Apay nga Adda Organisasion ti Dios?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Apay nga inorganisar ti Dios dagiti Israelita?

Inorganisar ti Dios dagiti kaputotan ni patriarka Abraham kas maysa a nasion ken inikkanna ida kadagiti linteg. “Israel” ti inyawagna iti dayta a nasion. Imbilinna a salimetmetanda ti pudno a panagdayaw ken ti Saona, ti Nasantuan a Kasuratan. (Salmo 147:19, 20) Nagunggonaan met iti dayta ti tattao iti amin a nasion.​—Basaem ti Genesis 22:18.

Dagiti Israelita ti pinili ti Dios nga agbalin a saksina. Pagimbaganda no agtulnogda kadagiti linteg ti Dios. (Deuteronomio 4:6) Ad-adu pay ti maammuantayo maipapan iti pudno a Dios no adalentayo ti pakasaritaan dagiti Israelita.​—Basaem ti Isaias 43:10, 12.

2. Apay a naorganisar dagiti pudno a Kristiano?

Idi agangay, napukaw ti nasion ti Israel ti anamong ti Dios, ket sinuktan dayta ni Jehova iti kongregasion Kristiano. (Mateo 21:43; 23:37, 38) Dagiti Israelita idi ti agserserbi kas saksi ti Dios. Ita, agserserbi met dagiti pudno a Kristiano kas saksi ni Jehova.​—Basaem ti Aramid 15:14, 17.

Inorganisar ni Jesus dagiti pasurotna tapno saksianda ni Jehova ken mangaramidda iti ad-adalan iti amin a nasion. (Mateo 10:7, 11; 24:14; 28:19, 20) Asidegen nga agpatingga dayta a trabaho. Ita pay laeng a napagkaykaysa ni Jehova ti minilion a tattao iti amin a nasion maipaay iti pudno a panagdaydayaw. (Apocalipsis 7:9, 10) Naorganisar met dagiti pudno a Kristiano tapno agpipinnaregta ken agtitinnulongda. Iti intero a lubong, agpapada ti ad-adalenda maipapan iti Biblia kadagiti gimongda.​—Basaem ti Hebreo 10:24, 25.

3. Kasano a nangrugi dagiti Saksi ni Jehova iti moderno a panawen?

Nangrugi ti moderno nga organisasion dagiti Saksi ni Jehova idi dekada 1870. Rinugian ti bassit a grupo dagiti estudiante ti Biblia a sukimaten manen dagiti kinapudno iti Biblia. Ammoda nga inorganisar ni Jesus ti kongregasion Kristiano para iti panangasaba. Isu nga ikaskasabada ti Pagarian iti amin a nasion. Idi 1931, inawatda ti nagan a Saksi ni Jehova.​—Basaem ti Aramid 1:8; 2:1, 4; 5:42.

4. Kasano a naorganisar dagiti Saksi ni Jehova iti kaaldawantayo?

Idi umuna a siglo, natulongan dagiti kongregasion Kristiano iti adu a daga babaen iti maysa a grupo wenno bagi a manarawidwid a nangbigbig ken Jesus kas Ulo ti kongregasion. (Aramid 16:4, 5) Kas met laeng ita, dagiti Saksi ni Jehova bigbigenda a ni Jesus ti Panguluenda. (Mateo 23:9, 10) Magunggonaanda met iti panangiturong ti Bagi a Manarawidwid a buklen dagiti aduan kapadasan a panglakayen a mangipapaay iti Nainkasuratan a pammaregta ken panangiwanwan iti nasurok a 100,000 a kongregasion. Iti tunggal kongregasion, adda dagiti kualipikado a lallaki nga agserserbi kas panglakayen, wenno manangaywan. Siaayat nga ay-aywanan dagitoy a lallaki ti arban ti Dios.​—Basaem ti 1 Pedro 5:2, 3.

Naorganisar dagiti Saksi ni Jehova a mangikasaba iti naimbag a damag ken mangaramid kadagiti adalan. Tapno matulonganda ti tattao iti amin a lugar, ipatarus, iyimprenta, ken iwarasda dagiti publikasion a makatulong iti panagadal iti Biblia iti nasurok a 500 a lenguahe. Kas kadagiti apostol, mangasabada iti binalaybalay. (Aramid 20:20) Agboluntarioda a mangyadal iti Biblia kadagiti napasnek nga agsapsapul iti kinapudno. Naipamaysada iti panangparagsak iti Dios ken iti itutulong iti sabsabali. Gapuna, naragsakda kas maysa nga organisasion.​—Basaem ti Salmo 33:12; Aramid 20:35.

Para iti kanayonan nga impormasion, kitaem ti kapitulo 19 daytoy a libro, Ania a Talaga ti Isursuro ti Biblia?, nga impablaak dagiti Saksi ni Jehova.