Tuladem ni Jesus—Agdayawka iti Dios iti Pamay-an nga Anamonganna
Siaayat nga aw-awisen ti Dios dagiti tattao “manipud kadagiti amin a nasion ken kadagiti tribu ken kadagiti ili ken kadagiti pagsasao” tapno agdayawda kenkuana. (Apoc. 7:9, 10; 15:3, 4) Dagidiay mangawat iti dayta nga awis ket ‘makitada ti kinamakaay-ayo ni Jehova.’ (Sal. 27:4; 90:17) Kas iti salmista, idaydayawda ti Dios buyogen ti napigsa a timek, a kunkunada: “Agdayaw ken agruknoytayo; agparintumengtayo iti sanguanan ni Jehova a Nangaramid kadatayo.”—Sal. 95:6.
Ti Panagdayaw a Nakapatpateg ken Jehova
Kas bugbugtong nga Anak ti Dios, naaddaan ni Jesus iti adu a gundaway a mangammo iti kapanunotan, prinsipio, ken pagalagadan ni Amana. Gapuna, sikokompiansa a naisuro ni Jesus ti umiso a panagdayaw. Kinunana: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.”—Juan 1:14; 14:6.
Naan-anay nga inyulidan ni Jesus ti sipapakumbaba a panagpasakup ken Amana. Kinunana: “Awan ti aramidek iti bukodko a nakem; no di ket kas iti insuro kaniak ni Ama sawek dagitoy a banag.” Sana innayon: “Kankanayon nga aramidek ti bambanag a makaay-ayo kenkuana.” (Juan 8:28, 29) Ania dagiti inaramid ni Jesus a makaay-ayo ken Amana?
Ti maysa ket babaen ti panangipakitana iti naan-anay a debosionna ken Amana, ket dayta ti kangrunaan a kaipapanan ti panagdayaw iti Dios. Pinaneknekan ni Jesus ti nasinged a relasionna ken Amana babaen ti panagtulnog ken panangaramidna iti pagayatan ni Amana, uray no ramanen dayta ti dakkel a panagsakripisiona. (Fil. 2:7, 8) Ti maysa a napateg nga aspeto iti panagdayaw ni Jesus ket ti panangitungpalna iti trabaho a panagaramid iti adalan. Siaanep nga inaramidna dayta ta uray la a Mannursuro ti inyawag kenkuana dagiti manamati ken di manamati. (Mat. 22:23, 24; Juan 3:2) Inusar met ni Jesus ti adu a tiempo ken pigsana iti panangtulong iti sabsabali. Gapu iti kinamanagsakripisiona, bassit laeng ti tiempona para iti bagina, ngem naragsak iti panagserbina iti sabsabali. (Mat. 14:13, 14; 20:28) Nupay okupado, kanayon nga inwayaan ni Jesus ti panagkararagna iti nailangitan nga Amana. (Luc. 6:12) Nakapatpateg la ketdi iti Dios ti panagdayaw kenkuana ni Jesus!
Ti Panangikagumaan a Mangay-ayo a Naan-anay iti Dios
Napaliiw ni Jehova ti kababalin ti Anakna ket inyebkasna ti pananganamongna kenkuana. (Mat. 17:5) Ngem napaliiw met ni Satanas ti kinamatalek ni Jesus. Gapuna, nagbalin ni Jesus a kangrunaan a puntiria ni Satanas. Apay? Gapu ta awan pay idi ti tao a nakataginayon iti naan-anay a panagtulnog iti Dios, nga isu ti kasapulan iti naan-anay a panagdayaw Kenkuana. Gapu iti dayta, kayat ti Diablo a lapdan ni Jesus iti panangipaayna iti panagdayaw a maikari unay ken Jehova.—Apoc. 4:11.
Iti panangikagumaanna a mangdadael iti kinatarnaw ni Jesus, adda makagargari nga intukon ni Satanas kenkuana. Impanna ni Jesus iti “bantay a nagpaiduma ti kangatona, ket imparangna kenkuana dagiti amin a pagarian ti lubong ken ti dayagda.” Sana kinuna: “Amin dagitoy a banag itedkonto kenka no agruknoyka ken mangaramidka iti maysa a tignay a panagdayaw kaniak.” Ania ti insungbat ni Jesus? Kinunana: “Pumanawka, Satanas! Ta adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam iti sagrado a panagserbi.’” (Mat. 4:8-10) Wen, ammo ni Jesus a maysa nga idolatroso nga aramid ti agruknoy ken Satanas aniaman ti kasla pagimbagan nga itden dayta. Saanna a kayat ti mangaramid iti uray maysa laeng a tignay a panagdayaw iti siasinoman malaksid ken Jehova.
Iti biangtayo, mabalin a saan nga itukon ni Satanas ti amin a pagarian ti lubong ken dagiti dayagda kas kasukat ti panagdayawtayo. Ngem ikagkagumaanna latta a lapdan ti panagdayaw dagiti napasnek a Kristiano iti Dios. Kayat ti Diablo nga agdayawtayo iti sabali a persona wenno iti maysa a banag.—2 Cor. 4:4.
Pinaneknekan ni Kristo Jesus nga isu ket matalek uray agingga ken patay. Babaen ti panangtaginayonna iti kinatarnawna iti Dios, impadayagna ni Jehova iti pamay-an a di pay pulos naaramid ti siasinoman a tao. Kas dagiti pudno a Kristiano ita, ikagumaantayo a suroten ti matalek a panagbiag ni Jesus babaen ti panangipangpangrunatayo iti panagdayawtayo iti Namarsua. Kinapudnona, ti nasayaat a relasiontayo iti Dios ti kapatgan nga ik-ikutantayo.
Dagiti Bendision nga Itden ti Naanamongan a Panagdayaw
Adu a bendision ti masagraptayo no itandudotayo “ti panagdayaw a nadalus ken di natulawan” iti panangmatmat ti Dios. (Sant. 1:27) Kas pagarigan, agbibiagtayo iti tiempo nga umad-adu ti tattao a ‘managayat iti bagbagida, managayat iti kuarta, napalangguad ken awanan panagayat iti kinaimbag.’ (2 Tim. 3:1-5) Ngem iti kongregasion ti Dios, addaantayo iti pribilehio a makitimpuyog iti nadalus ken naimbag a tattao a mangikagkagumaan a mangitandudo kadagiti pagalagadan ti Dios iti panagdayaw kenkuana. Saan kadi a makapabang-ar dayta?
Ti maysa pay a bendision a masagraptayo no agtalinaedtayo a di natulawan iti daytoy a lubong ket maaddaantayo iti nadalus a konsiensia. Kayattay a taginayonen ti nadalus a konsiensia babaen ti panangannurottayo kadagiti nalinteg a prinsipio ti Dios ken panagtulnogtayo kadagiti linteg ni Cesar a saan a maikontra kadagiti linteg ti Dios.—Mar. 12:17; Ara. 5:27-29.
Adda pay sabali a kita ti bendision nga itden ti amin-kararua a panagdayaw. No ipangpangrunatayo ti panagaramid iti pagayatan ti Dios imbes a ti pagayatantayo, agbalin a makapnek ken makagunggona ti biagtayo. Addaantayo iti natalged a namnama a biag nga agnanayon iti paraiso a daga imbes nga ibagbagatayo: “Mangan ken uminumtayo, ta inton bigat mataytayo.”—1 Cor. 15:32.
Ipalgak ti libro nga Apocalipsis nga addanto tiempo a dagiti mangtagtaginayon iti nadalus a takder iti imatang ni Jehova ket ‘aggapuda iti dakkel a rigat.’ Dakamaten ti salaysay a “Daydiay situtugaw iti trono isallukobnanto kadakuada ti toldana.” (Apoc. 7:13-15) Daydiay situtugaw iti trono ket awan sabali no saan a ni Jehova a Dios, ti kadadayagan a Persona iti uniberso. Panunotem laengen ti kasta unay a rag-om inton pastrekennaka kas sangaili iti toldana, nga aywanannaka tapno saanka a pulos a madangran! Uray ita, addada gundaway a masagsagraptayo ti pannalaknib ken panangaywanna.
Kanayonanna, amin a naanamongan nga agdaydayaw iti Dios ket nadeskribir kas maidaldalan “kadagiti ubbog ti dandanum ti biag.” Dagita a makapabang-ar nga ubbog ket mangisimbolo iti amin a probision ni Jehova tapno magun-odantayo ti biag nga agnanayon. Kinapudnona, babaen ti pannubbot ni Kristo, “ti Dios punasennanto ti amin a lua kadagiti matada.” (Apoc. 7:17) Ti sangatauan ket matulonganto tapno agbalinda a perpekto, a mangyeg iti kasta unay a rag-o kadagidiay mangin-inanama nga agbiag nga agnanayon ditoy daga. Uray pay itan, dagiti naragsak nga agdaydayaw iti Dios ket agdirdir-ida a sirarag-o, nga iyeb-ebkasda ti naimpusuan a panagyamanda kenni Jehova ken agdaydayawda kenkuana a kaduada dagiti anghel idiay langit a mangikankanta iti: “Naindaklan ken nakaskasdaaw dagiti aramidmo, Jehova a Dios, ti Mannakabalin-amin. Nalinteg ken napudno dagiti dalanmo, Ari ti kinaagnanayon. Siasinonto a pudno ti saan nga agbuteng kenka, Jehova, ken mangpadayag iti naganmo, agsipud ta siksika ti nasungdo? Ta amin dagiti nasion umaydanto ket agdaydayawda iti sanguanam, agsipud ta naiparangarang dagiti nalinteg a bilinmo.”—Apoc. 15:3, 4.
[Ladawan iti panid 27]
Ania ti ituktukon kadatayo ni Satanas a kasukat ti panagdayawtayo?