Ti Masursurotayo ken Jesus
No Kasano nga Apektarandatayo Dagiti Anghel
Agnanaed ni Jesus a kadua ni Amana idiay langit “sakbay a naadda ti lubong.” (Juan 17:5) No kasta, isu ti kangrunaan a makasungbat kadagiti sumaganad a saludsod.
Interesado kadi dagiti anghel kadatayo?
▪ Naammuantayo ken Jesus nga interesado unay dagiti anghel kadagiti tattao. Kinunana: “Adda panagrag-o kadagiti anghel ti Dios gapu iti maysa a managbasol nga agbabawi.”—Lucas 15:10.
Impalgak ni Jesus a rebbengen dagiti anghel a tulongan dagiti adipen ti Dios tapno agtalinaed a nabileg ti relasionda Kenkuana. Gapuna, idi pinakdaaran ni Jesus dagiti adalanna a saanda nga itibkol ti sabsabali, kinunana: “Siguraduenyo a dikay umsien ti maysa kadagitoy a babassit; ta ibagak kadakayo a dagiti anghelda sadi langit kanayon a makitada ti rupa ni Amak nga adda sadi langit.” (Mateo 18:10) Saan a kayat a sawen ni Jesus a tunggal maysa kadagiti pasurotna addaanda iti anghel de la guardia. Ngem impakita ni Jesus a dagiti anghel a makipagtrabaho a kanayon iti Dios ket talaga nga interesadoda kadagiti kameng ti kongregasion Kristiano.
Kasano a madangrannatayo ti Diablo?
▪ Pinakdaaran ni Jesus dagiti pasurotna a kayat ni Satanas a saan a maammuan dagiti tattao ti kinapudno maipapan iti Dios. “Sadinoman a mangngeg ti asinoman ti sao ti pagarian ngem saanna a maala ti kababagas dayta,” kuna ni Jesus, “umay daydiay nadangkes ket rabsutenna ti naimula iti pusona.”—Mateo 13:19.
Imbutaktak ni Jesus ti maysa a pamay-an ni Satanas a mangallilaw kadagiti tattao idi nangted iti ilustrasion maipapan iti lalaki a nagmula iti trigo iti talonna. Ti lalaki iladawanna ni Jesus, ket ti trigo iladawanna dagiti pudno a Kristiano nga agturayto a kadua ni Jesus idiay langit. Nupay kasta, kinuna ni Jesus nga immay ti kabusor sa “nagimula kadagiti dakes a ruot iti nagbabaetan dagiti trigo.” Dagiti ruot iladawanda dagiti palso a Kristiano. “Ti kabusor a nangimula kadakuada isu ti Diablo.” (Mateo 13:25, 39) No kasano a dagiti ruot ket umarngi kadagiti nagtubo a trigo, dagiti agkunkuna a Kristiano mabalin nga agpammarangda a pudno nga agdaydayaw. Dagiti relihion a mangisursuro kadagiti palso a doktrina allilawenda dagiti tattao tapno saanda nga agtulnog iti Dios. Us-usaren ni Satanas ti palso a relihion tapno madadael ti relasion dagiti tattao ken Jehova.
Ania ti aramidentayo tapno saannatayo a madangran ni Satanas?
▪ Ni Jesus inawaganna ni Satanas a “ti agturay iti lubong.” (Juan 14:30) Babaen iti kararag, impalgak ni Jesus no kasano a magun-odantayo ti pannalaknib ti Dios tapno dinatay dangran ni Satanas. Nagkararag ni Jesus iti nailangitan nga Amana maipaay kadagiti adalanna: “Aywanam ida gapu iti daydiay nadangkes. Saanda a paset ti lubong, a kas kaniak a saan a paset ti lubong. Santipikarem ida babaen iti kinapudno; ti saom ket kinapudno.” (Juan 17:15-17) Ti pannakaammo iti Sao ti Dios salaknibannatayo tapno saannatay nga impluensiaan daytoy lubong nga iturturayan ni Satanas.
Kasano nga apektarandatayo ita dagiti anghel?
▪ “Inton panungpalan ti sistema ti bambanag,” kuna ni Jesus, “rummuarto dagiti anghel ket ilasinda dagiti nadangkes manipud kadagiti nalinteg.” (Mateo 13:49) Agbibiagtayo itan iti “panungpalan ti sistema ti bambanag,” ket minilion itan ti mangipangpangag iti naimbag a damag ti Pagarian ti Dios.—Mateo 24:3, 14.
Ngem saan nga amin nga agpayadal iti Biblia ket makagun-od iti anamong ti Dios. Iwanwanwan dagiti anghel ti trabaho dagiti adipen ni Jehova, ket dagiti tattao a naimpusuan a mangay-ayat iti Dios mailasinda manipud kadagidiay madi a mangyaplikar iti ad-adalenda. Kastoy ti panangdeskribir ni Jesus kadagidiay anamongan ti Dios: “Dagitoy isuda dagidiay a, kalpasan a nangngegda ti sao buyogen ti nasayaat ken naimbag a puso, pagtalinaedenda dayta ket agbungada buyogen ti panagibtur.”—Lucas 8:15.
Para iti kanayonan nga impormasion, kitaem ti kapitulo 10 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.
[Ladawan iti panid 16]
Tumultulong dagiti anghel tapno maurnong dagiti napasnek a tattao iti kongregasion Kristiano