Sekreto 4

Piliem a Naimbag Dagiti Gagayyemmo

ANIA TI ISURSURO TI BIBLIA? “Daydiay makipagna kadagiti masirib a tattao agbalinto a masirib.”​—Proverbio 13:20.

ANIA TI KARIT? Dakkel ti impluensia dagiti gagayyemmo iti panagbalinmo a kontento wenno saan a kontento. Sigurado nga adda epekto ti kababalin ken panagsasaoda iti panangmatmatmo iti biag.​—1 Corinto 15:33.

Usigem kas pagarigan ti salaysay ti Biblia maipapan kadagiti 12 a lallaki a simmangpet manipud panagespiada idiay Canaan. Kaaduan kadakuada “intultuloyda ti nangyeg iti annak ti Israel iti dakes a damag maipapan ti daga a sinimisimda.” Ngem nasayaat ti impadamag ti dua kadakuada maipapan iti Canaan, nga inawaganda dayta iti “nakasaysayaat unay a daga.” Nupay kasta, nagwarasen iti intero nga ili ti negatibo a panangmatmat ti 10 nga espia. Kuna ti salaysay: “Idin impigsa ti intero a gimong ti timekda, . . . ket nangrugi nga agtanabutob dagiti amin nga annak ti Israel.”​—Numeros 13:30–14:9.

Adu met ti tattao ita a ‘managtanabutob ken managreklamo maipapan iti kasasaadda iti biag.’ (Judas 16) Narigat ti agbalin a kontento no ti kakaduam ket dagiti gagayyem a saan a pulos mapmapnek.

ANIA TI MABALINMO NGA ARAMIDEN? Usigem ti saritaanyo nga aggagayyem. Masansan kadi nga ipasindayagda dagiti sanikuada, wenno kanayon nga agreklamoda kadagiti awan kadakuada? Ania met ti kababalin nga ipakpakitam kadagiti gagayyemmo? Papaapalam kadi ida, wenno parparegtaem ida nga agbalin a kontento iti adda kadakuada?

Usigem ti ulidan ni David a nadutokan idi nga agbalin nga ari, ken ni Jonatan nga anak ni Ari Saul. Agbibiag idi ni David iti let-ang kas maysa a pugante. Imbilang ni Saul a ni David ket pangta iti kinaarina isu a kayatna a papatayen. Nupay ni Jonatan koma ti sumukat iti trono, isu ket nagbalin a maysa kadagiti nasinged a gagayyem ni David. Nabigbig ni Jonatan a ni David ti dinutokan ti Dios a sumukat nga ari ket kontenton iti panangsuportana iti gayyemna.​—1 Samuel 19:1, 2; 20:30-33; 23:14-18.

Kasapulam ti kasta a gagayyem, dagidiay mangikagkagumaan nga agbalin a kontento ken sipapanunot iti pagimbagam. (Proverbio 17:17) Siempre, tapno maaddaanka kadagiti kasta a gagayyem, nasken nga iparangarangmo met dagita a galad.​—Filipos 2:3, 4.

[Ladawan iti panid 7]

Im-impluensiaandaka kadi dagiti gagayyemmo nga agbalin a kontento wenno saan a kontento?