Malagipyo Kadi?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Ania ti masursurotayo iti ilustrasion ni Jesus maipapan iti napinget a manangsangaili? (Lucas 11:5-10)

Isuro dayta nga ilustrasion no ania ti rumbeng a kababalintayo no agkarkararagtayo. Rumbeng a sipipinget nga agkiddawtayo, wenno itultuloytayo ti agkiddaw, nangruna iti nasantuan nga espiritu ti Dios. (Lucas 11:11-13)​—12/15, panid 20-2.

• Ania a leksion ti masursurotayo iti ilustrasion ni Jesus maipapan iti balo ken ukom? (Lucas 18:1-8)

Ipaganetgetna ti kinapateg ti panagkararag. Maisupadi iti ukom, ni Jehova ket nalinteg ken kayatnatayo a tulongan. Kanayonanna, rumbeng a maaddaantayo iti pammati kas iti pammati ti balo iti dayta nga ilustrasion.​—12/15, panid 26-8.

• Apay nga imbaga ni apostol Pablo kadagiti Kristiano idiay Corinto a ‘lumawada’? (2 Corinto 6:11-13)

Agparang nga agkurang ti panangipateg ti dadduma idiay Corinto kadagiti kapammatianda, yantangay akikid ken saan a naparabur ti pusoda. Nasken nga ikagumaantayo a patanoren ti pudno a panangipateg kadagiti kapammatiantayo, ken pagreggetantayo pay ketdi ti maaddaan kadagiti baro a gagayyem.​—1/1, panid 9-11.

• Ania a panangselio ti nadakamat idiay Apocalipsis 7:3?

No pulotan ti Dios dagiti Kristiano babaen ti nasantuan nga espiritu, maselioan dagitoy iti umuna a gundaway. Ngem ti Apocalipsis 7:3 tukoyenna ti maudi a panangselio, inton mapatalgedan ti naan-anay a kinasungdo dagita a napulotan.​—1/1, panid 30-1.

• Ania ti mabalin a masursuro dagiti nagannak manipud iti rekord ti Biblia maipapan ken Samuel?

Ti maysa ket rumbeng nga isuroda kadagiti annakda ti Sao ti Dios, kas iti sigurado nga inaramid dagiti nagannak ni Samuel. Kanayonanna, rumbeng a paregtaenda ti annakda a pagbalinenda a karera ti panagserbida ken Jehova.​—1/15, panid 16.

• Kasanotayo nga ipakita a siraragsak nga ur-urayentayo ni Jehova?

‘Ur-urayentayo . . . ti aldaw ni Jehova,’ a segseggaantayo ti bang-ar inton pukawenna dagiti amin a nadangkes a tattao. (2 Pedro 3:7, 12) Ngem nupay magagaran ni Jehova a pagpatinggaen ti amin a kinadakes, isu ket agtepteppel tapno maisalakanna dagiti Kristiano iti wagas a pakaitan-okan ti naganna. Rumbeng nga agtalektayo nga ammo ni Jehova ti umiso a tiempo a panagtignayna, isu a kabayatanna, siaaktibo koma nga idayawtayo isuna. (Salmo 71:14, 15)​—3/1, panid 17-18.

• Pito kadi iti tunggal nadalus nga animal wenno sagpipito a paris ti inserrek ni Noe iti daong?

Naibaga kenni Noe a ‘mangala iti sagpipito’ iti tunggal nadalus nga animal. (Genesis 7:1, 2) Iti Hebreo, ti sao a “sagpipito” literal a kaipapananna ti “pito a pito.” Dayta a wagas ti panagsao dina kaipapanan ti pito a paris, kas ti ipasimudaag ti dadduma a teksto ti Biblia. Ni Noe ket nabatad a nangiserrek iti pito iti tunggal maysa, tallo a paris ken maysa a maikapito a mabalinna nga usaren idi agangay kas pagdaton. (Genesis 8:20)​—3/15, panid 31.

• Apay a dagiti Kristiano rumbeng a “panunotenda” no kasano ti pagbanagan ti pammati dagiti panglakayen, dagidiay a mangidadaulo?

Ni apostol Pablo aw-awisennatayo a ‘mangpanunot’ wenno siaannad a mangusig iti pagbanagan ti matalek a kababalin dagiti panglakayen ken tuladenda dagita a pagarigan ti pammati. (Hebreo 13:7) Aramidentayo dayta agsipud ta bilbilinennatayo ti Sao ti Dios. Kombinsidotayo met a maseknan dagiti panglakayen agpadpada kadagiti interes ti Pagarian ken iti pagimbagantayo.​—4/1, panid 28.