Agbiagka a Sipapanunot iti Masanguanan

“DIKAY pulos maringgoran maipapan iti sumaganad nga aldaw,” kinuna ni Jesu-Kristo iti nalatak a diskursona iti igid ti Bantay Galilea. Kinunana pay: “Ti sumaganad nga aldaw addaanto kadagiti bukodna a pakaringgoran.”​—Mateo 6:34.

Ania ti kaipapanan ti sasao a, “ti sumaganad nga aldaw addaanto kadagiti bukodna a pakaringgoran”? Isingsingasingna kadi nga agbiagka laeng para iti agdama ket dimon pampanunoten ti masanguanan? Maitunos kadi dayta iti panangmatmat ni Jesus ken dagiti pasurotna?

“Isardengyo ti Maringgoran”

Basaem ti intero a kinuna ni Jesus a masarakan iti Mateo 6:25-32. Iti dadduma a paset dayta, kinunana: “Isardengyo ti maringgoran maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto. . . . Paliiwenyo a sipapasnek dagiti tumatayab iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. . . . Siasino kadakayo nga iti panagbalinna a maringgoran manayonanna iti maysa a kasiko ti kaatiddog ti biagna? Kasta met, no maipapan iti pagan-anay, apay a maringgorankayo? Agsursurokayo kadagiti lirio iti talon, no kasano ti panagdakkelda; saanda nga agbannog, wenno mambi . . . Gapuna dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo.”

Inngudo ni Jesus dayta a paset ti diskursona babaen ti dua a balakad. Ti umuna ket: “Itultuloyyo, ngarud, a sapulen nga umuna ti pagarian [ti Dios] ken ti kinalintegna, ket amin dagitoy sabali pay a bambanag mainayonto kadakayo.” Ti maikadua ket: “Gapuna, dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran. Umdasen iti tunggal aldaw ti bukodna a kinadakes.”​—Mateo 6:33, 34.

Ammo ni Amayo no Ania Dagiti Kasapulanyo

Up-upayen kadi ni Jesus dagiti adalanna ken dagiti mannalon nga ‘agmula, agani, wenno agipempen iti apit kadagiti kamalig’? Wenno up-upayenna kadi ida nga ‘agbannog ken mambi’ tapno maaddaanda kadagiti pagkawes? (Proverbio 21:5; 24:30-34; Eclesiastes 11:4) Sigurado a saan. No agsardengda nga agtrabaho, awan duadua a ‘makilimosdanto iti tiempo ti panagapit,’ gapu ta awan ti kanen wenno pagkawesda.​—Proverbio 20:4.

Ti ngay pakaringgoran? Kayat kadi a sawen ni Jesus a saanto a pulos maringgoran dagiti dumdumngeg kenkuana? Saan a realistiko dayta. Ni Jesus a mismo napasaranna ti nakaro a tuok ken pakaringgoran iti rabii a pannakaarestona.​—Lucas 22:44.

Ibagbaga laeng ngarud ni Jesus ti maysa a kangrunaan a kinapudno. Awan ti maitulong ti nalabes a panagdanag iti pannakasolbar ti aniaman a parikutmo. Kas pagarigan, saanna a mapaatiddog ti biagmo. Kinuna ni Jesus a saanna a ‘manayonan iti maysa a kasiko ti kaatiddog ti biagmo.’ (Mateo 6:27) Kinapudnona, umababa pay ketdi ti biagmo no kanayon ken nalabes ti panagdandanagmo.

Praktikal unay ti balakadna. Ngamin, iti kinapudnona, manmano a mapasamak ti adu kadagiti pakaringgorantayo. Kasta ti naamiris ti Briton nga estadista a ni Winston Churchill maipapan iti nakalkaldaang a kasasaad idi Sangalubongan a Gubat II. Kastoy ti insuratna mainaig iti dadduma kadagiti pakaringgoranna idi: “No panunotek dagidi, malagipko ti inestoria ti maysa a lakay idi dandanin matay. Kinunana a nagadu idi ti pakadanaganna ngem kaaduan kadagita ket saan a pulos a napasamak.” Talaga ngarud a nainsiriban nga asikasuentayo laeng ti tunggal aldaw nga aglabas, nangruna no naglakatayo a maringgoran kadagiti pakarigatan ken parikut.

‘Itultuloyyo a Sapulen nga Umuna ti Pagarian ti Dios’

Kinapudnona, saan laeng a ti pisikal ken emosional a kasasaad dagiti agdengdengngeg kenkuana, ti pampanunoten ni Jesus. Ammona a mabalin a masinga ti panangipangpangrunatayo kadagiti napatpateg a banag no maringgorantayo gapu iti panagsapul iti pagbiag ken no nalabes ti panagtarigagaytayo kadagiti sanikua ken ragragsak. (Filipos 1:10) Nalabit a mapanunotmo, ‘Ania koma pay ti napatpateg ngem iti pananggun-od kadagiti kasapulantayo iti biag?’ Ti sungbat ket isu dagiti naespirituan a banag a nainaig iti panagdayawtayo iti Dios. Impaganetget ni Jesus a ti rumbeng a kapatgan iti biagtayo isu ti ‘agtultuloy a panangsapultayo nga umuna iti pagarian ken iti kinalintegna.’​—Mateo 6:33.

Idi kaaldawan ni Jesus, adu a tattao ti agragut a maaddaan kadagiti material a banag. Ti panagpabaknang ti kapatgan kadakuada. Ngem indagadag ni Jesus kadagiti dumdumngeg kenkuana a baliwanda ti panagpampanunotda. Kas tattao a dedikado iti Dios, ti ‘intero a pagrebbenganda’ isu ti ‘panagbutengda iti pudno a Dios ken panangsalimetmetda kadagiti bilinna.’​—Eclesiastes 12:13.

Mabalin a madadael ti espiritualidad dagiti dumdumngeg kenkuana no nalabes ti pannakakumikomda kadagiti material a banag​—“ti pakaringgoran daytoy a sistema ti bambanag ken ti makaallilaw a pannakabalin ti kinabaknang.” (Mateo 13:22) Insurat ni apostol Pablo: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” (1 Timoteo 6:9) Tapno matulonganna ida a mangliklik iti daytoy a “sulisog,” impalagip ni Jesus kadagiti pasurotna nga ammo ti nailangitan nga Amada ti amin a kasapulanda. Aywanan ida ti Dios no kasano nga ay-aywananna “dagiti tumatayab iti langit.” (Mateo 6:26, 32) Imbes a malapunosda iti adu a pakaringgoran, aramidenda ti amin a kabaelanda a mangisakad iti panagbiagda sa kalpasanna, sitatalek nga ipabiangdan ti bambanag kenni Jehova.​—Filipos 4:6, 7.

Idi kinuna ni Jesus a “ti sumaganad nga aldaw addaanto kadagiti bukodna a pakaringgoran,” kayatna laeng nga ibaga a ditay koma degdegan dagiti parikuttayo iti agdama babaen iti nalabes a panagdanagtayo iti posible a mapasamak iti sumuno nga aldaw. Iti sabali a bersion ti Biblia, kastoy ti pannakaipatarus ti kinuna ni Jesus: “Diyo pakasikoran ti agpaay kadakayo inton bigat; ta ti sumaganad nga aldaw adda bukodna a parikut. Umdasen ti parikut ti maysa nga aldaw iti dayta nga aldaw.”​—Mateo 6:34, Ti Baro a Naimbag a Damag Biblia.

“Umay Koma ti Pagariam”

Nupay kasta, adda dakkel a paggidiatan ti saan unay a pannakakumikom maipapan iti sumuno nga aldaw ken ti interamente a di panangpanunot iti dayta. Saan a pulos nga imparegta ni Jesus kadagiti adalanna a dida pakaseknan ti sumuno nga aldaw. Imbes ketdi, indagadagna kadakuada nga agbalinda koma nga interesado unay iti masanguanan. Rumbeng nga ikararagda dagiti agdama a kasapulanda​—ti tinapay a kanenda iti inaldaw. Ngem rumbeng nga ikararagda pay nga umuna ti bambanag a mapasamakto pay laeng iti masanguanan​—ti iyaay ti Pagarian ti Dios ken ti pannakaibanag ti pagayatan ti Dios ditoy daga.​—Mateo 6:9-11.

Ditay koma tultuladen dagiti tattao idi kaaldawan ni Noe. Dida ‘inkankano’ ti asideg idin a mapasamak gapu ta okupadoda unay a ‘mangmangan ken umin-inum, mangas-asawa dagiti lallaki ken mayas-asawa dagiti babbai.’ Ania ti resultana? “Immay ti layus ket inyanudna amin ida.” (Mateo 24:36-42) Dinakamat ni apostol Pedro daydi a pasamak tapno ipalagipna a nasken nga agbiagtayo a sipapanunot iti masanguanan. Insuratna: “Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!”​—2 Pedro 3:5-7, 11, 12.

Agurnongkayo Kadagiti Gameng Idiay Langit

No kasta, kanayontayo koma a “silalagip unay” iti aldaw ni Jehova. Ti panangaramid iti dayta ket dakkel ti epektona iti wagas a panangusartayo iti tiempo, pigsa, paglaingan, ik-ikutan, ken abilidadtayo. Saantayo koma a makumikom unay iti pananggun-od kadagiti material a banag​—dagiti man kasapulantayo iti biag wenno ti panagragragsak​—nga uray la a bassiten ti tiempotayo para kadagiti aramid a mangipakita iti “nadiosan a debosion.” Ti panagbiag nga agpaay laeng iti agdama ket mabalin a mangyeg kadagiti madagdagus a pagimbagan, ngem temporario laeng dagita. Kinuna ni Jesus nga ad-adda a nainsiriban ti ‘agurnong maipaay iti bagbagitayo kadagiti gameng idiay langit’ imbes a ditoy daga.​—Mateo 6:19, 20.

Inyunay-unay ni Jesus dayta a punto iti ilustrasionna maipapan iti maysa a lalaki a nangaramid kadagiti dakkel a plano para iti masanguanan. Saanna nga inkabilangan ti Dios kadagita a planona. Nawadwad ti maap-apitna isu nga inkeddengna a rakraken dagiti kamaligna tapno mangibangon kadagiti daddadakkel. Iti kasta, mabalinna ti agbiag a sinanam-ay​—mangan, uminom, ken agragsak. Adda kadi pagdaksanna dayta? Adda. Ngamin, natay dayta a lalaki sakbay a mapagnumaranna dagiti nagbannoganna. Ngem nakarkaro pay, saan a nakaipasdek iti nasayaat a relasion iti Dios. Ingngudo ni Jesus: “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.”​—Lucas 12:15-21; Proverbio 19:21.

Ania ti Mabalinmo nga Aramiden?

Dimo tultuladen ti lalaki iti ilustrasion ni Jesus. Ammuem ti panggep ti Dios para iti masanguanan, ket agbiagka a maitunos iti dayta. Saan nga inlimed ti Dios kadagiti tattao ti maipapan kadagiti panggepna. Insurat ti nagkauna a mammadto a ni Amos: “Ti Soberano nga Apo Jehova saanto nga agaramid iti maysa a banag malaksid no impalgakna ti kompidensial a banagna kadagiti adipenna a mammadto.” (Amos 3:7) Babaen iti naipaltiing a Saona a ti Biblia, mabalinmo itan nga ammuen ti impalgak ni Jehova kadagiti mammadtona.​—2 Timoteo 3:16, 17.

Ti maysa a banag nga impalgak ti Biblia ket ti asidegen a mapasamak a mangapektar iti intero a daga iti kakaro nga awan pay kapadana. Kinuna ni Jesus: “Addanto dakkel a rigat a dayta ket saan pay a napasamak nanipud idi pangrugian ti lubong agingga ita.” (Mateo 24:21) Awan ti asinoman a makalapped iti dayta a pasamak. Kinapudnona, awan ti rason tapno lapdan dayta dagiti pudno a managdaydayaw. Apay? Ngamin, dayta a pasamak ti mangpukaw iti amin a kinadakes ditoy daga, ken mangyeg iti “baro a langlangit ken baro a daga,” kayatna a sawen, maysa a baro a nailangitan a gobierno ken maysa a baro a kagimongan ditoy daga. Iti dayta a baro a lubong, ti Dios “punasennanto ti amin a lua kadagiti mata [dagiti tattao], ket awanton ni patay, awanto metten ti panagleddaang wenno panagsangit wenno ut-ot.”​—Apocalipsis 21:1-4.

No kasta, saan kadi a maiparbeng laeng a sukimatentayo itan ti ibagbaga ti Biblia maipapan iti dayta a pasamak? Kasapulam kadi ti tulong tapno maaramidmo dayta? Kiddawem kadagiti Saksi ni Jehova a tulongandaka. Wenno agsuratka kadagiti mangipabpablaak iti daytoy a magasin. Siguraduem koma ngarud nga agbibiagka saan laeng nga agpaay iti agdama no di ket agpaay met iti nakasaysayaat a masanguanan.

[Dagiti Ladawan iti panid 7]

“Dikay pulos maringgoran . . . Ti sumaganad nga aldaw addaanto kadagiti bukodna a pakaringgoran”