Pannakayanak Manen—Ti Dalan nga Agturong iti Pannakaisalakan?
ANIA ti sungbatyo iti saludsod a, “Nayanakka kadi manen?” Minilion nga agkunkuna a Kristiano iti intero a lubong ti sumungbat iti, “Wen!” Patienda a ti pannakayanak manen ket pakabigbigan ti amin a pudno a Kristiano ken ti kakaisuna a pamay-an wenno dalan nga agturong iti pannakaisalakan. Umanamongda iti panangmatmat dagiti lider ti relihion a kas ken Robert C. Sproul, maysa a teologo a nangisurat: “No saan a mayanak manen ti maysa a tao, . . . isu ket saan a Kristiano.”
Maysakayo kadi kadagidiay mamati a no mayanakkayo manen sigurado ti pannakaisalakanyo? No kasta, awan duadua a kayatyo a tulongan dagiti kakabagian ken gagayyemyo a mangbirok ken magna iti dayta a dalan. Ngem tapno maaramidda dayta, masapul a matarusanda ti nagdumaan ti maysa a nayanak manen ken ti saan. Kasanoyo nga ilawlawag kadakuada ti kaipapanan ti pannakayanak manen?
Adu ti mamati a ti sasao a “mayanak manen” tukoyenna ti maysa a nangaramid iti naimpusuan a kari nga agserbi iti Dios ken ni Kristo, ket iti kasta, arigna a mapagbiag iti naespirituan a pamay-an. Kinapudnona, depinaren ti maysa a diksionario ti indibidual a nayanak manen kas “maysa a Kristiano a nangpabaro wenno nangpatalged iti pammatina, nangnangruna kalpasan ti maysa a karkarna a pasamak a patienna a mainaig iti Dios.”—Merriam-Webster’s Collegiate Dictionary—Eleventh Edition.
Masdaawkayo kadi a makaammo a naiduma ti depinasion ti Biblia iti dayta a sasao? Kayatyo kadi a maammuan no ania a talaga ti isursuro ti Sao ti Dios maipapan iti pannakayanak manen? Sigurado a magunggonaankayo no usigenyo a naimbag daytoy a topiko. Apay? Gapu ta ti umiso a pannakatarus iti kaipapanan ti pannakayanak manen apektaranna ti biagyo ken ti namnamaenyo iti masanguanan.
Ania ti Isursuro ti Biblia?
Iti Biblia, ti kakaisuna a nagparangan ti sasao a “mayanak manen” ket iti Juan 3:1-12, a nangdakamat iti makapainteres a pannakisarita ni Jesus iti maysa a relihioso a lider idiay Jerusalem. Mabasayo dayta a salaysay iti naipakuyog a kahon. Basaenyo koma a naimbag dayta.
Iti salaysay, intampok ni Jesus ti sumagmamano nga aspeto ti “baro a pannakayanak.”a Kinapudnona, dayta a pannakisarita ni Jesus tulongannatayo a mangsungbat kadagiti lima a nagpateg a saludsod:
◼ Kasano kapateg ti baro a pannakayanak?
◼ Personal kadi a desision ti pannakayanak manen?
◼ Ania ti panggepna?
◼ Kasano a mayanak manen ti maysa a tao?
◼ Ania a panagbalbaliw iti relasion ti itdenna?
Usigentayo ti tunggal maysa kadagita a saludsod.
[Footnote]
a Ti termino a “baro a pannakayanak” ket masarakan iti 1 Pedro 1:3, 23. Dayta ti sabali pay a termino ti Biblia para iti “mayanak manen.” Dagita a termino ket agpada a nagtaud iti Griego a sao a gen·naʹo.
[Kahon/Ladawan iti panid 4]
“Masapul a Mayanakkayo Manen”
“Itan adda maysa a lalaki kadagiti Fariseo, Nicodemo ti naganna, maysa nga agturay kadagiti Judio. Daytoy a tao immay kenkuana iti rabii ket kinunana kenkuana: ‘Rabbi, ammomi a sika kas maysa a mannursuro naggapuka iti Dios; ta awan makaaramid kadagitoy a pagilasinan nga ar-aramidem malaksid no adda kenkuana ti Dios.’ Kas sungbat kinuna kenkuana ni Jesus: ‘Pudno unay kunak kenka, Malaksid no ti asinoman mayanak manen, saanna a mabalin a kitaen ti pagarian ti Dios.’ Kinuna kenkuana ni Nicodemo: ‘Kasano a mayanak ti maysa a tao no lakayen? Mabalinna aya ti sumrek iti aanakan ni inana iti maikadua a daras ket mayanak?’ Simmungbat ni Jesus: ‘Pudno unay kunak kenka, Malaksid no ti asinoman mayanak manipud danum ken espiritu, saanna a mabalin ti sumrek iti pagarian ti Dios. Ti nayanak manipud iti lasag ket lasag, ket ti nayanak manipud iti espiritu ket espiritu. Dika agsiddaaw gapu ta imbagak kenka, Masapul a mayanakkayo manen. Ti angin agpuyupoy iti sadinoman a kayatna, ket mangngegmo ti awerna, ngem saanmo nga ammo no sadino ti paggapuanna ken no sadino ti papananna. Kasta met ti tunggal maysa a nayanak manipud iti espiritu.’ Kas sungbat kinuna kenkuana ni Nicodemo: ‘Kasano a mapasamak dagitoy a banag?’ Kas sungbat kinuna kenkuana ni Jesus: ‘Maysaka aya a mannursuro iti Israel ket kaskasdi a saanmo nga ammo dagitoy a banag? Pudno unay kunak kenka, No ania ti ammomi sawenmi ket no ania ti nakitami saksianmi, ngem saanyo nga awaten ti pangsaksi nga ipaaymi. No imbagak kadakayo ti naindagaan a bambanag ket kaskasdi a saankayo a mamati, kasanonto a mamatikayo no ibagak kadakayo ti nailangitan a bambanag?’”—Juan 3:1-12.