Ti Panagturpos ti Maika-127 a Klase ti Gilead

Naibaon Dagiti Misionero “iti Kaadaywan a Paset ti Daga”

BINILIN ni Jesus dagiti adalanna nga agserbida kas saksi “iti kaadaywan a paset ti daga.” (Aramid 1:8) Determinado dagiti Saksi ni Jehova a mangtungtungpal iti dayta a bilin.

Kinapudnona, iti naglabas a nasurok nga 65 a tawen, dagiti misionero a nasanay iti Watchtower Bible School of Gilead timmulongda a nangidaulo iti dayta a trabaho iti nasurok a 200 a pagilian. Idi Sabado, Setiembre 12, 2009, adda sabali pay a 56 nga aduan kapadasan a ministro a nagturpos iti dayta nga eskuelaan idiay Patterson, New York, U.S.A.

Ti Bileg ti Panagpanunot

Ni Stephen Lett, a kameng ti Bagi a Manarawidwid dagiti Saksi ni Jehova ken tserman ti programa ti panagturpos, impalawagna ti tema a “Nainsiriban nga Usarenyo ti Panunotyo.” Umuna, pinakdaaranna dagiti agturpos maipapan iti uppat a pamay-an a saanda a pangusaran ti panagpanunotda. Adtoy ti tallo kadagita: (1) Saanyo a panunoten a makaipaay dagiti material a banag iti manayon a proteksion; (2) saanyo a pampanunoten dagiti imoral nga ar-aramid; ken (3) liklikanyo ti nalabes a panagdanag, a saanyo a pampanunoten no kasano kadakes ti sumaganad nga al-aldaw. (Proverbio 18:11; Mateo 5:28; 6:34) Mainaig iti maikatlo a punto, kinuna ti espiker a ti managdandanag pakaringgoranna ti naglabas, ti agdama, ken ti masanguanan a bambanag. “Makapadagsen dayta,” kinuna ni Kabsat Lett. Ania ti maikapat a punto? Nabagbagaan ti klase a saanda koma a panunoten a nasaysayaat ti biagda sakbay a rinugianda ti agmisionero. No kasta ti pampanunotenda, saanda a matagiragsak ti panagserbida iti baro a teritoriada.

Kalpasanna, imparegta ni Kabsat Lett nga usaren ti klase ti panunotda iti uppat a positibo a pamay-an. Kinunana: (1) Panunotenyo a nasaksakbay dagiti kasasaad a mabalin a mamagpeggad kadakayo iti naespirituan wenno pisikal, ket liklikanyo ti didigra; (2) darepdepenyo dagiti mabasbasayo iti Biblia, a kasla ket karamankayo iti pasamak; (3) panunotenyo nga amin a makasaritayo iti baro a teritoriayo ket agserbinto ken Jehova; ken (4) panunotenyo no kasano ngata no dakayo ti maipaspasango iti kasasaad ti kaskasabaanyo, iti kasta mapatanoryo ti pannakipagrikna.​—Proverbio 22:3.

Ti Kinapateg ti Panangsanay iti Sabsabali

Ni David Splane, kameng ti Bagi a Manarawidwid, impalawagna ti tema a “Dagitoy a Banag Italekmo Kadagiti Matalek a Lallaki,” a naibatay iti 2 Timoteo 2:2. Idi a ni apostol Pablo binilinna ni Timoteo a mangsanay kadagiti matalek a lallaki, panggep ni Pablo a saan laeng nga isuro ni Timoteo dagiti pagaammon a kinapudno no di ket paregtaenna met dagiti sinuruanna a mangsanay iti sabsabali. Impalawag ti espiker a dakkel ti pakasapulan kadagiti lallaki a mangidaulo kadagiti Nakristianuan nga aktibidad. Kaano ken kasano a sanayen dagitoy a lallaki? Pinaregta ni Kabsat Splane dagiti aggraduar a sanayenda a dagus dagitoy a lallaki apaman a rugianda ida nga iyadalan iti Biblia.

Kadagiti ania nga espesipiko a pamay-an a masanay dagiti misionero dagiti iyad-adalanda iti Biblia nga agbalin a matalek nga ulidan para iti sabsabali? Nangibalabala ti espiker iti sumagmamano a pamay-an. Dagiti misionero masapul a sanayenda dagiti iyad-adalanda nga agsagana a naimbag sakbay ti panagadalda iti Biblia. Kalpasanna, bayat a rugian dagiti mayad-adalan ti makigimong, nasken a sursuruenda no kasano nga isagana dagiti naibatay Biblia a reperensia a mapagadalan kadagiti gimong. Inlawlawag ti espiker a “no saan a kabaelan ti tao nga adalen ti Biblia a bukodna, dinanto kabaelan nga isuro ti sabsabali.” Imbaga pay ni Kabsat Splane a dagiti misionero mabalinda a tulongan dagiti kabbaro tapno agbalinda a managsapsapa, mangipaayda iti pinansial suporta iti trabaho a panangasaba, ken agtulnogda kadagidiay mangidadaulo. Kinunana a ti kasayaatan a pamay-an tapno maisuro dagita a leksion ket babaen ti panangipakita iti nasayaat nga ulidan.

Maysa a Pribilehio ti Panagbalin a Saksi

Ni Guy Pierce, a maysa met a kameng ti Bagi a Manarawidwid, impalawagna ti tema a “Dakayto Dagiti Saksik,” a naibatay iti sasao ni Jesus iti Aramid 1:8. Impalagipna kadagiti aggraduar nga idi umuna a siglo K.P., napukaw ti nasion ti Israel ti pribilehio kas saksi ni Jehova. Naited dayta a pribilehio iti maysa a nasion a mangpatpataud iti bungbunga ti Pagarian. (Mateo 21:43) Dayta a nasion isu ti kongregasion dagiti napulotan a Kristiano. Inadaw ti espiker ti sasao ni apostol Pedro, a nangikuna a ti “nasantuan a nasion” dagiti napulotan a Kristiano ‘ideklarana a sisasaknap’ ti kinatan-ok ni Jehova. (1 Pedro 2:6-9) Saan ngarud nga ibagbaga ni Jesus nga isu laeng ti saksian dagiti Kristiano, ket saandan a saksian ni Jehova. Ngamin, naawagan ni Jesus a “ti Matalek a Saksi.” (Apocalipsis 1:5; 3:14) Ni Jesus ti kangrunaan a Saksi ni Jehova ken ti pagwadantayo.​—1 Pedro 2:21.

Kinuna ti espiker kadagiti aggraduar a dakdakkel ita ti kaipapanan ti sasao ni Jesus iti Aramid 1:8. Apay? Gapu ta natungpalen ti nakapatpateg a padto iti Apocalipsis 11:15! Naipasdeken ti Mesianiko a Pagarian ti Dios. Ita, literal a maitungtungpal ti trabaho a panangsaksi “iti kaadaywan a paset ti daga.” (Aramid 1:8) Impaganetget ni Kabsat Pierce a saksaksian dagiti misionero ti maipapan ken Jehova ken ti Pagarianna, saan ket a ti maipapan iti bagbagida wenno maipapan iti dati a kabibiag, kultura, ken pagilianda. Pinaregtana dagiti aggraduar a suruanda “ti adu a tattao bayat ti nabatbati a tiempo.”

Dadduma a Tampok ti Programa

Ni Alex Reinmueller, a tumultulong iti Publishing Committee, impalawagna ti tema nga “Ikkannakayo ni Jehova iti Tured.” Kinunana a no agpannuray dagiti misionero iti bileg ni Jehova, tulonganna ida tapno mabigbigda ti abilidadda, mangawat kadagiti pagkapuyanda, mangsango kadagiti pagbutbutnganda, ken mangaramid iti kasayaatan a kabaelanda maipaay iti Dios.

Nagpalawag met ti dua kadagiti instruktor ti Theocratic Schools Department a da Sam Roberson ken William Samuelson. Impalawag ni Kabsat Roberson ti tema nga “Addaak Kenka,” a naibatay iti Isaias 41:10. Kinunana nga adunto ti matagiragsak dagiti misionero. Addanto met parikutda. Mapagballigianda dagita no tuladenda ni Ari David, nga immararaw iti naayat nga Amana. (Salmo 34:4, 6, 17, 19) Iti palawag ni Kabsat Samuelson, naipaganetget kadagiti aggraduar a kasapulan nga agtultuloy a patanorenda ti abilidad nga agpanunot. Napateg dayta tapno maliklikan dagiti misionero ti negatibo a reaksion no makangngegda iti nagubsang a sasao ken saanda a nalaka a masair.​—Proverbio 2:10, 11.

Ni Jim Mantz, a tumultulong iti Writing Committee, pinagsaludsodanna ti maysa a kameng ti Komite ti Sanga iti Republic of Georgia, ti sabali pay manipud Honduras, ken ti maysa a kameng ti Komite ti Pagilian iti Republic of Tajikistan. Dagitoy nga aduan kapadasan a kakabsat binalakadanda dagiti misionero no kasano ti makigayyem kadagiti posible a bumusor babaen ti ‘panangparmekda iti dakes babaen ti naimbag.’ (Roma 12:21) Ni Mark Noumair, sabali nga instruktor iti klase, ti nangidaulo iti narayray nga interbiu maipapan kadagiti kapadasan iti panangasaba a tinagiragsak dagiti estudiante bayat ti panagsanayda iti Gilead. Addaan dayta a paset iti mamagpanunot a tema nga, “Ania Ngarud ti Maitulongko?”

Ingngudo ti tserman ti programa babaen ti panangadawna iti liriko ti baro a kanta a napauluan “Inton Mapabaro ti Amin.” Nagawid dagiti 6,509 a timmabuno nga ad-adda pay a determinado a mangsaksi ken ni Jehova ken iti Anakna agingga “iti kaadaywan a paset ti daga.”

[Tsart/Mapa iti panid 31]

ESTADISTIKA TI KLASE

8 bilang dagiti pagilian a nairepresentar

56 bilang dagiti estudiante

28 bilang dagiti agassawa

33.6 promedio nga edad

18.3 promedio a tawen sipud bautismo

13.6 promedio a tawen iti amin-tiempo a ministerio

[Mapa]

(Para iti aktual a pannakaurnosna, kitaem ti publikasion)

Maibaon dagiti naggraduar iti 22 a pagilian a nailanad ditoy baba

PAKAIDESTINUAN DAGITI MISIONERO

JAMAICA

HAITI

NICARAGUA

COSTA RICA

PANAMA

CURAÇAO

GUYANA

PERU

BOLIVIA

PARAGUAY

CHILE

MOLDOVA

SERBIA

ALBANIA

CÔTE D’IVOIRE

CONGO, DEM. REP.

UGANDA

BURUNDI

TANZANIA

MOZAMBIQUE

NEPAL

CAMBODIA

[Ladawan iti panid 31]

Ti Maika-127 a Klase a Nagturpos iti Watchtower Bible School of Gilead

Iti listaan ditoy baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.