Salsaludsod Dagiti Agbasbasa

Kalpasan a ni David pinapatayna ni Goliat, apay nga inyimtuod ni Ari Saul kenni David, “Makin-anak kenka, agtutubo?” idinto ta pinaayabanna idin ni David nga agserbi kenkuana?​—1 Samuel 16:22; 17:58.

Ti maysa a posibilidad ket nalipatan ni Saul no asino ni David gapu ta apagbiit laeng ti damo a panagam-ammoda. Ngem adayo a kasta, yantangay sigun iti 1 Samuel 16:18-23 ipakitana a ni Ari Saul pinaayabanna ni David ken inayatna iti kasta unay ket pinagbalinna a paraawit iti armasna. Talaga nga am-ammona ni David.

Ibilang ti dadduma nga eskolar ti Biblia a nainayon laeng ti 1 Samuel 17:12-31 ken 17:55–18:5 yantangay saan nga agparang dagitoy a bersikulo kadagiti sumagmamano a kopia ti Griego a Septuagint, maysa a patarus ti Hebreo a Kasuratan a nakompleto idi maikadua a siglo K.K.P. Ngem saan met a nainsiriban ti kasta a konklusion a naibatay laeng kadagitoy a kopia ti Septuagint, yantangay agparang met dagitoy a teksto kadagiti dadduma a mapagtalkan a manuskrito ti Hebreo a Kasuratan.

Nalawag a ti panagsaludsodna ken Abner sa kalpasanna ken David ipakitana a saan laeng nga interesado ni Saul iti nagan ti ama ni David. Kalpasan a nakitana ti dakkel a pammati ken kinatured ni David idi pinarmekna ni Goliat, kayat a maammuan ni Saul ti kinatao ti nangpadakkel ken David. Mabalin a pampanunoten ni Saul nga itiponna iti buyotna ti ama ni David a ni Jesse, wenno ti dadduma pay a kameng ti pamiliada, ta mabalin nga addaanda met iti kinatured a kas ken David.

Nupay sagudayen ti 1 Samuel 17:58 ti ababa a sungbat ni David a “ti anak ni adipenmo a Jesse a Betlehemita,” ipamatmat dagiti sumaganad a nagtultuloy ti panagtungtongda. Mainaig iti daytoy, imutektekanyo ti komento ni C. F. Keil ken F. Delitzsch: “Babaen dagiti sasao iti [1 Samuel 18:1] nga ‘apaman a nalpas a nagsao ken Saul,’ nalawag nga ipakitana a nagtultuloyda a nagtungtong maipapan iti kasasaad ti pamiliana, yantangay dagita a sasao ipasimudaagda ti napapaut a panagsarita.”

Maibatay kadagiti kalkalpas a nausig, makunatayo nga idi inyimtuod ni Saul, “Makin-anak kenka, agtutubo?” isu ket saan nga interesado iti kinasiasino ni David ta am-ammonan ti agtutubo, no di ket interesado iti nalikudan ken kabibiag ni David.

[Ladawan iti panid 31]

Apay nga inyimtuod ni Saul kenni David no makin-anak kenkuana?