Naragsak ken Naimpusuan a Panangted

NO MAIPAPAN iti panangted, insurat ni apostol Pablo: “Tunggal maysa aramidenna koma kas iti inkeddengna iti pusona,” ken innayonna: “Saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Cor. 9:7) Saan a piliten ni Jehova ti asinoman tapno suportaranda ti pudno a panagdayaw. Ipalubosna nga ipakita dagiti adipenna ti debosionda kenkuana babaen ti boluntario ken naragsak a panangtedda. Iti intero a historia, sipaparabur a nagtignay ti ilina. Usigenyo ti tallo a pagarigan.

Kalpasan a winayawayaan ni Jehova dagiti Israelita manipud Egipto, imbilinna a mangibangonda iti tabernakulo. Kasapulan dagiti materiales isu a nakiddaw nga agdonar dagiti Israelita. Kas panagtignayda, “tunggal maysa a situtulok ti pusona” nangyeg iti balitok ken pirak, alahas, ken dadduma pay a materiales. Nakaparparabur dagiti umili nga uray la naipakaammo nga isardengdan ti mangted.​—Ex. 35:5, 21; 36:6, 7.

Idi maibangon ti templo sumagmamano a siglo kalpasanna, naaddaan manen ti ili ti Dios iti gundaway a mangsuporta iti nasin-aw a panagdayaw. Nagdakkel ti indonar ni Ari David iti dayta a proyekto ken inawisna ti sabsabali a mangtedda met. Sigagagar nga inaramidda dayta. No iti agdama a presiona, ti balitok ken pirak a naidonar ket aggatad iti nasurok a 100 a bilion a doliar. Nagragsakan dagiti tattao ti boluntario a panagdatonda ken Jehova.​—1 Cron. 29:3-9; 2 Cron. 5:1.

Impakita met dagiti nagkauna a pasurot ni Jesu-Kristo ti naragsak a panangted. Idi aldaw ti Pentecostes 33 K.P., agarup 3,000 ti nabautisaran. Adu kadakuada ti saan nga agnanaed iti Jerusalem. Tapno dagiti napanglaw makapagtalinaedda iti dayta a siudad ken makaadalda iti ad-adu pay maipapan iti baro a pammatida, adda temporario a panagur-or kadagiti donasion. Inlako dagiti kakabsat dagiti sanikuada ket intedda kadagiti apostol ti naglakuanda tapno masuportaran dagiti agkasapulan. Naragsakan la ketdi ni Jehova a nakakita iti kasta nga ebkas ti pammati ken ayat!​—Ara. 2:41-47.

Iti kaaldawantayo, agtultuloy a supsuportaran dagiti pudno a Kristiano ti nasin-aw a panagdayaw babaen ti naparabur ken naragsak a panangtedda iti tiempo, pigsa, ken kuartada. Ti naipakuyog a kahon ipakitana ti sumagmamano a pamay-an a maaramidyo dayta.

[Kahon iti panid 18]

DAGITI PAMAY-AN TI DADDUMA A MANGTED

DAGITI KONTRIBUSION ITI SANGALUBONGAN A TRABAHO

Adu ti mangilasin iti kantidad tapno itinnagda kadagiti kahon ti kontribusion a namarkaan iti “Worldwide Work.”

Dagiti kongregasion binulan nga ipatulodda dagitoy a kantidad iti sanga nga opisina dagiti Saksi ni Jehova iti pagilianda. Dagiti donasionyo a kuarta ket mabalin met nga ipatulodyo a direkta iti Watch Tower Bible and Tract Society of the Philippines, Inc., PO Box 2044, 1060 Manila, wenno iti sanga nga opisina dagiti Saksi ni Jehova iti pagilianyo. (Dagiti boluntario a donasion a nadakamat iti baba ket mabalin met a maipatulod iti sanga nga opisina dagiti Saksi ni Jehova a makinsakup iti pagilianyo.) Dagiti tseke a maipatulod iti nadakamat nga adres ket nasken a maipanagan iti “Watch Tower Society.” Mabalin met nga idonar dagiti alahas wenno dadduma pay a napateg a bambanag. Dagita a kontribusion ket masapul a mapakuyogan iti ababa a surat a mangibagbaga a dayta ket direkta a sagut.

KONDISIONAL A DONASION

Ti kuarta ket mabalin a maitalek iti Watch Tower Society tapno mausar iti sangalubongan a trabaho. Ngem maisubli dayta no kiddawen ti nangitalek. Para iti kanayonan nga impormasion, agsuratkayo iti Treasurer’s Office iti nadakamat nga adres.

NAIPLANO A PANAGIDONAR

Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar a makatulong iti sangalubongan a panagserbi nga agpaay iti Pagarian. Karaman ditoy dagiti sumaganad:

Insurance: Mabalin a ti Watch Tower Society ti mainaganan kas benepisiario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maipanagan iti Watch Tower Society inton matay ti nagidonar, a mayannurot kadagiti paglintegan ti banko iti lugaryo.

Stock ken Bond: Mabalin nga idonar dagiti stock ken bond iti Watch Tower Society kas direkta a sagut wenno pagbalinen ti Watch Tower Society kas benepisiario ti Transfer on Death.

Lote ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, mapalubosan nga agnaed sadiay ti nagdonar bayat a sibibiag. Makiumankayo iti sanga nga opisina iti pagilianyo sakbay a legal nga ipanaganyo iti Watch Tower ti titulo ti aniaman a lote, balay, wenno pasdekyo.

Gift Annuity: Iti daytoy nga urnos, ti nagidonar iyakarna ti kuarta wenno dagiti security iti maysa a natudingan a korporasion nga us-usaren dagiti Saksi ni Jehova. Ti nagidonar, wenno daydiay tinudinganna, ket makaawat met iti espesipiko a kantidad iti kada tawen bayat a sibibiag. Makissayan ti buis a bayadan ti nagidonar iti tawen a mapatalgedan ti gift annuity.

Testamento ken Bambanag a Maitalek (Trust Fund): Mabalin nga ipatawid ti sanikua wenno kuarta iti Watch Tower Society babaen ti legal a testamento, wenno ti Watch Tower Society ti mainagan kas benepisiario ti katulagan mainaig kadagiti bambanag a maitalek. Mabalin nga adda dagiti magun-odan a benepisio iti panagbuis no narelihiosuan nga organisasion ti benepisiario ti trust.

Kas ipasimudaag ti termino a “naiplano a panagidonar,” kalikaguman daytoy ti panagplano daydiay agidonar. Tapno matulongan dagidiay agtarigagay a tumulong iti sangalubongan a trabaho dagiti Saksi ni Jehova babaen ti sumagmamano a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur tapno maipakaammo no ania ti nadumaduma a wagas a mabalin a maited dagiti sagut wenno tawid inton matay ti nagdonar. Kalpasan a nabasada ti broshur ken nakiumanda kadagiti bukodda a mammagbaga mainaig iti linteg wenno buis, adu dagidiay nakatulong iti narelihiosuan ken pangsaranay a trabaho dagiti Saksi ni Jehova iti intero a lubong ken naaprobetsarda dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.

Para iti kanayonan nga impormasion, agsurat wenno agteleponokayo iti Charitable Planning Office, iti adres a nailista iti baba, wenno makiumankayo iti sanga nga opisina dagiti Saksi ni Jehova a makinsakup iti pagilianyo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090