Ti Panagungar​—Napaypayso Kadi Kenka?

“Addanto panagungar.”​—ARAMID 24:15.

1. Apay a kasla sigurado a mataytayo amin?

“ITI daytoy a lubong, awan ti sigurado no di laeng ti ipapatay ken buis.” Nagustuan ti adu a nasaririt a tattao dayta a komento nga insurat ti Americano nga estadista a ni Benjamin Franklin idi 1789. Nupay kasta, adu a suitik a tattao ti mangkuskusit kadagiti buisda. Ngem kasla ad-adda a sigurado ti ipapataytayo. No awan ti tumulong, sigurado a mataytayo amin. Awan kadatayo ti makalisi iti ipapatay. Di mapmapnek ti Sheol​—ti tanem ti sangatauan​—a mangalun-on kadagiti patpatgentayo. (Proverbio 27:20) Ngem usigem daytoy makaliwliwa nga impormasion.

2, 3. (a) Saan a kas iti ipagarup ti adu, apay nga adda dadduma a dinton pulos matay? (b) Ania ti usigentayo iti daytoy nga artikulo?

² Ti Sao ni Jehova ket mangted iti sigurado a namnama a panagungar, ti pannakapabiag manen. Saan nga arapaap laeng dayta, ket awan ti aniaman a puersa iti uniberso a makalapped iti panangibanag ni Jehova iti dayta a namnama. Ngem saan a kas iti ipagarup ita ti adu a tattao, adda dadduma a dinton pulos matay. Apay? Agsipud ta adda di mabilang a “dakkel a bunggoy” a makalasatto iti asidegen a “dakkel a rigat.” (Apocalipsis 7:9, 10, 14) Kalpasan dayta, agbiagdanton iti awan inggana. No kasta, sigurado a saandanton a matay. Maysa pay, “ni patay mapukawto.”​—1 Corinto 15:26.

³ Kas ken apostol Pablo, nasken a patientayo a sigurado ti panagungar. Kastoy ti insuratna: “Addanto panagungar agpadpada dagiti nalinteg ken dagiti nakillo.” (Aramid 24:15) Usigentayo ti tallo a saludsod maipapan iti panagungar. Umuna, ania ti makagapu a talaga a sigurado dayta a namnama? Maikadua, iti ania a pamay-an a maliwliwaka iti namnama a panagungar? Maikatlo, kasano nga apektaran dayta a namnama ti agdama a biagmo?

Sigurado ti Panagungar

4. Iti ania nga anag a ti panagungar ket nakapatpateg iti panggep ni Jehova?

⁴ Adu ti pamatiantayo a sigurado ti panagungar. Kangrunaan iti amin, napateg dayta iti panggep ni Jehova. Laglagipem a ni Satanas insungsongna ti sangatauan tapno agbasol, ket di maliklikan a nangibunga dayta iti ipapatay. Gapuna, kastoy ti nakuna ni Jesus maipapan ken Satanas: “Dayta ket mammapatay idi a nangrugi.” (Juan 8:44) Ngem inkari ni Jehova a ti kukuana a “babai,” wenno ti arig-asawana nga organisasion idiay langit, ket mangpataud iti ‘bin-i’ a mangrumek iti ulo ti “kadaanan a serpiente,” a pakaigapuan ti naan-anay a pannakadadael ni Satanas. (Genesis 3:1-6, 15; Apocalipsis 12:9, 10; 20:10) Bayat nga in-inut nga impalgak ni Jehova ti panggepna maipapan iti dayta a Mesianiko a Bin-i, bimmatad nga ad-adunto pay ti aramiden dayta a Bin-i ngem iti basta panangdadaelna ken Satanas. Kuna ti Sao ti Dios: “Iti daytoy a panggep naiparangarang ti Anak ti Dios, awan sabali, tapno dadaelenna dagiti aramid ti Diablo.” (1 Juan 3:8) Ti ipapatay nga imbunga ti basol a natawidtayo manipud ken Adan ti kangrunaan kadagiti gapuanan ni Satanas a panggep ni Jehova a balbaliwan babaen ken Jesu-Kristo. Maipapan iti dayta, talaga a napateg ti pangsubbot a sakripisio ni Jesus ken ti panagungar.​—Aramid 2:22-24; Roma 6:23.

5. Apay a ti panagungar ipadayagna ti nagan ni Jehova?

⁵ Determinado ni Jehova a mangipadayag iti sagrado a naganna. Padpadaksen ni Satanas ti nagan ti Dios ken isaksaknapna ti kinaulbod. Siuulbod nga imbagana kada Adan ken Eva a ‘sigurado a saanda a matay’ no manganda iti bunga ti kayo nga iparit ti Dios. (Genesis 2:16, 17; 3:4) Sipud idin, mangisaksaknapen ni Satanas kadagiti umasping a kinaulbod, kas iti palso a pannursuro a saan kano a matay ti kararua. Nupay kasta, babaen ti panagungar, ibutaktak ni Jehova nga ulbod amin dagita. Mamimpinsan a paneknekanna nga isu laeng ti Manangtaginayon ken Manangisubli iti biag.

6, 7. Aniat’ mangipakita a tartarigagayan ni Jehova a pagungaren dagiti natay, ken kasanotay nga ammo a kasta?

⁶ Tarigagayan unay ni Jehova a pagungaren dagiti natay. Ibatad ti Biblia a kasta ti rikna ni Jehova. Kas pagarigan, usigenyo dagitoy a naipaltiing a sasao ti matalek a lalaki a ni Job: “No ti nabaneg a lalaki matay mabalinna kadi ti agbiag manen? Amin dagiti aldaw ti inkapilitan a panagtrabahok agurayakto, agingga a ti gin-awak dumteng. Umawagkanto, ket siak sungbatankanto. Kailiwmonto ti aramid dagita imam.” (Job 14:14, 15) Ania ti kababagas dagita a sasao?

⁷ Ammo ni Job a kalpasan ti ipapatayna, isu ket aguray iti sumagmamano a tiempo bayat ti pannaturogna ken patay. Imbilangna dayta a tiempo kas ‘inkapilitan a panagtrabaho,’ maysa a tiempo a kasapulan ti panagurayna sakbay a mawayawayaan. Para kenkuana, siguradonto a mawayawayaan. Ammo ni Job a dumtengto ti pannakabang-arna. Apay? Agsipud ta ammona ti rikna ni Jehova. ‘Kailiwto’ ni Jehova a makita manen ti matalek nga adipenna. Wen, kailiw ti Dios a pagungaren dagiti amin a nalinteg a tattao. Ikkanto met ni Jehova iti gundaway ti sabsabali nga agbiag nga agnanayon iti Paraiso ditoy daga. (Lucas 23:43; Juan 5:28, 29) Yantangay pagayatan ti Dios nga ibanag dayta a panggep, adda kadi asinoman a makalapped kenkuana?

8. Kasano a ‘pinatalgedan’ ni Jehova ti namnamatayo iti masanguanan?

⁸ Ti namnamatayo agpaay iti masanguanan ket patalgedan ti panagungar idi ni Jesus. Idi nagpalawag ni Pablo idiay Atenas, kinunana: “[Ti Dios] nangituding iti aldaw nga iti dayta panggepna nga ukomen ti mapagnaedan a daga buyogen ti kinalinteg babaen ti maysa a lalaki a dinutokanna, ket nangipaay iti pammatalged kadagiti amin a tattao iti panangpagungarna kenkuana manipud kadagiti natay.” (Aramid 17:31) Nangrabrabak ti dadduma a dimngeg ken Pablo idi naammuanda ti maipapan iti panagungar. Nupay kasta, adda sumagmamano a nagbalin a manamati. Nalabit nagustuanda dayta a namnama idi pinampanunotda a napatalgedanen dayta. Idi pinagungar ni Jehova ni Jesus, inaramidna ti kangrunaan kadagiti amin a milagro. Pinagungarna ti Anakna manipud ken patay kas maysa a mannakabalin nga espiritu. (1 Pedro 3:18) Ti napagungar a ni Jesus ket natantan-oken ngem idi sakbay a nagbalin a tao. Kas maysa nga imortal ken sumegunda laeng ken ni Jehova iti pannakabalin, kabaelan itan ni Jesus nga ibanag dagiti nagsayaat nga annongen a naggapu ken Amana. Babaen ken Jesus, adda dadduma pay a panangpagungar nga aramiden ni Jehova​—agpaay iti biag idiay langit wenno ditoy daga. Kinuna a mismo ni Jesus: “Siak ti panagungar ken ti biag.” (Juan 5:25; 11:25) Babaen ti panangpagungarna iti Anakna, pinatalgedan ni Jehova dagita a namnama agpaay kadagiti amin a matalek nga adipenna.

9. Kasano a ti nailanad iti Biblia pasingkedanna ti kinaagpayso ti panagungar?

⁹ Addan dagiti panagungar a nasaksian ti dadduma ken nailanad dagita iti Sao ti Dios. Detalyado a naisalaysay iti Biblia ti maipapan iti walo a panagungar dagiti tattao a napagbiag manen ditoy daga. Saan a nailimed ti pannakaaramid dagita a milagro no di ket naaramid dagita iti publiko a lugar, a masansan nga adda dagiti nakaimatang. Ni Jesus pinagungarna ni Lazaro, nga uppat nga aldaw idin a natay, iti imatang ti maysa a bunggoy dagiti agsangsangit​—di pagduaduaan a pakairamanan ti pamilia, gagayyem, ken kakaarruba ni Lazaro. Natibker dayta nga ebidensia a ni Jesus ket imbaon ti Dios ta uray la a di mailibak dayta dagiti relihioso a bumusbusor ken Jesus. Imbes ketdi, insikatda a patayen saan laeng a ni Jesus no di ket uray met ni Lazaro! (Juan 11:17-44, 53; 12:9-11) Wen, makapagtalektayo a sigurado ti panagungar. Inikkannatayo ti Dios iti rekord dagiti napalabas a panagungar tapno maliwliwanatayo ken mapabilegna ti pammatitayo.

Pannakaliwliwa iti Namnama a Panagungar

10. Ania ti makatulong kadatayo a makagun-od iti liwliwa kadagiti salaysay ti Biblia maipapan iti panagungar?

¹⁰ Kayatmo kadi ti maliwliwa no agngangabitkan ken patay? Ti maysa a sigurado a gubuayan ti namnama ket masarakan kadagiti salaysay ti Biblia maipapan iti panagungar. Lallalo nga agbalin a napaypayso kenka ti namnama a panagungar no basaem ken utobem dagita, ken iladawanmo ida iti panunotmo. (Roma 15:4) Dagita ket saan laeng a sarsarita. Aktual a napasamakda kadagiti agpayso a tattao a kas kadatayo, a nagbiag iti napaypayso a tiempo ken lugar. Usigentayo biit ti maysa a pagarigan​—ti kaunaan a panagungar a nailanad iti Biblia.

11, 12. (a) Ania a trahedia ti napasamak iti balo iti Sarepta, ken ania ti reaksionna idi damo? (b) Ilawlawagyo no ania a pannakabalin ti impaay ni Jehova iti mammadtona a ni Elias agpaay iti balo.

¹¹ Darepdepem daytoy nga eksena. Ni Elias ket sumagmamanon a lawas a sangaili ti maysa a balo idiay Sarepta. Iti maysa a siled iti pangatepan ti balay dayta a balo ti pagnanaedan ni Elias. Nakalkaldaang ti kasasaad iti dayta a lugar agsipud ta tiempo idi ti tikag ken bisin. Adu ti matmatay. Kasakbayanna, ni Elias ket inusaren ni Jehova nga agaramid iti napaut a milagro tapno magunggonaan ti pammati dayta a nanumo a balo. Dayta a balo ken ti ubing pay nga anakna a lalaki ket dandani idin agbisin. Agpaay laengen iti maminsan a pannangan ti nabati a taraonda nga agina idi a ti Dios inikkanna ni Elias iti pannakabalin nga agaramid iti milagro tapno di maibus ti arina ken lana nga abasto ti balo a simimilagro a nangsustiner kadakuada. Ngem ita, adda trahedia a napasamak iti dayta a balo. Kellaat a nagsakit ti anakna, ket di nagbayag, nagsaten ti angesna. Napalalo la ketdi ti panagladingit dayta a balo! Nakasasaem la ngaruden ti maawanan iti mangpabileg ken mangsaranay nga asawa, sa ita, natay payen ti bugbugtong nga anakna. Gapu iti ladingitna, urayna la pinabasol ni Elias ken ti Diosna a ni Jehova! Ania ti inaramid ni mammadto Elias?

¹² Saan a binabalaw ni Elias dayta a balo gapu iti di umiso a pammabasolna. Imbes ketdi, kinunana: “Itedmo kaniak ti anakmo.” Inyuli ni Elias ti natay nga ubing agingga iti siled iti pangatepan sa maulit-ulit a nagkararag tapno agungar ti natay nga ubing. Kamaudiananna, nagtignayen ni Jehova! Panunotenyo ti rag-o a nagminar iti rupa ni Elias idi nakitana nga agang-angesen ti ubing. Nagmulagat ti ubing, ken rimmagsak dagiti matana. Inyulog ni Elias ti ubing ken inyasidegna ken ni nanangna sana kinuna: “Kitaem, sibibiag ti anakmo.” Kasta unay ti rag-o dayta a balo. Kinunana: “Ita, kinapudnona, ammokon a maysaka a lalaki ti Dios ket ti sao ni Jehova iti ngiwatmo pudno.” (1 Ar-ari 17:8-24) Ad-adda a bimmileg ti pammatina ken Jehova ken ni Elias a pannakabagi ti Dios.

13. Apay a makaliwliwa kadatayo ita ti salaysay maipapan iti panangpagungar ni Elias iti anak a lalaki ti maysa a balo?

¹³ Sigurado a makaliwliwa kadakayo ti panangutob iti kasta a salaysay. Anian a nagbatad a kabaelan ni Jehova a parmeken ti kabusortayo nga isu ni patay! Panunotenyo laengen ti aldaw inton dayta a rag-o ti balo ket mariknanto metten ti riniwriw inton sapasap a panagungar! Napalausto met ti rag-o sadi langit bayat a siraragsak a tarawidwidan ni Jehova ti Anakna a mangibanag iti panagungar iti intero a lubong. (Juan 5:28, 29) Adda met kadin pimmusay nga ay-ayatem? Anian a nagsayaat a maammuan a kabaelan ken talaga a pagungarento ni Jehova dagiti natay!

Ti Namnamam ken ti Panagbiagmo Ita

14. Kasano a ti namnama a panagungar apektaranna ti biagmo?

¹⁴ Kasano a ti namnama a panagungar apektaranna ti panagbiagmo ita? Dayta a namnama ti mangpabileg kenka no mapaspasaram ti rigat, parikut, pannakaidadanes, wenno peggad. Kayat ni Satanas a pagbutngam unay ti matay tapno situtulokka a mangikompromiso iti kinatarnawmo agpaay laeng iti ubbaw a kari nga agbalin a natalged ti kasasaadmo. Laglagipem ti imbaga ni Satanas ken ni Jehova: “Isuamin nga adda iti maysa a tao itednanto maigapu iti kararuana.” (Job 2:4) Idi imbagana dayta, nangidatag ni Satanas iti pammadakes maibusor kadatayo amin, a pakaibilangam. Agpayso kadi nga isardengmo ti agserbi iti Dios no agpeggad ti kasasaadmo? No ut-utobem ti namnama a panagungar, mapabilegmo ti determinasionmo nga agtultuloy a mangaramid iti pagayatan ti nailangitan nga Amam.

15. No maipasangotayo iti peggad, kasano a maliwliwatayo iti kinuna ni Jesus a nailanad iti Mateo 10:28?

¹⁵ Kinuna ni Jesus: “Dikay agbuteng kadagidiay mangpapatay iti bagi ngem saanda a kabaelan a papatayen ti kararua; no di ket agbutengkayo iti daydiay makabalin a mangdadael agpadpada iti kararua ken bagi idiay Gehenna.” (Mateo 10:28) Rumbeng a ditay pagbutngan ni Satanas wenno dagiti tattao nga aliporesna. Agpayso a kabaelan ti dadduma ti mangdangran ken mangpapatay pay ketdi. Nupay kasta, kaskasdi nga uray ti kadaksan a maaramidanda ket temporario laeng. Kabaelan ni Jehova nga aturen ti aniaman a pannakadangran dagiti matalek nga adipenna, uray kaipapananna pay ti panangpagungarna kadakuada. Ni laeng Jehova ti maikari a pagbutngan, pagdayawan, ken pagraemantayo. Isu laeng ti addaan pannakabalin a mangikkat iti biag ken iti amin a namnama a panagbiag iti masanguanan, ta kabaelanna a dadaelen agpadpada ti bagi ken ti kararua idiay Gehenna. Makaparagsak ta saan a kayat ni Jehova a mapasamak dayta kenka. (2 Pedro 3:9) Gapu iti namnama a panagungar, kanayon a masiguradotayo kas adipen ti Dios a natalgedtayo. Masagraptayto ti biag nga agnanayon no la ketdi ta agtalinaedtayo a matalek, ket awan ti aniaman a maaramidan ni Satanas wenno dagiti aliporesna maipapan iti dayta.​—Salmo 118:6; Hebreo 13:6.

16. Kasano a ti panangmatmattayo iti panagungar apektaranna dagiti prioridadtayo?

¹⁶ No napaypayso kadatayo ti namnama a panagungar, mabalbaliwanna ti panangmatmattayo iti biag. Maamiristayo a “no agbiagtayo ken no mataytayo, kukuanatay ni Jehova.” (Roma 14:7, 8) Iti panangikeddengtayo kadagiti prioridadtayo, rumbeng ngarud nga iyaplikartayo daytoy a balakad ni Pablo: “Dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) Kayat ti adu a tattao a penken a dagus ti tunggal tarigagay, ambision, ken kalikagumda. Gapu ta ibilangda a nakaab-ababa ti biag, kaslada la desperado unay nga agpempennek iti ragragsak, ket no adda man relihionda, sigurado a di maitunos ti wagasda iti “naan-anay a pagayatan ti Dios.”

17, 18. (a) Kasano a patalgedan ti Sao ni Jehova nga ababa ti biag ti tao, ngem ania ti kayat ti Dios agpaay kadatayo? (b) Apay a magutugottayo a mangidayaw ken Jehova iti inaldaw?

¹⁷ Agpayso nga ababa ti biag. ‘Sidadaras a lumabas dayta, ket tumayabtayon,’ nalabit iti agarup 70 wenno 80 a tawen. (Salmo 90:10) Temporario ti biag ti tao a kas iti berde a ruot, kas iti aglabas nga anniniwan, kas iti alingasaw. (Salmo 103:15; 144:3, 4) Ngem saan a pinanggep ti Dios a busbosentayo ti sumagmamano a dekada a dumakkel ken agmataengan, manggun-od iti bassit a sirib ken kapadasan sa iti sumaganad a sumagmamano a dekada, in-inuten nga agsakit, kumapuy, ken mataytayo. Pinarsua ni Jehova dagiti tattao nga addaan iti tarigagay nga agbiag nga agnanayon. “Ti tiempo a di nakedngan insaadna iti pusoda,” kuna ti Biblia kadatayo. (Eclesiastes 3:11) Naulpit aya ti Dios, ta nangted kadatayo iti kasta a tarigagay, sana pagbalinen nga imposible a maragpattayo dayta? Saan, ta kinapudnona, “ti Dios ket ayat.” (1 Juan 4:8) Usarennanto ti panagungar tapno mabalinton nga agbiag nga agnanayon dagiti tattao a natayen.

¹⁸ Gapu iti namnama a panagungar, mabalintay ti maaddaan iti natalged a masakbayan. Di kasapulan nga agapuratayo, a kasla ket tay masapul nga ibanagtayo itan ti amin a kabaelantayo nga aramiden. Ditay rumbeng nga usaren a “naan-anay” daytoy matmatayen a lubong. (1 Corinto 7:29-31; 1 Juan 2:17) Saan a kas kadagidiay awanan iti napaypayso a namnama, addaantayo iti nagsayaat a sagut nga ammotayo a no agtalinaedtayo a matalek ken ni Jehova a Dios, agnanayon ti gundawaytayo nga agdayaw kenkuana ken mangtagiragsak iti biag. Nasken ngarud nga inaldaw a dayawentayo ni Jehova, daydiay namagbalin a napaypayso ti namnama a panagungar!

Ania ti Sungbatmo?

• Ania ti nasken a panangmatmattayo iti panagungar?

• Ania dagiti ebidensia a sigurado ti namnama a panagungar?

• Kasano a makaliwliwa kenka ti namnama a panagungar?

• Ania ti epekto ti namnama a panagungar iti panagbiagmo?

[Ladawan iti panid 28]

Ammo ni Job a kailiw ni Jehova a pagungaren dagiti nalinteg

[Ladawan iti panid 29]

“Kitaem, sibibiag ti anakmo”