Ti Biblia Balbaliwanna ti Biag Dagiti Tattao

Ania ti nanggutugot iti maysa a babai nga agbalin a napudno ken mapagpiaran nupay dati a mammuslit iti diamante ken taktakawanna ti amona? Ania ti nakatulong iti maysa a babai a maaddaan manen iti panggep ti biag nupay namindua a ginandatna ti agpakamatay? Kasano a napabileg ti maysa nga alkoholiko ken adikto iti droga tapno isardengna dagiti makadangran a bisiona? Usigenyo ti salaysay dagitoy nga indibidual maipapan iti kapadasanda.

PERSONAL NGA IMPORMASION

NAGAN: MARGARET DEBRUYN

EDAD: 45

PAGILIAN: BOTSWANA

PAKASARITAANNA: MAMMUSLIT KEN MANNANAKAW

TI NAPALABASKO: Nayanak ni tatangko idiay Germany ngem nagbalin nga umili iti South-West Africa (Namibia itan). Taga-Botswana met ni nanangko, iti tribu ti Mangologa. Naipasngayak idiay Gobabis, Namibia.

Idi dekada 1970, inkagumaan unay ti gobierno ti South Africa nga iturayan ti Namibia ken siiinget nga impatungpalna dagiti linteg a mamagsisina ken mamaglalasin kadagiti di agkakapuli iti amin nga ili ken purok. Gapu ta agduma ti puli dagiti dadakkelko, nakombinsirda nga agsina isu a nagsubli ni Nanang idiay Ghansi, Botswana, ket inkuyognakami amin nga annakna.

Idi 1979, napanak idiay Lobatse, Botswana ket nakipagyanak iti pamilia a nangibilang kaniak kas anakda agingga a naturposko ti panageskuelak. Kalpasanna, nagtrabahoak kas klerk iti maysa a talyer. Sipud idi ubingak, diak mamati nga ipaay ti Dios dagiti kasapulan ti tattao isu a masapul nga aramidem ti aniaman a nasken nga aramidem​—naimbag man wenno dakes​—tapno masuportaram ti bagim ken ti pamiliam.

Yantangay talkendak iti pagtrabahuak, ginundawayak ti agtakaw kadagiti piesa ti lugan a kukua ti amok. Tunggal adda tren a lumabas iti ilimi iti rabii, aglugankami kadagiti kakaduak sami takawen ti aniaman a banag a mabalinmi nga alaen. Nagipuslitak met kadagiti diamante, balitok, ken bronse. Nagbalinak nga adikto iti droga, nakarangranggas, ken nagsusukot ti nobiok.

Idi 1993, naduktalanda nga agtaktakawak isu a nasesanteak. Binaybay-andak dagiti “gagayyemko” gapu ta maamakda a mairamraman. Nagsakit ti nakemko iti inaramidda isu nga inkeddengko a diakon agtalek iti asinoman.

NO KASANO A BINALBALIWAN TI BIBLIA TI BIAGKO: Idi 1994, naam-ammok ti dua a misionero a Saksi ni Jehova a da Tim ken Virginia. Kinasabaandak iti baro a pagtrabahuak. Kinasarsaritadak maipapan iti Biblia kabayatan ti pangngaldaw. Idi madlawko a mapagtalkak ida, impaluboskon nga umaydak iyadalan idiay balay.

Idi agangay, nabigbigko a tapno maay-ayok ti Dios, adda dagiti nasken a balbaliwak iti estilo ti panagbiagko. Kas pagarigan, naammuak iti 1 Corinto 6:9, 10 nga “uray dagiti mannakiabig, . . . wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.” In-inut nga insardengko dagiti dakes nga aramidko. Insardengkon ti agtakaw. Insardengkon ti makikadua kadagiti dati a barkadak. Babaen ti bileg ni Jehova, nakisinaak iti amin a nobiok.

NO KASANO A NAGUNGGONAANAK: Gapu iti kinapingetko, nasursurok a medmedan ti panagpungpungtotko ken liklikan ti panangbugkaw kadagiti annakko no agkamalida. (Efeso 4:31) Ikagkagumaak ti makisarita a siaalumamay. Nagsayaat ti resulta dayta ken ad-adda a pinasingednakami a sangapamiliaan.

Nadlaw dagiti dati a gagayyemko ken uray dagiti kaarrubak a mapagtalkandakon. Nagbalinak a napudno ken mapagpiaran nga empleado a siaannad a mangas-asikaso kadagiti tagilako ken kuarta. Gapuna, masuportarakon ti bagik bayat nga us-usarek ti kaaduan a tiempok a tumulong kadagiti sabsabali a makasursuro maipapan iti Biblia. Naimpusuan nga umanamongak iti kuna ti Proverbio 10:22: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.”

PERSONAL NGA IMPORMASION

NAGAN: GLORIA ELIZARRARÁS DE CHOPERENA

EDAD: 37

PAGILIAN: MEXICO

PAKASARITAANNA: NAGGANDAT NGA AGPAKAMATAY

TI NAPALABASKO: Dimmakkelak iti nadur-as a paset ti Naucalpan, Mexico State. Sipud idi ubingak, rebeliosoak unay ken magusgustuak ti dumar-ay kadagiti padaya. Rinugiak ti agsigarilio idi agtawenak iti 12, aginum idi agtawenak iti 14, ken agdroga idi agtawenak iti 16. Sumagmamano a tawen kalpasanna, nagtalawak idiay balay. Kaaduan a gagayyemko ket nariribuk ti pamiliada, ken mapaspasaranda ti makabkabil ken mapagsasaoan. Kasla awanen serserbi ti biagko isu a namindua a ginandatko ti agpakamatay.

Idi agtawenak iti 19, nangrugiak nga agtrabaho kas modelo. Gapuna, nakipulapolak kadagiti politiko ken artista. Idi agangay, nakiasawaak ken naaddaanak kadagiti annak, ngem siak ti mangar-aramid iti amin a desision para iti pamiliak. Intultuloyko met ti agsigarilio ken aginum, ken kanayonak latta a makipulpulapol kadagiti tattao. Tunggal makisaritaak, makapagsaoak latta iti dakes, ken magusgustuak dagiti naalas nga angaw. Managpungpungtotak pay.

Kasta met laeng ti kabibiag ti kaaduan kadagiti katimtimpuyogko. Impagarupda a kasla addan kaniak ti amin. Ngem kaskasdi a naliday ken awan direksion ti biagko.

NO KASANO A BINALBALIWAN TI BIBLIA TI BIAGKO: Nangrugiak a makipagadal iti Biblia kadagiti Saksi ni Jehova idi 1998. Naadalko iti Biblia nga adda panggep ti biag. Naammuak a panggep ni Jehova a Dios a pagbalinen manen ti daga a Paraiso, a pagungarennanto dagiti natay, ken posible nga agbiagak iti kastanto a kasasaad.

Naammuak met a tapno maipakitak nga ay-ayatek ti Dios, nasken nga agtulnogak kenkuana. (1 Juan 5:3) Narigatanak idi damo yantangay diak pay pulos nagpapaiwanwan iti siasinoman. Ngem naamirisko idi agangay a diak maiturong ti biagko a sisiak. (Jeremias 10:23) Inkararagko nga iwanwannak ni Jehova. Kiniddawko a tulongannak a mangitunos iti biagko kadagiti pagalagadanna ken mangisuro kadagiti annakko nga agbiagda a naiduma iti dati a kabibiagko.

Talaga a narigatanak a mangaramid kadagiti nasken a panagbalbaliw, ngem rinugiak nga iyaplikar ti balakad a masarakan iti Efeso 4:22-24: “Ikkatenyo koma ti daan a personalidad a mayannurot iti sigud a dana ti kababalinyo . . . ket ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.” Para kaniak, ti panangikawes iti baro a personalidad kaipapananna ti panangisardengko kadagiti makadangran a bisio kas iti panagsigarilio ken panagsao iti dakes. Agarup tallo a tawen nga inkagumaak nga aramiden dagita a panagbalbaliw tapno makapagpabautisarak kas maysa kadagiti Saksi ni Jehova.

Kanayonanna, impasnekkon a tungpalen ti annongek kas maysa nga asawa ken ina. Rinugiakon nga iyaplikar ti balakad iti 1 Pedro 3:1, 2: “Dakayo nga assawa a babbai, agpasakupkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo agraman ti nauneg a panagraem.”

NO KASANO A NAGUNGGONAANAK: Agyamanak unay ken Jehova ta naammuak a talaga nga adda panggep ti biag. Mariknak a nasaysayaatak nga amang itan ken kabaelakon a padakkelen dagiti annakko iti nasaysayaat a wagas. Sagpaminsan latta a makonsiensiaak gapu kadagiti naaramidak iti naglabas, ngem ammo ni Jehova ti pusok. (1 Juan 3:19, 20) Pudno a ti panagbiag maitunos kadagiti pagalagadan ti Biblia ti nangsaluad kaniak iti pannakadangran ken namagtalna iti panunotko.

PERSONAL NGA IMPORMASION

NAGAN: JAILSON CORREA DE OLIVEIRA

EDAD: 33

PAGILIAN: BRAZIL

PAKASARITAANNA: ALKOHOLIKO KEN ADIKTO ITI DROGA

TI NAPALABASKO: Naipasngayak iti Baģe, siudad iti Brazil nga addaan iti agarup 100,000 nga umili ken masarakan iti asideg ti beddeng ti Brazil ken Uruguay. Panagtalon ken panagtaraken kadagiti baka ti kangrunaan a pagsapulan dagiti tattao. Dimmakkelak iti napanglaw a distrito a sadiay nasaknap ti kinaranggas a gapuanan dagiti agbabarkada, ken gagangayen ti alkoholismo ken panagdroga kadagiti agtutubo.

Idi simmardengak nga ageskuela, rinugiakon ti aginum, agsigarilio, agmarihuana, ken agdengngeg iti musika a heavy-metal. Diak mamati idi iti Dios. Para kaniak, amin a panagsagaba ken riribuk iti lubong ket pammaneknek nga awan ti Dios.

Gitarista ken mannuratak iti kankanta. Masansan nga inspirasionko dagiti mabasbasak iti Apocalipsis a libro iti Biblia. Ti binuangayko a banda ket saan a limmatak a kas iti impagarupko, isu nga ad-addan a nasumokko dagiti nabirbirtud a droga. Awan aniamannan kaniak uray matayak gapu iti aglablabes a panagdrogak. Kasta ti nakatayan ti adun kadagiti idolok a kumakanta.

Naitultuloyko ti agdroga gapu ta umut-utangak ken lolak a nangpadakkel kaniak. Agulbodak no damagenna ti pangusarak iti kuarta. Kimmaro pay ti ar-aramidek ta nakipasetak iti espiritismo. Nagustuak ti black magic ta impagarupko no makatulong kaniak a mangputar kadagiti napimpintas a kanta.

NO KASANO A BINALBALIWAN TI BIBLIA TI BIAGKO: Idi rinugiak ti makipagadal iti Biblia ken makigimong kadagiti Saksi ni Jehova, nangrugin nga agbalbaliw ti panunot ken kababalinko. In-inut a napatanor ti tarigagayko nga agbiag ken agbalin a naragsak. Gapu iti dayta a panagbalbaliw, inkeddengko nga ipapukis ti atiddog a buokko. Pinaatiddogko idi kas pagilasinan ti panagrebeldek ken diak pannakakontento. Naamirisko a no kayatko nga anamongannak ti Dios, rumbeng nga isardengko ti agdroga, agsigarilio, ken ti nalabes a panagin-inum. Nautobko met a nasken a baliwak ti pagay-ayatko a kita ti musika.

Idi damok ti makigimong kadagiti Saksi ni Jehova, nabasak ti teksto iti Biblia a naipaskil iti diding ti Kingdom Hall. Naadaw dayta iti Proverbio 3:5, 6, kunana: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” Bayat a pinampanunotko dayta a teksto, nasiertok a tulongannak ni Jehova a mangpasayaat iti biagko no la ket ipalubosko.

Ngem kas iti karigat ti panangputed iti imak ti karigat ti panangbaliw kadagiti rimmamuten a wagas ti panagbiagko ken panangisardeng kadagiti bisiok a panagdroga ken nalabes a panaginum. (Mateo 18:8, 9) Ammok a saan nga agkurri kaniak ti in-inut a panagbalbaliw isu a pinampaminsanko nga insardeng dagita. Liniklikak met ti amin a lugar ken tattao a nalabit mangsulisog kaniak nga agsubli iti dati a makadangran a kabibiagko.

Nasursurok a pagragsakan ti inaldaw a maaramidak ken diak inkankano dagiti pakaupayak. Ammok a maay-ayo kaniak ni Jehova no nadalusak iti pisikal, moral, ken naespirituan. Sinungbatan ni Jehova ti panangikararagko a malipatak ti napalabasko tapno maipamaysak ti panunotko iti masanguanan. No dadduma, mailaw-anak latta. Ngem uray no diak pay nausawan no dadduma, agpayadalak latta iti Saksi a tumultulong kaniak.

Natukay ti pusok iti naadalko iti Biblia a kinapudno maipapan iti Dios. Naammuak a maseknan ti Dios iti tunggal tao, a dadaelennanto ti palso a relihion, ken iturturongna itan ti trabaho a panangasaba iti intero a lubong. (Mateo 7:21-23; 24:14; 1 Pedro 5:6, 7) Nalawlawaganak kadagita a kinapudno. Kamaudiananna, inkeddengko nga idedikar ti biagko iti Dios. Kayatko nga ipakita ti panagyamanko gapu iti amin nga inaramidna kaniak.

NO KASANO A NAGUNGGONAANAK: Mariknak a makagunggona ken addan panggep ti biagko. (Eclesiastes 12:13) Imbes a maysaak a kunsumision iti pamiliak, siak itan ti tumultulong kadakuada. Inranudko ken lolak dagiti nagsayaat a naadalko iti Biblia, ket maysa itan a Saksi ni Jehova. Nagbalin met a Saksi ti dadduma pay a kapamiliak ken ti maysa kadagiti dati a miembro ti bandak.

Ita, kasadoakon ket busbusbosenmi ken baketko ti kaaduan a tiempomi a mangisursuro iti Biblia kadagiti sabsabali. Pudno a nagunggonaanak unay ta nasursurok ti ‘agtalek ken Jehova buyogen ti isuamin a pusok.’

[Blurb iti panid 29]

“In-inut a napatanor ti tarigagayko nga agbiag ken agbalin a naragsak”