Ti Sao ni Jehova Nabiag
Dagiti Tampok iti Maikalima a Libro Dagiti Salmo
MABALIN a kunaen ti baknang: “Ti annakmi a lallaki kaslada babassit a mula a dimmakkel iti kinaagtutuboda, ti annakmi a babbai kaslada kadagiti pasuli a nakitikitan iti langa ti palasio, namsek dagiti agamangmi, . . . dagiti arbanmi umad-adu iti rinibu.” Mabalin a kunaen pay dagiti baknang: “Naragsak ti ili a kasta ti kasasaadna!” Ngem, maisupadi iti dayta, kuna ti salmista: “Naragsak ti ili a ti Diosna isu ni Jehova!” (Salmo 144:12-15) Apay koma a saanda nga agragsak? Naragsak a Dios ni Jehova, ket naragsak dagidiay agdaydayaw kenkuana. (1 Timoteo 1:11) Naitampok daytoy a kinapudno iti maudi a koleksion dagiti impaltiing ti Dios a kankanta, a buklen ti Salmo 107 agingga iti 150.
Itampok met ti Maikalima a Libro Dagiti Salmo dagiti agkakaimbag a kalidad ni Jehova, agraman ti naayat a kinamanangngaasi, kinapudno, ken kinaimbagna. Bayat nga umun-uneg ti pannakaammotayo iti personalidad ti Dios, ad-adda nga ayaten ken agbutengtayo kenkuana. Daytoy met ti mangparagsak kadatayo. Talaga a nakapatpateg ti mensahe a maammuantayo iti Maikalima a Libro Dagiti Salmo!—Hebreo 4:12.
NARAGSAK GAPU ITI NAAYAT A KINAMANANGAASI NI JEHOVA
“O dagiti tattao agyamanda koma ken Jehova gapu iti naayat a kinamanangngaasina ken gapu iti nakaskasdaaw nga ar-aramidna iti annak ti tattao,” inkanta dagiti naidestiero a Judio nga agaw-awid manipud iti pannakakautibo idiay Babilonia. (Salmo 107:8, 15, 21, 31) Iti panangidayawna iti Dios, inkanta ni David: “Ti naayat a kinamanangngaasim dakkel a dumanon iti langlangit.” (Salmo 108:4) Iti sumaruno a kanta, inkararagna: “Tulongannak, O Jehova a Diosko; isalakannak maitunos iti naayat a kinamanangngaasim.” (Salmo 109:18, 19, 26) Ti Salmo 110 ipadtona ti panagturay ti Mesias. “Ti panagbuteng ken Jehova isu ti punganay ti sirib,” kuna ti Salmo 111:10. Sigun iti sumaganad a salmo, “naragsak ti tao nga agbuteng ken Jehova.”—Salmo 112:1.
Dagiti Salmo 113 agingga iti 118 naawaganda iti Salmo ti Hallel. Kasta ti nayawag kadagitoy ta maulit-ulit nga usarenda ti ebkas nga “Aleluya,” wenno “Idaydayawyo ni Jah!” Sigun iti Mishnah, a maysa a libro idi maikatlo a siglo a nangilanad iti immun-una a tradision, dagitoy a kanta ti makanta iti Paskua ken kadagiti tallo a tinawen a piesta dagiti Judio. Ti Salmo 119, a kaatiddogan kadagiti amin a salmo ken kapitulo iti Biblia, itan-okna ti naipalgak a sao ni Jehova.
Sungbat Kadagiti Nainkasuratan a Saludsod:
109:23—Ania ti kayat a sawen ni David idi kinunana: “Kas iti maysa nga anniniwan no agpukaw, mapilitanak a pumanaw”? Naindaniwan nga ibagbaga ni David nga ammona nga umadanin ti ipapatayna.—Salmo 102:11.
110:1, 2—Ania ti inaramid “ti Apo [ni David]” a ni Jesu-Kristo, bayat nga agtugtugaw iti makannawan ti Dios? Kalpasan ti panagungarna, nagpalangit ni Jesus ket naguray iti makannawan ti Dios agingga idi 1914 tapno mangrugi nga agturay kas Ari. Bayat dayta a tiempo, inturayan ni Jesus dagiti napulotan a pasurotna. Imbagnosna ida iti panangasabada ken iti trabahoda a panangaramid-adalan agraman ti panangisagana kadakuada a makipagturay kenkuana iti Pagarianna.—Mateo 24:14; 28:18-20; Lucas 22:28-30.
110:4—Iti ania a ‘nagsapata ni Jehova ket saanto nga agbabawi’? Daytoy a sapata isu ti tulag nga inaramid ni Jehova ken Jesu-Kristo tapno agserbi nga Ari ken Nangato a Padi.—Lucas 22:29.
113:3—Iti ania a pamay-an a maidaydayaw ti nagan ni Jehova “manipud iti ileleggak ti init agingga iti ilelennekna”? Daytoy ramanenna saan laeng a ti maysa a grupo ti tattao nga agdaydayaw iti Dios iti inaldaw. Manipud iti ileleggak ti init iti daya agingga iti ilelennekna iti laud, silsilnagan ti init ti intero a lubong. Kasta met, maidaydayaw ni Jehova iti amin a lubong. Saan a maibanag daytoy no awan ti panagkaykaysa. Kas Saksi ni Jehova ipatpategtayo ti pribilehiotayo a mangidayaw iti Dios ken sireregta a makiraman iti trabaho a panangiwaragawag iti Pagarian.
116:15—Kasano ‘kapateg kadagiti mata ni Jehova ti ipapatay dagidiay nasungdona’? Nakapatpateg ken ni Jehova dagiti managdaydayawna isu a dina nga ipalubos a matayda kas maysa a grupo. No ipalubosna a mapasamak dayta, kayariganna a nabilbileg dagiti kabusorna ngem isu. Kasta met, awanen ti mabati ditoy daga kas pamuon ti baro a lubong.
119:71—Ania ti pagimbagan ti panagsagaba iti rigat? Ti rigat maisuronatayo nga ad-adda nga agpannuray ken Jehova, agkararag kenkuana a sipapasnek, ken ad-adda a naaneptayo nga agadal ken mangyaplikar iti ibagbaga ti Biblia. Maysa pay, ti tignaytayo iti sidong ti pakarigatan iparangarangna dagiti pagkapuyan a masapul nga aturentayo. Saan nga agsakit ti nakemtayo no matmatantayo a pakagugorantayo ti panagsagaba.
119:96—Ania ti kaipapanan ti “pagpatinggaan ti isuamin a kinanaan-anay”? Sarsaritaen ti salmista ti kinanaan-anay sigun iti panangmatmat ti tao. Mabalin a pampanunotenna nga adda limitasion ti kinanaan-anay sigun iti panangmatmat ti tao. Maisupadi iti dayta, awan ti limitasion ti bilin ti Dios. Ti panangiwanwanna agaplikar iti amin nga aspeto ti panagbiag.
119:164—Ania ti kaipapanan iti panangidaydayaw iti Dios iti “pito a daras iti maysa nga aldaw”? Kinaan-anay ti masansan nga ipamatmat ti bilang a pito. No kasta ibagbaga ti salmista a maikari ni Jehova iti amin a dayaw.
Dagiti Masursurotayo:
107:27-31. Inton dumteng ti Armagedon ‘mapaneknekanto nga agsisimparat’ ti kinasirib ti lubong. (Apocalipsis 16:14, 16) Saanna a maisalakan ti asinoman manipud iti pannakadadael. Dagidiay laeng agpannuray ken Jehova maipaay iti pannakaisalakan ti agbiag nga “agyaman [kenkuana] gapu iti naayat a kinamanangngaasina.”
109:30, 31; 110:5. Ti kalasag, nga iggaman ti kannigid nga ima ti soldado, kadawyan a dina masalakniban ti kannawan nga ima a mangitagtag-ay iti kampilan. Iti piguratibo a pamay-an, adda ni Jehova “iti makannawan” dagiti adipenna, tapno makirupak nga agpaay kadakuada. Iti kasta salakniban ken tulonganna ida, a maysa a nagsayaat a rason tapno ‘kasta unay nga idaydayawtayo ti Dios’!
113:4-9. Nakatantan-ok ni Jehova ta masapul nga agpakumbaba “tapno kumita iti langit.” Ngem, naasi kadagiti nanumo, kadagiti napanglaw, ken iti lupes a babai. Gapu ta napakumbaba ti Soberano nga Apo Jehova, kayatna a napakumbaba met dagiti agdaydayaw kenkuana.—Santiago 4:6.
114:3-7. Ti pannakaammotayo kadagiti nakaskasdaaw nga ar-aramid ni Jehova agpaay iti ilina idiay Nalabaga a Baybay, idiay Karayan Jordan, ken idiay Bantay Sinai rumbeng a pagsiddaawennatayo. Ti sangatauan, nga iladawan ti “daga,” rumbeng nga agsiddaaw—piguratibo nga ‘agrigat iti nakaro’—gapu iti Apo.
119:97-101. Masalaknibantayo manipud iti naespirituan a pannakadangran no gun-odentayo ti kinasirib, panangtarus, ken pannakaawat iti Sao ti Dios.
119:105. Ti Sao ti Dios ket pagsilawan iti sakatayo ta matulongannatayo a mangsaranget kadagiti agdama a problema. Piguratibo met a silawanna ti danatayo, ta ipadtona ti panggep ti Dios maipaay iti masanguanan.
NARAGSAK NUPAY ADU TI RIGAT
Kasano a sarangtentayo dagiti makasuot a kasasaad ken mapagballigian dagiti rigat? Nalawag ti sungbat ti Salmo 120 agingga iti 134 iti daytoy a saludsod. Mapagballigiantayo ti rigat ken mataginayontayo ti rag-otayo no agpannuraytayo ken Jehova maipaay iti tulong. Nalabit a dagitoy a salmo, a naawagan iti Kankanta Dagiti Panagsang-at, ti kinanta dagiti Israelita bayat a mapmapanda idiay Jerusalem tapno rambakanda dagiti tinawen a piesta.
Maisupadi kadagiti awan gawayda nga idolo, dagiti Salmo 135 ken 136 iladawanda ni Jehova kas Managaramid iti aniaman a pagragsakanna. Naputar ti maika-136 a Salmo para iti agsinnungbat a panagkanta. Makanta dagiti maudi a paset ti tunggal bersikulo kas sungbat ti immuna a paset. Ti sumaganad a salmo salaysayenna ti nakalkaldaang a kasasaad dagiti Judio nga adda idiay Babilonia, nga agtarigagay nga agdayaw ken Jehova idiay Sion. Pinutar ni David ti Salmo 138 agingga iti 145. Kayatna a ‘maidaydayawna ni Jehova buyogen ti isuamin a pusona.’ Apay? “Agsipud ta iti nakaam-amak a pamay-an nakaskasdaaw ti pannakaaramidko,” kinunana. (Salmo 138:1; 139:14) Kadagiti sumaganad a lima a salmo, inkararag ni David ti pannakasalaknibna manipud kadagiti dakes a tattao, ti nalinteg a pannakatubngarna, ti pannakaispalna kadagiti manangidadanes, ken ti pannakaiwanwan ti panagtignayna. Intampokna ti kinaragsak ti ili ni Jehova. (Salmo 144:15) Kalpasan ti panangpampanunot ni David iti kinatan-ok ken kinaimbag ti Dios, kinunana: “Ti pakaidaydayawan ni Jehova sawento ti ngiwatko; ket ti isuamin a lasag bendituenda koma ti nasantuan a naganna agingga iti tiempo a di nakedngan, iti mismo nga agnanayon.”—Salmo 145:21.
Sungbat Kadagiti Nainkasuratan a Saludsod:
122:3—Kasano a ti Jerusalem ket maysa a siudad a “napagsisilpo iti panagmaymaysa”? Kas iti gagangay a kasasaad dagiti siudad idi nagkauna a tiempo, agaassideg ti pannakaibangon dagiti balbalay idiay Jerusalem. Bassit laeng ti siudad isu a nalaka a salakniban. Maysa pay, gapu iti kinaassideg dagiti balbalay, dagiti agnaed iti siudad mabalin nga agpannurayda iti maysa ken maysa maipaay iti tulong ken pannalaknib. Daytoy ipasimudaagna ti naespirituan a panagkaykaysa ti 12 a tribu ti Israel no agtataripnongda tapno agdayaw.
123:2—Ania ti kaipapanan ti ilustrasion maipapan iti matmata dagiti adipen? Dagiti adipen nakaturong ti matmatada iti ima ti apoda gapu iti dua a rason: tapno maammuanda dagiti pagayatanna ken maaddaanda iti pannalaknib ken kasapulan iti biag. Umasping iti dayta, agpannuraytayo ken Jehova tapno maammuantayo ti pagayatanna ken magun-odtayo ti anamongna.
131:1-3—Kasano nga ‘inep-ep ken pinagulimek ni David ti kararuana kas iti maysa a kapuspusot iti inana’? No kasano a maliwliwa ken mapnek ti kapuspusot iti sakruy ti inana, nasursuro ni David nga ep-epen ken pagkalmaen ti kararuana “kas iti maysa a kapuspusot iti inana.” Kasano? Babaen iti saan a panagtangsit ti pusona ken panagpalalo dagiti matana ken saanna a panangsapul kadagiti naindaklan unay a bambanag. Binigbigna dagiti pagkapuyanna ket nagpakumbaba, imbes a sinapulna ti kinalatak. Masiribtayo no tuladentayo ti kababalinna, nangruna no tarigagayantayo ti maaddaan kadagiti pribilehio iti kongregasion.
Dagiti Masursurotayo:
120:1, 2, 6, 7. Dagiti mangpardaya ken mangsair a sasao mangyegda iti nakaro a panagtuok kadagiti sabsabali. No pengdantayo ti dilatayo ipakpakitatayo a “tarigagayantayo ti kappia.”
120:3, 4. No masapul nga ibturantayo ti maysa a “manangallilaw a dila,” maliwliwatayo nga addanto tiempo nga ilinteg ni Jehova dagiti bambanag. Dagiti manangpardaya dadaelento ti “nabileg a lalaki.” Sigurado nga apitendanto ti umap-apuy a panangukom ni Jehova babaen kadagiti “sumsumged a beggang dagiti kayo a retama.”
127:1, 2. Iti aniaman nga aramidentayo, rumbeng nga agpaiwanwantayo ken ni Jehova.
133:1-3. Makapaimbag, makabang-ar, ken makaay-ayo ti panagkaykaysa ti ili ni Jehova. Saantayo koma a dadaelen dayta babaen ti panagpipinnabasol, panagaapa, wenno panagreklamo.
137:1, 5, 6. Dagiti naidestiero a managdaydayaw ni Jehova ipatpategda ti Sion, ti nangirepresentar idi iti organisasion ti Dios. Datayo ngay? Nasungdotayo kadi iti organisasion nga us-usaren ni Jehova iti kaaldawantayo?
138:2. ‘Itan-ok ni Jehova ti sasaona uray pay iti ringbaw ti intero a naganna’ gapu ta ti kaitungpalan ti amin nga inkarina iti naganna ringbawannanto ti aniaman a mabalin a namnamaentayo. Talaga a naindaklan a namnama ti adda iti masanguanantayo.
139:1-6, 15, 16. Ammo ni Jehova ti ar-aramid, pampanunot, ken sasaotayo uray pay sakbay a sawentayo dagitoy. Am-ammonatayo uray maysatayo pay laeng idi a sikog, sakbay a nagminar dagiti paset ti bagitayo. “Nakaskasdaaw unay” a panunoten ti pannakaammo ti Dios kadatayo kas indibidual. Anian a makaliwliwa a maammuan a saan laeng a makita ni Jehova ti panagrigrigattayo no di ket maawatanna met dagiti epektona kadatayo!
139:7-12. Sadinoman ti papanantayo, saan nga adayo ti Dios tapno pabilgennatayo.
139:17, 18. Maay-ayotayo kadi iti pannakaammotayo ken ni Jehova? (Proverbio 2:10) No wen, nasarakantayon ti agnanayon nga ubbog ti pakaragsakan. Dagiti pampanunot ni Jehova “ad-aduda pay ngem uray dagiti binukel ti darat.” Kanayonto nga adu ti masursurotayo maipapan kenkuana.
139:23, 24. Tarigagayantayo koma nga usigen ni Jehova dagiti ‘nasaem a danatayo’—dagiti di umiso a pampanunot, tarigagay, ken pagannayasantayo—ken tulongannatayo a mangiwaksi kadagitoy.
143:4-7. Kasano a maibturantayo ti nakaro a rigat? Nangipaay ti salmista iti pamay-an: Mennamennaentayo dagiti ar-aramid ni Jehova, ipateg dagiti ar-aramidna, ken ikararag ti tulongna.
“Idaydayawyo ni Jah!”
Agpatingga ti tunggal maysa kadagiti uppat a koleksion dagiti salmo babaen ti ebkas ti panangidaydayaw ken ni Jehova. (Salmo 41:13; 72:19, 20; 89:52; 106:48) Kasta met ti ngudo ti maudi a koleksion. Kuna ti Salmo 150:6: “Tunggal agang-anges a banag—idaydayawna koma ni Jah. Idaydayawyo ni Jah!” Talaga a pumaysonto dayta inton baro a lubong ti Dios.
Bayat a segseggaantayo dayta a naragsak a tiempo, adu ti makagapu nga ipadayagtayo ti pudno a Dios ken idayaw ti naganna. No panunotentayo ti kinaragsaktayo a nakaam-ammo ken Jehova ken agrag-otayo iti naimbag a relasiontayo kenkuana, saantayo kadi a matignay a mangidayaw kenkuana buyogen ti managyaman a puso?
[Ladawan iti panid 15]
Nakaskasdaaw dagiti aramid ni Jehova
[Ladawan iti panid 16]
Dagiti pampanunot ni Jehova “ad-aduda pay ngem uray dagiti binukel ti darat”