Agpasakupkayo iti Autoridad ni Jehova
“Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”—1 JUAN 5:3.
1, 2. (a) Apay nga ibilang ti adu a tattao a saan a nainkalintegan ti agpasakup iti autoridad? (b) Talaga kadi nga adda wayawaya dagidiay dida kayat ti agpaiwanwan? Ilawlawagyo.
ADU ita ti marigatan nga agpasakup iti autoridad. Ibilangda a saan a nainkalintegan ti agtulnog iti pagayatan ti sabali a tao. Adda met dagidiay dida kayat ti agpaiwanwan ken agpadiktar. Ngem talaga kadi nga adda wayawaya dagita a tattao? Awan! Kaaduan kadakuada ti awan nakaidumaanna kadagidiay ‘agpaspasukog iti daytoy a sistema ti bambanag.’ (Roma 12:2) Imbes nga adda wayawayada, isuda ket “ad-adipen ti panagrupsa,” kas kinuna ni apostol Pedro. (2 Ped. 2:19) Magmagnada “maitunos iti sistema ti bambanag daytoy a lubong, maitunos iti agturay iti autoridad ti angin,” ni Satanas a Diablo.—Efe. 2:2.
2 Impannakkel ti maysa nga autor: “Diak ipalubos a dagiti dadakkelko wenno ti maysa a padi wenno ministro wenno mannursuro ti relihion wenno ti Biblia ti mangikeddeng no ania ti umiso para kaniak.” Pudno, dadduma ti mangabuso iti autoridadda ken saanda a maikari a pagtulnogantayo. Ngem solusion ngata ti saanen a panagpaiwanwan iti uray asinoman? Ti paulo dagiti periodiko ita mangipaayda iti saan a makaay-ayo a sungbat. Nakalkaldaang ta iti tiempo a kasapulan unay dagiti tattao ti panangiwanwan, kaaduan ita ti agkedked nga agpaiwanwan.
Ti Panangmatmattayo iti Autoridad
3. Kasano nga impakita dagiti Kristiano idi umuna a siglo a saanda a basta nagtulnog lattan kadagidiay addaan iti autoridad?
3 Kas Kristiano, naidumatayo iti lubong. Ngem dina kayat a sawen a basta agtulnogtayo lattan iti aniaman a maibilin kadatayo. Kinapudnona, adda dagiti gundaway a masapul a pagkedkedantayo ti kalikagum ti dadduma nupay addaanda iti autoridad. Kasta met ti inaramid dagiti Kristiano idi umuna a siglo. Kas pagarigan, idi naibilin kadagiti apostol nga isardengda ti mangasaba, saanda a timmulok iti dayta a kalikagum ti nangato a padi ken ti dadduma nga addaan iti autoridad a kameng ti Sanhedrin. Saanda nga insardeng ti umiso nga ar-aramidenda tapno laeng makapagtulnogda iti autoridad ti tao.—Basaen ti Aramid 5:27-29.
4. Ania dagiti pagarigan iti Hebreo a Kasuratan a mangipakita nga adu kadagiti adipen ti Dios ti saan a timmulad iti ar-aramiden ti kaaduan a tattao?
4 Kasta met laeng ti determinado nga inaramid ti adu nga adipen ti Dios sakbay ti panawen Kristiano. Kas pagarigan, “nagkitakit ni Moises . . . a maawagan ti anak daydi anak a babai ni Faraon, a pinilina ti dakes a pannakatrato a kadua ti ili ti Dios,” uray no dayta ti nakaigapuan ti “unget ti ari.” (Heb. 11:24, 25, 27) Pinagkedkedan ni Jose dagiti pananggargari ti asawa ni Potifar, nupay mabalinna a balsen ken dangran ni Jose. (Gen. 39:7-9) “Inkeddeng ni Daniel iti pusona a saanna a rugitan ti bagina iti naimas a makmakan ti ari,” nupay no ti takderna maipapan iti dayta a banag ket saan a maawatan ti kangrunaan nga opisial ti korte iti Babilonia. (Dan. 1:8-14) Ipakita dagita a pagarigan a sipud pay idi, sititibker a sinalimetmetan ti ili ti Dios no ania ti umiso, aniaman ti ibunga dayta. Saanda a pinagustuan dagiti tattao tapno laeng makagun-odda iti pabor; kastatayo met koma.
5. Kasano a ti panangmatmattayo iti autoridad naiduma iti panangmatmat ti lubong?
5 Ti kinaturedtayo dina kaipapanan a nasukirtayo; saantayo met a kas kadagiti dadduma nga agrebelde tapno laeng maipakitada a saanda nga umanamong iti maysa a napolitikaan a sistema. Imbes ketdi, determinadotayo nga agpasakup iti autoridad ni Jehova ngem iti asinoman a tao. No agsupadi ti linteg ti tao ken ti linteg ti Dios, saan a narigat nga ikeddeng no ania ti aramidentayo. Kas inaramid dagiti apostol idi umuna a siglo, agtulnogtayo iti Dios kas agturay imbes a kadagiti tattao.
6. Apay a kanayon a pagimbagantayo ti panangtungpal kadagiti bilin ni Jehova?
6 Apay nga agpaspasakuptayo iti autoridad ti Dios? Umanamongtayo ngamin iti kuna ti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” Wen, patientayo a pagimbagantayo ti aniaman a kalikaguman ti Dios kadatayo. (Basaen ti Deuteronomio 10:12, 13.) Kinapudnona, inladawan ni Jehova ti bagina kadagiti Israelita kas “Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.” Kalpasanna innayonna: “O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.” (Isa. 48:17, 18) Agtalektayo kadagita a sasao. Kombinsidotayo a kanayon a pagimbagantayo ti panagtulnog kadagiti bilin ti Dios.
7. Ania ti rumbeng nga aramidentayo uray ditay naan-anay a maawatan ti bilin a nailanad iti Sao ti Dios?
7 Agpasakup ken agtulnogtayo iti autoridad ni Jehova uray no saantayo a naan-anay a maawatan ti panggep ti dadduma nga ipapaalagad ti Saona. Saan a bulsek a pammati dayta. Imbes ketdi, panangipakita dayta iti naimpusuan a panagtalek nga ammo ni Jehova no ania ti pagsayaatantayo. Ti panagtulnogtayo ket maysa met nga ebkas ti panagayattayo, ta insurat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna.” (1 Juan 5:3) Ngem adda pay sabali nga aspeto ti panagtulnogtayo a nasken a sukimatentayo.
Panangsanay iti Abilidadtayo a Mangtarus
8. Kasano a ti ‘pannakasanay ti pannakaawattayo’ adda pakainaiganna iti panagpasakuptayo iti autoridad ni Jehova?
8 Ibaga kadatayo ti Biblia a nasken a ‘sanayentayo dagiti pannakabalin ti pannakaawattayo a mangilasin agpadpada iti umiso ken di umiso.’ (Heb. 5:14) Gapuna, saantayo koma a basta annuroten lattan dagiti linteg ti Dios a ditay man la tiningiting nga umuna; imbes ketdi, kayattayo a ‘mailasin agpadpada ti umiso ken di umiso’ maibatay kadagiti pagalagadan ni Jehova. Masapul a matarusantayo no apay a nainsiriban dagiti pamay-an ni Jehova, tapno maibagatayo ti kinuna ti salmista: “Ti lintegmo adda kadagiti makin-uneg a pasetko.”—Sal. 40:8.
9. Kasano a maitunostayo ti konsiensiatayo kadagiti pagalagadan ni Jehova, ken apay a napateg dayta?
9 Tapno maipategtayo dagiti linteg ti Dios kas iti panangipateg ti salmista, masapul a mennamennaentayo ti mabasatayo iti Biblia. Kas pagarigan, no maadaltayo ti maysa a kalikaguman ni Jehova, mabalin nga imtuodentayo: ‘Apay a nainsiriban daytoy a bilin wenno prinsipio? Apay a pagimbagak no tungpalek dayta? Ania dagiti dakes a nagbanagan dagidiay di nangipangag iti balakad ti Dios maipapan iti daytoy a banag?’ No sanayentayo ti konsiensiatayo maitunos kadagiti pagalagadan ni Jehova, ad-adda a makaaramidtayo kadagiti desision a maitunos iti pagayatanna. ‘Mailasintayo no ania ti pagayatan ni Jehova’ ket masapul a pagtulnogantayo dayta. (Efe. 5:17) Ngem saan a kanayon a nalaka nga aramiden dayta.
Ikagkagumaan ni Satanas a Pakapuyen ti Autoridad ti Dios
10. Iti ania a benneg nga inkagumaan ni Satanas a pakapuyen ti autoridad ti Dios?
10 Nabayagen nga ikagkagumaan ni Satanas a pakapuyen ti autoridad ti Dios. Ti espiritu ti panagwaywayas nga irakrakurakna ket maiparparangarang iti adu a pamay-an. Alaentayo a pagarigan ti saan a panangraem iti urnos ti Dios mainaig iti panagasawa. Adda dagidiay kaykayatda ti agdenna uray dida pay nagkasar. Ikagkagumaan met ti dadduma ti makisina kadagiti assawada. Dagidiay adda iti kasta a kasasaad mabalin nga umanamongda iti kinuna ti maysa a nalatak nga aktres: “Lalaki man wenno babai, imposible ti maaddaan iti maymaysa laeng nga asawa.” Kinunana pay: “Awan ti am-ammok a matalek wenno desidido nga agbalin a matalek iti asawana.” Kasta met laeng ti kinuna ti maysa a nalatak nga aktor a di naballigi ti panagasawana: “Diak mamati a nainkasigudan kadatayo ti maaddaan iti maymaysa nga asawa iti unos ti panagbiagtayo.” Naimbag no imtuodentayo ti bagitayo, ‘Raraemek kadi ti urnos ni Jehova mainaig iti panagasawa, wenno matultuladkon ti panangmatmat ti lubong a saan a permanente ti relasion ti agassawa?’
11, 12. (a) Apay a mabalin a marigatan dagiti agtutubo nga agpasakup iti autoridad ni Jehova? (b) Mangisalaysay iti maysa a kapadasan a mangipakita a kinamaag ti pananglabsing kadagiti linteg ken prinsipio ni Jehova.
11 Maysaka kadi nga agtutubo nga agserserbi ken Jehova? No wen, maysaka kadagiti kangrunaan a puntiria ni Satanas. Kayatna a panunotem a saanmo a pagimbagan ti panagpasakup iti autoridad ni Jehova. ‘Dagiti tarigagay a naikasigudan iti kinaagtutubo’ agraman ti panangpilit dagiti kapatadan ti mabalin a mangituggod kenka a mangpanunot a makapadagsen dagiti linteg ti Dios. (2 Tim. 2:22) Ngem dimo ipalubos a mapasamak dayta. Ikagumaam ketdi a kitaen dagiti pagimbagan nga itden dagiti pagalagadan ti Dios. Kas pagarigan, ibaga kenka ti Biblia nga ‘adaywam ti pannakiabig.’ (1 Cor. 6:18) Saludsodem manen iti bagim: ‘Apay a nainsiriban daytoy a bilin? Kasano a magunggonaanak no agtulnogak iti dayta?’ Mabalin nga adda sumagmamano nga am-ammom a di nangipangag iti balakad ti Dios ket nagsagabada iti nakaro. Talaga kadi a naragsakda ita? Nasaysayaat kadi ti biagda ita ngem idi makitimtimpuyogda pay iti organisasion ni Jehova? Pudno kadi a nakasarakda iti sekreto ti kinaragsak a saan a nasarakan dagiti adipen ni Jehova?—Basaen ti Isaias 65:14.
12 Usigenyo ti kinuna idi ti maysa a Kristiano nga agnagan iti Sharon: “Gapu iti diak panangikankano iti linteg ni Jehova, naaddaanak iti makapapatay a sakit nga AIDS. Masansan a malagipko dagiti adu a naragsak a tawtawen idi agserserbiak pay ken Jehova.” Nabigbigna a kinamaag ti pananglabsingna kadagiti linteg ni Jehova ken agbabbabawi ta dina impateg dagita. Agpaay a salaknibtayo dagiti linteg ni Jehova. Pito a lawas kalpasan nga insuratna dagiti nadakamat a sasao, natay ni Sharon. Kas ipakita ti nakalkaldaang a kapadasan ni Sharon, awan ti nasayaat nga itden ni Satanas kadagidiay agbalin a paset daytoy dakes a sistema. Kas “ama ti kinaulbod,” adu dagiti ikarina, ngem awan kadagita ti natungpal, uray ti karina ken Eva. (Juan 8:44) Kasayaatan pay latta ti panagpasakup iti autoridad ni Jehova.
Agannadkayo Maibusor iti Espiritu ti Panagwaywayas
13. Ania ti maysa a pamay-an a maliklikantayo ti espiritu ti panagwaywayas?
13 No agpasakuptayo iti autoridad ni Jehova, masapul nga agannadtayo maibusor iti espiritu ti panagwaywayas. Gapu iti kinatangsit, mabalin a panunotentayo a ditay kasapulan ti panangiwanwan ti asinoman. Kas pagarigan, mabalin a ditay kayat a suroten ti balakad dagiti mangidadaulo iti ili ti Dios. Inyurnos ti Dios a ti matalek ken masirib nga adipen ti mangipaay iti naespirituan a taraon iti umiso a tiempo. (Mat. 24:45-47) Rumbeng a sipapakumbaba a bigbigentayo a daytoy ti pamay-an ni Jehova a mangaywan iti ilina ita. Tuladenyo dagiti matalek nga apostol. Idi naitibkol ti dadduma nga adalan, inyimtuod ni Jesus kadagiti apostolna: “Kayatyo kadi met ti mapan?” Simmungbat ni Pedro: “Apo, siasino ti papananminto? Addaanka iti sasao ti agnanayon a biag.”—Juan 6:66-68.
14, 15. Apay a sipapakumbaba koma nga ipangagtayo ti balakad ti Biblia?
14 Ti panagpasakup iti autoridad ni Jehova ramanenna ti panagtulnog iti balakad a naibatay iti Saona. Kas pagarigan, ti klase matalek ken masirib nga adipen idagdagadagna kadatayo nga “agtalinaedtayo koma a siririing ken agtalinaedtayo a sipupuot.” (1 Tes. 5:6) Maitutop unay ti kasta a balakad bayat dagitoy maudi nga al-aldaw ta adu ti ‘managayat iti bagbagida, managayat iti kuarta.’ (2 Tim. 3:1, 2) Mabalin kadi a maapektarantayo kadagiti kasta nga agraraira a kababalin? Wen. Dagiti saan a naespirituan a kalat mabalin a pabaawenna ti panagserbitayo iti Dios, wenno pagbalinennatayo a materialistiko. (Luc. 12:16-21) Isu a nainsiriban nga agtulnogtayo iti balakad ti Biblia ket liklikantayo dagiti agimbubukodan nga estilo ti panagbiag a nasaknap ita iti lubong ni Satanas!—1 Juan 2:16.
15 Dagiti naespirituan a taraon manipud iti matalek ken masirib nga adipen ket maipapaay kadagiti lokal a kongregasion babaen kadagiti nadutokan a panglakayen. Ibalakad ti Biblia kadatayo: “Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo a kasla isudanto dagidiay manungsungbat; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.” (Heb. 13:17) Kayatna kadi a sawen a saan nga agbiddut dagiti panglakayen? Saan, agbiddutda met. Ammo ti Dios ti amin a pagkuranganda. Kaskasdi, kayatna nga agpasakuptayo kadakuada. Ti pannakitinnulongtayo kadagiti panglakayen, uray no imperpektoda, ket pammaneknek nga agpaspasakuptayo iti autoridad ni Jehova.
Ti Kinapateg ti Kinapakumbaba
16. Kasano a maipakitatayo ti panagraem ken Jesus kas Ulo ti kongregasion Kristiano?
16 Nasken a kanayon a laglagipentayo a ni Jesus ti pudno nga Ulo ti kongregasion. (Col. 1:18) Dayta ti maysa a makagapu no apay a sipapakumbaba nga agpaidalantayo kadagiti nadutokan a panglakayen, nga ipaayan ida iti “nalablabes a konsiderasion.” (1 Tes. 5:12, 13) Siempre, maipakita dagiti panglakayen a managpasakupda met no siaannad nga isuroda ti mensahe ti Dios iti kongregasion, saan a ti bukodda nga opinion. Saanda koma a “lumbes iti bambanag a naisurat” tapno laeng maitandudoda ti personal a kapanunotanda.—1 Cor. 4:6.
17. Apay a masapul a liklikantayo ti pagannayasan a manggun-od iti dayaw?
17 Amin a kameng ti kongregasion masapul nga agannadda maibusor iti panangsapul iti bukodda a dayaw. (Prov. 25:27) Nalawag a natnag iti dayta a silo ti maysa nga adalan a naam-ammo ni apostol Juan. Insuratna: “Ni Diotrefes, a kayatna nga ikutan ti umuna a saad iti tengngada, saanna a siraraem nga awaten ti aniaman manipud kadakami. Dayta ti makagapu a, no umayak, lagipekto dagiti aramidna nga itultuloyna nga aramiden, nga agsalsalawasaw maipapan kadakami babaen iti dakes a sasao.” (3 Juan 9, 10) Uray ita, adda maadaltayo iti dayta. Masapul nga ikkatentayo ti aniaman a pagannayasan a manggun-od iti dayaw. Ibaga kadatayo ti Biblia: “Ti panagpannakkel adda iti sakbay ti pannakarpuog, ken ti natangsit nga espiritu iti sakbay ti pannakaitibkol.” Dagidiay agpaspasakup iti autoridad ti Dios masapul a liklikanda ti silo ti kinatangsit. Ta no saan, agturong dayta iti pannakaibabain.—Prov. 11:2; 16:18.
18. Ania ti makatulong kadatayo nga agpasakup iti autoridad ni Jehova?
18 Wen, ikagumaanyo a liklikan ti espiritu ti panagwaywayas a nasaknap ditoy lubong ket agpasakupkayo iti autoridad ni Jehova. Kanayon nga utobenyo buyogen ti panangapresiar ti dakkel a pribilehio a makapagserbikayo ken Jehova. Gapu ta pasetnakayo ti ili ti Dios, pammaneknek dayta nga inyadaninakayo ti Dios babaen ti nasantuan nga espirituna. (Juan 6:44) Ipategyo koma ti relasionyo iti Dios. Ikagumaanyo nga ipakita iti amin nga aspeto ti panagbiagyo a laksidenyo ti espiritu ti panagwaywayas ket agpasakupkayo iti autoridad ni Jehova.
Malagipyo Kadi?
• Ania ti ramanen ti panagpasakup iti autoridad ni Jehova?
• Kasano a ti panangsanay iti pannakaawattayo adda pakainaiganna iti panagpasakup iti autoridad ni Jehova?
• Kadagiti ania a pamay-am a kayat ni Satanas a ditay agpasakup iti autoridad ti Dios?
• Apay a napateg ti kinapakumbaba no kayattayo ti agpasakup iti autoridad ni Jehova?
[Ladawan iti panid 18]
‘Masapul nga agtulnogtayo iti Dios kas agturay imbes a kadagiti tattao’
[Ladawan iti panid 20]
Kanayon a nainsiriban a suroten dagiti pagalagadan ti Dios