Ti Masursurotayo ken Jesus

Maipapan iti Masanguanan ti Sangatauan

Inkari kadi ni Jesus ti panagbiag idiay langit?

Wen! Napagungar a mismo ni Jesus, ken napan idiay langit iti ayan ni Amana. Ngem sakbay ti ipapatay ken panagungarna, kinunana kadagiti 11 a matalek nga apostolna: “Idiay balay ni Amak adu ti pagyanan. . . . Mapanak tapno mangisaganaak iti lugar a maipaay kadakayo.” (Juan 14:2) Ngem manmano laeng ti umawat iti daytoy a pribilehio. Pinagminar daytoy ni Jesus idi kinunana kadagiti adalanna: “Dikay agbuteng, bassit nga ipastoran, agsipud ta inanamongan ni Amayo ti panangited kadakayo ti pagarian.”​—Lucas 12:32.

Ania ti aramiden ti “bassit nga ipastoran” idiay langit?

No maipapan iti daytoy bassit a grupo, kayat ti Ama nga agbalinda a paset ti nailangitan a gobierno a kadua ni Jesus. Kasanotayo nga ammo dayta? Kalpasan a napagungar ni Jesus, impalgakna ken apostol Juan a dadduma kadagiti matalek “agturayda a kas ar-ari iti daga.” (Apocalipsis 1:1; 5:9, 10) Naimbag a damag dayta. Maysa kadagiti kangrunaan a kasapulan ti sangatauan ket ti nasayaat a gobierno. Ania ti itungpal daytoy a gobierno nga iturayan ni Jesus? Kinunana: “Iti pannakaparsua manen, inton ti Anak ti tao agtugaw iti nadayag a tronona, dakayo a simmurot kaniak agtugawkayto met iti sangapulo ket dua a trono.” (Mateo 19:28) Ti panagturay ni Jesus ken dagiti pasurotna ket agresulta iti “pannakaparsua manen,” wenno pannakapabaro, ti perpekto a kasasaad a tinagiragsak ditoy daga ti umuna a pagassawaan sakbay a nagbasolda.

Ania a namnama ti intukon ni Jesus kadagiti dadduma a tattao?

Naparsua ti sangatauan tapno agbiag ditoy daga, a naiduma ken Jesus a naparsua nga agbiag idiay langit. (Salmo 115:16) Gapuna, kinuna ni Jesus: “Naggapukayo kadagiti lugar iti baba; naggapuak kadagiti lugar sadi ngato.” (Juan 8:23) Dinakamatna ti nagsayaat a masanguanan ti sangatauan ditoy daga. Naminsan, kinunana: “Naragsak dagiti naalumamay ti kababalinda, yantangay tawidendanto ti daga.” (Mateo 5:5) Tuktukoyenna ti naipaltiing a salmo a nagkuna: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna. Dagiti nalinteg tagikuaendanto ti daga, ket agtaengdanto nga agnanayon iti dayta.”​—Salmo 37:11, 29.

Gapuna, saan laeng a ti “bassit nga ipastoran” a mapan idiay langit ti makagun-od iti agnanayon a biag. Dinakamat met ni Jesus ti namnama a silulukat iti minilion a tattao iti intero a lubong. Kinunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

Kasano a bang-aran ti Dios ti panagsagaba ti sangatauan?

Dinakamat ni Jesus ti pannakabang-ar manipud iti dua a gubuayan ti pannakairurumen idi kinunana: “Ita adda panangukom iti daytoy a lubong; ita ti agturay iti daytoy a lubong maparuarto.” (Juan 12:31) Umuna, maukom ken madadaelto dagiti dakes a tattao a makinggapuanan iti panagsagaba. Maikadua, maipupokto ni Satanas ket saannanton a mayaw-awan ti sangatauan.

Dagidiay ngay natay a saan a naikkan iti gundaway a nangam-ammo iti Dios ken ni Kristo ken nangipakita iti pammati kadakuada? Kinuna ni Jesus iti managdakdakes a natay iti abayna: “Makikaduakanto kaniak idiay Paraiso.” (Lucas 23:43) Dayta a tao, agraman ti minilion a sabsabali pay, maaddaanto iti gundaway a mangam-ammo iti Dios inton isu ket pagungaren ni Jesus iti paraiso a daga. Maaddaanto iti gundaway a makikadua kadagiti naemma ken nalinteg nga umawat iti agnanayon a biag ditoy daga.​—Aramid 24:15.

Para iti kanayonan nga impormasion, kitaenyo ti kapitulo 3 ken 7 ti libro nga Ania a Talaga ti Isursuro ti Biblia?a

[Footnote]

[Ladawan iti panid 23]

“Dagiti nalinteg tagikuaendanto ti daga, ket agtaengdanto nga agnanayon iti dayta.” ​—Salmo 37:29