Ikarkari Kadi ti Dios a Pabaknangennaka?
‘Kayat ti Dios a bumaknangka—umadu ti luganmo, rumang-ay ti negosiom. Mamatika laeng kenkuana, ukradem ti dakulapmo ket itedmo iti Dios ti amin a kabaelam.’
KASTA ti ibagbaga ti dadduma a relihioso a grupo idiay Brazil, sigun iti maysa a diario a mayim-imprenta sadiay. Adu ti mangipangpangag iti dayta. Kuna ti magasin a Time nga idi nasurbey dagiti agkunkuna a Kristiano idiay Estados Unidos, “Patien ti 61% a kayat ti Dios a bumaknang dagiti tattao. Umanamong met ti 31% . . . a no itedmo ti kuartam iti Dios, ad-adunto pay ti itedna kenka.”
Dagiti kasta a pammati, a masansan a maawagan iti prosperity theology, ket agsaksaknap kadagiti pagilian iti Latin-America, kas iti Brazil, isu nga agaaripuno dagiti tattao kadagiti simbaan a mangikarkari kadagiti material a bendision manipud iti Dios. Ngem talaga kadi nga ikarkari ti Dios a pabaknangenna dagidiay agserserbi kenkuana? Nabaknang kadi amin dagiti agserserbi iti Dios idi un-unana?
Pudno nga iti Hebreo a Kasuratan, ti bendision ti Dios ket masansan a mainaig iti material a kinabaknang. Kas pagarigan, mabasatayo iti Deuteronomio 8:18: “Masapul a lagipem ni Jehova a Diosmo, agsipud ta isu ti manangipaay iti bileg kenka nga agaramid iti kinabaknang.” Dayta ti nangipasigurado kadagiti Israelita a no agtulnogda iti Dios, pabaknangenna ti nasionda.
Dagiti met ngay tattao nga agserserbi iti Dios? Nakabakbaknang ti matalek a tao a ni Job ngem pinapanglaw ni Satanas. Kalpasan dayta, ni Jehova “dinoblena ti kaadu ti sigud a sanikua ni Job.” (Job 1:3; 42:10, Ti Baro a Naimbag a Damag Biblia) Nabaknang met ni Abraham. Kuna ti Genesis 13:2 nga isu ket “aduan unay idi kadagiti pangen ken pirak ken balitok.” Idi a ti nagkakappon a buyot ti uppat nga ari iti Daya kinautiboda ni Lot, ti ulitegna a ni Abraham “inurnongna dagiti nasanay a lallakina, tallo gasut ken sangapulo ket walo nga adipen a nayanak iti sangakabbalayanna.” (Genesis 14:14) Dakkel la ketdi ti sangakabbalayan ni Abraham yantangay addaan iti 318 a ‘nasanay a lallaki’ a makabael a makigubat. Gapu ta kabaelanna a suportaran ti kasta kadakkelna a sangakabbalayan, nabatad nga isu ket nakabakbaknang, nga aduan iti pangen ken arban.
Wen, nabaknang ti adu kadagiti matalek nga agserserbi iti Dios idi un-unana kas kada Abraham, Isaac, Jacob, David, ken Solomon. Ngem kayat kadi a sawen daytoy a pabaknangen ti Dios ti amin nga agserserbi kenkuana? Iti kasumbangirna, no napanglaw ti maysa a tao, kaipapanan kadi dayta nga isu ket saan a bembendisionan ti Dios? Masungbatan dagita a saludsod iti sumaganad nga artikulo.