Asino ti Makabael a Mangammo iti Masanguanan?
“Siak Daydiay Nadibinuan . . . , Daydiay a manipud punganay ibagbagana ti pagnguduan, ken manipud iti nabayagen a tiempo ti bambanag a saan pay a naaramid.”—Isaias 46:9, 10.
KADAGITOY nariribuk a tiempo, dagiti mangus-usig iti politika, ekonomia, ken iti pakabuklan ti kagimongan ket ad-adalenda ti paspasamak iti naglabas ken iti agdama tapno maibagada no ania ti masanguanan. Gapu ta desperado ti dadduma a mangammo iti masakbayanda, agpatulongda iti astrolohia wenno espiritismo. Ngem masansan a maupayda kadagiti resulta. Talaga kadi nga imposible a maammuantayo no anianto dagiti mapasamak iti daytoy a lubong, iti pamiliatayo, ken kadatayo kas indibidual? Gapuna, adda kadi asinoman a talaga a makabael a mangammo iti masanguanan?
Iti kinuna ti Mannakabalin-amin a Dios a ni Jehova a naadaw iti ngato, dineskribirna ken propeta Isaias ti mismo nga abilidadna a mangipakpakauna iti masanguanan. Babaen ken Isaias, impakpakauna ti Dios ti pannakawayawaya dagiti nagkauna nga Israelita manipud iti pannakakautiboda idiay Babilonia ken ti panagawidda tapno ibangonda manen ti Jerusalem ken ti templo. Kasano ti kinaumiso dayta a padto? Agarup 200 a tawen a nasaksakbay, ni Isaias ket siuumiso nga innagananna ni Ciro a mangparmek iti Babilonia. Kasta met a siuumiso a dineskribir ni Isaias ti estratehia ni Ciro—ti panangbaliwna iti pagayusan ti Karayan Eufrates, nga agserserbi idi a mangsalaknib iti siudad. Impakpakaunana met a makitanto ni Ciro a nabaybay-an a silulukat ti nagdadakkelan a dua ti rikepna a ruruangan iti siudad, a mangpalaka iti panagballigi ni Ciro.—Isaias 44:24–45:7.
No idilig iti Dios, ti tao ket awanan iti pannakabalin a mangammo iti masanguanan. Kastoy ti insurat ni masirib nga Ari Solomon: “Dika agpasindayag maipapan iti sumaganad nga aldaw, ta saanmo nga ammo no ania ti ipasngayto ti maysa nga aldaw.” (Proverbio 27:1) Pudno dayta uray ita. Awan ti tao a makabael a mangammo uray iti mismo a masanguananna. Ania ti nakaidumaan ti Dios? Naan-anay a maawatanna ti amin a pinarsuana, agraman dagiti galad ken pagannayasan ti tao. No pagayatanna, kabaelanna nga ammuen a nasaksakbay ti eksakto a tignay ti maysa a tao wenno nasion. Kasta met a saan a limitado ti abilidadna a mangkontrol kadagiti pagbanagan dagiti pasamak. No ipakpakaunana idi babaen kadagiti propetana nga adda mapasamak, isu ket agtignay kas “Daydiay mamagbalin a pudno ti sao ti adipenna, ken Daydiay mangitungpal a naan-anay iti pammatigmaan dagiti bukodna a mensahero.” (Isaias 44:26) Ni laeng Jehova a Dios ti aktual a makaaramid iti dayta.
Ni Isaias ket nagbiag nasurok a 700 a tawen sakbay a nayanak ti Mesias a ni Jesus. Kaskasdi nga adu ti impadto ni Isaias maipapan iti iyaay ti Mesias. Ngem ti kinaumiso ti libro nga Isaias ket kinuestion dagiti kritiko iti Biblia nangruna manipud idi maika-18 a siglo ken nagpatpatuloy. Kinunada a dagiti padto ni Isaias ket saan a talaga a prediksion no di ket insurat dayta ti maysa a mannurat kalpasan a napasamakda. Agpayso kadi dayta? Idi 1947, adda nadiskobre a kopia ti libro ni Isaias, agraman ti dadduma pay a nagkauna a lukot, iti maysa a kueba nga asideg iti Natay a Baybay. Dagiti arkeologo, mangus-usig kadagiti nagkauna a sursurat, ken dagiti eskolar a mangad-adal iti sinurat dagiti Hebreo ken Judio inkeddengda a dayta a kopia ket naisurat nasurok a sangagasut a tawen sakbay ti pannakaipasngay ti naipakpakauna a Mesias wenno Kristo. Wen, ti Biblia impalgakna ti masanguanan!
Ni Isaias ken ti dadduma pay a nangisurat iti Biblia ket saanda koma a nabaelan nga impakpakauna dagiti masanguanan idi a pasamak no nagpannurayda laeng iti bukodda a pannakaammo. Imbes ketdi, “nagsaoda manipud iti Dios bayat nga idaldalan ida ti nasantuan nga espiritu.” (2 Pedro 1:21) Kadagiti sumaruno nga artikulo, maitampok ti dadduma a detalye maipapan iti biag ni Jesus nga impakpakauna ni Isaias. Kalpasan dayta, usigentayo dagiti pasamak nga impakpakauna ni Jesus ken dagiti adalanna maipapan iti kaaldawantayo ken iti masanguanan.