Ti Biblia Balbaliwanna ti Biag

ANIA ti nangtignay iti maysa a punk rocker tapno sursuruenna nga ayaten ken tulongan dagiti padana a tao? Ania ti nakatignayan ti maysa a taga-Mexico a mangtallikud iti imoral a panagbiagna? Apay a ti maysa a nalatak a siklista iti Japan pinanawanna ti karerana tapno makapagserbi iti Dios? Usigem ti salaysay dagitoy nga indibidual.

“Agresibo, Nalastog, ken Nauyongak Idi.”​—DENNIS O’BEIRNE

NAYANAK: 1958

NAKAYANAKANNA: ENGLAND

PAKASARITAANNA: PUNK ROCKER

TI NAPALABASKO: Maysa nga Irish ni Tatang ket dimmakkelak a Katoliko. Ngem masansan nga agmaymaysaak a mapan makimisa, nupay saanko koma a kayat dayta. Kaskasdi, mawawak iti naespirituan a bambanag. Kanayon nga ilualok ti “Amami,” ket pampanunotek no ania ti kaipapanan dayta bayat nga agid-iddaak iti rabii. Saggaysaek a tarusan ti kaipapanan ti tunggal sao dayta a kararag.

Idi tin-edyerak pay, intandudok ti Rastafarianismo. Naginteresak met kadagiti napolitikaan a grupo a kas iti Anti-Nazi League. Ngem nangnangruna nga intandudok ti rebelioso a kababalin dagiti punk rocker. Gistay inaldaw nga agusarak iti droga, nangnangruna ti marihuana. Gapu ta awan bibiangko iti sabsabali, nagbalin a nalabes ti panagin-inumko, isagsagmakko ti biagko, ken diak unay maseknan iti padak a tao. Manmano a makisaritaak iti asinoman malaksid no ibilangko a napateg ti pagsaritaanmi. Diak pay kayat ti agparetrato. Bigbigek ita nga agresibo, nalastog, ken nauyongak idi. Nasayaat ken naparaburak laeng kadagiti nasinged kaniak.

Naginteresak iti Biblia idi agarup 20 ti tawenko. Nangrugi nga agbasa iti Biblia ti gayyemko a naibalud gapu iti panaglakona iti droga, ket napaut ti panagsaritami maipapan iti relihion, Simbaan, ken ti impluensia ni Satanas iti lubong. Gimmatangak iti Biblia ket rinugiak nga adalen dayta. Personal a basaenmi ti sumagmamano a paset ti Biblia. Kalpasanna, pagsaritaanmi ti nasursuromi, sa ikeddengmi no ania ti patienmi. Adu a bulan a kasta ti inaramidmi.

Adtoy ti sumagmamano a konklusionmi manipud kadagiti nabasami: agbibiagtayon iti maudi nga al-aldaw daytoy a lubong; masapul nga ikasaba dagiti Kristiano ti naimbag a damag ti Pagarian ti Dios; masapul a saanda a paset ti lubong, a pakairamanan ti politika; ken naglaon ti Biblia iti umiso a giya iti moral. Nalawag kadakami nga agpayso ti Biblia ken adda pudno a relihion. Ngem saanmi nga ammo no ania dayta. Gapuna, inusigmi dagiti dadakkel a relihion agraman ti kinagarbo ken seremoniada kasta met ti pannakinaminda iti politika, ngem nakitami a naidumada ken Jesus. Nabigbigmi a saan ida nga ar-aramaten ti Dios, isu nga inkeddengmi met nga usigen ti sumagmamano a saan unay a nalatak a relihion.

Nakisaritakami iti sumagmamano a miembro dagita a relihion ken inyimtuodmi kadakuada ti sumagmamano a saludsod. Ammomi ti kunaen ti Biblia iti tunggal saludsodmi, isu a nalakami laeng a matingiting no maitunos iti Sao ti Dios ti sungbatda. Kalpasanna, kanayon nga ikararagko iti Dios, ‘No ik-ikutan dagita a tattao ti pudno a relihion, pangngaasim ta tignayennak a makisarita manen kadakuada.’ Ngem kalpasan ti sumagmamano a bulan, awan latta ti nasarakak a grupo a nagusar iti Biblia iti panangsungbatda kadagiti saludsodmi; ket diak met tinarigagayan ti makisarita manen kadakuada.

Idi agangay, agpada a naam-ammomi dagiti Saksi ni Jehova. Inyimtuodmi dagiti isu met laeng a saludsod​—ket simmungbatda sigun iti kunaen ti Biblia. Maitunos amin a kinunada kadagiti nasursuromin. Gapuna, inyimtuodmi payen ti dadduma a saludsod a saanmi pay a nasarakan ti sungbatna iti Biblia​—kas pagarigan, no ania ti panangmatmat ti Dios iti panagsigarilio ken panagdroga. Nasungbatanda manen dagita babaen iti Sao ti Dios. Iti kasta, immanamongkami a makigimong iti Kingdom Hall.

Saan a kaskarina ti itatabunok iti gimong yantangay diak unay makilanglangen kadagiti tattao, ket saanak met a komportable no asitgandak dagidiay nakais-isem ken disente a tattao. Impapanko nga adda dakes a motiboda isu nga inkeddengko a saanakton a makigimong. Ngem kas iti dati, inkarkararagko iti Dios a no talaga met laeng a dagiti Saksi ni Jehova ti mangik-ikut iti pudno a relihion, tignayennak koma ngarud a makisarita manen kadakuada. Pudno a diak mapengdan ti tarigagayko a makipagadal iti Biblia kadagiti Saksi.

NO KASANO A BINALBALIWAN TI BIBLIA TI BIAGKO: Ammok a masapul nga isardengko ti agdroga, ket saanak a narigatan a mangisardeng iti dayta. Nupay kasta, narigatanak a mangikkat iti panagsigariliok. Namin-ano a pinadasko nga isardeng dayta ngem napaayak. No adda madamagko a nalaka a nakaisardeng iti dayta, agkararagak ken Jehova. Iti tulong ni Jehova, naisardengko met laeng ti agsigarilio idi agangay. Nasursurok a nagpateg ti sipaprangka a panangikararag ken Jehova iti aniaman a marikriknak.

Adu met ti kasapulan a balbaliwak maipapan iti panagkawkawes ken panaglanglangak. Idi damok ti makigimong idiay Kingdom Hall, nakasugargar dagiti buokko ken natinaan iti berde ken asul. Insublatko met a tininaan iti narangrang nga orange. Nakapantalonak iti maong ken naka-jacket iti lalat nga addaan kadagiti islogan. Awan ti makitak a nasken a balbaliwak, uray siaanus a binalakadandak dagiti Saksi. Ngem idi agangay, pinampanunotko ti kunaen ti 1 Juan 2:15-17: “Dikay ayaten ti lubong wenno uray ti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana.” Nabigbigko a ti panaglanglangak iyan-anninawna ti panagayatko iti lubong ket masapul nga agbalbaliwak tapno maipakitak nga ay-ayatek ti Dios. Kasta ti inaramidko.

Nabigbigko idi agangay a saan laeng a dagiti Saksi ti mangayat a makigimongak. Impaawat kaniak ti Hebreo 10:24, 25 a dayta ket bilin ti Dios. Idi tumabtabunoakon iti amin a gimong ken naam-ammokon dagiti Saksi, inkeddengkon ti agpabautisar kas simbolo ti dedikasionko ken Jehova.

NO KASANO A NAGUNGGONAANAK: Agyamyamanak ta ipalpalubos ni Jehova a maaddaantayo iti nasinged a relasion kenkuana. Ti kinadungngo ken pannakaseknan ti Dios ti nangtignay kaniak a mangtulad kenkuana ken sumurot iti ulidan ti Anakna a ni Jesu-Kristo. (1 Pedro 2:21) Naadalko nga uray ikagkagumaak a patanoren ti Nakristianuan a personalidad, dina kaipapanan nga awanen ti pakaidumaak iti sabsabali. Pinagreggetak ti agbalin a nadungngo ken maseknan iti sabsabali. Inkagumaak a tuladen ni Kristo iti pannakilangenko iti asawak ken iti anakko, ket maseknanak metten kadagiti kapammatiak. Gapu iti panangsurotko iti ulidan ni Kristo, nasursurok a raemen ti bagik ken ayaten ti sabsabali.

“Nadayaw ti Panangtratoda Kaniak.”​—GUADALUPE VILLARREAL

PANNAKAYANAKNA: 1964

NAKAYANAKANNA: MEXICO

PAKASARITAANNA: IMORAL TI PANAGBIAGNA

TI NAPALABASKO: Pitokami nga agkakabsat ket nakapangpanglaw ti lugar a dimmakkelanmi​—idiay Hermosillo, Sonora, Mexico. Ubingak pay idi natay ni Tatang, isu a ni Nanang ti nangisakad iti panagbiagmi. Kaaduanna a magmagnaak a sakasaka gapu ta awan ti igatangmi iti sapatos. Uray ubingak pay, nagtrabahoakon tapno makatulongak iti pamiliak. Kas iti adu a pamilia, inan-anusanmi ti nagnaed iti bassit a balaymi.

Kaaduanna nga agmalmalem nga awan ni Nanang a mangaywan kadakami. Idi agtawenak iti innem, namin-adu a minolestianak ti 15 ti tawenna a lalaki. Gapu iti dayta, kamali ti panangmatmatko iti sekso. Impagarupko a gagangay laeng nga agkursonadaak iti padak a lalaki. Nagpatulongak kadagiti doktor ken uray kadagiti papadi, ngem imbagada a normal laeng kano ti marikriknak.

Idi agtawenak iti 14, inkeddengko nga agbiagak kas bakla. Kasta ti panagbiagko bayat ti simmaganad a 11 a tawen, ket nakikabbalayak pay ketdi iti nagduduma a lallaki. Idi agangay, nagadalak kas hair stylist ket nangibangonak iti beauty shop. Ngem saanak a naragsak ta masansan a mariknak a magunggundawayanak. Ammok a di umiso ti ar-aramidek, ket isalsaludsodko iti bagik, ‘Adda ngata siasinoman a naimbag ken nasingpet a tattao?’

Nalagipko ni manangko, a nakipagadal iti Biblia kadagiti Saksi ni Jehova ken nagbautisar idi agangay. Es-estoriaenna kaniak dagiti maad-adalna, ngem diak ikankano dagita. Kaskasdi a dayawek ti wagas ti panagbiagna ken ti panagasawana. Makitak a talaga a patpatgen ken raraemenda ti maysa ken maysa. Idi agangay, adda Saksi ni Jehova a nangyadal kaniak iti Biblia. Idi damo, pinagustuak laeng ida ta saanak nga interesado. Ngem nagbalbaliw ti kasasaad idi agangay.

NO KASANO A BINALBALIWAN TI BIBLIA TI BIAGKO: Inawisdak dagiti Saksi a makigimong, ket napanak met. Nagpaiduma daydi a kapadasak. Gagangay a pagkakatawaandak dagiti tattao ngem saan a kasta dagiti Saksi. Sidadayaw a kinablaawandak, ket rinaemda ti kinataok. Naallukoy ti riknak.

Simmayaat pay ti panangmatmatko kadagiti Saksi idi tinabunuak ti maysa nga asamblea. Napaliiwko nga uray aguummongda iti dadakkel a tallaong, kaslada ken manangko a napudno ken napasnek. Inamadko iti bagik no daytoy kadin ti grupo dagiti naimbag ken nasingpet a tattao a nabayagkon a sapsapulen. Nasdaawak iti ayat ken panagkaykaysada, kasta met ti panangaramatda iti Biblia iti panangsungbatda iti tunggal saludsod. Nabigbigko a nasayaat ti kababalinda gapu iti impluensia ti Biblia. Ket nabigbigko met nga adu ti kasapulan a balbaliwak tapno agbalinak a kas kadakuada.

Kinapudnona, masapul a naan-anay nga agbalbaliwak ta agbibiagak a kasla babai. Nasken a baliwak ti panagsasao, tigtignay, panagkawkawes, panagbubuok, ken gagayyemko. Lalaisendak dagiti dati a gagayyemko, a kunkunada: “Apay a kasta metten ti ar-aramidem? Nagmayat la ngaruden ti biagmo. Bay-am ketdi dayta agadal iti Biblia. Adda kenkan ti amin.” Ngem ti imoral a panagbiagko ti karirigatan a binaliwak.

Nupay kasta, ammok a makapagbalbaliwak ta immukuok iti pusok ti kuna ti Biblia iti 1 Corinto 6:9-11: “Ania! Dikay aya ammo a dagiti nakillo a tattao didanto tawiden ti pagarian ti Dios? Dikay payaw-awan. Uray dagiti mannakiabig, wenno dagiti managrukbab iti idolo, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki . . . didanto tawiden ti pagarian ti Dios. Ket kaskasdi a kasta idi ti sumagmamano kadakayo. Ngem naugasankayon.” Tinulongan idi ni Jehova nga agbalbaliw dagiti tattao, ket tinulongannak met. Kalpasan ti sumagmamano a tawen a napalalo a panagreggetko, naparmekko met laeng dayta, ngem ad-adda a nakatulong kaniak ti balakad ken ayat dagiti Saksi.

NO KASANO A NAGUNGGONAANAK: Iti agdama, normalen ti panagbiagko. Addaanakon iti asawa, ket sursuruanmi ti anakmi a mangsurot kadagiti prinsipio ti Biblia. Inidiakon ti dati a kabibiagko, ket tagtagiragsakek itan ti adu a naespirituan a gunggona ken pribilehio. Agserserbiak kas panglakayen iti kongregasion, ket natulongak met ti sumagmamano a mangammo iti kinapudno iti Sao ti Dios. Naragsakan unay ni Nanang kadagiti inaramidko a panagbalbaliw, isu a nagpayadal iti Biblia ket nagbalin met a bautisado a Kristiano. Nagbalin pay a Saksi ni Jehova ti maysa nga adingko a babai a sigud nga imoral ti panagbiagna.

Uray ti dadduma kadagidiay makaammo iti sigud a kabibiagko bigbigenda a talaga a nagbalbaliwakon. Ket ammok no ania ti nakatulong kaniak. No adda idi problemak, agpatulongak kadagiti propesional ngem saan a nasayaat ti intedda a balakad. Nupay kasta, talaga a tinulongannak ni Jehova. Inkabilangan, inayat, ken inan-anusannak ti Dios nupay impapanko a saanak a maikari. Pudno a natignayak gapu ta inkabilangannak ti nakaim-imbag, nasaririt, ken naayat a Dios ken kayatna a sumayaat ti biagko.

“Nalidayak ken Awan Direksion ti Biagko.”​—KAZUHIRO KUNIMOCHI

NAYANAK: 1951

NAKAYANAKANNA: JAPAN

PAKASARITAANNA: NALAING A SIKLISTA

TI NAPALABASKO: Dimmakkelak iti naulimek a sangladan nga ili iti Shizuoka Prefecture, Japan. Nagnaed iti bassit a balay ti pamiliami a buklen ti walo nga indibidual. Adda pagtarimaanan ken paglakuan ni Tatangko iti bisikleta. Idi ubingak pay, itugtugotnak kadagiti lumba ti bisikleta ket nagessemak dayta nga isport. Plano ni Tatangko nga agbalinak a propesional a siklista. Idi addaak pay laeng iti middle school, inrugina ti sipipinget a panangsanay kaniak. Idi addaakon iti high school, agsasaruno a tallo a tawen a nangabakak iti nasional a paay-ayam. Naitukon kaniak ti panagadal iti unibersidad, ngem inkeddengko ti agadal iti eskuelaan dagiti siklista. Iti kasta, nagbalinak a propesional a siklista idi agtawenak iti 19.

Kalatko idi ti agbalin a kalaingan a siklista iti Japan. Planok ti agurnong iti adu a kuarta tapno maipaayak ti pamiliak iti natalged ken nasayaat a biag. Inggaedko ti nagsanay. No marigatanak iti panagsanay wenno iti maysa a paset ti lumba, ibagak iti bagik a nayanakak a makilumba iti bisikleta ket itultuloyko laeng dayta! Talaga a nagballigiak ken nagbunga dagiti bannogko. Iti umuna a tawen a nakisalipak kadagiti padak nga agdadamo, naalak ti umuna a premio. Iti maikadua a tawen, nakualipikarak a makisalip para iti numero uno a siklista iti Japan. Iti innem a nagduduma a lumba, siak ti maikadua.

Bayat a karamanak kadagiti kalaingan a siklista, nabirngasanak iti “nabibileg a saka” ti Tokai, maysa a lugar iti Japan. Mannakikompetensiaak. Idi agangay, nagbalinak a mapagbutbutngan iti lumba. Dimmakkel ti sapulko agingga a mabalinkon a gatangen ti aniaman a kayatko. Gimmatangak iti balay nga adda siledna a pagehersisuan a naglaon iti kasasayaatan nga alikamen. Gimmatangak iti imported a kotse a gistay maysa a balay ti kanginana. Tapno agbalin a natalged ti biagko, innegosiok ti kuartak iti real estate (balay ken lote) ken iti stock market.

Ngem kaskasdi a nalidayak ken awan direksion ti biagko. Iti daydi a gundaway, addan asawa ken tallo nga putotko, ngem masansan a diak makaan-anus iti pamiliak. Makapungtotak ken baketko ken kadagiti annakko gapu laeng iti simple a bambanag. Gapuna, agnernerbiosda ket sipsiputanda ti rupak tapno ammoda no makapungtotak manen.

Ngem idi agangay, nakipagadal ni baketko iti Biblia kadagiti Saksi ni Jehova. Dayta ti nakaigapuan ti adu a panagbalbaliw. Imbagana a kayatna ti tumabuno kadagiti gimong dagiti Saksi, isu nga inkeddengko a mapankami a sangapamiliaan. Malagipko pay nga iti maysa a rabii, simmarungkar iti pagtaenganmi ti maysa a panglakayen ket rinugiannak nga iyadalan iti Biblia. Immukuok iti kaunggak ti nasursurok.

NO KASANO A BINALBALIWAN TI BIBLIA TI BIAGKO: Diakto pulos malipatan ti epekto kaniak ti panangbasak iti Efeso 5:5, nga agkuna: “Awan ti mannakiabig wenno narugit a tao wenno naagum a tao​—a kaipapananna ti panagbalin a managrukbab iti idolo​—nga addaan aniaman a tawid iti pagarian ti Kristo ken ti Dios.” Nakitak a nainaig iti sugal ti lumba ti bisikleta ken kinaagum ti itantandudo dayta nga isport. Nangrugi a makonsiensiaak. Mariknak a masapul nga isardengko ti makilumba tapno maay-ayok ni Jehova a Dios. Ngem narigat a desision dayta para kaniak.

Lepleppas idi ti kasayaatan a tawen ti pannakilumbak, ket kayatko koma ti ad-adu pay. Ngem nadlawko a kalmadoak no agadalak iti Biblia​—a naiduma unay iti tarigagayko a mangabak kadagiti lumba! Manipud nangrugiak nga agadal iti Biblia, namitlo laengen a nakilumbaak, ngem saanak pay a desidido a sumardeng. Awan met ti ammok a sabali a pamay-an a pangbiagko iti pamiliak. Diakon ammo ti aramidek. Um-umsiendak pay dagiti kabagiak gapu iti baro a pammatik. Napalalo ti pannakadismaya ni Tatang. Gapuna, ad-adda a naburiboranak ket nagsakitak iti ulser.

Iti dayta a narigat a tiempo, nakatulong kaniak ti panagtultuloyko nga agadal iti Biblia ken ti itatabunok kadagiti gimong dagiti Saksi ni Jehova. In-inut a bimmileg ti pammatik. Kiniddawko a denggen koma ni Jehova dagiti kararagko ket tulongannak a mamati nga ipangpangagna dagita. Nabang-aranak idi impanamnama ni baketko a saan a nasken a dakkel ti balay tapno agbalin a naragsak. Iti kasta, in-inut a rimmang-ayak iti naespirituan.

NO KASANO A NAGUNGGONAANAK: Napaneknekak a pudno dagiti sasao ni Jesus a nailanad iti Mateo 6:33. Kinunana: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” Pulos a saankami pay a nagkurang iti “sabali pay a bambanag” a tinukoy ni Jesus, dagiti kangrunaan a kasapulan iti biag. Nupay ita ket agarup 3 a porsiento laeng ti sapulko no idilig iti mategteggedak idi makilumlumbaak pay, saan a nagkurang ti pamiliak iti aniaman a banag iti napalabas a 20 a tawen.

Kangrunaanna, ita laeng a mariknak ti ragsak ken pannakapnek bayat ti panangasaba ken pannakigimongko a kaduak dagiti kapammatiak. Nagpartak a lumabas dagiti aldaw. Nagdakkel met ti rimmang-ayan ti relasionko iti pamiliak. Nagbalin a matalek nga adipen ni Jehova dagiti tallo nga annakko a lallaki ken dagiti assawada.