Ilulung-aw Manipud iti Nariribuk a Kinaagtutubo

Kas insalaysay ni Eusebio Morcillo

Idi Setiembre 1993, napanak iti maysa a pagbaludan a nainget a mabambantayan. Dayta nga aldaw ti pannakabautisar ti maysa a balud, ti adingko a ni Mariví. Sitatalna a nagbuya ti dadduma pay a balud ken dagiti opisial ti pagbaludan bayat nga impaayko ti palawag ti bautismo. Ngem sakbay nga ibagak no kasano nga addakami iti kasta a kasasaad, estoriaek man pay ti nasapsapa a paset ti biagmi.

NAYANAKAK idiay Espania idi Mayo 5, 1954. Siak ti inauna kadakami a walo nga agkakabsat. Ni Mariví ti maikatlo. Pinadakkelnakami ni lelangmi kas napeklan a Katoliko, ken malagipko pay a naragsakak idi ubingak gapu ta mariknak a nasingedak iti Dios no kaduak ni lelangko. Ngem saan a relihioso dagiti dadakkelko. Ni Tatang kanayon a kabilenna ni Nanang ken dakami nga annakna. Masansan a mabutbutengkami, ket maladingitanak unay a makakita a marigrigatan ni Nanang.

Makaupay met ti kasasaad idiay eskuelaan. Maysa a maestromi a padi ti mangitugtog kadakami iti diding no di umiso ti sungbatmi iti saludsodna. Seksual a ginundawayan pay ti sabali a padi dagiti estudiantena bayat ti panagrepasona kadagiti homework-da. Kasta met, mariro ken mabutengak kadagiti pannursuro ti Katoliko a kas iti umap-apuy nga impierno. Di nagbayag, bimmaawen ti pammatik iti Dios.

Naigamer iti Awan Mamaayna a Biag

Gapu ta awan ti nangiwanwan kaniak iti naespirituan, nakikaduaak kadagiti imoral ken naranggas a tattao kadagiti klab. Masansan nga adda panagaapa, ket dagiti kutsilio, kadena, baso, ken bangko ti nausar nga armas. Nupay saanak a nakiraman iti kinaranggas, iti naminsan a gundaway, naawananak iti puot.

Idi agangay, naumaakon iti kasta a kasasaad ket nagbirokak iti nataltalna a klab, ngem uray kadagita, gagangayen ti panagdroga. Imbes a mangted iti pannakapnek ken talna ti panunot, nagresulta ti panagdrogak iti panagammangaw ken panagdanag.

Nupay diak naragsak iti kasta nga estilo ti panagbiag, naallukoyko a tumulad kaniak ni adingko a José Luis ken ti maysa a nasinged a gayyem a ni Miguel. Naigamerkami iti dakes a lubong agraman ti dadduma pay nga agtutubo idiay Espania idi a tiempo. Aramidek ti dandani amin a banag tapno adda laeng igatangko iti droga. Awanen ti babainko.

Inalawnak ni Jehova

Iti daytoy a tiempo, namin-ano nga insaritak kadagiti gagayyemko ti kaadda ti Dios ken ti biag nga addaan panggep. Rinugiak a binirok ti Dios isu a nagsapulak iti maysa a pangipeksaak iti riknak. Nadlawko a naiduma ni Francisco kadagiti dadduma a katrabahuak. Makitak a naragsak, mapagpiaran, ken naasi, isu nga impeksak ti riknak kenkuana. Ni Francisco ket maysa a Saksi ni Jehova, ken nangted iti Ti Pagwanawanan nga addaan iti artikulo maipapan iti droga.

Idi nabasakon ti artikulo, nagkararagak iti Dios a tulongannak: “Apo, ammok a sibibiagka a Dios ket kayatko nga aramiden ti pagayatam. Pangngaasim ta tulongannak!” Ni Francisco ken ti dadduma pay a Saksi inusarda ti Biblia a nangparegta kaniak ken inikkandak kadagiti basaek a publikasion a naibatay iti Biblia. Nabigbigko nga ipapaayda ti tulong a kiniddawko iti Dios. Isu nga inranudko ken José Luis ken kadagiti gagayyemko dagiti bambanag a naadalko.

Maysa nga aldaw, simminaak kadagiti gagayyemko bayat ti panagawidmi manipud iti konsierto a rock. Pinaliiwko ti grupomi ket ditak la a nakita a nakadakdakes gayam ti konduktami gapu iti pannakaigamer iti droga. Iti daydi a tiempo nga inkeddengko nga iwaksi ti kasta a panagbiag ket nagbalinak a maysa kadagiti Saksi ni Jehova.

Nagkiddawak iti Biblia ken Francisco, ket inikkannak agraman ti libro a Ti Kinapudno a Mangiturong iti Biag nga Agnanayon.a Idi nabasak ti kari ti Dios a punasenna ti amin a lulua ken ikkatenna pay ti ipapatay, diak nagduadua a nasarakakon ti kinapudno a mangwayawaya iti sangatauan. (Juan 8:32; Apocalipsis 21:4) Kalpasanna, timmabunoak iti gimong iti Kingdom Hall dagiti Saksi ni Jehova. Naallukoyak iti naingayyeman ken nabara a pannakilangenda.

Gapu ta magagaranak a mangiranud iti kapadasak idiay Kingdom Hall, dagus nga inayabak ni José Luis ken dagiti gagayyemko ket imbagak daytoy kadakuada. Sumagmamano nga aldaw kalpasanna, timmabunokami amin iti gimong. Tinaliawnakami ti maysa nga agtutubo a babai iti sanguananmi. Nalawag a nasdaaw a makakita kadagiti atiddog ti buokda a hippie, isu a saanen a timmaliaw. Nalabit nasdaaw idi nagsublikami iti Kingdom Hall iti simmaganad a lawas, ta nakaamericana ken nakakurbatakamin.

Di nagbayag kalpasanna, timmabunokami met ken Miguel iti asamblea sirkito dagiti Saksi ni Jehova. Dikam pay napasaran ti kasta idi, maysa a pudno a panagkakabsat iti amin nga edad. Ket nakaskasdaaw ta naaramid ti asamblea iti mismo a teatro a nakaaramidan ti konsierto ti rock nga inatendaranmi. Ngem iti daytoy a gundaway, naragsakankami iti kasasaad ken iti musika a nangngegmi.

Nagadal iti Biblia ti intero a grupomi. Agarup walo a bulan kalpasanna, idi Hulio 26, 1974, nabautisarankami ken ni Miguel. Agpadakami idi nga agtawen iti 20. Uppat pay iti grupomi ti nabautisaran sumagmamano a bulan kalpasanna. Gapu kadagiti naadalko iti Biblia, natignayak a mangtulong iti naanus nga inak kadagiti trabahona iti balay ken mangiranud kenkuana iti baro a pammatik. Nagbalinkami a nasinged. Adu met a tiempo ti binusbosko a nangtulong kadagiti addingko.

Idi agangay, ni Nanang ken amin dagiti kakabsatko malaksid iti maysa, naammuanda ti kinapudno iti Biblia ken nabautisaranda kas Saksi ni Jehova. Idi 1977, inkasarko ni Soledad. Isu daydiay agtutubo a nasdaaw a nakakita kadakami idi damo a napankami idiay Kingdom Hall. Iti sumagmamano laeng a bulan, nagpayunirkami a dua, kas awag iti amin-tiempo a mangaskasaba iti naimbag a damag.

Nasubbot ti Maysa nga Inay-ayat

Seksual a naabuso ti adingko a ni Mariví idi ubing pay, ket nakaro ti epekto kenkuana dayta a nakaam-amak a napasaranna. Idi tin-edyer, nagbalin nga imoral ti panagbiagna, ket nagdroga, nagtakaw, ken nagbalangkantis. Idi agtawen iti 23, naibalud ket intultuloyna ti dakes a panagbiagna.

Agserserbiak idin kas agdaldaliasat a ministro dagiti Saksi ni Jehova. Idi 1989, naidestinokami ken Soledad iti lugar a nakaibaludan ni Mariví. Nabiit pay idi nga innala dagiti agtuturay ti anakna, ket maupay unay ta dinan kayat ti agbiag. Idi binisitak, inawatna ti singasingko nga agadalkami iti Biblia. Kalpasan ti nakabulan, insardengnan ti agdroga ken agsigarilio. Maragsakanak a makakita a tinulongan ni Jehova a maaddaan iti tured nga agbalbaliw.​—Hebreo 4:12.

Uray rugrugina pay laeng ti agadal, iranranuden ni Mariví dagiti kinapudno iti Biblia kadagiti padana a balud ken kadagiti opisial iti pagbaludan. Nupay nagduduma a pagbaludan ti nakaipananna, intultuloyna latta ti nangasaba. Iti maysa a pagbaludan, nangasaba pay iti tunggal selda. Nakairugi ni Mariví iti adu a panangyadal iti Biblia iti nagduduma a pagbaludan.

Maysa nga aldaw, inyebkas ni Mariví ti tarigagayna a mangidedikar iti biagna ken Jehova ken agpabautisar. Ngem saan a napalubosan a rummuar iti pagbaludan ken awan met ti mapalubosan a mangaramid iti panangbautisar iti uneg ti pagbaludan. Uppat pay a tawen nga inibturanna ti nagdakes a kasasaad iti pagbaludan. Ania ti nakatulong kenkuana a mangtaginayon iti pammatina? Bayat nga aggigimong ti kongregasion, ad-adalenna iti uneg ti pagbaludan ti isu met la a programa. Regular met ti panagkararagna ken ti personal a panagadalna iti Biblia.

Idi agangay, nayakar ni Mariví iti pagbaludan a nainget ti pannakabantayna ken addaan iti swimming pool. Napanunotna a daytoy a kasasaad ti mamagbalin a posible iti pannakabautisarna. Kamaudiananna, napatgan met laeng ti kiddaw ni Mariví. Siak ti nangted iti palawag iti bautismo. Naimatangak ti kapatgan a pasamak iti biagna.

Gapu iti dati a kabibiagna, naaddaan ni Mariví iti AIDS. Ngem nasapa a nawayawayaan idi Marso 1994 gapu iti naimbag a konduktana. Nakipagnaed ken Nanang ket nagbalin nga aktibo a Kristiano agingga iti ipapatayna dua a tawen kalpasanna.

Panangdaer iti Pannakaupay

Iti biangko, saanko pay a naan-anay a naliklikan ti bunga ti dati a kabibiagko. Naglamma iti personalidadko ti panangkabkabil kaniak ni Tatang ken ti kabibiagko idi tin-edyerak pay. Bayat ti kinaadultok, masansan a maburibor ti konsiensiak ken mapukaw ti panagraemko iti bagik. No dadduma, nakaro ti pannakaupayko. Ngem nagdakkel ti naitulong ti Sao ti Dios tapno maparmekko dagitoy a riknak. Iti napalabas nga adu a tawen, ti kanayon a panangutobko kadagiti teksto a kas iti Isaias 1:18 ken Salmo 103:8-13 ket nakatulong kaniak a mangpalag-an iti pannakaburiborko.

Ti panagkararag ti sabali pay a naespirituan nga igam nga us-usarek a mangparmek iti pannakariknak iti kinaawan iti panagraem iti bagik. Masansan nga agsangsangitak nga agkararag ken Jehova. Nupay kasta, mapabpabilegak kadagiti sasao iti 1 Juan 3:19, 20: “Babaen itoy maammuantayto a nagtaudtayo iti kinapudno, ket pagtalgedentayto dagiti pusotayo iti sanguananna maipapan iti aniaman a pangkondenaran kadatayo dagiti pusotayo, agsipud ta ti Dios dakdakkel ngem kadagiti pusotayo ket ammona ti amin a bambanag.”

Yantangay sipapasnek nga umad-adaniak iti Dios buyogen ti “nadunor ken naidagel” a puso, naamirisko a saanak met a kas kadakes ngem iti impagarupko. Impanamnama ti Biblia kadagiti amin nga agsapsapul ken Jehova a dina umsien dagidiay napudno nga agbabbabawi ken agaramid iti pagayatanna.​—Salmo 51:17.

No kasta a makariknaak iti panagduadua, ikagumaak a punnuen ti isipko kadagiti naespirituan a bambanag a nadakamat iti Filipos 4:8. Kinabesadok pay ti Salmo 23 ken ti Sermon iti Bantay. No makariknaak iti pannakaupay, lagipek dagitoy a teksto ti Biblia. Nakatulong daytoy kaniak nangnangruna kadagiti rabii a diak makaturog gapu iti pannakaburiborko.

Nakatulong met ti komendasion nga ipapaay ni baketko ken dagiti nataengan a Kristiano. Nupay narigatko nga awaten ti komendasionda idi damo, tinulongannak ti Biblia a mangtarus a ti ayat “patienna ti amin a bambanag.” (1 Corinto 13:7) Idi agangay, nasursurok a bigbigen dagiti pagkapuyak ken limitasionko.

Ngem adda met nagsayaatan ti pannakidangadangko kadagiti negatibo a rikna, yantangay natulonganak nga agbalin a mannakipagrikna kas maysa nga agdaldaliasat a manangaywan. Agarup 30 a tawen ti binusbos ti tunggal maysa kadakami ken baketko kas amin-tiempo a mangikaskasaba iti naimbag a damag. Ti rag-o nga inyeg ti panagserbi kadagiti sabsabali ti nakatulong kaniak a mangiwaksi kadagiti negatibo a rikna ken manglipat kadagiti napait a kapadasak.

No lagipek ti napalabas ken utobek ti amin a bendision nga impaay kaniak ni Jehova, matignayak a mangyebkas iti kinuna ti salmista: “Bendituem ni Jehova, . . . Isuna a mangpakpakawan iti isuamin a biddutmo, a mangpapaimbag kadagiti amin a sakitmo, a mangbawbawi iti biagmo manipud iti mismo nga abut, a mangkorkorona kenka iti naayat a kinamanangngaasi ken as-asi.”​—Salmo 103:1-4.

[Footnote]

[Blurb iti panid 30]

Masansan a maburibor ti konsiensiak ken mapukaw ti panagraemko iti bagik. Ngem nagdakkel ti naitulong ti Sao ti Dios tapno maparmekko dagitoy a riknak

[Dagiti Ladawan iti panid 27]

Ti kabsatko a ni José Luis ken ti gayyemko a ni Miguel tinuladda ti dakes ken naimbag nga inaramidko

[Ladawan iti panid 28, 29]

Ti pamilia Morcillo idi 1973

[Ladawan iti panid 29]

Idi nakabalud ni Mariví

[Ladawan iti panid 30]

Dakami ken baketko a Soledad