“Masapul nga Agtulnogkami iti Dios kas Agturay Imbes a Kadagiti Tattao”

‘Ti Diosmi Kabaelannakami nga Alawen’

NAIRANTA nga agbalin a naisangsangayan ti okasion. Naibangon ti maysa a nagdakkel nga imahen a balitok iti tanap ti Dura, nabatad nga iti asideg ti siudad ti Babilonia. Mainaguraran ti imahen bayat ti maysa a naisangsangayan a seremonia a dar-ayan dagiti nangangato nga opisial a manamnama nga agrukbab iti sanguanan ti imahen bayat ti panaguni dagiti nadumaduma nga instrumento ti musika. Sigun iti bilin ni Nabucodonosor nga ari ti Babilonia, mapapatay iti gumilgil-ayab nga urno ti asinoman a saan nga agdayaw iti imahen. Siasino koma ti natured a mangsukir iti dayta a bilin?

Gapuna, naklaat dagiti nakaimatang idi saan a nagrukbab ti tallo a managbuteng-Dios nga agdaydayaw ken ni Jehova​—da Sidrac, Mesac, ken Abednego. Ammoda a no agrukbabda, ipakpakitada a saan a naipamaysa ti debosionda ken ni Jehova a Dios. (Deuteronomio 5:8-10) Idi makalikaguman nga ilawlawagda ti di maisin a takderda, situtured nga imbagada ken ni Nabucodonosor: “No maipalladawkami, ti Diosmi a pagserserbianmi kabaelannakami nga alawen. Manipud iti gumilgil-ayab a naapuy nga urno ken manipud iti imam, O ari, isu alawennakamto. Ngem no saan, maipakaammo koma kenka, O ari, a ti didiosmo saan nga isuda ti pagserbianmi, ket ti ladawan a balitok nga impasdekmo saanminto a pagdayawan.”​—Daniel 3:17, 18.

Idi a dagiti tallo a Hebreo naitapuakda iti gumilgil-ayab nga urno, naispal ti biagda gapu iti maysa a milagro. Nangibaon ti Dios iti maysa nga anghel a mangsalaknib kadagiti matalek nga adipenna. Ngem pinilida pay ketdin nga irisgo ti biagda imbes a sumukirda ken ni Jehova.a Ti takderda ket umasping iti takder dagiti apostol ni Jesu-Kristo nasurok nga innem a siglo kalpasanna. Impakaammo dagitoy nga apostol iti nangato a pangukoman dagiti Judio: “Masapul nga agtulnogkami iti Dios kas agturay imbes a kadagiti tattao.”​—Aramid 5:29.

Dagiti Napateg a Masursurotayo

Da Sidrac, Mesac, ken Abednego ket nasayaat nga ulidan ti pammati, panagtulnog, ken kinasungdo. Dagitoy a tallo a Hebreo nangipakitada iti pammati ken ni Jehova. Gapu iti konsiensiada a sinanay ti Kasuratan, saanda a mairusok ti aniaman a pannakipaset iti palso a panagdayaw wenno nasionalistiko a debosion. Dagiti Kristiano ita naan-anay met nga agtalekda iti pudno a Dios. Ti sinanay-Biblia a konsiensiada ti mangiwanwanwan kadakuada ken agkedkedda a makipaset iti palso a panagdayaw wenno seremonia a maisalungasing kadagiti linteg ken prinsipio ti Dios.

Dagiti tallo a matalek a Hebreo nagtalekda ken ni Jehova ken dida insukat ti kinatulnogda iti dayaw, saad, wenno dayag nga intukon ti Imperio ti Babilonia. Dagidi nga agtutubo sidadaanda a nagsagaba ken matay imbes a dadaelenda ti relasionda iti Dios. Kas ken ni Moises nga immuna kadakuada, ‘nagtalinaedda a natibker a kasla kitkitaenda daydiay Maysa a di makita.’ (Hebreo 11:27) Ipalubos man ni Jehova a mapapatayda wenno saan, determinado dagiti tallo a mangtaginayon iti kinatarnawda kenkuana imbes nga agkompromisoda tapno laeng saanda a mapapatay. Nabatad a ti ulidanda ti ipaspasimudaag ni apostol Pablo idi tinukoyna dagidiay matalek a ‘nangdepdep iti puersa ti apuy.’ (Hebreo 11:34) Imparangarang dagiti adipen ti Dios ti kasta a pammati ken panagtulnog bayat a nasubok ti kinatarnawda iti kaaldawantayo.

Manipud iti kapadasan da Sidrac, Mesac, ken Abednego, maadaltayo met a gunggonaan ti Dios dagiti nasungdo kenkuana. Inkanta ti salmista: “Ni Jehova . . . saannanto a panawan dagidiay nasungdona.” (Salmo 37:28) Ita, saantayo a namnamaen ti milagro a panangispal kadatayo ti Dios, kas iti inaramidna kadagiti tallo a Hebreo. Ngem makapagtalektayo nga aniaman ti sanguentayo a rigat, tulongannatayo ti nailangitan nga Amatayo. Ti Dios mabalin a risutenna ti parikut, mangipaay iti bileg tapno maibturan dayta, wenno pagungarennatayo no taginayonentayo ti kinatarnawtayo agingga iti ipapatay. (Salmo 37:10, 11, 29; Juan 5:28, 29) Maipakitatayo ti pammati, panagtulnog, ken kinasungdotayo tunggal masubok ti kinatarnawtayo ket pagtulnogantayo ti Dios imbes a ti tao.

[Footnote]

[Kahon/Ladawan iti panid 9]

AMMOYO KADI?

• Dagiti tallo a Hebreo ket dandanidan agtawen iti 30 idi masubok ti kinatarnawda.

• Ti urno ket nabatad a napapudot iti kasta unay.​—Daniel 3:19.