Ti Dios ti “Mangpadakkel iti Dayta”!
“Saan a daydiay agmula ti napateg wenno uray daydiay agsibug, no di ket ti Dios a mangpadakkel iti dayta.”—1 COR. 3:7.
1. ‘Katrabahuannatayo ti Dios’ iti ania a trabaho?
“KATRABAHUANNAKAMI ti Dios.” Kasta ti panangdeskribir ni apostol Pablo iti pribilehio a mabalintay amin a tagiragsaken. (Basaen ti 1 Corinto 3:5-9.) Ti pribilehio a tuktukoyen ni Pablo ket ti trabaho a panagaramid-adalan. Inyarigna dayta iti panagmula ken panagsibug iti bin-i. Tapno agballigitayo iti dayta a napateg a trabaho, kasapulantayo ti tulong ni Jehova. Impalagip ni Pablo kadatayo a ‘ti Dios ti mangpadakkel iti dayta.’
2. Apay a makatulong kadatayo ti kinapudno a ‘ti Dios ti mangpadakkel iti dayta’ tapno maaddaantayo iti umiso a panangmatmat iti ministeriotayo?
2 Tulongannatayo dayta a mamagpakumbaba a kinapudno tapno maaddaantayo iti umiso a panangmatmat iti ministeriotayo. Mabalin a naaneptayo a mangasaba ken mangisuro, ngem inton agangay, ni Jehova ti maikari nga umawat iti amin a pammadayaw no adda agbalin a baro nga adalan. Apay? Agsipud ta uray no kasano ti panangikagumaantayo, awan kadatayo ti naan-anay a makatarus no kasano a ti maysa a tao ket agbalin a baro nga adalan, nangnangruna ta awan abilidadtayo a mangkontrol iti dayta. Siuumiso a dineskribir ni Ari Solomon dayta a kasasaad idi insuratna: “Saanmo nga ammo ti aramid ti pudno a Dios, a mangar-aramid iti amin a bambanag.”—Ecl. 11:5.
3. Ania ti pagpadaan ti panagmula iti literal a bin-i ken ti panagaramid kadagiti adalan?
3 Makapaupay kadi ti trabahotayo gapu ta ditay naan-anay a maawatan no kasano a ti maysa a tao ket agbalin a baro nga adalan? Saan. Dayta ketdi ti mamagbalin iti trabahotayo a makaparagsak ken makapainteres. Kinuna ni Ari Solomon: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.” (Ecl. 11:6) Kinapudnona, no maipapan iti panagmula iti literal a bin-i, ditay ammo no agtubonto dayta wenno no sadinonto ti pagtubuanna. Adu a banag ti ditay makontrol. Kasta met laeng no iti trabaho a panagaramid-adalan. Intampok ni Jesus dayta a kinapudno iti dua nga ilustrasion a nailanad iti maikapat a kapitulo ti Ebanghelio ni Marcos. Kitaentayo no ania dagiti masursurotayo iti daytoy dua nga ilustrasion.
Nadumaduma a Kita ti Daga
4, 5. Sumariaenyo ti ilustrasion ni Jesus a nailanad iti Marcos 4: 1-9.
4 Kas nailanad iti Marcos 4:1-9, dineskribir ni Jesus ti maysa a managmula a nagiwaris kadagiti bin-i a nagdisso iti nadumaduma a kita ti daga: “Agimdengkayo. Adtoy! Ti managmula rimmuar tapno agimula. Ket bayat nga agimulmula, sumagmamano a bin-i ti nagdisso iti igid ti dalan, ket immay dagiti tumatayab ket kinnanda dayta. Ket ti sabali a bin-i nagdisso iti kabatuan a sadiay, siempre, awanan iti adu a daga, ket dagus a nagtubo gapu iti kaawan ti nauneg a dagana. Ngem idi limgak ti init, nalaylay, ket gapu iti kaawan ti ramutna nagango. Ket ti sabali a bin-i nagdisso iti baet dagiti sisiitan, ket dimmakkel dagiti sisiitan ket lineppesda dayta, ket saan a nagbunga. Ngem ti dadduma nagdisso iti nasayaat a daga, ket, idi timmubo ken rimmang-ayda, nangrugida nga agbunga, ket nangpataudda iti saggatlopulo, ken innem a pulo ken sangagasut.”
5 Idi tiempo ti Biblia, ti panagmula kadagiti bin-i ket kadawyanna a maar-aramid babaen ti panagiwaris kadagita. Adda bin-i nga awit ti managmula iti sab-ok ti kawesna wenno iti maysa a bag sana iwaris dagita. Isu nga iti dayta nga ilustrasion, ti managmula ket dina igagara nga imula dagiti bin-i iti nadumaduma a kita ti daga. Imbes ketdi, nagduduma ti nagdissuan dagiti naiwaris a bin-i.
6. Kasano ti panangilawlawag ni Jesus iti kaipapanan ti ilustrasion maipapan iti managmula?
6 Saanen a kasapulan a pugtuantayo ti kaipapanan dayta nga ilustrasion. Ngamin, inlawlawag daytan ni Jesus kas nailanad iti Marcos 4:14-20: “Ti managmula agimula iti sao. Dagitoy, ngarud, dagidiay adda iti igid ti dalan a nakaimulaan ti sao; ngem apaman a nangngegda dayta umay ni Satanas ket ikkatenna ti sao a naimula kadakuada. Ket kasta met a dagitoy isuda dagidiay naimula kadagiti kabatuan: apaman a nangngegda ti sao, awatenda a sirarag-o. Kaskasdi nga awananda a mismo iti ramut, ngem agtalinaedda iti apagbiit; kalpasanna apaman a tumaud ti rigat wenno pannakaidadanes gapu iti sao, maitibkolda. Kaskasdi nga adda dadduma a naimula iti nagbabaetan dagiti sisiitan; dagitoy isuda dagidiay nakangngeg iti sao, ngem dagiti pakaringgoran daytoy a sistema ti bambanag ken ti makaallilaw a pannakabalin ti kinabaknang ken dagiti panagtarigagay iti sabsabali pay a bambanag sumrekda ket leppesenda ti sao, ket agbalin a di nabunga. Kamaudiananna, dagidiay naimula iti nasayaat a daga isuda dagidiay agimdeng iti sao ket siaannugot nga awatenda dayta ket agbungada iti saggatlopulo ken innem a pulo ken sangagasut.”
7. Ania ti irepresentar dagiti bin-i ken ti nadumaduma a kita ti daga?
7 Imutektekanyo ta saan nga imbaga ni Jesus a nadumaduma a klase ti bin-i ti naiwaris. Imbes ketdi, kinunana a dagiti nagdisso iti nadumaduma a kita ti daga ket maysa laeng a klase ti bin-i, a tunggal maysa kadagita ket nadumaduma ti nagbanaganda. Ti umuna a kita ti daga ket natangken wenno nasedsed, ti maikadua ket narabaw; ti maikatlo ket kasiitan; ken ti maikapat ket nadam-eg, wenno nasayaat a daga a makapataud iti adu a bunga. (Luc. 8:8) Ania ti bin-i? Dayta ket ti mensahe maipapan iti Pagarian a nailanad iti Sao ti Dios. (Mat. 13:19) Ania ti irepresentar ti nadumaduma a kita ti daga? Isu dagiti tattao a nadumaduma ti kasasaad ti pusoda.—Basaen ti Lucas 8:12, 15.
8. (a) Siasino ti irepresentar ti managmula? (b) Apay nga agduduma ti reaksion dagiti tattao iti trabaho a panangikasaba iti Pagarian?
8 Siasino ti irepresentar ti managmula? Irepresentarna dagiti katrabahuan ti Dios, nga isu dagidiay mangiwarwaragawag iti naimbag a damag ti Pagarian. Kas kada Pablo ken Apolos, agmulmula ken agsibsibugda. Ngem uray no agtrabahoda a sipipinget, agduma dagiti resulta ti nagbannoganda. Apay? Agsipud ta agduduma ti kasasaad ti puso dagidiay makaskasabaanda. Iti ilustrasion, ti managmula ket saanna a makontrol ti pagbanagan dagiti immulana. Anian a makaliwliwa dayta, nangnangruna kadagidiay matalek a kakabsattayo nga adun a tawen, wenno dinekdekada pay ketdin nga agbambannog ngem kasla saan unay a nabunga ti ministerioda!a Apay a kasta?
9. Ania a makaliwliwa a kinapudno ti impaganetget ni apostol Pablo ken uray ni Jesus?
9 Ti kinamatalek ti managmula ket saan a marukod babaen kadagiti resulta ti trabahona. Imparipirip dayta ni Pablo idi a kinunana: “Tunggal maysa a tao awatennanto ti bukodna a gunggona sigun iti bukodna a panagbannog.” (1 Cor. 3:8) Ti gunggona ket sigun iti panagbannog, saan a sigun kadagiti resulta dayta a panagbannog. Impaganetget met ni Jesus dayta a punto idi nagsubli dagiti adalanna manipud iti panangasabada. Napalaus ti rag-oda agsipud ta babaen ti panangusarda iti nagan ni Jesus, uray dagiti demonio ket nagpasakup kadakuada. Nupay nakaragragsakda, kinuna ni Jesus kadakuada: “Dikay pagrag-oan daytoy, a naipasakup kadakayo dagiti espiritu, ngem agrag-okayo agsipud ta ti nagnaganyo nailanaden iti langlangit.” (Luc. 10:17-20) Uray iti lugar a mabalin a bassit nga irarang-ay ti makita ti managmula kas resulta ti panagbannogna, di kaipapanan dayta a napingpinget wenno ad-adda a matalek dagiti sabsabali ngem isuna. Dagiti resulta ket nangnangruna nga agpannuray iti kasasaad ti puso ti dumdumngeg. Ngem kamaudiananna, ti Dios ti mangpadakkel iti dayta!
Ti Rebbengen Dagidiay Dumngeg iti Sao
10. Ania ti mangikeddeng no ti maysa a dumngeg iti sao ket umasping iti nasayaat a daga wenno saan?
10 Dagiti met ngay dumdumngeg iti sao? Nasaksakbay kadin a naikeddeng ti reaksionda iti dayta? Saan. Makaammodan no kayatda wenno dida kayat ti agbalin a kas iti nasayaat a daga. Kinaagpaysuanna, mabalin a sumayaat wenno dumakes ti kasasaad ti puso ti maysa a tao. (Roma 6:17) Iti ilustrasionna, imbaga ni Jesus nga “apaman a [ti dadduma] nangngegda” ti sao, immay ni Satanas ken inikkatna dayta. Ngem saan a rumbeng a mapasamak dayta. Iti Santiago 4:7, maiparparegta kadagiti Kristiano a ‘busorenda ti Diablo,’ ket isu agtalawto kadakuada. Ti dadduma ket dineskribir ni Jesus kas dagidiay nagrag-o idi damo nga inawatda ti sao ngem naitibkolda agsipud ta “awananda a mismo iti ramut.” Ngem maidagadag kadagiti adipen ti Dios a ‘mairamutda koma ken maipasdekda iti pamuon’ tapno maawatanda ‘ti kaakaba ken kaatiddog ken kangato ken kauneg, ken tapno maammuanda ti ayat ti Kristo a manglab-aw iti pannakaammo.’—Efe. 3:17-19; Col. 2:6, 7.
11. Kasano a ti maysa maliklikanna ti agpaapektar kadagiti pakaringgoran ken kinabaknang a mangleppes iti sao?
11 Ti dadduma a dimngeg iti sao ket nadeskribir kas dagidiay mangipalpalubos a “dagiti pakaringgoran daytoy a sistema ti bambanag ken ti makaallilaw a pannakabalin ti kinabaknang” ti mangapektar kadakuada isu a malpes ti sao. (1 Tim. 6:9, 10) Kasano a maliklikanda dayta? Kastoy ti sungbat ni apostol Pablo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta kinunana: ‘Saankanto a pulos panawan ket saankanto a pulos baybay-an.’”—Heb. 13:5.
12. Apay a dagidiay irepresentar ti nasayaat a daga ket agduduma ti kaadu ti ibungada?
12 Kamaudiananna, kinuna ni Jesus a dagidiay naimula iti nasayaat a daga “agbungada iti saggatlopulo ken innem a pulo ken sangagasut.” Gapuna, adda dagiti umawat iti sao. Ngem uray no nasayaat ti kasasaad ti pusoda ken agbungada, agduduma ti magapuananda iti panangiwaragawag iti naimbag a damag sigun iti sirkumstansiada. Kas pagarigan, mabalin a malimitaran ti pannakiraman ti dadduma iti trabaho a panangasaba gapu iti kinalakay, kinabaket, wenno mangpakapuy a sakit. (Idilig ti Marcos 12:43, 44.) Kas nadakamat itay, mabalin a bassit laeng ti maaramidan wenno di pay ketdi makontrol ti managmula dayta, ngem agrag-o no makitana a padakkelen dayta ni Jehova.—Basaen ti Salmo 126:5, 6.
Ti Managmula a Maturog
13, 14. (a) Sumariaenyo ti ilustrasion ni Jesus a nailanad iti Marcos 4:26-29. (b) Siasino ti irepresentar ti managmula ken ania ti irepresentar ti bin-i?
13 Iti Marcos 4:26-29, adda sabali pay nga ilustrasion maipapan iti managmula: “Iti kastoy a pamay-an, ti pagarian ti Dios ket kas no mangipuruak ti maysa a tao iti bin-i iti daga, ket maturog iti rabii ken bumangon iti aldaw, ket ti bin-i agtubo ken dumakkel, saanna nga ammo no kasano. Iti bukbukodna agin-inut nga agbunga ti daga, umuna ti bulong ti ruot, kalpasanna ti dawa iti ungkay, kamaudiananna ti namsek a bukel iti dawa. Ngem apaman nga ipalubosen ti bunga, iserrekna ti kumpay, agsipud ta dimtengen ti tiempo ti panagani.”
14 Siasino dayta a managmula? Patien ti dadduma iti Kakristianuan a ni Jesus kano dayta. Ngem apay koma a maturog ni Jesus ken dina ammo no kasano ti panagtubo dagiti bin-i? Sigurado la ketdi nga ammo ni Jesus ti proseso ti panagtubo! Gapuna, dayta a managmula, kas iti nadakamaten ket irepresentarna ti tunggal manangiwaragawag iti Pagarian—dagidiay nga agmulmula iti bin-i ti Pagarian babaen ti naregta a panangasabada. Dagiti bin-i a maiwaris iti daga ket isu ti sao nga ikaskasabada.b
15, 16. Ania a kinapudno maipapan iti literal ken naespirituan a panagdakkel ti imbatad ni Jesus iti ilustrasionna maipapan iti managmula?
15 Kinuna ni Jesus a ti managmula ket “maturog iti rabii ken bumangon iti aldaw.” Di kaipapanan dayta a naliway ti managmula. Ipasimudaag laeng dayta ti gagangay a rutina ti kaaduan a tattao. Ti sasao a nausar iti daytoy a bersikulo ipasimudaagna ti agtultuloy a proseso ti agmalmalem a panagtrabaho ken agpatnag a pannaturog iti las-ud ti maysa a periodo ti panawen. Inlawlawag ni Jesus no ania ti napasamak kabayatan dayta a tiempo. Kinunana: “Ti bin-i agtubo ken dumakkel. Saanna nga ammo no kasano.” Ti naipaganetget ket ti kinapudno a ti panagtubo napasamak a “bukbukodna.”c
16 Ania a punto ti imbatad ni Jesus? Imutektekanyo ta ti naipaganetget ket ti panagtubo ken panagdakkel agraman ti in-inut a pannakapasamak dayta. “Iti bukbukodna agin-inut nga agbunga ti daga, umuna ti bulong ti ruot, kalpasanna ti dawa iti ungkay, kamaudiananna ti namsek a bukel iti dawa.” (Mar. 4:28) In-inut ken agsasaganad ti pannakapasamak dayta a panagtubo ken panagdakkel. Saan a mabalin a piliten wenno dagdagen. Kasta met laeng ti naespirituan a panagdakkel. Mapasamak dayta iti agsasaganad a tukad bayat nga ipalpalubos ni Jehova nga agtubo ken dumakkel ti kinapudno iti puso daydiay siuumiso nga agannayas iti sao.—Ara. 13:48; Heb. 6:1.
17. Siasino ti agpadpada nga agrag-o no agbungan ti bukel ti kinapudno?
17 Kasano a makipaset ti managmula iti panagani “apaman nga ipalubosen ti bunga”? No padakkelen ni Jehova ti kinapudno ti Pagarian iti puso dagiti kabbaro nga adalan, dumtengto ti tiempo a kayatdan nga idedikar ti biagda iti Dios gapu iti panagayatda kenkuana. Isimboloda ti dedikasionda babaen ti panagpabautisarda. Dagiti kakabsat a lallaki nga agtultuloy a rumang-ay iti kinanataengan ket in-inut a makabaelton a mangibaklay iti ad-adu a responsabilidad iti kongregasion. Ti bunga ti Pagarian ket apiten ti immuna a managmula agraman ti dadduma pay a manangiwaragawag iti Pagarian a mabalin a saan a personal a nakiraman iti pannakaimula ti bin-i a nangpataud iti dayta a partikular nga adalan. (Basaen ti Juan 4:36-38.) Kinapudnona, ‘ti managmula ken ti managani agrag-oda nga agpadpada.’
Dagiti Masursurotayo Ita
18, 19. (a) Kasanoka a naparegta iti daytoy a panangrepaso kadagiti ilustrasion ni Jesus? (b) Ania ti mausig iti sumaganad nga artikulo?
18 Ania dagiti masursurotayo manipud iti panangrepasotayo kadagitoy dua nga ilustrasion a nailanad iti Marcos kapitulo 4? Silalawag a naammuantayo nga adda trabaho a masapul nga aramidentayo—isu dayta ti panagmula. Pulos a ditay koma ipalubos a dagiti parikut wenno rigat a nalabit mapaspasarantayo ti mangpasardeng kadatayo a mangitungpal iti dayta a trabaho. (Ecl. 11:4) Ngem naammuantayo met a naisangsangayan a pribilehio ti maibilang kas katrabahuan ti Dios. Ni Jehova ti mangtigtignay kadagiti tattao nga agbalin nga adalan, ket bembendisionanna dagiti panagreggettayo ken ti panagregget dagidiay umawat iti mensahe. Naawatantayo a ditay mabalin a piliten ti siasinoman nga agbalin nga adalan. Naammuantayo met a rumbeng a ditay maupay wenno maawanan iti namnama no nabuntog ti irarang-ay ti iyad-adalantayo wenno saan pay ketdi a rumangrang-ay. Anian a makaliwliwa a maammuan a ti panagballigitayo ket marukod babaen iti kinamatalektayo ken Jehova ken iti pribilehio nga impakumitna kadatayo a mangikasaba iti “naimbag a damag ti pagarian . . . maipaay a pangsaksi kadagiti amin a nasion.”—Mat. 24:14.
19 Ania pay ti insuro ni Jesus kadatayo maipapan iti idadakkel wenno irarang-ay dagiti kabbaro nga adalan ken maipapan iti trabaho ti Pagarian? Ti sungbat iti dayta a saludsod ket masarakan iti dadduma pay nga ilustrasion a nailanad kadagiti salaysay dagiti Ebanghelio. Usigentayo ti sumagmamano kadagitoy nga ilustrasion iti sumaganad nga artikulo.
[Footnotes]
a Usigenyo ti ministerio ni Kabsat Georg Fjölnir Lindal idiay Iceland kas naisalaysay iti 2005 Tinawen a Libro Dagiti Saksi ni Jehova, panid 210-211, ken dagiti kapadasan ti matalek a kakabsat a nagibtur idiay Ireland iti adu a tawen a dida nakita a dagus dagiti resulta ti kinapingetda kas mabasa iti 1988 Yearbook of Jehovah’s Witnesses, panid 82-99.
b Nailawlawag idin iti daytoy a magasin a ti bin-i ket irepresentarna dagiti galad a kasapulan iti panagmataengan a naimpluensiaan kadagiti kasasaad iti aglawlaw. Ngem imutektekantayo ta iti ilustrasion ni Jesus, ti bin-i ket saan a nagbalin nga inigges wenno rinuker. Basta nagtubo ken dimmakkel laeng dayta.—Kitaen Ti Pagwanawanan a Disiembre 15, 1980, panid 18-22.
c Ti kakaisuna a sabali a nakausaran dayta a sao ket masarakan iti Aramid 12:10, idi a ti maysa a landok a ruangan ket nadakamat nga automatiko a naglukat a “bukbukodna.”
Malagipyo Kadi?
• Ania ti sumagmamano a pagpadaan ti panagmula kadagiti literal a bin-i ken ti panangasaba iti mensahe ti Pagarian?
• Kasano ti panangrukod ni Jehova iti kinamatalek ti maysa a mangikaskasaba iti Pagarian?
• Ania a panagpada iti literal ken naespirituan nga idadakkel ti impaganetget ni Jesus?
• Kasano a ‘ti managmula ken ti managani agrag-oda nga agpadpada’?
[Dagiti Ladawan iti panid 13]
Apay nga inyasping ni Jesus ti mangikaskasaba iti Pagarian ti Dios iti managmula kadagiti bin-i?
[Dagiti Ladawan iti panid 15]
Dagidiay irepresentar ti nasayaat a daga ket naimpusuan a makipaspasetda iti panangikasaba iti Pagarian sigun kadagiti kasasaadda
[Dagiti Ladawan iti panid 16]
Ti Dios ti mangpadpadakkel iti dayta