Naan-anay Kadi nga Itungtungpalmo ti Bilin ni Kristo?
“Kas iti pannagnayo, . . . itultuloyyo nga aramiden dayta nga ad-adda pay a naan-anay.”—1 TES. 4:1.
1, 2. (a) Ania a naindaklan a bambanag ti naimatangan ti adu a tattao idi kaaldawan ni Jesus? (b) Apay a nakapatpateg ti tiempotayo ita?
PINAMPANUNOTMO kadin a nagsayaat koma no nagbiagka idi adda ni Jesus ditoy daga? Nalabit a pampanunotem a mabalin koma a pinaimbagnaka ni Jesus tapno saanmo a mapasaran ti ut-ot nga itden dagiti mangparigat a sakit. Wenno nalabit nga ibilangmo a dakkel a pribilehio ti pannakakita ken pannakangngegmo ken ni Jesus—tapno makasursuroka kenkuana wenno tapno makitam ti dadduma nga inaramidna a milagro. (Mar. 4:1, 2; Luc. 5:3-9; 9:11) Anian a nagdakkel a pribilehio ti pannakakita koma iti amin nga inaramid idi ni Jesus! (Luc. 19:37) Sipud idi, awan ti kaputotan a nakaimatang kadagiti kasta a gapuanan, ken saanton a maulit ti inaramid ni Jesus ditoy daga a ‘panangisakripisiona iti bagina.’—Heb. 9:26; Juan 14:19.
2 Ngem nakapatpateg met ti tiempotayo ita. Apay? Agbibiagtayo iti impadto ti Kasuratan kas “tiempo ti panungpalan” ken ‘maudi nga al-aldaw.’ (Dan. 12:1-4, 9; 2 Tim. 3:1) Bayat dayta a tiempo a napapanaw ni Satanas idiay langit. Iti din agbayag, maparautan ken maitapuakto “iti mangliwengliweng” nga abut. (Apoc. 12:7-9, 12; 20:1-3) Bayat met laeng ti maudi nga al-aldaw nga addaantayo iti naindaklan a pribilehio a mangiwaragawag iti “naimbag a damag ti pagarian” iti intero a lubong, nga isarsaritatayo ti umad-adani a Paraiso. Dinto pulos mauliten dayta a trabaho.—Mat. 24:14.
3. Sakbay a nagpalangit ni Jesus, ania ti imbilinna nga aramiden dagiti pasurotna, ken ania ti ramanen dayta?
3 Sakbay a nagpalangit ni Jesus, imbilinna kadagiti pasurotna: “Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Ara. 1:8) Karaman iti dayta a trabaho ti sangalubongan a panangisuro. Ania ti panggepna? Tapno mangaramid kadagiti adalan—dagiti kanayonan a pasurot ni Kristo—sakbay a dumteng ti panungpalan. (Mat. 28:19, 20) Ania ti masapul nga aramidentayo tapno maitungpaltayo ti bilin ni Kristo?
4. (a) Ania ti ipaganetget dagiti sasao ni Pedro iti 2 Pedro 3:11, 12? (b) Ania ti rumbeng a pagannadantayo?
4 Imutektekam ti kinuna ni apostol Pedro: “Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!” (2 Ped. 3:11, 12) Ipaganetget dagiti sasao ni Pedro ti kinapateg ti panagtalinaed a naridam bayat daytoy maudi nga al-aldaw tapno masiguradotayo nga agtultuloy a naisentro ti biagtayo kadagiti aramid a mangipakita iti nadiosan a debosion. Karaman kadagita nga aramid ti panangikasaba iti naimbag a damag. Gapuna, anian a rag-otayo a makita ti kinaregta dagiti kakabsattayo iti intero a lubong bayat nga itungtungpalda ti bilin ni Kristo a mangasaba. Kabayatanna, ammotayo met a masapul nga agannadtayo a di koma maksayan ti regtatayo nga agserbi iti Dios gapu kadagiti inaldaw a pakarigatan nga itden ti lubong ni Satanas ken itden ti natawidtayo a pagannayasan nga agbasol. Gapuna, usigentayo no kasano a masiguradotayo nga agtultuloy a maitungpaltayo ti bilin ni Kristo.
Awatem Dagiti Annongen nga Inted ti Dios
5, 6. (a) Apay a kinomendaran ni Pablo dagiti kapammatianna idiay Jerusalem, ken maibusor iti ania a pinakdaaranna ida? (b) Apay a ditay koma tagtagilag-anen dagiti annongen nga inted kadatayo ti Dios?
5 Iti surat ni apostol Pablo kadagiti Kristiano idiay Jerusalem, kinomendaranna dagiti kapammatianna gapu iti nagtultuloy a kinamatalekda iti laksid ti pannakaidadanes. Kinunana: “Itultuloyyo a laglagipen dagiti immun-una nga aldaw a kadagidi, kalpasan a nalawagankayo, inibturanyo ti dakkel a salisal iti sidong dagiti panagsagaba.” Wen, silalagip ni Jehova iti kinamatalekda. (Heb. 6:10; 10:32-34) Sigurado a dagiti Hebreo a Kristiano naparegtada unay iti naimpusuan a komendasion ni Pablo. Ngem iti dayta met la a suratna, namakdaar maipapan iti pagannayasan ti tao a no dina makontrol, mabalin a bumaaw ti regtana nga agserbi iti Dios. Kinunana a masapul nga agannad dagiti Kristiano di la ket ta “agkitakit,” wenno agpambarda tapno saanda a tungpalen dagiti bilin ti Dios.—Heb. 12:25.
6 Agaplikar met kadagiti Kristiano ita dayta a pakdaar maibusor iti pagannayasan nga “agkitakit” a mangawat kadagiti annongen nga inted ti Dios. Mabigbigtayo a nasken a determinadotayo a di mangtagilag-an kadagiti Nakristianuan nga annongentayo ken ditay ipalubos a bumaaw ti regtatayo nga agserbi iti Dios. (Heb. 10:39) Ti ngamin panangipaay iti sagrado a panagserbi kaipapananna ti biag ken patay.—1 Tim. 4:16.
7, 8. (a) Ania ti tumulong kadatayo nga agtultuloy nga agserbi a sireregta iti Dios? (b) No maksayan ti sigud a regtatayo, ania ti nasken a laglagipentayo maipapan ken Jehova ken ni Jesus?
7 Ania ti makatulong kadatayo tapno ditay agpambar a mangitungpal kadagiti obligasiontayo iti Dios? Ti maysa a napateg a pamay-an a maparmektayo dayta a pagannayasan ket babaen ti regular a panangutob iti kaipapanan ti karitayo idi nagdedikartayo. Iti kababagasna, inkaritayo ken Jehova nga iyun-unatayo nga aramiden ti pagayatanna ken kayattayo a salimetmetan dayta a kari. (Basaen ti Mateo 16:24.) Gapuna, pasaray koma nga isaludsodtayo iti bagitayo: ‘Nataginayonko kadi ti determinasionko a mangitungpal iti dedikasionko iti Dios sipud idi nagbautisarak? Wenno naksayanen ti sigud a kinaregtak bayat ti panaglabas dagiti tawen?’
8 No sipupudno a sukimatentayo ti bagitayo ket makitatayo a naksayanen ti regtatayo, nasayaat a lagipentayo ti makapabileg a sasao ni propeta Sofonias. Kinunana: “Saan koma nga agsalupaypay dagiti imam. Ni Jehova a Diosmo adda iti tengngam. Kas Daydiay mannakabalin, isu mangisalakanto. Agragsakto gapu kenka buyogen ti panagrag-o.” (Sof. 3:16, 17) Dagita a mangpatalged a sasao ket umuna a nagaplikar kadagiti nagkauna nga Israelita a nagsubli idiay Jerusalem manipud pannakakautiboda idiay Babilonia. Ngem agaplikar met dayta a pammatalged iti ili ti Dios ita. Yantangay trabaho ni Jehova ti itungtungpaltayo a trabaho, masapul a laglagipentayo a tultulongan ken pabpabilgennatayo ni Jehova ken ti Anakna tapno naan-anay a maitungpaltayo dagiti annongentayo nga intedna. (Mat. 28:20; Fil. 4:13) No ikagumaantayo nga itultuloy nga aramiden a sireregta ti trabaho nga intalek ti Dios, bendisionannatayo ken tulongannatayo nga agtultuloy a rumang-ay iti naespirituan.
Sireregta a “Sapulen nga Umuna ti Pagarian”
9, 10. Ania ti punto ti ilustrasion ni Jesus maipapan iti naindaklan a pangrabii, ken ania ti maadaltayo iti dayta?
9 Bayat ti pannakipanganna iti pagtaengan ti maysa nga agturay a Fariseo, nangted ni Jesus iti ilustrasion maipapan iti naindaklan a pangrabii. Iti dayta nga ilustrasion, dineskribirna ti gundaway a naitukon iti nagduduma a tattao nga umawat iti Pagarian ti langlangit. Inlawlawagna pay ti kaipapanan ti ‘panagkitakit.’ (Basaen ti Lucas 14:16-21.) Dagiti naawis a bisita iti ilustrasion ni Jesus nagpambarda tapno dida makatabuno iti padaya. Kuna ti maysa a masapul a mapanna kitaen ti kagatgatangna a talon. Kinuna met ti maysa a masapul a mapanna sukimaten dagiti ginatangna a baka. Kinuna pay ti maysa: ‘Saanak a makaumay ta kakaskasarko.’ Narabaw dagita a pambar. Saan kadi a sukimatem nga umuna ti talon wenno baka sakbay a gatangem? Gapuna, saan a naganat ti panangsukimat kadagita kalpasan a nagatangmon. Ken apay koma a dimo patgan ti kasta a napateg nga awis gapu laeng ta kakaskasarmo? Saan a pakasdaawan a nakapungtot ti nagpasken iti ilustrasion!
10 Adda maadal ti amin nga adipen ti Dios manipud iti ilustrasion ni Jesus. Ania dayta? Ditay koma pulos ipalubos nga agbalin a nakapatpateg unay dagiti personal a pakaseknantayo, kas kadagiti dinakamat ni Jesus iti ilustrasion, nga uray la agbalinen a segundario ti panagserbitayo iti Dios. No saan a natimbeng ti maysa a Kristiano kadagiti personal a pakaseknanna, in-inut a bumaaw ti regtana iti ministerio. (Basaen ti Lucas 8:14.) Tapno saan a mapasamak dayta, ipangagtayo ti balakad ni Jesus: “Itultuloyyo, ngarud, a sapulen nga umuna ti pagarian ken ti kinalintegna.” (Mat. 6:33) Anian a makaparegta a makita dagiti adipen ti Dios—agtutubo ken nataengan—a mangyap-aplikar iti dayta a napateg a balakad! Kinapudnona, adu ti nangpasimple iti biagda tapno ad-adu ti panawenda iti ministerio. Napaneknekanda a mismo a ti sireregta a panangbirok nga umuna iti Pagarian ket mangyeg iti pudno a kinaragsak ken dakkel a pannakapnek.
11. Ania a salaysay iti Biblia ti mangyilustrar iti kinapateg ti panagbalin a naregta ken amin-puso a panagserbi iti Dios?
11 Kas panangyilustrar iti kinapateg ti naregta a panagserbi iti Dios, imutektekam ti maysa a pasamak iti biag ni Ari Jehoas ti Israel. Gapu ta madanagan iti posible a pagbanagan ti Israel iti ima dagiti Siriano, agsangsangit a napan ken Eliseo. Binilin ti mammadto nga ipanana ti bai iti ruar ti tawa nga agturong iti Siria, a mangipasimudaag iti panagballigi ni Jehova iti dayta a nasion. Napabileg koma iti dayta ti ari. Kalpasanna, ni Eliseo binilinna ni Jehoas a kabilenna ti daga babaen kadagiti baina. Namitlo a kinabil ni Jehoas ti daga. Nakapungtot ni Eliseo iti dayta yantangay ti lima wenno innem a daras a panangkabil iti daga ipasimudaagna ti ‘panangkabil iti Siria agingga a maikisap.’ Gapuna, tallo laeng a saan a naan-anay a panagballigi ti natagiragsak ni Jehoas. Gapu ta saan a naan-anay ti regtana a nagtignay, limitado ti nagun-odna a balligi. (2 Ar. 13:14-19) Ania ti maadaltayo iti dayta a salaysay? Sipaparabur a bendisionannatayo ni Jehova no amin-puso nga itungpaltayo ti trabahona buyogen ti kinaregta.
12. (a) Ania ti makatulong kadatayo a mangtaginayon iti kinaregtatayo nga agserbi iti Dios bayat a maipaspasangotayo kadagiti karit iti biag? (b) Isalaysayyo no kasano a nagunggonaankayo iti panagtultuloyyo nga okupado iti ministerio.
12 Dagiti karit iti biag subokenda ti regta ken debosiontayo nga agserbi iti Dios. Adu a kakabsat ti maipaspasango iti rigat ti panagbiag. Dadduma ti naupay gapu kadagiti nakaro a sakit a manglimitar iti maar-aramidanda a panagserbi ken Jehova. Kaskasdi, adda mabalin nga aramiden ti tunggal maysa kadatayo tapno mataginayon ti kinaregtatayo ken agtultuloy a maitungpaltayo a naan-anay ti bilin ni Kristo. Kitaem ti dadduma a singasing ken teksto iti kahon nga “Ania ti Makatulong Kenka nga Agtultuloy a Mangitungpal iti Bilin ni Kristo?” Usigem no kasano a naan-anay a mayaplikarmo dagita. No aramidem dagita, magun-odmo dagiti pudno a gunggona. No agtultuloytayo nga okupado iti ministerio, nataltalged ti riknatayo, nasaysayaat, nataltalna, ken naragragsak ti biagtayo. (1 Cor. 15:58) Kanayonanna, ti amin-kararua a panagserbitayo iti Dios tulongannatayo nga ‘agtaltalinaed a silalagip unay iti kaadda ti aldaw ni Jehova.’—2 Ped. 3:12.
Sipupudno a Sukimaten ti Bagi
13. Kasano a maammuantayo no amin-kararua met laeng ti panagserbitayo?
13 Ngem nasayaat a laglagipen a ti amin-kararua a panagserbi ket saan la a maibatay iti kaadu ti tiempo a busbosen iti ministerio. Nagduduma ti kasasaad ti tunggal maysa. Ti indibidual a mangbusbusbos iti maysa wenno dua laeng nga oras iti ministerio iti kada bulan ket mabalin a makaay-ayo ken Jehova no dayta laeng a talaga ti ipalubos ti salun-atna. (Idilig ti Marcos 12:41-44.) Gapuna, tapno maammuantayo no amin-kararua met laeng ti panagserbitayo iti Dios, masapul a sipupudno a sukimatentayo dagiti abilidad ken kasasaadtayo. Kas pasurot ni Kristo, kayattayo met a tuladen ti panangmatmatna. (Basaen ti Roma 15:5; 1 Cor. 2:16) Ania ti impangpangruna ni Jesus iti biagna? Imbagana kadagiti bunggoy manipud Capernaum: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:43; Juan 18:37) Bayat a pampanunotem ti kinaregta ni Jesus iti ministeriona, tingitingem ti kasasaadmo tapno makitam no mabalinmo pay a palawaen ti ministeriom.—1 Cor. 11:1.
14. Kadagiti ania a pamay-an a mapalawatayo ti ministeriotayo?
14 No usigentayo a naimbag ti kasasaadtayo, mabalin a mabigbigtayo a kabaelantayo pay a nayonan ti tiempo a busbusbosentayo iti ministerio. (Mat. 9:37, 38) Kas pagarigan, rinibu nga agtutubo a nabiit pay a nagraduar ti nangpalawa iti ministerioda isu a tagtagiragsakenda itan ti rag-o nga itden ti naregta a panagserbi kas payunir. Kayatmo kadi a matagiragsak ti kasta a rag-o? Dadduma a kakabsat ti nangsukimat iti kasasaadda ket nakitada a mabalinda ti umakar iti sabali a lugar iti pagilianda, wenno iti sabali pay ketdi a pagilian, nga agkasapulan iti ad-adu nga agibumbunannag iti Pagarian. Adda met dagidiay nagsursuro iti sabali a lenguahe tapno matulonganda dagiti ganggannaet ti pagsasaoda. Nupay maysa a karit ti panangpalawa iti ministerio, mangyeg dayta iti nabaknang a bendision, ken mabalin a matulongantayo ti adu a ‘dumteng iti umiso a pannakaammo iti kinapudno.’—1 Tim. 2:3, 4; 2 Cor. 9:6.
Dagiti Ulidan iti Biblia a Tuladen
15, 16. Siasino dagiti pagwadantayo no iti panagbalin a naregta a pasurot ni Kristo?
15 Ania ti inaramid ti dadduma a nagbalin nga apostol idi inawis ida ni Kristo nga agbalin a pasurotna? Kuna ti salaysay maipapan ken Mateo: “Pinanawanna ti amin a banag timmakder ket simmurot kenkuana.” (Luc. 5:27, 28) No maipapan kada Pedro ken Andres a madama idi nga agkalkalap, mabasatayo: “Madagdagus nga idi binaybay-anda dagiti iket, simmurotda kenkuana.” Simmaruno a nakita ni Jesus da Santiago ken Juan nga agay-ayuma kadagiti iketda a kadua ti amada. Ania ti inaramidda idi inawis ida ni Jesus? “Madagdagus nga idi pinanawanda ti barangay ken ti amada, simmurotda kenkuana.”—Mat. 4:18-22.
16 Mapagwadan met ni Saulo, ti nagbalin nga apostol Pablo. Nupay panatiko idi a manangidadanes kadagiti pasurot ni Kristo, isu ket nagbalbaliw ken nagbalin a “napili a basehas” a mangawit iti nagan ni Kristo. ‘Kadagiti sinagoga, dagus a rinugian ni Pablo nga inkasaba ni Jesus, a Daytoy ti Anak ti Dios.’ (Ara. 9:3-22) Ken iti laksid ti adu a rigat ken pannakaidadanes a nakaipasanguan ni Pablo, saan a bimmaaw ti regtana.—2 Cor. 11:23-29; 12:15.
17. (a) Ania ti determinasionyo mainaig iti pangitungpal iti bilin ni Kristo? (b) Ania dagiti bendision a matagiragsaktayo no aramidentayo ti pagayatan ni Jehova buyogen ti amin a puso ken pigsatayo?
17 Sigurado a kayattayo a tuladen dagiti nagsayaat nga ulidan dagidi nga adalan ken dagus nga agtignay buyogen ti amin a puso. (Heb. 6:11, 12) Ania dagiti bendision a matagiragsaktayo no ikagumaantayo nga itungpal a sireregta ken naan-anay ti bilin ni Kristo? Mariknatayo ti pudno a kinaragsak nga itden ti panangaramid iti pagayatan ti Dios ken ti pannakapnek nga itden ti panangawat iti kanayonan a pribilehio ken annongen iti kongregasion. (Sal. 40:8; basaen ti 1 Tesalonica 4:1.) Wen, bayat a sipipinget nga itungpaltayo ti bilin ni Kristo, matagiragsaktayo dagiti nabaknang ken manayon a bendision kas iti talna ti panunot, pannakapnek, anamong ti Dios, ken ti namnama nga agbiag nga agnanayon.—1 Tim. 4:10.
Malagipyo Kadi?
• Ania a napateg a trabaho ti naited kadatayo, ken kasano ti rumbeng a panangmatmattayo iti dayta?
• Ania a pagannayasan ti masapul a pagannadantayo, ken apay?
• Ania a napudno a panangsukimat iti bagi ti masapul nga aramidentayo?
• Ania ti makatulong kadatayo nga agtultuloy a mangitungpal iti bilin ni Kristo?
[Kahon/Ladawan iti panid 27]
Ania ti Makatulong Kenka nga Agtultuloy a Mangitungpal iti Bilin ni Kristo?
▪ Basaem nga inaldaw ti Sao ti Dios, ken utobem dagiti nabasam.—Sal. 1:1-3; 1 Tim. 4:15.
▪ Masansan nga ikararagmo ti tulong ken panangiwanwan ti espiritu ti Dios.—Zac. 4:6; Luc. 11:9, 13.
▪ Makitimpuyogka kadagidiay mangiparparangarang iti naimpusuan a kinaregta iti ministerio.—Prov. 13:20; Heb. 10:24, 25.
▪ Bigbigem ti kinaganat ti tiempo a pagbibiagantayo.—Efe. 5:15, 16.
▪ Sipapanunotka koma kadagiti serioso a pagbanagan ti ‘panagkitakit.’—Luc. 9:59-62.
▪ Regular nga utobem ti karim idi nagdedikarka ken ti aglaplapusanan a bendision nga itden ti panagserbi ken ni Jehova ken ti amin-puso a panangitungpal iti bilin ni Kristo.—Sal. 116:12-14; 133:3; Prov. 10:22.