Umadanika iti Dios
Daydiay Makaisubli iti Biag
NATAYANKA kadin iti ing-ingungoten? No kasta, napasaram ti maysa kadagiti kaladingitan a pagteng ti biag. Maawatan ti Namarsua ti marikriknam a leddaang. Malaksid iti dayta, kabaelanna a pagungaren dagiti natay. Iti Biblia, naisalaysay ti maipapan kadagiti pinagungarna tapno ipakitana a saan laeng nga isu ti Gubuayan ti biag no di ket isu pay Daydiay makaisubli iti biag. Usigentayo ti maysa kadagiti pinagungarna babaen ken Jesu-Kristo nga Anakna. Nairekord daytoy a salaysay iti Lucas 7:11-15.
Tawen 31 K.P. idi. Nagdaliasat ni Jesus idiay Nain, maysa a siudad ti Galilea. (Bersikulo 11) Nalabit a sumipngeten idi sumangpet iti ruar ti siudad. Kuna ti salaysay ti Biblia: “Idi a nakaasideg iti ruangan ti siudad, ay ket, adtoy! adda mairuruar a maysa a natay a tao, ti bugbugtong nga anak a lalaki ni inana. Malaksid iti dayta, isu ket balo. Naikuyog met kenkuana ti maysa a dakkel a bunggoy manipud iti siudad.” (Bersikulo 12) Mailadawanmo kadi ti leddaang ti balo nga ina? Gapu ta natay ti bugbugtong nga anakna, awanen ti mangasikaso kenkuana.
Inturong ni Jesus ti atensionna iti agladladingit nga ina, a nalabit magmagna iti asideg ti nakaikargaan ti bangkay ti anakna. Kuna ti salaysay: “Idi nakita ti Apo, simnek ti asina kenkuana, ket kinunana kenkuana: ‘Sumardengka nga agsangsangit.’” (Bersikulo 13) Naasian unay ni Jesus iti kasasaad ti balo. Mabalin a nalagipna met ti inana, a nalabit maysa metten idi a balo ken asidegen nga agdung-aw gapu iti sigurado nga ipapatayna.
Immasideg ni Jesus—ngem saan a tapno makipamunpon. Addaan autoridad a “sinagidna ti idda ti natay” sana pinasardeng ti bunggoy. Kalpasanna, buyogen ti timek ti maysa a naikkan iti pannakabalin a mangparmek ken patay, kinunana: “‘Baro, kunak kenka, Bumangonka!’ Ket bimmangon ti natay a tao ket nangrugi nga agsao, ket intedna ken inana.” (Bersikulo 14, 15) No pampanunoten, agmaymaysan ti balo idi natay ti barona. Ngem idi ‘inted ni Jesus dayta a baro kenni inana,’ nabukel manen ti pamiliada. Sigurado a ti saem a narikna ti balo nasuktan kadagiti lulua ti rag-o.
Il-iliwentayo met kadi ti kasta a rag-o—ti pannakakitatayo manen kadagiti natay nga ing-ingungotentayo? Namnamaem a maawatan ti Dios ti riknam. Ti empatia ni Jesus iti daydi a malmaldaangan a balo ipakitana ti mismo a kinamanangngaasi ti Dios, yantangay naan-anay nga inyanninaw ni Jesus ti personalidad ni Amana. (Juan 14:9) Isursuro kadatayo ti Biblia a magagaranen ti Dios a mangisubli iti biag dagidiay adda iti lagipna. (Job 14:14, 15) Ti Biblia mangted iti naraniag a namnama a biag nga agnanayon iti paraiso a daga ken ti pannakakitatayo iti panagungar dagiti natay nga ing-ingungotentayo. (Lucas 23:43; Juan 5:28, 29) Apay a dimo ammuen ti ad-adu pay maipapan iti Daydiay makabael a mangisubli iti biag ken no kasano a matagiragsakmo dayta a namnama?
[Ladawan iti panid 23]
“Bimmangon ti natay a tao ket nangrugi nga agsao, ket intedna ken inana”