Apay a Saan a Nakinamin ni Jesus iti Politika?
ILADAWAM ti eksena iti maysa a malem idi tawen 32 K.P. Nakalatlataken ni Jesus, ti naipadto a Mesias, gapu iti panangagasna kadagiti addaan an-anayen ken panangpagungarna pay kadagiti natay. Ita, pinagsiddaawna dagiti rinibu a tattao babaen ti panangaramidna kadagiti datdatlag ken ti panangiranudna kadagiti pannursuro ti Dios. Inummongna dagiti mabisin a tattao kadagiti babassit a grupo. Nagkararag ken Jehova sa simimilagro a pinakanna ida amin. Kalpasanna, inurnongna dagiti tedda tapno awan ti masayang. Ania ti reaksion dagiti tattao?—Juan 6:1-13.
Kalpasan a nakitada dagiti milagro ni Jesus ken ti nalaing a panangimatonna iti bunggoy ken ti panangipaayna kadagiti kasapulanda, kinuna dagiti tattao a nasayaat no isu ti agbalin nga ari. (Juan 6:14) Saan a nakaskasdaaw ti kasta a reaksionda. Laglagipem a kasapulanda unay ti naimbag, nalaing nga agturay; ta ti inay-ayatda a pagilian ket iturturayan ti manangirurumen a ganggannaet nga agturay. Isu a pilpilitenda ni Jesus a makinamin iti politika. Gapu iti kasta a kasasaad, panunotem no ania ti sungbatna.
“Ni Jesus, idi naammuanna nga umayda koman ket kemmegenda tapno pagbalinenda nga ari, napan manen nga agmaymaysa idiay bantay,” kuna ti Juan 6:15. Nakabatbatad ti pangngeddeng ni Jesus. Natibker a pinagkedkedanna ti makinamin iti politika iti pagilianna. Saan a pulos nagbaliw ti takderna. Imbagana a kasta met laeng ti takder dagiti pasurotna. (Juan 17:16) Apay a kasta ti takder ni Jesus?
Apay a Pinili ni Jesus ti Agbalin a Neutral?
Ti neutral a takder ni Jesus iti politika iti daytoy a lubong ket sititibker a naibatay kadagiti prinsipio ti Biblia. Usigem ti dua nga aspeto.
“Ti tao dinominaranna ti tao iti pakadangrananna.” (Eclesiastes 8:9) Kasta ti pananggupgop ti Biblia iti pakasaritaan ti turay ti tao. Laglagipem a nagbiag ni Jesus iti naunday a tiempo kas maysa nga espiritu idiay langit sakbay nga immay ditoy daga kas maysa a tao. (Juan 17:5) Iti kasta ammo ni Jesus a kasano man kasayaat ti panggep dagiti tattao, saanda a kabaelan nga ipaay a siuumiso ti kasapulan ti binilion; ken saan met a pinarsua ti Dios dagiti tattao a mangaramid iti kasta. (Jeremias 10:23) Ammo ni Jesus a saan a masolbar dagiti gobierno ti tao dagiti parikut ti sangatauan.
“Ti intero a lubong adda iti pannakabalin daydiay nadangkes,” a ni Satanas a Diablo (1 Juan 5:19) Makapasiddaaw kadi dagita a sasao kenka? Adu ti masdaaw. Pagarupenda nga adda dagiti nasisingpet a tattao a makinamnamin iti gobierno gapu ta kayatda a pagbalinen ti lubong a nasaysayaat ken nataltalged a pagnaedan. Ngem uray kasano ti panangikagumaanda, uray pay ti kapasnekan nga agturay saanna a mapagballigian ti impluensia daydiay inawagan ni Jesus a “ti agturay daytoy a lubong.” (Juan 12:31; 14:30) Dayta ti gapuna a kinuna ni Jesus iti maysa a politiko: “Ti pagariak saan a paset daytoy a lubong.” (Juan 18:36) Ni Jesus ti manamnama nga Ari ti nailangitan a gobierno. No kas pagarigan ta nakinamin ni Jesus iti politika, naikompromisona koman ti kinasungdona iti gobierno ni Amana.
Ngem insuro kadi ni Jesus dagiti pasurotna nga awan ti obligasionda kadagiti gobierno ditoy daga? Saan, insurona ketdi ida no kasano a maaddaanda iti natimbeng a panangmatmat kadagiti rebbengenda iti Dios ken kadagiti obligasionda iti gobierno.
Rinaem ni Jesus ti Autoridad ti Gobierno
Idi mangisursuro ni Jesus idiay templo, sinaludsod dagiti bumusbusor kenkuana no masapul nga agbayad dagiti tattao iti buis. Narikut dayta a saludsod ta no saan ti sungbatna, maibilang dayta kas ibubusor iti autoridad ken mabalin a mangrubrob pay ketdi iti iyaalsa dagiti mairurrurumen a tattao maibusor iti turay ti Roma. Ngem no wen ti sungbat ni Jesus, adu ti mangibaga a kankanunonganna ti kinaawan hustisia a mapaspasaranda. Naan-anay ti kinabalanse ti sungbat ni Jesus. Kinunana: “Ibayadyo ken Cesar ti bambanag ni Cesar, ngem iti Dios ti bambanag ti Dios.” (Lucas 20:21-25) No kasta, dagiti pasurotna ket adda obligasionda iti Dios ken uray ken ni Cesar wenno ti sekular a gobierno.
Ti gobierno ti mangay-aywan iti urnos ti pagilian. Umiso laeng a kalikagumanda dagiti umili nga agbalinda a napudno, agbayadda iti buis, ken tungpalenda ti linteg. Ania ti impasdek ni Jesus nga ulidan iti panagbayad ken “Cesar kadagiti bambanag ni Cesar”? Dimmakkel ni Jesus iti poder ti nagannak a managtungpal iti linteg uray iti narigat a kasasaad. Kas pagarigan, ni Jose ken ti masikog nga asawana a ni Maria nagdaliasatda iti nasurok a 150 a kilometro tapno mapanda agparehistro idiay Betlehem, kas panangtungpalda iti pammilin ti Roma. (Lucas 2:1-5) Gapuna, nagbalin met ni Jesus a managtungpal iti linteg. Nagbayad pay ketdi iti buis a saanna koma nga obligasion. (Mateo 17:24-27) Nupay adda autoridadna, sitataktika a liniklikanna ti makibiang kadagiti sekular a banag. (Lucas 12:13, 14) Nabatad ngarud a rinaem ni Jesus ti sistema ti gobierno, nupay pinagkedkedanna ti makipaset iti dayta. Ania ngarud ti kayat a sawen ni Jesus iti kinunana a panangbayad “iti Dios ti bambanag ti Dios?”
No Kasano nga Impaay ni Jesus “iti Dios ti Bambanag ti Dios”
Naminsan, adda nangisaludsod ken Jesu-Kristo no ania ti kadakkelan iti amin a linteg nga inted ti Dios kadatayo. Kastoy ti insungbatna: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’” (Mateo 22:37-39) Insuro ni Jesus a no maipanggep iti panangbayad “iti Dios ti bambanag ti Dios,” ti kangrunaan nga utangtayo Kenkuana ket ayat—a pakairamanan ti naimpusuan ken naan-anay a kinasungdo.
Mabalin kadi a mabingay ti kasta nga ayat? Mabalin kadi a nasungdotayo ken ni Jehova a Dios ken iti nailangitan a gobiernona bayat nga ipapaaytayo met ti kinasungdotayo iti gobierno ti tao? Kastoy ti prinsipio nga imbaga ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali.” (Mateo 6:24) Agsasao ni Jesus maipapan iti pannakabingay ti kinasungdo iti Dios ken iti kinabaknang, ngem nabatad met kenkuana nga agaplikar met dayta a prinsipio iti pannakinamin iti politika. Kasta met ti panangmatmat dagiti pasurotna idi umuna a siglo.
Ti kadaanan a magun-odan a rekord ipakitana a di pulos nakipaset iti politika dagiti pasurot ni Jesus idi nagkauna a tiempo. Tangay impaayda ti amin a kararuada iti panagdayaw iti Daydiay dinaydayaw ni Kristo, saanda nga impaay ti kinasungdoda iti Roma ken kadagiti emperadorna, saanda nga agsoldado, ken agserbi nga opisial ti gobierno. Nagbanaganna, napasaranda ti amin a kita ti ibubusor. No dadduma dagiti kabusorda pabasolenda ida a manggurgura iti sangatauan. Nainkalintegan kadi dayta nga akusasion?
Dagiti Pudno a Kristiano Maseknanda Kadagiti Tattao
Lagipem ti dinakamat ni Jesus a maikadua a kadakkelan a bilin ti Dios—“Masapul nga ayatem ti kaarrubam a kas iti bagim.” Nalawag nga awan ti pudno a pasurot ni Kristo nga adda siasinoman a kagurgurana. Inayat ni Jesus dagiti tattao, nagregget maipaay kadakuada, ken tinulonganna ida uray kadagiti gagangay a parikutda.—Marcos 5:25-34; Juan 2:1-10.
Ngem ania ti kangrunaan a naglatakan ni Jesus? Saan a naawagan kas Mangngagas, Manangpakan iti Rinibribu, ken uray pay Manangpagungar Kadagiti Natay—nupay intungpalna amin dagita a nakaskasdaaw nga akem. Imbes ketdi, siuumiso nga inawaganda iti Mannursuro. (Juan 1:38; 13:13) Inlawlawag ni Jesus a ti maysa a kangrunaan a rason no apay nga immay ditoy daga ket tapno isurona dagiti tattao maipapan iti Pagarian ti Dios.—Lucas 4:43.
Dayta ti makagapu no apay a dagiti pudno a pasurot ni Kristo impamaysada ti biagda iti trabaho a nakakumikoman ti Apoda idi adda ditoy daga—ti panangisuro kadagiti tattao maipapan iti naimbag a damag ti Pagarian ti Dios. Impaannong ni Jesu-Kristo iti amin a pudno a Kristiano ti panangisuro kadagiti tattao iti sangalubongan maipapan iti dayta a Pagarian. (Mateo 24:14; 28:19, 20) Dayta nga agnanayon a nailangitan a gobierno ti mangituray iti amin a parsua ti Dios, maitunos iti linteg ti ayat. Dayta ti mangitungpal iti pagayatan ti Dios, nga ikkatenna ti panagsagaba ken ipapatay. (Mateo 6:9, 10; Apocalipsis 21:3, 4) Maitutop ngarud a tinukoy ti Biblia ti mensahe ni Kristo kas “naimbag a damag”!—Lucas 8:1.
No ngarud sapsapulem dagiti pudno a pasurot ita ni Jesu-Kristo ditoy daga, kasanom a mabigbig ida? Makinamnaminda ngata iti politika daytoy a lubong? Wenno itungtungpalda ti kangrunaan a misionda nga isu met ti nakakumikoman ni Jesus—ti panangikasaba ken panangisuro iti Pagarian ti Dios?
Kayatmo kadi a maammuan ti ad-adu pay maipapan iti Pagarian ti Dios ken no kasano nga apektaranna ti biagmo ita? Awisendaka a makisarita kadagiti Saksi ni Jehova iti lugarmo wenno agsukimat iti autorisado a Web site, a www.watchtower.org.
[Kahon/Dagiti Ladawan iti panid 24, 25]
Tumultulong Kadi Dagiti Saksi ni Jehova iti Komunidad?
Neutral ti takder dagiti Saksi ni Jehova no iti politika. Nupay kasta, sipapasnek a tumultulongda kadagiti tattao iti amin a puli iti komunidadda. Usigem ti sumagmamano a pammaneknek:
◼ Dagiti Saksi ni Jehova ket buklen ti nasurok a pito a milion a boluntario. Tinawen a mangbusbusbosda iti nasurok a 1.5 bilion nga oras iti panangisuro kadagiti tattao maipapan iti linaon ti Biblia. Isursuroda met kadagiti tattao no kasano a makatulong ti Biblia tapno maikkatda ti dakes nga ugali ken ar-aramid, tapno agbalin a naragsak ti pamiliada, ken tapno mapasayaat ti kasasaad ti panagbiagda.
◼ Agim-imprenta ken agiwarwarasda kadagiti libre a literatura iti nasurok a 500 a lenguahe, agraman iti dadduma a lenguahe nga awan pay ti sabali a nayimprenta a pagbasaan.
◼ Mangang-angayda kadagiti kurso a nakatulong iti minilion a tattao a mangadal no kasano ti agpalawag iti publiko iti nataktika ken nalawag a pamay-an.
◼ Mangisaysayangkatda kadagiti programa ti panangisuro a nakatulongen iti rinibribu a tattao iti intero a lubong tapno masursuroda ti agbasa ken agsurat.
◼ Nangorganisarda iti nasurok nga 400 a Regional Building Committee iti intero a lubong a mangsansanay kadagiti boluntario nga agbalin a nasigo iti panagibangon tapno makaipasdekda kadagiti sentro ti panagadal iti Biblia. Iti napalabas a sangapulo a tawen, nasurok a 20,000 a pasdek a paggigimongan wenno Kingdom Hall ti naibangon.
◼ Iti intero a lubong, makiramramanda met iti panangsaranay kadagiti Saksi ken saan a Saksi a biktima ti didigra. Iti las-ud ti dua a tawen kalpasan ti bagyo a nangdidigra iti Estados Unidos, 90 a Kingdom Hall ken 5,500 a pagtaengan a nadadael ti imbangon dagiti Saksi a boluntario.
[Ladawan iti panid 23]
Idi pinilit dagiti tattao a makinamin ni Jesus iti politika, napan nga “agmaymaysa idiay bantay”