Agsursuroka iti Sao ti Dios
Anianto ti Mapasamak Kadagiti Relihion?
Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.
1. Naimbag kadi amin a relihion?
Iti adu a relihion, adda dagiti napasnek nga indibidual a mayat a mangparagsak iti Dios. Makitkita ti Dios dagitoy a tattao ken maseknan kadakuada. Ngem nakalkaldaang ta adda dagiti tattao a dakes ti nangaramatanda iti relihion. Iti napalabas, dagiti lider ti relihion pinarparigatda dagiti kalabanda. (2 Corinto 4:3, 4; 11:13-15) Iti agdama, sigun kadagiti damag, adda dagiti lider ti relihion a nangisungsong iti terorismo wenno nangsuporta iti gubat, wenno nangabusoda kadagiti ubbing.—Basaem ti Mateo 24:3-5, 11, 12.
Kuna ti Biblia nga adda dua a kita ti relihion—ti pudno ken ti ulbod. Saan nga isursuro ti ulbod a relihion ti kinapudno maipapan iti Dios. Nupay kasta, kayat ni Jehova a Dios a maammuan dagiti tattao ti kinapudno maipapan kenkuana.—Basaem ti 1 Timoteo 2:3-5.
2. Anianto ti mapasamak kadagiti relihion?
Saan a kayat ti Dios a maallilaw dagiti tattao gapu kadagiti relihion nga agkunkuna a mangay-ayat iti Dios ngem saanda met nga isursuro ti kinapudno maipapan kenkuana. Kinapudnona, kaykayat dagiti miembro dagitoy a relihion ti makigayyem iti lubong a konkontrolen ni Satanas a Diablo. (Santiago 4:4; 1 Juan 5:19) Iti Sao ti Dios, nayarig iti balangkantis (prostitute) dagiti relihion a mangsupsuportar iti gobierno ti tao, imbes nga iti Dios. Awagan ti Biblia daytoy a balangkantis kas “Babilonia a Dakkel,” ti nagan ti nagkauna a siudad a nangrugian ti ulbod a relihion kalpasan ti Layus idi kaaldawan ni Noe. Din agbayag, kellaatto a dadaelen ti Dios ti relihion a mangal-allilaw ken mangirurrurumen kadagiti tattao.—Basaem ti Apocalipsis 17:1, 2, 5, 17; 18:8, 23, 24.
3. Kasanonto nga iyeg ti Dios ti kinaragsak iti amin a tattao iti intero a daga?
Nagsayaat a maammuan nga asidegen ti pannakaukom ti ulbod a relihion. Mangyegto dayta iti pannakabang-ar ti amin a tattao. Saanton a maallilaw ken mabingaybingay ti sangatauan gapu kadagiti ulbod a relihion. Amin a sibibiag a tattao agkaykaysadanto nga agdaydayaw iti kakaisuna a pudno a Dios.—Basaem ti Isaias 11:9; Apocalipsis 18:20, 21; 21:3, 4.
4. Ania ti masapul nga aramiden dagiti napasnek a tattao?
Napateg ken Jehova dagiti napasnek a tattao nga adda kadagiti ulbod a relihion iti intero a lubong. Um-ummongenna ita dagita a tattao babaen ti panangisurona kadakuada iti kinapudno.—Basaem ti Mikias 4:2, 5.
Awaten ni Jehova iti pamiliana ti asinoman a mayat nga agserbi kenkuana. Nupay saan a maragsakan ti gagayyem ken kakabagiantayo no mangrugitayo nga agserbi ken Jehova, adu ti bendision nga agur-uray. Maaddaantayo iti nasinged a relasion iti Dios, agbalintayo a kameng ti naayat a “pamilia,” ken maaddaantayo iti namnama nga agbiag nga agnanayon.—Basaem ti Marcos 10:29, 30; 2 Corinto 6:17, 18.
Para iti kanayonan nga impormasion, kitaem ti kapitulo 15 ken 16 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.
[Picture Credit Line iti panid 16]
The Complete Encyclopedia of Illustration/J. G. Heck