Ania ti Kinapudno Maipapan iti Langit?

MAKAALLUKOY la ketdi iti adu ti namnama a makapan idiay langit! Dagiti Muslim, Hindu, Budista, kameng dagiti relihion ti Kakristianuan ken uray ti adu a saan nga interesado iti relihion mamatida iti namnama a biag kalpasan ti ipapatay. Masansan a mamatmatan ti langit kas napintas ken naragsak a lugar, a pakabang-aran dagiti tattao kalpasan ti panagsagaba ken sadiay a makaduada manen dagiti “pimmusay nga ipatpategda.” Kaskasdi, para iti kaaduan a tattao, pudno daytoy a pagsasao: Tarigagayan ti amin ti mapan idiay langit, ngem awan ti mayat a matay tapno makapanda sadiay. Apay a kasta?

No nadiseniotayo a matay ken mapan idiay langit, saan kadi nga ad-adu koma ti mangnamnama iti dayta no kasano a ti maysa nga ubing mangnamnama a dumakkel wenno ti maysa nga agkabannuag mangnamnama a maaddaan iti asawa? Ngem kaaduan a tattao dida kayat ti matay.

Agpapan pay kasta, kunaen dagiti klero a nairanta nga agnaedtayo idiay langit kalpasan ti ababa a tiempo a panagnaedtayo ditoy daga. Kas pagarigan, naadaw a kinuna ti retirado nga arsobispo ti Washington, D.C. a ni Theodore Edgar Cardinal McCarrick: “Saan a daytoy a biag ti nakaparsuaantayo. Naparsuatayo nga agnaed idiay langit.” Umasping iti dayta, naadaw a kinuna ti dati a presidente ti U.S. National Association of Evangelicals: “Panggep ti biag nga ipadayagtayo ti Dios ken mapantayo idiay langit . . . ta ti langit ti pagtaengantayo.”

Dagidiay mamati iti biag idiay langit kalpasan ti ipapatay gagangay a naibatay ti pammatida iti narabaw nga impormasion. Sigun ken George Barna, presidente ti kompania nga agsirsirarak kadagiti narelihiosuan a kapanunotan, adu a tattao ti naaddaan “kadagiti kapanunotan maipapan iti biag ken biag kalpasan ti ipapatay a naibatay kadagiti ideya a nagtaud iti nagduduma a gubuayan, a kas kadagiti pelikula, musika, ken nobela.” Idiay Florida, maysa nga Episcopalian a pastor ti naadaw a nangikuna: “Ti laeng kakaisuna nga ammotayo maipapan iti langit ket dayta ti pagnaedan ti Dios.”

Ngem napateg a topiko iti Biblia ti maipapan iti langit. Ania ti makunkuna a langit sigun iti Sao ti Dios? Naparsua kadi ti tao tapno agbiag idiay langit? No adda man dagiti tattao a mapan idiay langit, ania ti aramidenda sadiay?

[Blurb iti panid 3]

Apay nga adu ti agtarigagay a mapan idiay langit, ngem manmano ti mayat a matay tapno makapanda sadiay?