Kalikaguman Kadi ti Dios ti Panagkompesar?

Iti adu a relihion, ti panagkompesar iti maysa a padi wenno ministro ket agtultuloy pay latta a paset ti relihioso a ritual wenno panagdayaw. Ngem napateg wenno nasken pay kadi dayta a ritual iti daytoy napanuynoy a kagimongan?

AGDUDUMA dagiti kapanunotan. Kas pagarigan, impadamag ti National Post ti Canada ti maipapan iti maysa a tao a nangamin a nupay narigat nga ipudno ti nagbasolam, “makapabang-ar no mayebkasmo dayta iti sabali a tao a mangikararag kenka ken mangibaga iti masapul nga aramidem.” Iti libro a Bless Me, Father, for I Have Sinned, naadaw ti sasao ti maysa a lalaki a nagkuna: “Ti panagkompesar ti maysa kadagiti makapadagsen a ritual ti Simbaan. Napalalo a pagdanagennaka.” Ania ngata ti kunaen ti Biblia mainaig iti dayta?

No Ania ti Kunaen ti Biblia

Iti Linteg nga inted idi ti Dios iti ili ti Israel, nailanad dagiti espesipiko nga instruksion mainaig iti nasken nga aramiden ti maysa a nakabasol. Kas pagarigan, no nakabasol ti maysa iti padana a tao wenno nasalungasingna ti linteg ti Dios, nasken nga ipudnona dayta iti maysa a natudingan a padi iti tribu ni Levi. Kalpasanna, mangaramid ti padi iti panangabbong para kenkuana babaen ti panagdaton iti Dios agpaay iti pannakapakawan ti basol.​—Levitico 5:1-6.

Kalpasan ti ginasgasut a tawen, idi a ni Ari David ket tinubngar ni propeta Nathan gapu kadagiti naaramidna a basol, ania ti reaksion ni David? Dagus nga inaklonna: “Nagbasolak a maikaniwas ken Jehova.” (2 Samuel 12:13) Nagkararag pay iti Dios a nagpakpakaasi a mapakitaan koma iti pabor. Ania ti resultana? Kastoy ti kinuna ni David idi agangay: “Ti basolko impudnok kenka iti kamaudianan, ket ti biddutko saanko nga inabbongan. Kinunak: ‘Ipudnokto dagiti salungasingko ken Jehova.’ Ket sika pinakawanmo ti biddut dagiti basolko.”​—Salmo 32:5; 51:1-4.

Iti kongregasion Kristiano idi umuna a siglo iti Kadawyan a Panawentayo, nagtultuloy a kinalikaguman ti Dios ti panagipudno iti basol. Ni Santiago a kabsat ni Jesus iti ina ken maysa kadagiti mangidadaulo iti kongregasion idiay Jerusalem, indagadagna kadagiti padana a Kristiano: “Sipapanayag nga ipudnoyo dagiti basolyo iti maysa ken maysa ket ikararaganyo ti maysa ken maysa, tapno maimbagankayo.” (Santiago 5:16) Ania ngarud ti makalikaguman nga ipudno dagiti Kristiano, ken siasino ti pagipudnuanda?

Ania ti Rumbeng nga Ipudno?

Kas imperpekto a tattao, inaldaw nga addaantayo iti pagannayasan nga agkamali iti tignay ken iti panagsao ket makabasoltayo iti padatayo a tao. (Roma 3:23) Kayat kadi a sawen dayta nga amin a salungasingtayo ket masapul nga ipudnotayo iti maysa a tao nga addaan autoridad?

Nupay kagura ti Dios ti tunggal basol, siaasi nga ipapaayannatayo iti konsiderasion no makaaramidtayo kadagiti basol a maigapu iti natawidtayo a kinaimperpekto. Kinapudnona, binigbig ti salmista: “No dagiti biddut koma ti siputam, O Jah, O Jehova, siasino ti makapagtakder? Ta adda kenka ti pudno a panangpakawan, tapno iti kasta mapagbutnganka.” (Salmo 130:3, 4) Ania ngarud ti aramidentayo no agbiddut ken agbasoltayo iti padatayo a tao, a nalabit ditay inggagara? Laglagipem nga iti modelo a kararag nga insuro ni Jesus kadagiti pasurotna, inramanna daytoy a kiddaw: “Pakawanennakami iti basbasolmi, ta pakawanenmi met ti tunggal maysa a nakautang kadakami.” (Lucas 11:4) No kasta, pakawanennatayo ti Dios no agkararagtayo kenkuana ken kiddawentayo dayta iti nagan ni Jesus.​—Juan 14:13, 14.

Laglagipem nga inraman pay ni Jesus ti kondision a masapul a pakawanentayo met dagidiay ‘nakautang kadatayo.’ Impalagip ni apostol Pablo kadagiti kapammatianna: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa no kasano a ti Dios sibubulos a nangpakawan met kadakayo babaen ken Kristo.” (Efeso 4:32) No ngarud pakawanentayo dagiti sabsabali iti nagbasolanda kadatayo, addaantayo iti nasayaat a rason a mangnamnama a pakawanennatayo met ti Dios kadagiti basoltayo.

Kasano ngaruden dagiti nadagsen a basol a kas iti panagtakaw, inggagara a panagulbod, imoralidad, panagbartek, ken dadduma pay? Ti siasinoman a mangar-aramid kadagiti kasta salsalungasingenna ti linteg ti Dios ket direkta ngarud nga agbasbasol iti Dios. Ania ti rumbeng nga aramiden ti nakabasol iti kasta kadagsen?

Siasino ti Rumbeng a Pagipudnuan Kadagiti Basol?

Ti laeng Dios ti mabalin a mangpakawan kadagiti basol a maikaniwas iti lintegna; saanna nga ited dayta nga autoridad kadagiti tattao. Imbatad kadatayo ti Biblia: “No ipudnotayo dagiti basoltayo, [ti Dios] matalek ken nalinteg tapno pakawanennatayo kadagiti basoltayo ken tapno dalusannatayo manipud iti isuamin a kinakillo.” (1 Juan 1:9) Nupay kasta, siasino ti pagipudnuan kadagiti kasta a basol?

Yantangay ti Dios laeng ti gubuayan ti pammakawan, masapul ngarud a ti Dios ti pagipudnuantayo. Kasta ti inaramid ni David, kas pagaammotayon. Ngem ania laeng ti pakaibatayan ti pannakapakawan? Kunaen kadatayo ti Biblia: “Agbabawikayo, ngarud, ket agbaw-ingkayo tapno mapunas dagiti basolyo, iti kasta dagiti panawen ti pannakabang-ar umayda manipud iti persona ni Jehova.” (Aramid 3:19) Wen, malaksid iti panangbigbig ken panangipudnona iti basolna, nasken a sitatallugod pay ti maysa a nakabasol a mangisardeng iti dakes nga aramidna tapno magun-odna ti pammakawan. Masansan a narigat nga aramiden dayta a kanayonan nga addang. Nupay kasta, adda makatulong.

Lagipem ti kinuna ti adalan a ni Santiago a nadakamat itay: “Sipapanayag nga ipudnoyo dagiti basolyo iti maysa ken maysa ket ikararaganyo ti maysa ken maysa, tapno maimbagankayo.” Innayon pay ni Santiago: “Ti araraw ti nalinteg a tao, no agtigtignay dayta, aduan iti puersa.” (Santiago 5:16) “Ti nalinteg a tao” mabalin a tukoyenna ti maysa kadagiti “lallakay iti kongregasion” a nadakamat iti bersikulo 14. Iti kongregasion Kristiano, adda dita dagiti naespirituan a “lallakay iti kongregasion,” wenno dagiti panglakayen, a natudingan a mangasistir kadagidiay agtarigagay a makagun-od iti pammakawan ti Dios. Dagita a “lallakay iti kongregasion” saanda a mabalin ti mangpakawan wenno mangabsuelto kadagiti basol, yantangay awan ti tao a naikkan iti autoridad a mangpakawan iti padana a tao maigapu iti basol a maibusor iti Dios.a Nupay kasta, kualipikadoda a mangtubngar ken mangatur iti tao a nakaaramid iti nadagsen a basol, a tulonganda a mangamiris iti kadagsen ti basolna ket masapul a pagbabawyanna dayta.​—Galacia 6:1.

Apay a Nasken nga Ipudno ti Basol?

Nadagsen man wenno nalag-an ti basol ti maysa a tao, nakaaramiden iti pakadadaelan ti relasionna iti padana a tao ken iti Dios. Gapuna, mabalin a mariribukan wenno madanagan. Dayta ti maaramidan ti inted kadatayo ti Dios a konsiensia. (Roma 2:14, 15) Ania ngarud ti mabalin nga aramiden?

Iti met laeng libro ni Santiago, mabasatayo dagitoy a makaparegta a sasao: “Adda aya asinoman a masaksakit kadakayo [iti naespirituan]? Ayabanna koma dagiti lallakay iti kongregasion, ket ikararaganda koma, nga isu sapsapuanda iti lana iti nagan ni Jehova. Ket ti kararag ti pammati paimbagennanto ti addaan sagubanit, ket isu ibangonto ni Jehova. Kasta met, no nakaaramid kadagiti basol, mapakawanto dayta kenkuana.”​—Santiago 5:14, 15.

Iti dayta a teksto, naidagadag manen kadagiti lallakay, wenno dagiti panglakayen nga asikasuenda ti kasapulan ti arban. Kasano? Saanda a basta denggen ti maipudno kadakuada a basol. Imbes ketdi, adda tignay a masapul nga aramidenda tapno ‘mapaimbag ti addaan sagubanit,’ yantangay maibilang dayta a naespirituan a sakit. Adda dua a banag a dinakamat ni Santiago a masapul nga aramidenda.

Umuna, “sapsapuanda iti lana.” Tuktukoyen dayta ti makapaimbag a birtud ti Sao ti Dios. Inlawlawag ni apostol Pablo a “ti sao ti Dios nabiag ken adda bilegna . . . ket kabaelanna a lasinen dagiti panunot ken dagiti panagem ti puso.” (Hebreo 4:12) Babaen ti nasigo a panangusar iti Biblia, dagiti lallakay tulonganda ti tao a masakit iti naespirituan tapno makitana ti makagapu iti parikutna ken tapno makaaramid iti addang a mangilinteg kadagiti bambanag iti imatang ti Dios.

Kalpasanna, mangipaayda iti “kararag ti pammati.” Nupay ti kararag dagiti lallakay saanna a mabaliwan ti pangngeddeng ti Dios, napateg Kenkuana dagita a kararag, yantangay sidadaan a mangpakawan iti basol maibatay iti daton a subbot ni Kristo. (1 Juan 2:2) Sisasagana a tumulong ti Dios iti asinoman a sipapasnek nga agbabbabawi ken daydiay agar-aramid iti tignay a “maitutop iti panagbabawi.”​—Aramid 26:20.

Iti man pada a tao wenno iti Dios ti nagbasolantayo, ti kangrunaan a rason nga ipudnotayo dayta ket tapno magun-odtayo ti naanamongan a takder iti imatang ti Dios. Impasimudaag ni Jesu-Kristo a masapul a risutentayo nga umuna ti aniaman a parikuttayo iti padatayo a tao ken makikappia kadakuada sakbay a mabalintayo ti agdayaw iti Dios buyogen ti nadalus a konsiensia. (Mateo 5:23, 24) Kuna ti Proverbio 28:13: “Daydiay mangabbong kadagiti salungasingna saanto nga agballigi, ngem daydiay mangipudno ken mangpanaw kadakuada maipakitaanto iti asi.” No agpakumbabatayo ken Jehova a Dios ken kiddawentayo ti pammakawanna, magun-odtayo ti anamongna ken itan-oknatayto iti naikeddeng a tiempo.​—1 Pedro 5:6.

[Footnote]

[Blurb iti panid 23]

Palabsen ken pakawanen ti Dios dagiti basoltayo no kiddawentayo dayta iti nagan ni Jesus

[Ladawan iti panid 24]

Ti kangrunaan a rason nga ipudnotayo ti basoltayo ket tapno magun-odtayo ti naanamongan a takder iti imatang ti Dios