Ammoyo Kadi?
Mano ti gatad ti dua a sinsilio ti balo a babai?
Idi umuna a siglo K.P., ti tinawen a pagbuis dagiti Judio para iti templo ket “dua a drakma,” nga aggatad iti agarup dua nga aldaw a sueldo. (Mateo 17:24) Iti sabali a bangir, kinuna ni Jesus a ti dua a billit-tuleng ket mailako “iti sinsilio a bassit ti pategna,” a katupag laeng ti 45 a minuto a sueldo, no maibasar iti kadawyan a 12-oras a panagtrabaho iti maysa nga aldaw. Kinapudnona, lima a billit-tuleng ti mabalin a magatang no madoble dayta a gatad, wenno ti katupag ti sueldo iti agarup 90 a minuto a panagtrabaho.—Mateo 10:29; Lucas 12:6.
Ti donasion ti napanglaw a balo para iti templo ket adayo a basbassit pay ngem iti dayta a gatad. Dagita a dua a sinsilio, wenno dua a lepta, ket isu ti kababassitan a gambang a sinsilio a maus-usar idi idiay Israel. Katupag dayta ti nakurang a 12 a minuto a sueldo.
Para ken Jesu-Kristo, ti sagut ti balo ket napatpateg ngem ti indonar ti isuamin a nangted “manipud kadagiti teddada.” Apay? Dakamaten ti salaysay nga isu ket addaan iti “dua a babassit a sinsilio,” isu a mabalin a maysa la koma ti idonarna, ken ibatina ti maysa para iti bagina. Nupay kasta, intedna ti “isuamin nga adda kenkuana, ti intero a pagbiagna.”—Marcos 12:41-44; Lucas 21:2-4.
Kaano a nangrugi a maawagan ni Saulo kas Pablo?
Ni apostol Pablo ket nayanak a Hebreo ngem isu ket maysa nga umili ti Roma. (Aramid 22:27, 28; Filipos 3:5) Isu a sipud kinaubingna, mabalin nga agpadpada nga addaanen iti Hebreo a nagan a Saulo, ken Romano a nagan a Pablo. Mabalin a dadduma kadagiti kabagian ni Pablo ket addaan met iti Romano ken Griego a nagnagan. (Roma 16:7, 21) Kanayonanna, kadawyan laeng idi kadagiti Judio ti maaddaan iti dua a nagan, nangruna kadagiti agnanaed iti ruar ti Israel.—Aramid 12:12; 13:1.
Iti nasurok a maysa a dekada kalpasan ti panagbalinna a Kristiano, agparang a ti masansan nga iyawagda iti daytoy nga apostol ket ti Hebreo a naganna a Saulo. (Aramid 13:1, 2) Ngem iti umuna a panagdaliasatna kas misionero, idi agarup 47/48 K.P., mabalin a kinaykayatna ti maawagan iti Romano a naganna a Pablo. Isu ket naipaayan iti annongen a mangiwaragawag iti naimbag a damag kadagiti saan a Judio, isu a nalabit a napanunotna nga isu ket ad-adda nga awaten dagiti kasabaanna no usarenna ti Romano a naganna. (Aramid 9:15; 13:9; Galacia 2:7, 8) Mabalin met a ti nagan a Pablo ti inusarna agsipud ta ti Griego a pannakaibalikas ti Hebreo a naganna a Saulo ket umasping unay iti Griego a sao nga adda dakes a kaipapananna. Aniaman ti rason, impakita ni Pablo nga isu ket situtulok nga ‘agbalin a kas kadagiti amin a tattao iti amin a kasasaadda tapno adda maisalakanna kadakuada.’—1 Corinto 9:22, Ti Baro a Naimbag a Damag Biblia.
[Ladawan iti panid 12]
Lepta a naipakita ti aktual a kabassitna