Dagiti Kinabaknang nga Aggapu iti Dios
NO MATALEKKA iti Dios, pabaknangennaka kadi? Nalabit, ngem saan a ti namnamaem a kita ti kinabaknang. Usigem ni Maria nga ina ni Jesus. Nagparang kenkuana ni anghel Gabriel sana kinuna a ni Maria ket ‘pinaraburan unay’ ti Dios isu nga ipasngaynanto ti Anak ti Dios. (Lucas 1:28, 30-32) Ngem saan a nabaknang ni Maria. Idi nangidaton iti sakripisio kalpasan nga impasngayna ni Jesus, nangidatag iti “maysa a paris a pagaw wenno dua nga urbon nga atap a kalapati,” a kadawyan nga idatdaton ken Jehova dagiti napanglaw.—Lucas 2:24; Levitico 12:8.
Gapu ta napanglaw ni Maria, kayat kadi a sawen dayta nga isu ket saan a bembendisionan ti Dios? Saan, ta idi napanna sinarungkaran ni Elisabet a kabagianna, “ni Elisabet napno iti nasantuan nga espiritu, ket nagpukkaw a buyogen ti natbag nga ikkis ket kinunana: ‘Benditoka kadagiti babbai, ket bendito ti bunga ti aanakam!’” (Lucas 1:41, 42) Naaddaan ni Maria iti pribilehio nga agbalin nga ina ditoy daga ti dungdungnguen nga Anak ti Dios.
Ni Jesus a mismo ket saan a nabaknang idi nagbalin a tao. Malaksid a napanglaw ti lugar a nakaipasngayanna ken dagiti nangpadakkel kenkuana, isu ket napanglaw iti unos ti panagbiagna. Naminsan, kinunana iti maysa nga agtarigagay nga agbalin nga adalanna: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.” (Lucas 9:57, 58) Nupay kasta, gapu iti iyaay ni Jesus ditoy daga, nagbalin a posible kadagiti adalanna ti maaddaan iti adu a kinabaknang. Insurat ni apostol Pablo: “Pimmanglaw maigapu kadakayo, tapno bumaknangkayo koma babaen ti kinakurapayna.” (2 Corinto 8:9) Ania a kita ti kinabaknang ti impaay idi ni Jesus kadagiti adalanna? Ania met ti ipapaayna ita?
Ania a Kita ti Kinabaknang?
Ti material a kinabaknang ket masansan a manglapped iti pammati ta ti nabaknang mabalin nga agtalek iti kuartana imbes nga iti Dios. Kinuna ni Jesus: “Anian a nakarigrigatto a banag kadagidiay addaan kuarta ti sumrek iti pagarian ti Dios!” (Marcos 10:23) Nabatad ngarud a saan a material a kinabaknang ti ituktukon ni Jesus kadagiti pasurotna.
Kinapudnona, kaaduan kadagiti Kristiano idi umuna a siglo ket nakurapay. Idi a ti maysa a nayanak a pilay ket nagkiddaw iti kuarta ken Pedro, kinuna ni Pedro: “Awan ik-ikutak a pirak ken balitok, ngem ti adda kaniak isu ti itedko kenka: Iti nagan ni Jesu-Kristo a Nazareno, magnaka!”—Aramid 3:6.
Ipakita met dagiti sasao ni adalan a Santiago a napanglaw ti kaaduan a kameng ti kongregasion Kristiano. Insuratna: “Agimdengkayo, dungdungnguek a kakabsat. Saan aya a ti Dios pinilina dagidiay napanglaw maipapan iti lubong tapno agbalinda a nabaknang iti pammati ken agtawid iti pagarian, nga inkarina kadagidiay agayat kenkuana?” (Santiago 2:5) Maysa pay, kinuna met ni apostol Pablo a saan nga adu a “mamasirib iti nainlasagan a pamay-an” wenno “mannakabalin” wenno “natan-ok pannakayanakna” ti naayaban nga agbalin a paset ti kongregasion Kristiano.—1 Corinto 1:26.
No saan a material a kinabaknang ti impaay ni Jesus kadagiti pasurotna, ania ngarud a kita ti kinabaknang ti impaayna kadakuada? Iti surat nga impatulod ni Jesus iti kongregasion ti Smirna, kinunana: “Ammok ti rigat ken kinakurapaymo—ngem nabaknangka.” (Apocalipsis 2:8, 9) Nupay nakurapay dagiti Kristiano idiay Smirna, addaanda iti kinabaknang nga adayo a napatpateg ngem iti pirak wenno balitok. Nabaknangda gapu iti pammati ken kinatarnawda iti Dios. Napateg ti pammati gapu ta dayta ket “saan nga ik-ikutan dagiti amin a tattao.” (2 Tesalonica 3:2) Kinapudnona, dagidiay awanan pammati ket nakurapay iti imatang ti Dios.—Apocalipsis 3:17, 18.
Dagiti Kinabaknang a Bunga ti Pammati
Ngem iti ania nga anag a napateg ti pammati? Dagidiay addaan pammati iti Dios magunggonaanda iti “kinabaknang ti kinamanangngaasi ken kinamanagpalabas ken mabayag a panagituredna.” (Roma 2:4) Magun-odanda met “ti pannakapakawan dagiti labsing[da]” gapu iti pammatida iti subbot a sakripisio ni Jesus. (Efeso 1:7) Kanayonanna, maaddaanda iti sirib nga iyeg “ti sao ti Kristo” kadagidiay addaan pammati. (Colosas 3:16) No agkararagda iti Dios buyogen ti pammati, “ti talna ti Dios a mangringbaw iti isuamin a panunot” saluadanna dagiti puso ken isipda isu a kontento ken naragsakda.—Filipos 4:7.
Malaksid kadagita a gunggona, addaan pay iti nagsayaat a namnama a biag nga agnanayon dagidiay mamati iti Dios baeten iti Anakna a ni Jesu-Kristo. Nalatak dagitoy a sinao ni Jesu-Kristo: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Bumileg dayta a namnama no magun-odan dagiti tattao ti umiso a pannakaammo maipapan iti Ama ken iti Anak, ta kinuna pay ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.
Nupay naespirituan ti kangrunaan kadagiti bendision ti Dios, adda met kakuykuyog dagita nga emosional ken pisikal a bendision. Alaentayo a pagarigan ni Dalídio idiay Brazil. Sakbay a naaddaan iti umiso a pannakaammo maipapan iti panggep ti Dios, isu ket mangnginum. Gapu iti dayta, saan a nasayaat ti pannakilangenna kadagiti kapamiliana ken kanayon a problemado iti kuarta. Ngem idi nagpayadal iti Biblia kadagiti Saksi ni Jehova, nagdakkel ti nagbalbaliwanna.
Gapu kadagiti nasursurona iti Biblia, insardeng ni Dalídio dagiti bisiona. Dakkel ti nagrang-ayanna iti naespirituan ta kinunana, “Mapmapanak idi kadagiti pagiinuman tapno agbartek ngem mamalaybalayak itan tapno mangasaba.” Isu ket nagbalinen nga amin-tiempo a ministro ti Sao ti Dios. Simmalun-at ken simmayaat ti pinansial a kasasaadna gapu iti dayta a panagbalbaliw. Kinuna ni Dalidio, “Ti kuarta a gastuek koma a paginum ket us-usarekon a tumulong kadagiti agkasapulan wenno paggatangkon kadagiti kasapulak.” Naaddaan met kadagiti pudno a gagayyem gapu iti pannakitimpuyogna kadagiti tattao a kas kenkuana nga addaan iti naespirituan a panangmatmat. Kontento ken natalna itan ti panunot ni Dalídio, banag a dina pulos impagarup a masagrapna idi awan pay pannakaammona maipapan iti Dios.
Usigentay ti kapadasan ni Renato a maysa pay kadagiti simmayaat ti biagda gapu iti panangpatanorda iti pammati ken Jehova a Dios. No makitam ti naragsak ken naisem a rupana ita, narigat a patien nga adda nasaem a kapadasanna. Isu ket binaybay-an ni nanangna idi kayan-anak. Inkabilna iti bag sana imbati iti sirok ti maysa a bangko. Nagadu ti garumiad ken sugat ni Renato sa di pay naputed ti pusegna. Adda limmabas a dua a babbai ket nakitada ti aggargaraw a bag iti sirok ti bangko. Impagarupda idi damo no adda nangibati iti kuting sadiay. Idi natakuatanda a kayyanak gayam a maladaga dayta, dagus nga intarayda iti asideg nga ospital tapno maasikaso.
Saksi ni Jehova ti maysa kadagita a babbai. Inestoriana iti padana a Saksi a ni Rita ti maipapan iti maladaga. Ni Rita ket namin-adun a nagpasngay iti natay a maladaga. Babai ti kakaisuna a sibibiag a nayanakna isu a napalalo ti ayatna a maaddaan iti anak a lalaki. Gapuna, inkeddengna nga amponen ni Renato.
Idi ubing pay ni Renato, imbaga kenkuanan ni Rita a saan nga isu ti pudno nga inana. Ngem siaayat ken sidudungngo nga inaywananna ti ubing ken inkagumaanna nga intukit kenkuana dagiti prinsipio ti Biblia. Bayat a dumakdakkel ni Renato, isu ket naginteres iti Biblia. Immuneg met ti panangapresiarna iti dandani di nakappapati a wagas ti pannakasalbarna. Makasangit tunggal mabasana ti kinuna idi ni salmista David: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.”—Salmo 27:10.
Kas panangipakitana iti panangapresiarna iti amin nga inaramid ni Jehova para kenkuana, nagpabautisar ni Renato idi 2002 ken nagbalin nga amin-tiempo a Kristiano a ministro idi 2003. Agingga ita, dina pay ammo no siasino dagiti pudno a nagannakna ken nalabit dinanton pulos maammuan. Nupay kasta, para ken Renato, ti maysa kadagiti kapatgan a sagut a naawatnan ket ti pannakaam-ammo ken panamatina ken ni Jehova kas ti naayat ken nadungngo nga Amana.
Nalabit tartarigagayam ti maaddaan iti nasinged ken naayat a relasion iti Dios, banag a talaga a mangpasayaat iti biagmo. Ti gundaway a maaddaan iti kasta a relasion ken Jehova a Dios ken iti Anakna a ni Jesu-Kristo ket silulukat iti amin—nabaknang man wenno napanglaw. Mabalin a saan a mangyeg dayta iti material a kinabaknang ngem agresulta iti talna ti panunot ken pannakakontento, a di pulos kabaelan a gatangen ti amin a kuarta iti lubong. Pudno nga umiso dagiti sasao a mabasa iti Proverbio 10:22: “Ti bendision ni Jehova—isu dayta ti mangpabaknang, ket awan rigat nga inayonna iti dayta.”
Maseknan unay ni Jehova a Dios kadagiti tattao nga umadani kenkuana ta kinunana: “O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.” (Isaias 48:18) Ken ikarkarina a sibabaknang a magunggonaan dagidiay umadani kenkuana buyogen ti umiso a motibo ken kababalin: “Ti bunga ti kinapakumbaba ken ti panagbuteng ken Jehova ket kinabaknang ken dayag ken biag.”—Proverbio 22:4.
[Blurb iti panid 6]
Ti pammati iti Dios ket agresulta iti talna, kinakontento, ken kinaragsak
[Ladawan iti panid 5]
Ti Dios sibabaknang a binendisionanna ti pamilia ni Jesus ditoy daga nupay nakurapay ti panagbiagda