Ar-aramidenyo Kadi ti Pasetyo Tapno Agbalin a Makapabileg Dagiti Nakristianuan a Gimong?
“No aguurnongkayo, . . . maaramid koma ti amin a bambanag a maipaay a pakapabilgan.”—1 COR. 14:26.
1. Sigun iti 1 Corinto kapitulo 14, ania ti maysa a napateg a panggep dagiti gimong?
‘ANIAN a makapabileg dayta a gimong!’ Nayebkasyo met kadin ti kasta kalpasan ti pannakigimongyo iti Kingdom Hall? Sigurado la ketdi! Pudno a gubuayan ti pammaregta dagiti gimong ngem saan a pakasdaawan dayta. Kas idi kaaldawan dagiti nagkauna a Kristiano, ti maysa a napateg a panggep dagiti gimongtayo ita ket ti naespirituan a pannakapabileg ti amin a timmabuno. Imutektekanyo no kasano nga impaganetget ni apostol Pablo dayta nga espesipiko a panggep dagiti gimong iti umuna a suratna kadagiti taga-Corinto. Iti intero a kapitulo 14, maulit-ulit a kinunana a rumbeng a maymaysa ti panggep ti amin a paset a maiparang kadagiti gimong—‘ti panangpabileg iti kongregasion.’—Basaen 1 Corinto 14:3, 12, 26.a
2. (a) Dagiti makapabileg a gimong ket resulta ti ania? (b) Ania a saludsod ti usigentayo?
2 Ammotayo a dagiti makapabileg, wenno makaisuro, a gimong ket kangrunaan a resulta ti panangidalan ti espiritu ti Dios. Gapuna, rugiantayo ti gimong babaen ti naimpusuan a panagkararag ken Jehova tapno kiddawentayo iti nailangitan nga Amatayo a bendisionanna ti panagtataripnongtayo babaen ti nasantuan nga espirituna. Kaskasdi, ammotayo nga adda maitulong ti amin a kameng ti kongregasion tapno agbalin a makapabileg dagiti programa iti gimong agingga a posible. Ania ngarud ti sumagmamano a mabalintayo nga aramiden kas indibidual tapno masigurado nga agbalin a gubuayan ti naespirituan a bang-ar ken pammaregta dagiti linawas a gimong iti Kingdom Hall?
3. Kasano kapateg dagiti gimong?
3 Tapno masungbatan dayta, usigentayo ti sumagmamano nga aspeto dagiti gimong a masapul a laglagipen dagiti mangikonkondukta. Usigentayo met no kasano a makatulong ti intero a kongregasion tapno agbalin a makapabileg dagiti gimong iti amin a tumabuno. Pakaseknantayo unay daytoy a topiko gapu ta dagiti gimongtayo ket sagrado a panagtataripnong. Kinapudnona, ti itatabuno ken pannakipaset kadagiti gimong ket napateg nga aspeto ti panagdayawtayo ken Jehova.—Sal. 26:12; 111:1; Isa. 66:22, 23.
Gimong a Nairanta a Mangusig iti Biblia
4, 5. Ania ti panggep ti Panagadal iti Pagwanawanan?
4 Kayattayo amin ti naan-anay a magunggonaan iti linawas a Panagadal iti Pagwanawanan. Gapuna, tapno maawatantayo a naimbag ti kangrunaan a nakairantaan dayta a gimong, repasuentayo ti sumagmamano a panagbalbaliw iti magasin a Pagwanawanan ken kadagiti mapagadalan nga artikulo.
5 Nangrugi iti umuna a ruar ti pagadalan nga edision Ti Pagwanawanan nga Enero 15, 2008, adda napateg a detalye a nairaman iti makinsango nga akkubna. Nadlawyo kadi dayta? Kitaenyo ti akkub ti magasinyo. Iti baba ti torre, adda nakalukat a Biblia. Dayta ti mangitampok iti panggep ti Panagadal iti Pagwanawanan—ti panangusig iti Biblia babaen ti tulong daytoy a magasin. Wen, bayat ti linawas a Panagadal iti Pagwanawanan, ‘maibinsabinsa’ ti Sao ti Dios, ken kas idi panawen ni Nehemias, ‘maipaayan dayta iti kaipapanan.’—Neh. 8:8; Isa. 54:13.
6. (a) Ania a panagbalbaliw ti naaramid iti Panagadal iti Pagwanawanan? (b) Ania ti rumbeng a laglagipen mainaig kadagiti “basaen” a teksto?
6 Yantangay ti Biblia ti kangrunaan a librotayo, adda panagbalbaliw iti Panagadal iti Pagwanawanan. Naglaon dagiti mapagadalan nga artikulo kadagiti teksto a napakuyogan iti sao a “basaen.” Bayat ti gimong, maparegtatayo amin a mangsurot iti pannakaibasa dagita a teksto iti bukodtayo a Biblia. (Ara. 17:11) Apay? Dakdakkel ti epektona kadatayo no mabasatayo ti balakad ti Dios iti mismo a Bibliatayo. (Heb. 4:12) Gapuna, sakbay a maibasa ti teksto, ti mangikonkondukta iti panagadal ikkanna koma ti amin a timmabuno iti umdas a tiempo a mangbirok kadagiti teksto tapno masurotanda dagita bayat ti pannakaibasada.
Ad-adu a Tiempo a Mangyebkas iti Pammatitayo
7. Ania a gundaway ti silulukat bayat ti Panagadal iti Pagwanawanan?
7 Ti maysa pay a panagbalbaliw kadagiti maadal nga artikulo iti Pagwanawanan ket mainaig iti kaatiddogda. Kadagiti nabiit pay a tawen, ab-ababa dagiti artikulo. Gapuna, bayat ti Panagadal iti Pagwanawanan, basbassit a tiempo ti mausar a mangbasa kadagiti parapo isu nga ad-adu ti tiempo para kadagiti agkomento. Ad-adu itan ti addaan iti gundaway a mangyebkas iti pammatida babaen ti panangsungbat iti nayimprenta a saludsod, panangkomento iti maysa a teksto, panangisalaysay iti ababa a kapadasan a mangipakita iti kinasirib ti panangsurot kadagiti prinsipio ti Biblia, wenno dadduma pay a pamay-an. Masapul a makomentuan met uray dagiti retrato.—Basaen ti Salmo 22:22; 35:18; 40:9.
8, 9. Ania ti akem ti konduktor iti Panagadal iti Pagwanawanan?
8 Ngem posible laeng nga ad-adu ti makapagkomento no ababa ti komento ti tunggal maysa ken saan koma a kanayon nga agkomento ti konduktor iti Panagadal iti Pagwanawanan. Ania ngarud ti makatulong iti konduktor tapno mataginayonna a balanse ti kaadu ti komentona ken ti komento dagiti kakabsat, ket iti kasta, agbalin a makapabileg ti gimong kadagiti amin a timmabuno?
9 Tapno masungbatan dayta, usigentayo ti maysa nga ilustrasion. Ti nasayaat ti pannakaikonduktana a Panagadal iti Pagwanawanan ket mayarig iti sangabugkong a sabong (bouquet) a makaay-ayo iti mata. No kasano a ti sangabugkong a sabong ket buklen ti nagduduma a sabong, ti Panagadal iti Pagwanawanan ket buklen met ti nagduduma a komento. Malaksid iti dayta, no kasano a nagduduma ti kadakkel ken kolor dagiti sabong, nagduduma met ti kaatiddog ken pamay-an ti pannakaidatag dagiti komento. Ania ngarud ti akem ti konduktor? Ti sagpaminsan a komentona ket mayarig iti sumagmamano a bulong a nasayaat ti pannakaiballaballaetna iti sangabugkong a sabong. Saan a dagita ti ad-adda nga agminar; imbes ketdi, mangipaay dagita iti porma ken mangparayray iti pintasna. Umasping iti dayta, masapul a laglagipen ti konduktor a saan koma nga isu ti makaadu iti komento no di ket mangted laeng kadagiti napateg a punto nga ad-adda a mangparayray kadagiti ebkas ti panagdayaw dagiti timmabuno. Wen, no sititimbeng a mapagtitipon ti nagduduma a komento dagiti kakabsat ken ti sumagmamano a maitutop a komento ti konduktor, makapataudda iti nagpintas a sangabugkong a sasao a makaay-ayo iti amin a timmabuno.
“Kankanayon Koma nga Idatontayo iti Dios ti Sakripisio ti Panagdaydayaw”
10. Kasano ti panangmatmat dagiti nagkauna a Kristiano kadagiti gimong?
10 Ti panangiladawan ni Pablo kadagiti Nakristianuan a gimong a nadakamat iti 1 Corinto 14:26-33 ipaayannatayo iti naun-uneg a pannakatarus no kasano ti pannakaangay dagita a taripnong idi umuna a siglo. Kinuna ti maysa nga eskolar ti Biblia maipapan iti dayta a teksto: “Ti nakakadkadlaw maipapan iti panaggigimong dagiti nagkauna a Kristiano ket ti pannakarikna ti dandani amin a timmabuno nga addaanda iti pribilehio ken obligasion nga agpipinnabileg. Saan laeng a tumabuno ti maysa tapno agdengngeg; saan laeng a tumabuno tapno umawat no di ket mangted.” Wen, dagiti nagkauna a Kristiano matmatanda dagiti gimong kas gundaway tapno mayebkasda ti pammatida.—Roma 10:10.
11. (a) Ania ti dakkel a makatulong tapno makapabileg dagiti gimong, ken apay? (b) Mapasayaattayo dagiti komentotayo no iyaplikartayo dagiti ania a singasing? (Kitaenyo ti footnote.)
11 Ti panangyebkas iti pammatitayo bayat dagiti gimong ket dakkel ti maitulongna iti “pannakapabileg ti kongregasion.” Sigurado nga umanamongkayo nga uray mano a tawenen a makigimgimongkayo, makaay-ayo latta ti umimdeng kadagiti komento dagiti kakabsattayo. Matukay ti riknatayo kadagiti naimpusuan a komento dagiti natataengan ken matalek a kapammatiantayo; mapabilegtayo kadagiti nabagas a komento dagiti naayat a panglakayen; ken ditay magawidan ti umisem no iyebkas ti ubing ti bukodna a komento a mangipakita iti pudno a panagayatna ken Jehova. Nalawag a babaen ti panagkomentotayo, adda amin maitulongtayo tapno agbalin a makapabileg dagiti Nakristianuan a gimong.b
12. (a) Ania ti maadaltayo iti kapadasan da Moises ken Jeremias? (b) Ania ti maitulong ti kararag no maipapan iti panagkomento?
12 Ngem kadagiti managbabain, talaga a maysa a karit ti panagkomento. No kasta ti kasasaadmo, makatulong no laglagipem a saanka nga agmaymaysa. Kinapudnona, uray dagiti matalek nga adipen ti Dios a kas kada Moises ken Jeremias kinunada a saanda a kabaelan ti agsao iti publiko. (Ex. 4:10; Jer. 1:6) Kaskasdi, no kasano a tinulongan idi ni Jehova dagiti adipenna tapno maidaydayawda ti Dios iti publiko, tulongannaka met a mangipaay kadagiti ebkas ti panagdayaw. (Basaen ti Hebreo 13:15.) Kasano a magun-odam ti tulong ni Jehova tapno maparmekmo ti panagamak nga agkomento? Umuna, agsaganaka a naimbag para kadagiti gimong. Kalpasanna, sakbay a mapanka iti Kingdom Hall, agkararagka ken ni Jehova ken espesipiko a kiddawem nga ikkannaka iti tured nga agkomento. (Fil. 4:6) Kidkiddawem ti maysa a banag a “maitunos iti pagayatanna,” isu a makapagtalekka a sungbatan ni Jehova ti kararagmo.—1 Juan 5:14; Prov. 15:29.
Dagiti Gimong a Nairanta a ‘Mangpabileg, Mangparegta, ken Mangliwliwa’
13. (a) Ania koma ti epekto dagiti gimongtayo kadagiti timmabuno? (b) Ania a saludsod ti nangruna nga ikabilangan dagiti panglakayen?
13 Kinuna ni Pablo a ti napateg a panggep dagiti gimong iti kongregasion ket ti ‘panangpabileg, panangparegta, ken panangliwliwa’ kadagiti amin a timmabuno.c (1 Cor. 14:3) Kasano a masigurado dagiti Kristiano a panglakayen ita a dagiti pasetda iti gimong ket pudno a makapabileg ken makaliwliwa kadagiti kakabsat? Tapno maammuantayo ti sungbat, usigentayo ti maysa a taripnong nga inangay ni Jesus kalpasan unay ti panagungarna.
14. (a) Ania dagiti pasamak sakbay ti taripnong nga inyurnos ni Jesus? (b) Apay a nabang-aran la ketdi dagiti apostol idi “immasideg ni Jesus ket nagsao kadakuada”?
14 Umuna, imutektekanyo dagiti pasamak sakbay dayta a taripnong. Sakbay unay a napapatay ni Jesus, dagiti apostolna ‘binaybay-anda ket nagtalawda,’ ken kas naipadto, ‘naiwarawarada tunggal maysa iti bukodna a balay.’ (Mar. 14:50; Juan 16:32) Kalpasan ti panagungar ni Jesus, inawisna dagiti malmaldaangan nga apostolna a tumabuno iti naisangsangayan a taripnong.d Gapuna, “dagiti sangapulo ket maysa nga adalan napanda idiay Galilea iti bantay a sadiay ti inyurnos kadakuada ni Jesus.” Idi nakasangpetda, “immasideg ni Jesus ket nagsao kadakuada.” (Mat. 28:10, 16, 18) Panunotenyo ti pannakabang-ar dagiti apostol iti dayta nga inaramid ni Jesus! Ania ti insarita kadakuada ni Jesus?
15. (a) Ania ti insarita ni Jesus kadagiti apostol, ngem ania ti saanna nga inaramid? (b) Ania ti epektona kadagiti apostol dayta a taripnong?
15 Rinugian ni Jesus dayta a taripnong babaen ti panangikunana: “Isuamin nga autoridad naiteden kaniak.” Kalpasanna, inikkanna ida iti annongen: “Inkayo ngarud ket mangaramidkayo iti ad-adalan.” Kamaudiananna, siaayat nga impanamnamana: “Addaak kadakayo iti amin nga al-aldaw.” (Mat. 28:18-20) Ngem nadlawyo kadi no ania ti saan nga inaramid ni Jesus? Dina inungtan dagiti apostolna; dina met inusar dayta a taripnong a mangkuestionar kadagiti motiboda wenno ad-adda a mangkonsiensia kadakuada babaen ti panangdakamatna iti temporario a panagkapuy ti pammatida. Imbes ketdi, impanamnama kadakuada ni Jesus ti panagayatna ken ti panagayat ti Amana babaen ti panangitalekna kadakuada iti nadagsen nga annongen. Ania ti epektona kadagiti apostol dayta a pannakilangen ni Jesus? Napabileg, naparegta, ken naliwliwada unay yantangay sumagmamano a tiempo kalpasan dayta a taripnong, intuloyda ti “mangisuro ken mangideklara iti naimbag a damag.”—Ara. 5:42.
16. Kasano a matulad ita dagiti Kristiano a panglakayen ti ulidan ni Jesus no iti panangikondukta kadagiti makapabang-ar a taripnong?
16 Kas panangtulad ken Jesus, dagiti panglakayen ita matmatanda dagiti gimong kas gundaway a mangipanamnama kadagiti kapammatianda a di agbalbaliw ti panagayat ni Jehova kadagiti adipenna. (Roma 8:38, 39) Gapuna, kadagiti paset dagiti panglakayen iti gimong, itampokda koma dagiti nasayaat a maar-aramidan dagiti kakabsat imbes a dagiti pagkapuyanda. Saanda koma a kuestionaran ti motibo dagiti kakabsatda. Imbes ketdi, makita koma kadagiti ibagbagada a matmatanda dagiti kapammatianda kas indibidual a mangipatpateg ken ni Jehova ken addaan iti tarigagay a mangaramid iti umiso. (1 Tes. 4:1, 9-12) Siempre, adda dagiti gundaway a masapul a balakadan dagiti panglakayen ti intero a kongregasion. Ngem no sumagmamano laeng a kakabsat ti agkasapulan iti panangatur, nasaysayaat no pribado lattan a mabalakadan dagiti maseknan. (Gal. 6:1; 2 Tim. 2:24-26) No kasarsarita dagiti panglakayen ti intero a kongregasion, ikagumaanda ti mangipaay iti komendasion agingga a maitutop. (Isa. 32:2) Ikagumaanda nga iparang ti pasetda iti pamay-an a no malpas ti gimong, marikna ti amin a timmabuno a nabang-aran ken napabilegda.—Mat. 11:28; Ara. 15:32.
Makaliwliwa a Taripnong
17. (a) Apay a napatpateg ita a taginayonentayo a makaliwliwa dagiti gimongtayo? (b) Ania ti personal a maaramidanyo tapno agbalin a makapabileg dagiti gimong? (Kitaenyo ti kahon a “Sangapulo a Pamay-an Tapno Agbalin Dagiti Gimong a Makapabileg Kenka ken iti Sabsabali.”)
17 Bayat a kumarkaro ti panangirurumen ti lubong ni Satanas, masapul a siguraduentayo nga agbalin a makaliwliwa dagiti Nakristianuan a taripnongtayo iti amin a tumabuno. (1 Tes. 5:11) Maysa a Kristiano a pagassawaan ti nangdaer iti nakaro a pakasuotan sumagmamano a tawen ti napalabasen. Kinuna ti asawa a babai: “No addakami iti Kingdom Hall, mariknami ti naayat a panangaywan ni Jehova. Bayat dagiti oras a kaaddami sadiay a kadua dagiti Kristiano a kakabsat, mariknami a nayallatiwmi ken Jehova ti dadagsenmi, a nangted kadakami iti talna ti panunot.” (Sal. 55:22) Marikna koma ti amin a timmabuno kadagiti gimongtayo ti kasta a pannakapabileg ken pannakaliwliwa. Tapno masigurado a kasta, itultuloytayo nga aramiden ti pasettayo a mamagbalin a makapabileg kadagiti Nakristianuan a gimong.
[Footnotes]
a Ti dadduma nga aspeto dagiti Nakristianuan a gimong idi umuna a siglo ket naipadto nga agsardeng. Kas pagarigan, awanen ita ti ‘agsao kadagiti pagsasao’ wenno ‘agipadto.’ (1 Cor. 13:8; 14:5) Nupay kasta, dagiti bilin ni Pablo ket mangted kadatayo iti naun-uneg a pannakaawat no kasano ti rumbeng a pannakaikondukta dagiti gimong ita.
b Dagiti singasing no kasano a mapasayaattayo dagiti komentotayo kadagiti gimong ket masarakan iti Ti Pagwanawanan a Setiembre 1, 2003, panid 19-22.
c No maipapan iti nagdumaan ti “mangparegta” ken “mangliwliwa,” ilawlawag ti Vine’s Expository Dictionary of Old and New Testament Words a ti Griego a sao a naipatarus a “mangliwliwa” ket mangipasimudaag iti “naun-uneg a kinadungngo ngem iti [pammaregta].”—Idilig ti Juan 11:19.
d Nalabit a dayta ti pasamak a tinukoy ni Pablo idi kinunana a ni Jesus ket “nagparang iti nasurok a lima gasut.”—1 Cor. 15:6.
Ania ti Sungbatyo?
• Kasano kapateg dagiti Nakristianuan a gimong?
• Apay a makatulong dagiti komento kadagiti gimong iti “pannakapabileg ti kongregasion”?
• Ania ti maadaltayo iti taripnong nga inangay ni Jesus a kadua dagiti pasurotna?
[Kahon/Dagiti Ladawan iti panid 22, 23]
SANGAPULO A PAMAY-AN TAPNO AGBALIN DAGITI GIMONG A MAKAPABILEG KENKA KEN ITI SABSABALI
Agsagana a nasaksakbay. No adalenyo a nasaksakbay ti material a mapagsasaritaan iti Kingdom Hall, ad-adda nga agintereskayo kadagiti paset ti gimong ken dakdakkel ti magunggonayo kadagita.
Regular a tumabuno. Gapu ta ad-adda a makapabileg kadagiti timmabuno no ad-adu ti makigimong, makapabileg ti kaaddayo.
Nasapa a sumangpet. No nakatugawkayon sakbay a mangrugi ti gimong, adda gundawayyo a makipaset iti panglukat a kanta ken kararag, a paset ti panagdayawtayo ken Jehova.
Kompleto nga alikamen. Itugotyo ti Biblia ken dagiti publikasion a mausar iti gimong tapno masurotanyo ken ad-adda a maawatanyo dagiti mapagsasaritaan.
Liklikan dagiti pakasingaan. Kas pagarigan, basaenyo dagiti teks iti selponyo kalpasan ti gimong, saan ket a kabayatan ti gimong. Iti kasta, mataginayonyo dagiti personal a pakaseknanyo iti umiso a lugarda.
Makipaset. No ad-adu ti agkomento, ad-adu ti maparegta ken mapabileg iti nagduduma nga ebkas ti pammati.
Ababa koma dagiti komento. Dayta ti mangted iti gundaway tapno ad-adu ti makapagkomento.
Iparang dagiti paset. No adda pasetyo iti Teokratiko nga Eskuelaan ti Panagministro wenno iti Gimong ti Serbisio, isaganayo a naimbag, agensayokayo a nasaksakbay, ken ikagumaanyo nga iparang dayta.
Komendaranyo dagiti nagpaset. Iyebkasyo ti dakkel a panagyaman kadagiti nagpaset wenno nagkomento kadagiti gimong.
Makilangen. Dagiti nabara a kablaaw ken makapabileg a panagsasarita sakbay ken kalpasan dagiti gimong ket mangnayon iti ragsak ken gunggona nga itden ti pannakigimong.