb dagiti kandidato, maitunos iti pagtuladan nga inyussuat a mismo ni Jesus. Ipakita ti Biblia a kalpasan a nabautisaran, “simmang-at ni Jesus manipud iti danum.” (Mateo 3:16; Marcos 1:10) Nalawag a ni Juan a Mammautisar naan-anay nga intanebna ni Jesus.b Ti naan-anay a pannakaitaneb maitutop nga isimbolona ti dakkel a panagbalbaliw nga inaramidtayo iti biagtayo―arigna a nataytayo iti sigud a wagas ti panagbiagtayo ket rugiantayo ti baro a biag nga agserbi iti Dios.

17. Kasano a dagiti kandidato iti bautismo ken dagiti agbuybuya makatulongda iti panagbalin a nadayaw ti okasion?

¹⁷ Agpadpada a serioso ken naragsak nga okasion ti bautismo. Ipasimudaag ti Biblia nga agkarkararag ni Jesus idi isu ket intaneb ni Juan iti Karayan Jordan. (Lucas 3:21, 22) Maitunos iti dayta nga ulidan, dagiti kandidato iti bautismo nasken nga iparangarangda ti nadayaw a kondukta. Gapu ta idagadag ti Biblia nga agkawestayo a sieemma iti inaldaw, ad-adda pay ngarud nga ipangagtayo daytoy a balakad iti aldaw ti bautismotayo! (1 Timoteo 2:9) Maipakita met dagiti agbuybuya ti umiso a panagraem babaen ti panagimdengda a naimbag iti palawag ti bautismo ken babaen ti panagbuyada iti dayta a pagteng buyogen ti kinaurnos.―1 Corinto 14:40.

Dagiti Bendision a Tagiragsaken Dagiti Bautisado nga Adalan

18, 19. Ania dagiti pribilehio ken bendision nga iyeg ti panagpabautisar?

¹⁸ Apaman nga indedikartayo ti biagtayo iti Dios ken nagpabautisartayo, agbalintayon a paset ti maysa a naisangsangayan a pamilia. Umuna iti amin, agbalin ni Jehova kas Ama ken Gayyemtayo. Nayadayotayo iti Dios sakbay ti bautismotayo; ita, naikappiatayon kenkuana. (2 Corinto 5:19; Colosas 1:20) Babaen ti sakripisio ni Kristo, nayadanitayo iti Dios ket isu immadani kadatayo. (Santiago 4:8) Deskribiren ni propeta Malakias no kasano nga inturong ni Jehova ti atensionna ken inimdenganna dagidiay mangus-usar ken mangaw-awit iti naganna, ket iramanna ti naganda iti librona a pakalaglagipan. “Sigurado nga agbalindanto a kukuak,” kuna ni Jehova, “ket ipakitakto ti panangngaasi kadakuada, no kasano a ti maysa a tao ipakitana ti panangngaasi iti anakna nga agserserbi kenkuana.”​—Malakias 3:16-18.

¹⁹ No agpabautisartayo, agbalintayo a paset ti sangalubongan a panagkakabsat. Idi inyimtuod ni apostol Pedro no ania dagiti bendision a matagiragsak dagiti adalan ni Kristo gapu kadagiti panagsakripisioda, inkari ni Jesus: “Ti tunggal maysa a nangpanaw iti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.” (Mateo 19:29) Sumagmamano a tawen kalpasanna, nagsurat ni Pedro maipapan “iti intero a timpuyog dagiti kakabsat” nga adda “ditoy lubong.” Personal a natagiragsak ni Pedro ti saranay ken bendision nga iyeg ti naayat a panagkakabsat, ket mabalintayo met a matagiragsak dayta.―1 Pedro 2:17; 5:9.

20. Ania a nagsayaat a namnama ti iyeg ti panagpabautisar?

²⁰ Malaksid iti dayta, impasimudaag ni Jesus a dagidiay sumurot kenkuana ‘tawidendanto ti agnanayon a biag.’ Wen, ti panagdedikar ken panagpabautisar aramidenna a posible a ‘mapetpetantayo a sititibker ti pudpudno a biag’―biag nga agnanayon iti baro a lubong ti Dios. (1 Timoteo 6:19) Ania pay koma ti nasaysayaat a pundasion para iti masanguanan ti mabalintayo nga ipasdek agpaay iti bagitayo ken iti pamiliatayo? Babaen iti daytoy a nagsayaat a namnama, mabalinantayo ti ‘magna iti nagan ni Jehova a Diostayo agingga iti tiempo a di nakedngan, iti mismo nga agnanayon.’​—Mikias 4:5.

[Footnotes]

Mailawlawagyo Kadi?

• Kasano ken apay nga agtignaytayo iti panagayat ni Jehova?

• Ania a naespirituan a panagrang-ay ti nasken a ragpaten sakbay nga agpabautisar?

• Apay a rumbeng a ditay ipalubos a ti panagamak a mapaay wenno ti panagduadua a mangawat iti responsabilidad ti manglapped kadatayo nga agpabautisar?

• Ania dagiti agkakaimbag a bendision ti matagiragsak dagiti bautisado nga adalan ni Jesu-Kristo?

[Ladawan iti panid 26]

“Ania ti makalapped kaniak a mabautisaran?”

[Dagiti Ladawan iti panid 29]

Serioso ken naragsak nga okasion ti bautismo